Futbol üzrə Meksika yığma komandasının və İtaliyanın “Milan” klubunun mərkəz hücumçusu Santyaqo Ximenes yenə uzun müddətə sıradan çıxıb.

Arena.az bu barədə İtaliya klubunun mətbuat xidmətinə istinadən xəbər verir.

Ximenes DÇ-2026-nın 1/8 final mərhələsində İngiltərə yığmasına qarşı oyunda zədələnib və meydanı xərəkdə tərk etməli olub. Vurğulanır ki, əzələ bağlarının ikinci dərəcəli gərilməsi ilə üzləşmiş Ximenes 2 ay müddətinə yaşıl meydanlardan kənarda qalmalı olacaq.

Xatırladaq ki, Argentinada dünyaya göz açmış Santyaqo Ximenes Meksikanın “Krus Asul” klubunun yetirməsidir. 2022-2025-ci illər aralığında Niderlandda “Feyenoord”un uğurları üçün çalışmış hücumçu “Milan”a 2025-ci ilin fevralında 30,2 milyon avro müqabilində keçib. Onun İtaliya klubu ilə 2029-cu ilin 30 iyununadək müqaviləsi var.

Ximenes “Milan”ın heyətində indiyə qədər 37 oyuna çıxıb, 7 qol və 6 məhsuldar ötürmə müəllifi olub.

Ximenes 2021-ci ilin oktyabr ayında debüt etdiyi Meksika yığmasında 51 oyuna çıxıb, 6 qol və 3 məhsuldar ötürmə müəllifi olub.

“Transfermarkt” internet-portalı 25 yaşlı hücumçunun transfer dəyərini 18 milyon avro məbləğində qiymətləndirir.

Rafael Markes dünya çempionatından (DÇ-2026) sonra Meksika millisindən ayrılmış Xavyer Aqirrenin əvəzində bu komandaya baş məşqçi təyin edilib.

Arena.az xəbər verir ki, bu barədə Meksika Futbol Federasiyasının mətbuat xidməti məlumat yayıb.

47 yaşlı mütəxəssislə 2030-cu ilə qədər nəzərdə tutulmuş müqavilə imzalanıb. O, DÇ-2026-da komandanın 1/8 finalda mübarizəni dayandırmasından sonra vəzifəsindən ayrılmış Xavyer Aqirreni əvəzləyib.

Rafael Markes futbolçu karyerası ərzində “Atlas”, “Monako”, “Barselona”, “Nyu-York Red Bulls” və “Verona” klublarının formasını geyinib. O, 1997–2018-ci illər aralığında çıxış etdiyi Meksika millisində 148 oyuna çıxıb, 17 qol vurub, 7 assistlə yadda qalıb. O, həmçinin beş dünya çempionatında iştirak edib.

Xatırladaq ki, “Barselona”nın sabiq müdafiəçisi peşəkar karyerasını bitirdikdən sonra Kataloniya klubunun əvəzedici komandasına rəhbərlik edib. O, 2024-cü ildən Meksika yığmasında baş məşqçinin köməkçisi kimi fəaliyyət göstərirdi.

Qeyd edək ki, Meksika millisi DÇ-2026-da 1/8 finala qədər irəliləmiş, bu mərhələdə İngiltərəyə 2:3 hesabı ilə uduzaraq turnirlə vidalaşmışdı.