Norveçin “Bodo Qlimt” klubu, eləcə də bu komandanın hücumçusu Yens Petter Hauqe UEFA Çempionlar Liqasında (ÇL) rekorda imza atıb.

Arena.az xəbər verir ki, Norveç təmsilçisi ÇL-in pley-off mərhələsinin ötən gecə baş tutmuş cavab matçında İtaliya “İnter”ini 2:1 hesabı ilə məğlub edərək (ilk oyun – 3:1) XXI əsrdə unikal nailiyyət əldə edib.

Skandinaviya klubu Avropanın “Top-5” liqalarını təmsil edən rəqiblərinə qarşı ardıcıl 4 qələbə qazanmış ilk komanda olub. Norveçlilər “İnter”dən əvvəl “Mançester Siti”ni (3:1) və Madrid “Atletiko”sunu (2:1) üstələyiblər. Sonuncu dəfə belə nəticəni 1971/1972-ci illər mövsümündə Niderlandın “Ayaks” komandası göstərmişdi.

Norveç klubunun hücumçusu Yens Petter Hauqe isə UEFA Çempionlar Liqasında norveçli futbolçular arasında yeni rekord müəyyənləşdirib. O, cari mövsümdə turnirdə 6 qol vurub.

Bu, Norveç klubunun heyətində bir mövsümdə vurulan ən çox qol kimi tarixə düşüb. “Tottenhem” (İngiltərə) və “İnter”in (İtaliya) qapısına 2 dəfə yol tapan futbolçu “Borussiya” (Dortmund, Almaniya) və “Mançester Siti” ilə oyunlarda (İngiltərə) 1 dəfə fərqlənib.

Xatırladaq ki, “Bodo Qlimt” UEFA Çempionlar Liqasının pley-off mərhələsində “İnter”i iki oyunun nəticəsinə (3:1, 2:1) görə mübarizədən kənarlaşdıraraq 1/8 finala vəsiqə qazanıb. Norveç təmsilçisi növbəti mərhələdə “Mançester Siti” – “Sportinq” cütünün qalibi ilə qarşılaşacaq.