İspaniyanın “Atletiko” (Madrid) klubu təcrübəli yarımmüdafiəçisi, komandanın kapitanı Koke ilə müqavilənin müddətini uzadıb.

Arena.az bu barədə La Liqa təmsilçisinin rəsmi saytına istinadən xəbər verir.

34 yaşlı futbolçunun yeni sözləşməsi 2027-ci ilin yayına – iyun ayının 30-na qədər nəzərdə tutulub. Tərəflər arasındakı əvvəlki müqavilənin müddəti bu yay bitirdi.

Xatırladaq ki, Koke “Atletiko”nun öz yetirməsidir. O, 2008/2009 mövsümündə bu klubun gənclər komandasında debüt edib, 2010/2011 mövsümündə isə əsas komandaya cəlb edilib. Futbolçu bütün karyerasını yalnız Madrid “Atletiko”suna həsr edib.

Ümumilikdə o, “döşəkçilər”in heyətində 740 oyun keçirib ki, bu da klub tarixində rekord göstəricidir. Yarımmüdafiəçi bu oyunlarda 50 qol vurub, 122 məhsuldar ötürmə verib. Geridə qalmış 2024/2025-ci illər mövsümündə ispan futbolçu 56 oyuna 2 qol və 3 məhsuldar ötürmə ilə yadda qalıb.

Koke “Atletiko” ilə 8 qənimət qazanıb: 2 İspaniya La Liqası (2013/2014, 2020/2021), İspaniya Kral Kuboku (2012/2013), İspaniya Super Kuboku (2013/2014), 2 Avropa Liqası (2011/2012, 2017/2018), 2 UEFA Super Kuboku (2011/2012, 2017/2018).

Yarımmüdafiəçi 2013-cü ilin avqustunda debüt etdyi İspaniya yığma komandasının heyətində 70 oyun keçirib. O, bu görüşlərdə 8 məhsuldar ötürmə verib. İspan yarımmüdafiəçi “qırmızı qəzəb”in U-21 yığması ilə 2013-cü il Avropa çempionatının qalibi olub.

“Transfermarkt” internet portalı 34 yaşlı Kokeni 5 milyon avro məbləğində qiymətləndirir. Kokenin klubla yeni müqavilə bağlaması futbolçunun bu gedişlə karyerasını elə Madrid təmsilçisində bitirməsi ehtimalını artırıb.

Futbol üzrə İspaniya millisinin və Almaniyanın “Bayer” klubunun müdafiəçisi Alexandro Qrimaldo karyerasını Madrid “Atletiko”sunda davam etdirəcək.

Arena.az xəbər verir ki, bu barədə paytaxt klubu rəsmi saytı vasitəsilə məlumat yayıb.

30 yaşlı futbolçu ilə 4 illik (2030-cu il iyunun 30-na qədər) müqavilə imzalanıb. “Atletiko” bu keçidə görə “Bayer”ə 20 milyon avro ödəyib.

Alexandro Qrimaldo “Barselona”nın məzunudur. Karyerası ərzində “Benfika”da oynamış Qrimaldo “Bayer”ə 2023-cü ilin iyul ayında Lissabon klubundan azad agent qismində keçmişdi. İspan futbolçunun “əczaçılar”la müqaviləsinin müddəti 2027-ci ilin iyun ayının sonuna qədər idi.

Qrimaldonun “əczaçılar”ın heyətindəki çıxışının ümumi mənzərəsi 145 oyun, 30 qol və 45 məhsuldar ötürmədən ibarətdir.

Qrimaldo “Bayer”lə Almaniya Bundesliqasının, Almaniya Kubokunun və Almaniya Super Kubokunun qalibi olub.

Alexandro Qrimaldo 2023-cü ilin noyabr ayında debüt etdiyi İspaniya yığmasının heyətində 14 oyun keçirib, 2 məhsuldar ötürmə verib. Qrimaldo “qırmızı qəzəb”lə 2024-cü il Avropa Çempionatının qalibi olub.

“Transfermarkt” internet-portalı 30 yaşlı ispan sol cinah müdafiəçisinin transfer dəyərini 20 milyon avro məbləğində qiymətləndirir.