Macarıstanın “Zalaegerseq” (ZTE) klubunun mərkəz müdafiəçisi Bense Varkonyi bundan sonra “Qarabağ”ın uğurları üçün çalışacaq.

Arena.az bu barədə Ağdam klubunun rəsmi saytına istinadən xəbər verir.

Xəbərdə vurğulanır ki, 2026/2027-ci illər mövsümünün transfer çalışmalarını davam etdirən klub növbəti futbolçu keçidini gerçəkləşdirib. Macarıstan klubu ilə danışıqlar uğurla yekunlaşıb və Bense Varkonyi “Qarabağ”a transfer olunub.

Macarıstanlı mərkəz müdafiəçisi ilə 3 illik müqavilə imzalanıb. 24 yaşlı futbolçu 2029-cu ilin yayına qədər bu komandanın formasını geyinəcək. Varkonyi yeni klubunda 4 nömrəli formanı seçib.

MTK (Budapeşt) klubunun yetirməsi olan Bense karyerası ərzində bu klubun əsas komandası, həmçinin “Kozarmisleni”də də çıxış edib. O, Macarıstanın U-21 komandasında forma geyinib.

Varkonyi bu yay transfer pəncərəsində “Qarabağ”ın altıncı transferidir. Daha əvvəl Jali Muaddib, Zəkəriyyə Savo, Samuel Lobato, Bruno Lanqa, Martin Zlomisliç və Renaldo Sefas da “Qarabağ”a qoşulmuşdular.