Argentina millisi dünya çempionatının (DÇ-2026) yarımfinalında İngiltərə yığması ilə keçirəcəyi oyun öncəsi FIFA-ya xüsusi müraciət ünvanlayıb.

Arena.az bu barədə məşhur jurnalist Qaston Edulun məlumatına əsasən xəbər verir.

İddia olunur ki, Argentina Futbol Federasiyası komandanın İngiltərə yığmasına qarşı səfər formasında meydana çıxmasına icazə verilməsini istəyib. Bu məsələ ilə bağlı yekun qərarın iyulun 14-də veriləcəyi gözlənilir.

Xatırladaq ki, Argentina millisi mundialın 1/4 final mərhələsində əlavə vaxtda İsveçrəni 3:1 hesabı ilə məğlub edərək yarımfinala yüksəlib. Lionel Skaloninin komandası bundan əvvəl isə Misir və Kabo Verde yığmalarını eyni – 3:2 hesabı ilə üstələmişdi.

İyulun 15-də keçiriləcək Argentina – İngiltərə qarşılaşmasının qalibi finalda Fransa – İspaniya cütünün qalibi ilə üz-üzə gələcək.

DÇ-2026-ya iyulun 19-da yekun vurulacaq.

Canni Infantino dünya çempionatının iştirakçılarının sayının gələcəkdə 64 komandaya çatdırılması ehtimalını istisna etmədiyini açıqlayıb.

Arena.az xəbər verir ki, FİFA prezidenti bu barədə jurnalistlərə açıqlamasında bildirib .

Onun sözlərinə görə, bu məsələ DÇ-2026 başa çatdıqdan sonra müzakirəyə çıxarıla bilər:

“Bu məsələni hazırkı dünya çempionatı başa çatdıqdan sonra mütləq nəzərdən keçirmək lazımdır. Dünya çempionatında iştirak etmək arzusu təkcə Avropa və Cənubi Amerika komandaları üçün deyil, bütün dünya üçün əlçatan olmalıdır”, – deyə İnfantino bildirib.

O, həmçinin 2026-cı il dünya çempionatında iştirakçı komandaların sayının 48-ə çatdırılmasını böyük uğur kimi qiymətləndirib.

Qeyd edək ki, ABŞ, Kanada və Meksikanın birgə ev sahibliyi etdiyi DÇ-2026 tarixdə ilk dəfə 48 milli komandanın iştirakı ilə keçirilir. Turnir iyulun 19-da başa çatacaq.

FIFA Fondu Venesuelada baş vermiş dağıdıcı zəlzələdən zərərçəkənlərə yardım məqsədilə 1 milyon ABŞ dolları yardım ayıracaq.

Arena.az xəbər verir ki, bu barədə FIFA prezidenti Canni İnfantino məlumat verib.

O, dünya futbol ictimaiyyətinin Venesuela xalqının yanında olduğunu bildirib:

“Venesuela xalqı bu son dərəcə ağır dövrdə dünya futbol ailəsinin tam dəstəyini hiss edir. Futbol xüsusilə böhran anlarında insanları birləşdirmək və onlara ümid vermək kimi unikal gücə malikdir”.

Xatırladaq ki, iyunun 24-də Venesuelada təxminən 40 saniyə fərqlə baş vermiş iki güclü yeraltı təkan böyük dağıntılara səbəb olub.

İyulun 9-na olan məlumata görə, təbii fəlakət nəticəsində 3889 nəfər həyatını itirib, 16 740 nəfər xəsarət alıb. Bundan başqa, 17 907 nəfər evsiz qalıb, 190 bina tamamilə dağılıb, 856 tikiliyə ciddi ziyan dəyib. Axtarış-xilasetmə əməliyyatları zamanı 6462 nəfər xilas edilib.