Futbol üzrə Xorvatiya millisinin keçmiş dayaq yarımmüdafiəçisi Marselo Brozoviç Səudiyyə Ərəbistanının “Əl-Nəsr” klubundan ayrılıb.

Arena.az xəbər verir ki, bu barədə Ər-Riyad təmsilçisinin mətbuat xidməti məlumat yayıb.

33 yaşlı futbolçu ilə yeni müqavilə bağlamağa ehtiyac duyulmayıb. Klub ona xidmətləri üçün təşəkkür edib, gələcək karyerasında uğurlar arzulayıb.

Yarımmüdafiəçi “Əl-Nəsr”də keçirdiyi 3 mövsümdə 124 oyuna çıxıb, 8 qol vurub, 23 məhsuldar ötürmə edib və ölkə çempionu olub.

Brozoviç 2023-cü ilin iyul ayından “Əl-Nəsr”də çıxış edirdi. Səudiyyə Ərəbistanı klubu həmin vaxt onu Milan “İnter”indən 18 milyon avro müqabilində heyətinə qatmışdı.

Marselo Brozoviç daha öncə ölkəsində “Dinamo” (Zaqreb), “Lokomotiva” və “Hrvatski Draqovolyaç” klublarında da forma geyinib. Onun karyerasının böyük hissəsi “İnter”də keçib. Marselo 2015-ci ildən “Əl-Nəsr”ə keçənə qədər bu komandanın heyətində 300-dən çox oyun keçirib, xeyli titul qazanıb. Ümumilikdə Brozoviçin 8 illik “İnter” karyerası belədir: 330 oyun, 31 qol, 43 məhsuldar ötürmə. Yarımmüdafiəçi Milan klubu ilə 5 kubok qazanıb: 1 skudetto, 2 İtaliya Kuboku, 2 İtaliya Super Kuboku.

Brozoviçin titulları arasında vaxtilə Zaqreb “Dinamo”su ilə 3 Xorvatiya çempionluğu və 1 Xorvatiya Super Kuboku da var.

Marselo 2014-cü ilin iyun ayında debüt etdiyi Xorvatiya yığma komandasında meydana çıxdığı 99 oyunda 7 qol vurub, 7 məhsuldar ötürmə müəllifi olub. O, milli ilə dünya çempionatının gümüş (2018) və bürünc (2022) medalçısı olub, həmçinin AÇ-2024-də də iştirak edib.

Seneqal milli komandasının tarixində ən çox qol vurmuş futbolçu olan Sadio Mane yığmadakı karyerasını başa vurduğunu açıqlayıb.

Arena.az xəbər verir ki, bu barədə Seneqal mətbuatı məlumat yayıb.

34 yaşlı hücumçu millidən ayrılarkən azarkeşlərə emosional vida mesajı ünvanlayıb:

“Bilin ki, bu bayraq naminə hər şeyimi qurban vermişəm. Bütün gücümü ortaya qoymuşam və hər zaman ölkəmiz uğrunda sonadək mübarizə aparmışam”, – deyə Mane bildirib.

Sadio Mane Seneqal millisinin heyətində 130 oyuna çıxıb, 54 qola imza ataraq komandanın tarixinin ən yaxşı bombardiri olub.

O, milli ilə birlikdə 2021-ci ildə Afrika Millətlər Kubokunun qalibi olub, həmçinin 2019 və 2026-cı illərdə turnirin gümüş medallarını qazanıb.

Mane 2023-cü ildən Səudiyyə Ərəbistanının “Əl-Nəsr” klubunda çıxış edir və 2026-cı ildə bu komandanın heyətində ölkə çempionu olub.

Təcrübəli hücumçu karyerası ərzində “Mets”, “Zalsburq”, “Sauthempton”, “Liverpul” və “Bayern”in də formasını geyinib. O, “Liverpul”un heyətində İngiltərə Premyer Liqasının, İngiltərə Kubokunun, Liqa Kubokunun, UEFA Çempionlar Liqasının və UEFA Super Kubokunun qalibi olub. Hücumçu “Bayern”lə isə Almaniya Bundesliqasını və Almaniya Super Kubokunu qazanıb.