Seneqal Futbol Federasiyası (FSF) milli komandanın baş məşqçisi Pape Tiav ilə yolların ayrılması proseduruna başlanıldığını rəsmən açıqlayıb.

Arena.az xəbər verir ki, qərar Seneqal yığmasının DÇ-2026-nın 1/16 final mərhələsində Belçikaya məğlub olaraq turnirlə vidalaşmasından sonra qəbul edilib.

Federasiyanın bəyanatında deyilir:

“İyulun 11-də milli komandanın baş məşqçisi Pap Tiav və onun bütün məşqçilər korpusu ilə əməkdaşlığa xitam verilməsi proseduruna başlanılması barədə qərar qəbul olunub. Komandanın idman nəticələri və gələcək perspektivləri hərtərəfli qiymətləndirildikdən sonra İcraiyyə Komitəsi Seneqal futbolunun maraqları naminə bu addımın atılmasını zəruri hesab edib”.

45 yaşlı mütəxəssis 2024-cü ildən milliyə rəhbərlik edirdi. Onun rəhbərliyi altında komanda 2026-cı ildə Afrika Millətlər Kubokunun qalibi olsa da, daha sonra final görüşündə Mərakeşlə oyundan sonra baş məşqçi və futbolçuların davranışına görə Afrika Futbol Konfederasiyası (CAF) Seneqal yığmasına texniki məğlubiyyət vermişdi.

Pap Tiav futbolçu karyerası ərzində də millinin formasını geyinib və 2002-ci ildə Afrika Millətlər Kubokunun gümüş medalını qazanıb.

Seneqal milli komandasının tarixində ən çox qol vurmuş futbolçu olan Sadio Mane yığmadakı karyerasını başa vurduğunu açıqlayıb.

Arena.az xəbər verir ki, bu barədə Seneqal mətbuatı məlumat yayıb.

34 yaşlı hücumçu millidən ayrılarkən azarkeşlərə emosional vida mesajı ünvanlayıb:

“Bilin ki, bu bayraq naminə hər şeyimi qurban vermişəm. Bütün gücümü ortaya qoymuşam və hər zaman ölkəmiz uğrunda sonadək mübarizə aparmışam”, – deyə Mane bildirib.

Sadio Mane Seneqal millisinin heyətində 130 oyuna çıxıb, 54 qola imza ataraq komandanın tarixinin ən yaxşı bombardiri olub.

O, milli ilə birlikdə 2021-ci ildə Afrika Millətlər Kubokunun qalibi olub, həmçinin 2019 və 2026-cı illərdə turnirin gümüş medallarını qazanıb.

Mane 2023-cü ildən Səudiyyə Ərəbistanının “Əl-Nəsr” klubunda çıxış edir və 2026-cı ildə bu komandanın heyətində ölkə çempionu olub.

Təcrübəli hücumçu karyerası ərzində “Mets”, “Zalsburq”, “Sauthempton”, “Liverpul” və “Bayern”in də formasını geyinib. O, “Liverpul”un heyətində İngiltərə Premyer Liqasının, İngiltərə Kubokunun, Liqa Kubokunun, UEFA Çempionlar Liqasının və UEFA Super Kubokunun qalibi olub. Hücumçu “Bayern”lə isə Almaniya Bundesliqasını və Almaniya Super Kubokunu qazanıb.