FIFA Belçika Futbol Assosiasiyasının amerikalı hücumçu Folarin Baloqunun qırmızı vərəqəsinin ləğvi ilə bağlı verdiyi apellyasiyanı qəbul etməyib.

Arena.az bu barədə FIFA-nın yaydığı rəsmi açıqlamaya istinadən xəbər verir.

Müraciət qəbuledilməz hesab olunub. Qurum bunu Belçika Futbol Assosiasiyasının həmin intizam işi üzrə hüquqi tərəf hesab edilməməsi ilə əsaslandırıb:

“Müraciət ona görə qəbuledilməz sayılıb ki, Belçika Kral Futbol Assosiasiyası bu prosesin tərəfi deyil və buna görə də sözügedən qərardan şikayət vermək hüququna malik deyil”, – deyə rəsmi bəyanatda bildirilib.

Beləliklə, Baloqun dünya çempionatının 1/8 final mərhələsində Belçikaya qarşı keçiriləcək oyunda iştirak edə biləcək.

Xatırladaq ki, ABŞ millisinin hücumçusu Bosniya və Herseqovina ilə 1/16 final görüşündə müdafiəçi Tarik Muharemoviçə qarşı kobud oyuna görə birbaşa qırmızı vərəqə almışdı. Lakin FİFA-nın İntizam Komitəsi sonradan cəzanın icrasını bir il sınaq müddəti ilə təxirə salaraq futbolçunun növbəti oyunda çıxış etməsinə icazə verib.

Bu qərar futbol ictimaiyyətində geniş müzakirələrə səbəb olub. Daha əvvəl jurnalist Ben Ceykobs FİFA rəhbəri Canni İnfantinoya Ağ Evdən zəng edildiyini iddia etmişdi. ABŞ Prezidenti Donald Tramp isə İnfantinoya zəng etdiyini və yalnız qərara yenidən baxılmasını xahiş etdiyini təsdiqləyib.

Belçika Futbol Assosiasiyası qərardan narazı qalaraq FİFA-ya apellyasiya müraciəti edib. Lakin qurum həmin müraciəti hüquqi əsas olmadığı üçün baxılmamış saxlayıb.

RBFA Baloqun işi ilə bağlı mübarizəni dayandırmayacaq

Belçika Kral Futbol Assosiasiyası ABŞ millisinin hücumçusu Folarin Baloqunun DÇ-2026-nın 1/8 finalında iştirak etməsinin qarşısını almaq üçün hüquqi mübarizəni davam etdirəcəyini açıqlayıb. RBFA bəyan edib ki, Baloqun ABŞ millisinin matç heyətinə daxil ediləcəyi təqdirdə onun oynamaq hüququna rəsmi etiraz edəcək:

“RBFA ABŞ Futbol Federasiyasını məlumatlandırıb ki, əgər futbolçu matçın iştirak ərizəsinə salınarsa, onun oynamaq hüququna etiraz ediləcək. Bu isə sonrakı bütün hüquqi addımlar üçün imkanları açıq saxlayır”, – deyə assosiasiyanın bəyanatında bildirilir.

Kanadanın Toronto şəhərində FIFA-nı tənqid edən plakat qaldırmış azarkeş polis tərəfindən saxlanılıb və cərimələnib.

Arena.az xəbər verir ki, 64 yaşlı Yan Maraseviç şəhərin sərgi kompleksi yaxınlığında üzərində “FIFA = Tamahkarlıq” yazılmış əl istehsalı plakatla etiraz aksiyası keçirib.

Bir müddət sonra polis əməkdaşları ona yaxınlaşaraq plakatı yığışdırmağı tələb ediblər. Daha sonra isə azarkeş sərgi kompleksinin ərazisinə qanunsuz daxil olmaq ittihamı ilə saxlanılıb. Polis bölməsində ona 65 ABŞ dolları məbləğində cərimə yazıldıqdan sonra sərbəst buraxılıb.

Kanada millisinin azarkeşi olan Maraseviç etirazının əsas səbəbinin dünya çempionatının biletlərinin həddindən artıq baha olması olduğunu bildirib.

Onun sözlərinə görə, 2022-ci ildə Qətərdə keçirilmiş dünya çempionatında matçlara biletləri təxminən 50 dollara aldığı halda, builki mundialda ən ucuz bilet Qana – Panama (1:1) oyunu üçün 195 dollar olub.

Maraseviç əlavə edib ki, Kanada millisinin Bosniya və Herseqovina ilə (1:1) keçirdiyi ilk oyunun biletləri 1300 dollardan başlayır, ən bahalı biletlərin qiyməti isə 3035 dollara çatırdı.

“Futbolu yüz ildən çoxdur bütün dünya sevir və bu oyun həmişə hər kəs üçün əlçatan olub. İndi isə stadiona yalnız pulu olanlar gedə bilir”, – deyə azarkeş bildirib.

Qeyd edək ki, ABŞ, Kanada və Meksikanın birgə ev sahibliyi etdiyi 2026-cı il dünya çempionatı iyulun 19-da başa çatacaq. Turnirin Kanadadakı oyunları Toronto və Vankuver şəhərlərində keçirilib.

Fransa Futbol Federasiyası (FFF) dünya çempionatının 1/8 finalında Maykl Oliseyə göstərilən sarı vərəqənin ləğvi üçün FİFA-ya müraciət edib.

Arena.az xəbər verir ki, 24 yaşlı hücumçu Paraqvaya qarşı 1:0 hesabı ilə başa çatmış oyunun sonlarında rəqib futbolçu Matias Qalarsa ilə yaşadığı mübahisəyə görə xəbərdarlıq almışdı.

Fransa tərəfi hesab edir ki, videoyazılar Olisenin rəqibə toxunmadığını açıq şəkildə göstərir. Kadrlarda fransalı futbolçunun sadəcə barmağını dodaqlarına apararaq rəqibini susmağa çağırdığı, bundan dərhal sonra isə Qalarsanın üzünə zərbə almış kimi özünü yerə atdığı görünür.

FFF məhz bu görüntülərə əsaslanaraq sarı vərəqənin ləğv edilməsini tələb edir.

Əgər FİFA müraciəti rədd etsə və Olise 1/4 finalda Mərakeşə qarşı keçiriləcək görüşdə daha bir sarı vərəqə alsa, avtomatik cəza səbəbindən yarımfinal oyununu buraxmalı olacaq.

Qeyd edək ki, Fransa – Mərakeş arasında 1/4 final qarşılaşması iyulun 9-da keçiriləcək.

Maykl Olise 2024-cü ilin yayından Almaniyanın “Bayern” klubunun formasını geyinir. O, Münhen təmsilçisi ilə iki dəfə Bundesliqanın, bir dəfə isə Almaniya Kuboku və Super Kubokunun qalibi olub.

FİFA-nın ABŞ milli komandasının hücumçusu Folarin Baloqun ilə bağlı qərarı dünya çempionatında ciddi müzakirələrə səbəb olub.

Arena.az xəbər verir ki, FİFA-nın İntizam Komitəsi Baloqunun 1/16 finalda Bosniya və Herseqovinaya qarşı oyunda aldığı qırmızı vərəqə səbəbilə qüvvədə olan bir oyunluq diskvalifikasiyanı dayandırıb və ona Belçikaya qarşı 1/8 final matçında oynamaq imkanı verib.

ABŞ millisinin baş məşqçisi Maurisio Poçettino bu qərarı ədalətli hesab etdiyini bildirib:

“Biz artıq bosniyalılara qarşı oyunda 30 dəqiqə azlıqda oynamaqla kifayət qədər cəzalandırılmışdıq. Bu, mənim ABŞ millisinin baş məşqçisi olmağımla bağlı deyil. Düşünürəm ki, insanların 99,9 faizi bunun ədalətsiz qırmızı vərəqə olduğunu qəbul edər”, – deyə argentinalı mütəxəssis vurğulayıb.

Belçika tərəfi etiraz edir

Belçika millisinin baş məşqçisi Rudi Qarsiya isə FİFA-nın qərarını sərt tənqid edib:

“Mən bilmirdim ki, dünya çempionatında və FİFA-da 5 iyul əslində 1 aprel imiş. Biz hansısa federasiyanı deyil, futbolu və oyunun ədalətini müdafiə edirik”, – deyə Qarsiya bildirib.

Belçika Futbol Assosiasiyası da qərardan rəsmi şəkildə apellyasiya verəcəyini açıqlayıb. Məlumata görə, qurum FİFA-ya müraciət edərək diskvalifikasiyanın ləğvinə yenidən baxılmasını tələb edib.

Siyasi müstəviyə daşınan mübahisə

Məsələ artıq siyasi səviyyədə də müzakirə olunur. Belçikanın xarici işlər naziri Maksim Prevo qərarın çoxlu suallar doğurduğunu bildirib:

“Keçmiş futbol hakimi kimi mən həmişə qaydalara əməl olunmasının və qərarların ədalətli verilməsinin tərəfdarı olmuşam. Bu qərar ciddi suallar yaradır”, – deyə nazir qeyd edib.

O əlavə edib ki, əgər cəzanın ləğvinə həqiqətən telefon zəngi səbəb olubsa, bu, idmanın əsas prinsiplərinə zərbə vurur və FİFA-nın ədalətli oyunu təmin etmək qabiliyyətini şübhə altına alır.

Trampın müdaxilə iddiası

“Reuters”in yaydığı məlumata görə, ABŞ Prezidenti Donald Tramp ötən həftə FİFA prezidenti Canni İnfantinoya zəng edərək Baloqunun diskvalifikasiyasının ləğvini xahiş edib. Qərardan sonra Tramp sosial şəbəkədə FİFA-ya təşəkkür edərək federasiyanın “doğru addım atdığını və böyük ədalətsizliyi aradan qaldırdığını” yazıb.

Mübahisənin mərkəzində nə dayanır?

Folarin Baloqun Bosniya və Herseqovinaya qarşı oyunda müdafiəçi Tarik Muharemoviçə arxadan kobud müdaxilə etdiyinə görə birbaşa qırmızı vərəqə almışdı. Qaydalara əsasən, o, növbəti oyunu buraxmalı idi. Amma FİFA-nın İntizam Komitəsi Baloqunun bir oyunluq diskvalifikasiyasını bir illik sınaq müddəti ilə şərti cəzaya çevirib. Bu qərar sayəsində ABŞ millisinin bombardiri Belçikaya qarşı 1/8 final oyununda iştirak edə biləcək. ABŞ tərəfi bunu ədalətin bərpası kimi qiymətləndirir, Belçika isə qərarın dünya çempionatının reqlamentinə zidd olduğunu və oyunun dürüstlüyünə kölgə saldığını iddia edir.

ABŞ – Belçika qarşılaşmasının qalibi 1/4 finalda İspaniya – Portuqaliya duelinin qalibi ilə üz-üzə gələcək.

ABŞ, Kanada və Meksikanın birgə ev sahibliyi etdiyi dünya çempionatı iyulun 19-da başa çatacaq.

ABŞ millisinin hücumçusu Folarin Baloqun FİFA-nın qərarı ilə dünya çempionatının 1/8 finalında Belçikya qarşı matçda oynaya biləcək.

Arena.az xəbər verir ki, 25 yaşlı hücumçu 1/16 finalda Bosniya və Herseqovina üzərində 2:0 hesablı qələbə ilə başa çatmış görüşdə müdafiəçi Tarik Muharemoviçə arxadan kobud müdaxiləyə görə birbaşa qırmızı vərəqə almışdı. Turnirin qaydalarına əsasən, o, növbəti oyunu buraxmalı idi.

Lakin FİFA-nın İntizam Komitəsi İntizam Məcəlləsinin 27-ci maddəsinə əsaslanaraq futbolçunun bir oyunluq diskvalifikasiyasını bir il müddətinə şərti cəzaya çevirib. Bu o deməkdir ki, Baloqun Belçikaya qarşı matçda iştirak edə biləcək. Əgər o, sınaq müddəti ərzində oxşar xarakterli və ağırlıqda yeni intizam pozuntusuna yol versə, hazırkı cəza qüvvəyə minəcək və yeni sanksiyalar da buna əlavə olunacaq.

Folarin Baloqun 2026-cı il dünya çempionatında keçirdiyi 3 oyunda 3 qol vuraraq ABŞ millisinin turnirdə ən məhsuldar futbolçusudur. O, 2023-cü ilin yayından etibarən “Monako” klubunun formasını geyinir.

Tramp FİFA-ya təşəkkür etdi

ABŞ Prezidenti Donald Trump qərardan sonra sosial şəbəkədə paylaşım edərək FİFA-ya minnətdarlığını bildirib.

“Doğru addım atdığı və böyük ədalətsizliyi aradan qaldırdığı üçün FİFA-ya təşəkkür edirəm”, – deyə Tramp qeyd edib.

Bundan sonra jurnalist Ben Yakobs iddia edib ki, qərardan əvvəl Ağ Evdən FİFA prezidenti Canni Infantinoya zəng olunaraq Baloqunun qırmızı vərəqəsinin yenidən nəzərdən keçirilməsi xahiş edilib. Bununla belə, FİFA-dakı mənbələr qərarın yalnız müstəqil İntizam Komitəsi tərəfindən qəbul edildiyini və Ağ Evin prosesə təsir göstərməsinin mümkün olmadığını bildiriblər.

Belçika tərəfi narazıdır

Belçika Kral Futbol Assosiasiyası isə FİFA-nın qərarına etiraz edib. Qurumun açıqlamasında bildirilib ki, qərar dünya çempionatının reqlamentinə ziddir və qırmızı vərəqə alan futbolçunun avtomatik olaraq növbəti oyunu buraxmalı olduğu açıq şəkildə göstərilib.

Assosiasiya bütün iştirakçı komandaların hüquqlarını və ədalətli oyun prinsiplərini qorumaq məqsədilə qərardan şikayət verməyin mümkün variantlarını araşdırdığını açıqlayıb.

Maraqlıdır ki, 1970-ci ildən etibarən dünya çempionatlarında qırmızı vərəqə alan heç bir futbolçu növbəti oyunda meydana çıxmamışdı. Bu səbəbdən Baloqunla bağlı qərar mundial tarixində presedent kimi qiymətləndirilir. Bununla belə, şərti cəza tətbiq edilən və ya diskvalifikasiyası sonradan dəyişdirilən oxşar hallar olub.

2025-ci ilin noyabrında Portuqaliya millisinin ulduzu Kristiano Ronaldo dünya çempionatının seçmə mərhələsində kobud davranışa görə qırmızı vərəqə almışdı. O, seçmə mərhələnin növbəti oyununu buraxsa da, əlavə iki oyunluq diskvalifikasiya bir illik sınaq müddəti ilə şərti cəza ilə əvəzlənmişdi. Bu qərar sayəsində Ronaldo 2026-cı il dünya çempionatının ilk oyunlarında iştirak edə bilmişdi.

Daha əvvəl, 2007-ci ilin noyabrında isə Rusiya yığmasının hücumçusu Andrey Arşavin AÇ-2008-in seçmə mərhələsində qırmızı vərəqə alaraq üç oyunluq diskvalifikasiya cəzası almışdı. Lakin final mərhələsi başlamazdan əvvəl Rusiya Futbol İttifaqının müraciətindən sonra UEFA cəzanı 3 oyundan 2 oyuna endirmişdi.

ABŞ – Belçika görüşünün qalibi 1/4 finalda İspaniya – Portuqaliya cütünün qalibi ilə qarşılaşacaq.

FIFA dünya çempionatının (DÇ-2026) 1/16 finalında Argentina və Kabo Verde milliləri arasında keçirilən oyunun rəsmi protokolunda dəyişiklik edib.

Arena.az xəbər verir ki, bu barədə FIFA-nın mətbuat xidməti məlumat yayıb.

Qurum Argentinanın üçüncü qolunu əvvəlcə müdafiəçi Kristian Romeronun aktivinə yazsa da, sonradan epizodu Kabo Verde millisinin futbolçusu Borxes Dineyin avtoqolu kimi rəsmiləşdirib.

Bu qərar Lionel Messinin dünya çempionatları tarixi ilə bağlı daha bir rekordunun qeydə alınmasına mane olub. Belə ki, üçüncü qol Romeronun adına yazılsaydı, məhsuldar ötürmənin müəllifi olan Messi mundiallarda assistlərinin sayını 9-a çatdıraraq bu göstəricidə mütləq rekordçu olacaqdı.

Lakin qolun avtoqol kimi təsdiqlənməsindən sonra Messinin aktivindəki məhsuldar ötürmələrin sayı 8 olaraq qalıb. Beləliklə, o, bu göstəricidə 1986-cı il dünya çempionu, əfsanəvi argentinalı Dieqo Maradona ilə rekordu bölüşməkdə davam edir.

Buna baxmayaraq, 39 yaşlı hücumçu dünya çempionatları tarixinin iki əsas rekordunun yeganə sahibidir. Messi mundiallarda keçirdiyi 30 oyunla ən çox matç keçirən, 20 qolla isə turnir tarixinin ən məhsuldar futbolçusudur.

Qeyd edək ki, Argentina Kabo-Verdeni əlavə vaxtda 3:2 hesabı ilə məğlub edərək DÇ-2026-nın 1/8 finalına yüksəlib.