Azərbaycan Premyer Liqasında mübarizə aparan “İmişli” heyətini yeni futbolçu – gənc qapıçı Sadiq Məmmədzadə ilə gücləndirib.

Arena.az bu barədə İmişli klubunun mətbuat xidmətinə istinadən xəbər verir.

Bölgə təmsilçisi 19 yaşlı qolkiperlə 2 illik müqavilə bağlayıb. Azərbaycanlı futbolçu yeni klubuna azad agent kimi keçib.

Sadiq Məmmədzadə futbolçu karyerasına “Səbail”də başlayıb və 7 il bu klubun formasını geyinib. Daha sonra “Qarabağ”a qoşulmuş qapıçı, son mövsümü icarə əsasında “Difai”də keçirib.

Məmmədzadə həm də 21 yaşadək futbolçulardan ibarət Azərbaycan milli komandasının üzvüdür.

“İmişli” daha öncə Seyxan Fərəcov, Fərid Nəbiyev və Bəxtiyar Həsənalızadəni də heyətinə qatmışdı. Tuncay Yusifli, İdris İnqilablı və İmam Əli ilə yeni müqavilə bağlamış əyalət klubu Xəzər Mahmudov, Həzrət İsayev, Elmir Rəhimzadə, Riad Abbaszadə, Orxan Fərəcov, Lətif Rzayev, Abbas Ağazadə, Hüseynəli Quliyev, Rafael Vyeqas və Andrey Sinenka ilə də yollarını ayırmışdı.

Yeri gəlmişkən, “İmişli” qapıçı məşqçisi Elşad Tahirovla əməkdaşlığı davam etdirməyə qərar verib. Klubla Elşad Tahirov arasında 1 illik yeni müqavilə imzalanıb.

Əyalət təmsilçisi həm də skautinq departamentinin rəhbəri vəzifəsinə beynəlxalq təcrübəyə malik futbol funksioneri Rəsul Allahverdiyevi təyin edib. UEFA ASSIST proqramlarının məzunu olan Rəsul Allahverdiyev Azərbaycan, Ukrayna və Türkiyədə skautinq, futbol idarəçiliyi, oyunçu seçimi və inkişafı sahələrində uzunillik təcrübəyə sahibdir. O, peşəkar fəaliyyəti dövründə müxtəlif klublarda skaut, idman direktoru, klub prezidenti və baş məsləhətçi kimi çalışıb.