“Neftçi”nin baş məşqçisi Yuri Vernidub Azərbaycan Premyer Liqasının sonuncu – 33-cü turunda “Kəpəz”ə qarşı keçirdikləri oyunu şərh edib.

Arena.az xəbər verir ki, sözügedən komandalar mövsümün son oyunu çərçivəsində bu gün Sumqayıtda üz-üzə gəliblər.

Yuri Vernidub matçdan sonra təşkil edilmiş mətbuat konfransında bunları söyləyib:

“İstəyimizə nail olduq. Hazırda turnir cədvəlindəki mövqeyimiz bizə Avropa Konfrans Liqasında iştirak etmək hüququ verir. Kimin gedib, kimin qalacağına gəlincə, bəzi futbolçuların müqavilələri bitib. Mövsüm başa çatdığı üçün artıq bu işlə daha konkret məşğul olacağıq. Həm avrokuboklarda, həm də növbəti ölkə çempionatında daha yaxşı nəticə göstərmək üçün heyətimizi gücləndirməyə ehtiyac var. Klubun sahibləri var. Onlar mənə suallar verəcəklər, mən də onların suallarına cavab verəcəyəm. Sabahdan etibarən kimlərin qalacağına, kimlərin gedəcəyinə qərar verəcəyik.

Premyer Liqa klublarında həm yaxşı azərbaycanlı, həm də legioner futbolçular var. Seçim etsəm, bəlkə də azərbaycanlı oyunçuları seçərdim. Eyni zamanda milli komandaya da dəstək olmaq istəyirəm. Nə qədər yaxşı yerli futbolçu olsa, milli üçün faydalıdır. Azərbaycanda çıxış edən diqqət çəkən əcnəbi futbolçular da var. Əgər eyni mövqe üçün həm yerli, həm əcnəbi namizəd varsa, gərək əcnəbinin səviyyəsi daha yuxarı olsun ki, onu götürək. Səviyyələri bərabərdirsə, yerlini seçərəm.

“Neftçi” ilə uzunmüddətli layihəyə gəlincə, belə bir təklif olarsa, əlbəttə, düşünərəm. Çünki mən Azərbaycanı, onun xalqını, buradakı insanları səmimiliyinə, qonaqpərvərliyinə görə çox sevirəm və bu gün burada olduğum, bu şəraitdə çalışdığım üçün məmnunam”.

“Neftçi”nin baş məşqçisi Yuri Vernidub Azərbaycan Premyer Liqasının 32-ci turunda “Sabah”a qarşı keçirdikləri oyunu şərh edib.

Arena.az xəbər verir ki, sözügedən komandaların bu gün Masazırda baş tutmuş görüşü “Neftçi”nin 2:1 hesablı əzmkar qələbəsi ilə yekunlaşıb.

Yuri Vernidub matçdan sonra təşkil edilmiş mətbuat konfransında bunları söyləyib:

“Fikrimcə, çox gözəl axşamdır. Hədəfimizə çatdıq. Sizə səmimi olaraq deyirəm ki, bu gün çox xoşbəxtəm. Mən Bakıya gələndə qarşıma elə bir məqsəd qoyulmuşdu ki, “Neftçi” avrokuboklarda çıxış edə bilsin. Bilirdim ki, 4-cü pillədən çox uzaqdayıq. Amma bunu reallaşdırmaq mümkün idi. Gəldikdən 2 matç sonra yaxşı oldu ki, fasiləyə getdik və həmin fasilədən maksimum yararlanaraq oyunçularımı yaxından tanımaq şansım oldu. Hər bir futbolçu ilə fərdi söhbət etdim. Sonra nizam-intizamı yerinə oturtduq. Anlayırdıq ki, biz “Neftçi”yik və hər bir matçı 1 nömrə kimi oynamalıyıq. Ən azından biz “Qarabağ” və “Sabah” kimi görünməli idik. Buraya gələndə ən güclü komanda onlar idilər. Oyunçulara inandım və onlar da mənə inandılar. Klubun işçilərinə də təşəkkür edirəm. Onlar da əllərindən gələni etdilər. Xüsusi olaraq da, rəhbərliyə təşəkkür edirəm. Hər zaman bizim yanımızda oldular. Bu cür nəticələrin əldə edilməsində birlik önəmlidir. Bu, bizim qələbəmizin təminatçısıdır”.

Yuri Vernidub bu heyətlə avrokuboklarda uğur qazanmağın mümkünlüyü barədə sualı da cavablandırıb:

“Bəzi futbolçuların müqavilələrinin müddəti bitir, bəzilərində isə davam edir. Bunu mövsüm bitəndən sonra ətraflı düşünəcəyik. Təbii ki, komandaya yeni qan da lazımdır. İstəmərəm ki, avrokuboklarda 1 tur oynayıb və məğlub olaraq geri dönək. Bizim görəcəyimiz həddindən artıq çox iş var. Qarşıya qoyulan məqsədlərə çatmaqdan ötrü çox çalışmalıyıq”.