Azərbaycanın güləş yığmasının aparıcı üzvlərindən olan Həsrət Cəfərov və Qurban Qurbanov Avropa çempionu olublar.

Arena.az xəbər verir ki, onlar bu uğura Albaniyanın paytaxtı Tiranada imza atıblar.

Belə ki, qitə birinciliyinin üçüncü günündə yunan-Roma güləşi üzrə növbəti medalçılar müəyyənləşiblər.

67 kq çəki dərəcəsində mübarizə aparan Həsrət Cəfərov finalda Türkiyə təmsilçisi Murad Fıratı 7:5 hesabı ilə məğlub edərək dördqat Avropa çempionu adını qazanıb.

Onun ardınca ötənilki turnirin qalibi Qurban Qurbanov (82 kq) finalda Adlet Tülübayevə (UWW) 4:2 hesabıyla qalib gələrək ikiqat Avropa çempionu olub.

Digər güləşçimiz Nihat Məmmədli (60 kq) bürünc medal uğrunda qarşılaşmada Suner Konunovu (UWW) 6:0 hesabı ilə üstələyərək fəxri kürsünün üçüncü pilləsinə yüksəlib.

Xatırladaq ki, bundan öncə Azərbaycanın yunan-Roma güləşçilərindən Rəşad Məmmədov (55 kq) və İslam Abbasov (87 kq) bürünc medal qazanmışdılar.