Dünya çempionatından (DÇ-2026) sonra Xorvatiya millisinin baş məşqçisi vəzifəsindən ayrılmış Zlatko Dailiçi bu postda Slaven Biliç əvəz edib.

Arena.az bu barədə Xorvatiya Futbol İttifaqının mətbuat xidmətinə istinadən məlumat verir.

57 yaşlı mütəxəssislə bağlanan müqavilənin müddəti açıqlanmayıb.

Biliç təyinatından sonra bunları deyib:

“Federasiya rəhbərliyinə mənə göstərdiyi etimada və Xorvatiya millisini yenidən çalışdırmaq imkanı yaratdığına görə təşəkkür edirəm. Zlatko Daliçin rəhbərliyi altında yaşanan möhtəşəm dövrdən sonra üzərimdə böyük gözləntilərin olacağını anlayıram. Ancaq Xorvatiya millisini çalışdıran hər kəs buna hazır olmalıdır. Çünki biz futbol ölkəsiyik.

Futbolçularımıza çox inanıram. Məqsədim komandaya yeni enerji, ambisiya və qətiyyət gətirmək, Xorvatiyanın dünya futbolunun elitasında qalmasını təmin etməkdir. Bu çağırışı səbirsizliklə gözləyirəm. İndi 2006-cı illə müqayisədə daha yetkin və təcrübəli məşqçiyəm, amma milli komandamızın güclü və uğurlu olması arzusu dəyişməyib”.

Xatırladaq ki, iyulun 8-də Zlatko Daliç 9 ilə yaxın davam edən fəaliyyətindən sonra Xorvatiya millisinin baş məşqçisi postundan ayrılmışdı. Onun rəhbərliyi altında komanda 2018-ci il dünya çempionatının gümüş, 2022-ci il dünya çempionatının bürünc medalını qazanıb, 2023-cü ildə isə UEFA Millətlər Liqasının gümüş mükafatçısı olub. DÇ-2026-da isə xorvatlar 1/16 finalda Portuqaliyaya məğlub olaraq turnirlə vidalaşıblar.

Slaven Biliç üçün bu, Xorvatiya millisində ikinci dönəm olacaq. O, yığmanı ilk dəfə 2006-2012-ci illərdə çalışdırıb və komandanı 2008 və 2012-ci illərdə Avropa çempionatlarının final mərhələsinə çıxarıb.

Mütəxəssisin son iş yeri Səudiyyə Ərəbistanının “Əl-Fateh” klubu olub. O, 2023-2024-cü illərdə bu komandaya rəhbərlik edib.

Biliç məşqçilik karyerası ərzində Moskvanın “Lokomotiv”, Türkiyənin “Beşiktaş”, İngiltərənin “Vest Hem”, “Vest Bromviç” və “Uotford”, Səudiyyə Ərəbistanının “Əl-İttihad”, həmçinin Çinin “Beytszin Qoan” klublarında da çalışıb.

Biliç futbolçu kimi isə Xorvatiyanın “Hayduk”, Almaniyanın “Karlsrue”, İngiltərənin “Vest Hem” və “Everton” komandalarının formasını geyinib. Xorvatiya millisinin heyətində isə o, 1998-ci il dünya çempionatının bürünc medalını qazanıb.

Zlatko Daliç doqquz illik fəaliyyətindən sonra futbol üzrə Xorvatiya milli komandasının baş məşqçisi vəzifəsindən ayrılmağa qərar verib.

Arena.az xəbər verir ki, bu barədə Xorvatiya Futbol İttifaqının mətbuat xidməti məlumat yayıb.

59 yaşlı mütəxəssis qərarını belə şərh edib:

“Millidə işləmək çox çətin qərarlar qəbul etməyi tələb edir. Amma bu, karyeramın ən ağır qərarı oldu. Mən həmişə demişəm ki, öz ölkənin millisini çalışdırmaqdan böyük şərəf yoxdur. Bu vəzifəyə gələndə futbolçuların keyfiyyətinə və özümə inanırdım, lakin bu illər ərzində əldə etdiyimiz uğurları xəyal belə etmirdim. Hər qələbə, hər medal və ən əsası komanda daxilində, eləcə də Xorvatiya xalqı ilə yaratdığımız birliklə fəxr edirəm. Dünya çempionatlarında qazandığımız medallardan sonra yaşadığımız unudulmaz bayramlar bunu bir daha göstərdi.

Son günlər aldığım böyük dəstək qərarımı yenidən gözdən keçirməyə vadar etdi. Ancaq düşünürəm ki, artıq vaxtı çatıb. Millidə yeni uğurlar qazanmaq istəyim qalsa da, bu möhtəşəm dövrü başa vurmaq üçün ən uyğun məqamın indi olduğuna inanıram. Xorvatiya futbolunun tarixindəki ən böyük nailiyyətlərdə payımın olması ilə qürur duyuram və varisimə, milli komandaya və Xorvatiya futboluna gələcəkdə yeni uğurlar arzulayıram”.

Xatırladaq ki, Zlatko Daliç 2017-ci ilin oktyabrından Xorvatiya millisini çalışdırırdı. Onun rəhbərliyi altında komanda 2018-ci ildə Rusiyada keçirilən dünya çempionatının gümüş, 2022-ci ildə Qətərdə təşkil olunan mundialın bürünc mükafatını qazanıb. Xorvatiya millisi, həmçinin 2023-cü ildə UEFA Millətlər Liqasının gümüş medalına sahib çıxıb.

DÇ-2026-da isə xorvatlar pley-offa yüksəlsələr də, 1/16 final mərhələsində Portuqaliyaya məğlub olaraq mübarizəni dayandırıblar.

Zlatko Daliç məşqçilik karyerası ərzində Xorvatiyanın “Riyeka” və “Slaven”, Səudiyyə Ərəbistanının “Əl-Feysəli” və “Əl-Hilal”, həmçinin BƏƏ-nin “Əl-Ayn” klublarını da çalışdırıb.