Futbol üzrə Almaniya yığma komandasının və “Bayern”in təcrübəli qapıçısı Aleksander Nübel bundan sonra “Beşiktaş”ın uğurları üçün çalışacaq.

Arena.az bu barədə Türkiyə klubunun mətbuat xidmətinə istinadən xəbər verir.

“Beşiktaş” alman qapıçını “Bayern”dən tamhüquqlu əsasda satın alıb. Keçid İstanbul klubuna 5 milyon avro məbləğ müqabilində başa gəlib. Tərəflər 3 illik müqavilə bağlayıblar. Nübel 2029-cu ilin iyun ayının sonuna qədər müddət ərzində “qara qartal”ın xidmətində olacaq.

Xatırladaq ki, Aleksander Nübelin “Bayern”lə 2029-cu ilin 30 iyununa kimi qüvvədə olacaq müqaviləsi vardı. O, 2020-ci ilin yayından Münhen klubunda olsa da, bu komandada cəmi 4 oyuna çıxıb, 4 qol buraxıb, 1 “quru” matç keçirib. Alman qolkiper bu müddətdə iki mövsüm “Monako”da, üç mövsüm də “Ştutqart”da icarədə olub. O, “Bayern”ə keçənə qədər də “Paderborn” və “Şalke”də oynayıb.

Vaxtilə Almaniyanın U-17 yığmasında oynamış Nübelə əsas millidə debüt etmək 2024-cü ildə nəsib olub. O, yığmanın heyətində 3 oyun keçirib, 3 qol buraxıb.

“Transfermarkt” internet-portalı 29 yaşlı qapıçının transfer dəyərini 12 milyon avro məbləğində qiymətləndirir.

“Beşiktaş” heyətini daha bir neçə futbolçu ilə gücləndirib. İstanbul klubu Türkiyə millisinin futbolçusu Salih Özcanı heyətinə qatıb. 28 yaşlı yarımmüdafiəçi tibbi müayinədən keçmək və müqavilə imzalamaq üçün artıq İstanbula gəlib. O, son olaraq Almaniyanın “Borussiya” (Dortmund) klubunda çıxış edib.

“Başakşəhər”in futbolçusu Doğan Alemdar da “Beşiktaş”a keçib. Tərəflər 4 illik müqaviləyə imza atıblar.

Fransanın “Klermon” klubunun futbolçu İlhan Fakılı da İstanbul təmsilçisinə keçib. Onunla da 4 illik müqavilə imzalanıb.

“Beşiktaş” iki futbolçusu ilə də yollarını ayırıb. İstanbul klubu qapıçı Ersin Destanoğlu və yarımmüdafiəçisi Gökhan Sazdağı ilə vidalaşıb. Ersin klubu azad agent kimi tərk edibsə, Gökhan “Çorum”a transfer edilib.