AFFA-nın Apellyasiya Komitəsi hazırda İkinci Liqada mübarizə aparan “Ağdaş” komandasına lisenziya verilməməsinə dair qərarı ləğv edib.

Arena.az bu barədə qurumun rəsmi saytına istinadən xəbər verir.

Belə ki, bu gün AFFA-nın Apellyasiya Komitəsinin növbəti iclası keçirilib. İclasda “Ağdaş” FK tərəfindən daxil olmuş apellyasiya müraciətinə və klub tərəfindən təqdim olunmuş əlavə sənədlərə baxılıb. Bölgə təmsilçisinin apellyasiya müraciəti Lisenziya Komissiyasının 08.05.2026-cı il tarixli qərarına əsasən, İkinci Liqa yarışlarında iştirak etmək üçün lisenziyanın verilməməsi məsələsi ilə bağlı olub.

Müzakirələrdən sonra “Ağdaş” FK-ya 2026/2027-ci il mövsümündə İkinci Liqa yarışlarında iştirak etmək üçün lisenziya verilməsinə qərar verilib.

Qeyd edək ki, “Ağdaş” İkinci Liqanın 2025/2026-cı illər mövsümündə 27 oyuna topladığı 26 xalla 12 iştirakçı arasında 9-cu yeri tutub.

AFFA-nın Apellyasiya Arbitraj Tribunalı “Neftçi”nin “Turan Tovuz”la matçla bağlı İntizam Komitəsinin qərarından şikayətini təmin etməyib.

Arena.az bu barədə AFFA-nın rəsmi saytına istinadən xəbər verir.

Belə ki, Apellyasiya Arbitraj Tribunalı paytaxt klubunun Azərbaycan Premyer Liqasının 23-cü turunda baş tutmuş “Turan Tovuz”la matçla bağlı İntizam Komitəsinin qərarına baxıb. Klubun azarkeşləri tərəfindən təhqiredici pankart açılması səbəbindən martın 11-də paytaxt təmsilçisinin 15 000 manat cərimələnməsi barədə çıxarılmış qərar qüvvədə saxlanılıb.

Qeyd edək ki, martın 9-da keçirilmiş sözügedən qarşılaşma “Turan Tovuz”un 1:0 hesablı qələbəsi ilə yekunlaşıb.

Apellyasiya Arbitraj Tribunalının müvafiq qərarlarını təqdim edirik:

1. “Neftçi” Peşəkar Futbol Klubu tərəfindən verilən apellyasiya şikayəti təmin edilməsin.
2. 9 mart 2026-cı il tarixində Azərbaycan Premyer Liqasında 23-cü turun “Neftçi” – “Turan Tovuz” oyununda “Neftçi”nin azarkeşləri tərəfindən təhqiredici pankart açıldığına görə “Neftçi” klubunun 15000 manat cərimə edilməsi barədə AFFA İntizam Komitəsinin 11 mart 2026-cı il tarixli qərarı öz qüvvəsində saxlanılsın.
3. Apellyasiya Arbitraj Tribunalının qərarından Lozannadakı (İsveçrə) İdman üzrə Arbitraj Məhkəməsinə (CAS) şikayət verilməsinin mümkünlüyü maraqlı tərəflərə izah edilsin.