Birinci Liqaya vəsiqə uğrunda pley-off oyununun nominal meydan sahibinin müəyyənləşdirilməsi məqsədilə püşkatma mərasimi keçirilib.

Arena.az xəbər verir ki, bu gün baş tutmuş mərasimdə Peşəkar Futbol Liqasının, Birinci Liqanın 9-cusu “Şimal”ın və İkinci Liqanın 2-cisi “Qaradağ Lökbatan”ın nümayəndələri iştirak ediblər.

PFL Yarışların təşkili və qeydiyyatı şöbəsinin baş mütəxəssisi Elvin Yaqubov, “Şimal” menecer Taleh Bədirxanov, “Qaradağ Lökbatan” isə klubun baş meneceri Bəbir Həsənov ilə təmsil olunub. Püşkatmaya əsasən “Şimal” nominal meydan sahibi olub və nominal meydan sahibi kimi bütün təşkilati məsələləri həyata keçirəcək.

Püşkatmadan sonra klub nümayəndələri ilə Peşəkar Futbol Liqası arasında görüş keçirilib. Görüşdə Peşəkar Futbol Liqasının texniki-idman direktoru Elgiz Abbasov pley-off oyunu ilə bağlı ilkin təşkilati məsələlər, pley-off oyununun qaydaları, nəzərə alınacaq digər nüanslarla bağlı ətraflı məlumat verib, klub rəsmilərinin oyunla bağlı planları dinlənilib.

PFL-in qərarına əsasən, Birinci Liqa uğrunda pley-off oyunu mayın 27-də Şamaxı şəhər stadionunda keçiriləcək. Oyuna saat 16:00-da start veriləcək. Bu görüşdə VAR sistemi tətbiq ediləcək.

Azərbaycan Premyer Liqasının 32-ci turu çərçivəsində keçiriləcək “Şamaxı” – “Turan Tovuz” matçının hakim təyinatında dəyişiklik edilib.

Arena.az xəbər verir ki, bu barədə Peşəkar Futbol Liqasının (PFL) rəsmi saytı məlumat yayıb.

Xəbərdə bildirilir ki, qarşılaşmanı Rəvan Həmzəzadə idarə edəcək. Dördüncü hakim isə Ruslan Quliyev olacaq.

Xatırladaq ki, daha öncə bu oyunu Ruslan Quliyevin idarə edəcəyi açıqlanmışdı. Rəvan Həmzəzadə isə dördüncü hakim funksiyasını yerinə yetirməli idi.

Dəyişikliyin səbəbi açıqlanmır.

Sözügedən qarşılaşma sabah – mayın 16-da Şamaxı şəhər stadionunda keçiriləcək. Oyuna saat 17:00-da start veriləcək.

Azərbaycan Premyer Liqası
32-ci tur
16 may

17:00. “Şamaxı” – “Turan Tovuz”
Hakimlər: Rəvan Həmzəzadə, Eyyub İbrahimov, Teymur Teymurov, Ruslan Quliyev.
VAR: Kamranbəy Rəhimov.
AVAR: Zeynal Zeynalov.
Hakim-inspektor: Rəhim Həsənov.
AFFA nümayəndəsi: Emin Cəfərov.
Şamaxı şəhər stadionu.