2025/2026-cı illər mövsümündə futbol üzrə İngiltərə Premyer Liqasının qalibi olmuş “Arsenal” komandası bir neçə ilkə də imza atıb.

Arena.az xəbər verir ki, London təmsilçisi Premyer Liqa tarixində mövsümü qırmızı vərəqəsiz başa vurmuş ilk çempion olub.

Bundan əlavə, mövsüm ərzində “topçular”ın qapısına 38 oyunun heç birində penaıti təyin edilməyib. Bu baxımdan da londonlular ilki gerçəkəşdiriblər.

Mikel Artetanın rəhbərlik etdiyi komanda mövsüm ərzində yüksək səviyyədə intizam və müdafiə etibarlılığı nümayiş etdirib ki, bu da titul uğrunda mübarizədə əsas amillərdən biri olub.

Xatırladaq ki, Premyer Liqa yekunlaşsa da, 2025/2026-cı illər mövsümü hələ “Arsenal” üçün tam bitməyib. Belə ki, İngiltərə çempionu UEFA Çempionlar Liqasının finalında mübarizə aparacaq. Sözügedən komanda mayın 30-da Fransa nəhəngi PSJ ilə qarşılaşacaq.

“Arsenal”ın sağ vingeri Maks Dauman İngiltərə Premyer Liqası tarixində start heyətində meydana çıxmış ən gənc futbolçu olub.

Arena.az xəbər verir ki, 16 yaş 144 günlüyündə olan ingiltərəli oyunçu bu rekordu turnirin 2025/2026-cı illər mövsümünün sonuncu – 38-ci turunda, “Kristal Pelas”a qarşı keçirdikləri görüşdə (2:1) gerçəkləşdirib.

O, “Everton”un sabiq futbolçusu Xose Baksterin 2008-ci ildə qeydə alınmış rekordunu (16 yaş 198 gün) qırıb.

Dauman 2025/2026-cı illər mövsümündə Premyer Liqada debüt edən və qol vuran ən gənc oyunçu olmaqla yanaşı, “Arsenal”ın heyətində turnirin qalibi olan ən gənc futbolçu kimi də tarixə düşüb. O, həmçinin 15 yaş 308 günlüyündə UEFA Çempionlar Liqası tarixində meydana çıxan ən gənc oyunçu ünvanına yiyələnib.

Xatırladaq ki, Maks Dauman “Arsenal”ın öz yetirməsidir. O, 2025/2026-cı illər mövsümündə çıxış etdiyi bütün turnirlər çərçivəsində ümumilikdə 13 matçda 1 qol vurub və 1 məhsuldar ötürmə müəllifi olub.

Dauman İngiltərənin U-16, U-17 və U-19 yığmalarında da oynayıb.

London “Arsenal”ının ispaniyalı baş məşqçisi Mikel Arteta futbol üzrə İngiltərə Premyer Liqasında unikal nailiyyətə imza atıb.

Arena.az xəbər verir ki, bu barədə qurumun saytı məlumat yayıb.

Ötən gecə London təmsilçisinin ölkə çempionluğu rəsmiləşib. Arteta turnir tarixində əvvəllər oyunçu kimi çıxış etdiyi komanda ilə məşqçi olaraq da titul qazanmış ilk mütəxəssis kimi tarixə düşüb.

Xatırladaq ki, Mikel Arteta 2011-ci ildən 2016-cı ilə qədər “Arsenal”da oynayıb. Bu müddət ərzində o, 150 matça çıxıb, 16 qol vurub və 8 məhsuldar ötürmə edib. Onun “Arsenal”la futbolçu kimi titul qazanmağa ən yaxın gəldiyi mövsüm klubdakı son mövsümü olub. O zaman “topçular” Premyer Liqanın gümüş medalını qazanıblar.

Arteta 2019-cu ildən “Arsenal”a rəhbərlik edir. O, bu müddət ərzində “topçular”ı 350 oyuna çıxarıb, 216 qələbə qazanıb, 60 heç-heçə edib, 74 məğlubiyyətə üzülüb.