Son mövsüm uzun illərin dominantlığını əldən buraxmağa məcbur olan “Qarabağ”ın yeni mövsümdə necə olacağı ən aktual suallardan biridir.

Kimisi deyir, “atlılar” artıq yavaş-yavaş baş roldan çəkiləcək, kimisi daha iddialı geridönüşə inanır.

Bəs necə olacaq?

Müşahidələrə əsasən deyə bilərik ki, “Qarabağ”ın uzun illər rəqabətsiz qalması klubu da, komandanı da arxayınlaşdırmışdı. Onlarda böhran dövründə rəftar instikti zəifləmişdi.

“Sabah”ın 2025/26 mövsümündəki performansı “Qarabağ” üçün həm panika, həm oyanış oldu.

Demək olar ki, “atlılar” səhnədən çəkilmək fikrində deyil, əksinə daha şiddətli istəklə geridönüş planları qururlar.

Bunu ilk növbədə transfer siyasətində görmək olar. Bugünə olan gedənlər və gələnlər qrafikinə nəzər yetirək:

Gələnlər:

1. Zakaria Savo (Hücumçu, “Yurqorden”, İsveç – dəyəri 750 min avro)

2. Jali Muaddib (Yarımmüdafiəçi, vinger “Omoniya”, Kipr – dəyəri 550 min avro)

3. Samuel Lobato (dayaq yarımmüdafiəçi, “Portimonense”, Portuqaliya – dəyəri 450 min avro)

4. ⁠Bruno Lanqa (sol cinah müdafiəçi, “Almeriya”, İspaniya – dəyəri 1 milyon avro)

5. Martin Zlomisliç (qapıçı, “Riyeka”, Xorvatiya – dəyəri 2 milyon avro)

6. Renaldo Sefas (vinger, “Pari NN”, Rusiya – dəyəri 900 min avro)

Gedənlər:

Fabian Buntiç – qapıçı, dəyəri 450 min avro

Amin Ramazanov – qapıçı, dəyəri 125 min avro

Kevin Medina – müdafiəçi, dəyəri 450 min avro

Toral Bayramov – müdafiəçi, 2 milyon avro

Emmanuel Addai – yarımmüdafiəçi, vinger, dəyəri 1.2 milyon avro

Ramil Şeydayev – hücumçu, dəyəri 600 min avro.

(Qeyd: qiymətlər “transfermarkt”a istinadən verilib, rəsmi məlumat deyil).

Görünür, Ağdam təmsilçisi bu mövsüm üçün daha çox pul xərcləyəcək və yerli futbolçulara elə də üstünlük verməyəcək. O başqa məsələ ki, “bazarda” tələblərə uyğun səviyyədə yerli futbolçu yox kimidir…

Beləliklə, “Sabah”a qapdırılan dominantlığın legionerləşmə strategiyası ilə geri qaytarılması hədəflənib. Bunu çətin ki, etiraf etsinlər. Və bu, şəxsi müşahidə və mülahizəyə əsaslanan subyektiv fikirdir.

Prosesin davamını izləməyə dəyər. Adını isə “Qarabağ”ın rekonstruksiyası” qoymaq olar. Çünki bu, son illərdəki sabit gedişatdan fərqli yanaşmadır.

Elçin Cəlilov