იტალიაში ბოლო დღეებში მომხდარი ორი შოკისმომგვრელი შემთხვევა კიდევ ერთხელ აჩვენებს ქალებზე ძალადობის პრობლემის სიმწვავეს. ერთი ინციდენტი სიცილიაზე, პალაგონიაში (კატანია), მეორე კი ტოსკანის პროვინციაში – სკანდიჩიში მოხდა. ორივე შემთხვევაში მამაკაცები ქალების გატაცებისა და ფიზიკური ან სექსუალური ძალადობის ბრალდებით დააკავეს. ამის შესახებ იტალიური მედია იუწყება.

პალაგონიაში კარაბინერებმა დააკავეს 60 წლის მამაკაცი, რომელსაც ბრალი ედება გატაცებასა და სექსუალურ ძალადობაში. გამოძიების მიხედვით, მამაკაცმა სოციალურ ქსელებში გამოაქვეყნა ყალბი განცხადება დასაქმებაზე – თითქოს ხანდაზმული ადამიანების მომვლელს (იტ. badante – ბადანტე) ეძებდა.

44 წლის რუმინელი ქალი განცხადებას გამოეხმაურა და მისამართზე მივიდა, რათა სამუშაოს პირობები გაერკვია. როდესაც ქალმა უწესრიგოდ დაყრილი ლუდის ბოთლები დაინახა და მამაკაცის ქცევა საეჭვოდ მიიჩნია, ამ უკანასკნელმა აღიარა, რომ ბადანტეს აყვანის საბაბით შეიტყუა, მობილური ტელეფონი ძალით წაართვა და ქალი სახლში ჩაკეტა. იმ დღიდან ერთი თვის განმავლობაში იგი დატყვევებულ ქალს სცემდა და სექსუალურად ძალადობდა.

დაზარალებული მარტოხელა დედაა და 12 წლის ქალიშვილი ჰყავს. მან დახმარების გამოძახება მხოლოდ მაშინ შეძლო, როცა მოძალადეს ერთხელაც სახლიდან გასვლისას შემთხვევით მობილური ტელეფონი დარჩა. ქალმა მეგობარს მესიჯი გაუგზავნა, შემდეგ კი წაშალა. მეგობარმა დაუყოვნებლივ დარეკა პოლიციაში.

ადგილზე მისვლისას მამაკაცმა კარაბინერებს უთხრა, რომ „თავის პარტნიორთან“ ერთად ცხოვრობდა, თუმცა ამ დროს ქალი გამოვარდა სახლიდან და დახმარება ითხოვა.

კარაბინერებმა რუმინელი ქალი კალტაჯირონეს საავადმყოფოში გადაიყვანეს. სამედიცინო შემოწმებით დადასტურდა ქალის როგორც ფიზიკური, ისე ფსიქოლოგიური დაზიანებები, რომლებიც სექსუალურ ძალადობაზე მიუთითებდა. 60 წლის მამაკაცი დაკავებულია.

მეორე შემთხვევა მოხდა ტოსკანაში, სკანდიჩიში, სადაც 51 წლის ფლორენციელი მამაკაცი დააკავეს გატაცებისა და მკვლელობის მცდელობის ბრალდებით.

გამოძიების თანახმად, მამაკაცმა სცადა 41 წლის ქალის გატაცება, რომელმაც უარი უთხრა ინტიმურ ურთიერთობაზე. გამოძიების თანახმად, თავში მიყენებული ტრავმის გამო შოკურ მდგომარეობაში მყოფი ფლორენციელი ქალი მამაკაცს ფურგონში 24 საათის განმავლობაში ჰყავდა დამალული საბნების ქვეშ, რათა ვერავის შეემჩნია.

შემთხვევით გამვლელმა ვია დელ ფონტისთან ახლოს გზაზე საეჭვო პიკაპი შეამჩნია, რომელშიც მამაკაცი იჯდა და პოლიციას შეატყობინა. ადგილზე მისულმა კარაბინერებმა მამაკაცი ადგილზე დააკავეს, ხოლო მსხვერპლი სასწრაფო დახმარების ბრიგადამ ფლორენციის კარეჯის საავადმყოფოში გადაიყვანა. როგორც RaiNews-ი იუწყება, ქალს დაზიანება, სავარაუდოდ, ჩაქუჩით ჰქონდა მიყენებული, რომელიც პოლიციამ ნივთმტკიცებად ამოიღო. ამჟამად მის სიცოცხლეს საფრთხე არ ემუქრება.

სკანდიჩის მერმა კლაუდია სერენიმ მხარდაჭერა გამოხატა მსხვერპლისადმი და მადლობა გადაუხადა გამვლელს, რომელმაც სამართალდამცავებს სავარაუდო დანაშაულის შესახებ შეატყობინა. მან მადლობა გადაუხადა კარაბინერებსაც „მათი დროული ჩარევისთვის“. მერის თქმით:

„ეს უკიდურესად მძიმე ინციდენტია, რომელიც აჩვენებს, რომ არცერთი რეგიონი არ არის დაცული ქალებზე ძალადობისა და ფემიციდისგან. საჭიროა სიღრმისეული კულტურული ცვლილება, რათა მსგავსი ტრაგედიები მომავალში აღარ განმეორდეს“.

იტალიაში ფემიციდის შემთხვევები კვლავ ზრდის ტენდენციით გამოირჩევა. შინაგან საქმეთა სამინისტროს მონაცემებით, 2025 წელს უკვე მამაკაცების ჩადენილი ფემიციდის 80-ზე მეტი შემთხვევა დაფიქსირდა, ხოლო გატაცებისა და სექსუალური ძალადობის შემთხვევები კვლავაც ერთ-ერთ ყველაზე სერიოზულ სოციალურ პრობლემად რჩება.

ნინო ხოშტარია

რუმინეთის დედაქალაქ ბუქარესტში კვირას, 26 ოქტომბერს საზეიმოდ გაიხსნა მსოფლიოში უდიდესი მართლმადიდებლური ეკლესია – ერის ხსნის საკათედრო ტაძარი. ტაძრის გახსნაზე მთელი მსოფლიოდან ათასობით მომლოცველი ჩავიდა, – წერს სააგენტო AP.

ეკლესიის ფრესკების კურთხევის ცერემონია კონსტანტინოპოლის პატრიარქმა ბართლომე I-მა და რუმინეთის მართლმადიდებელი ეკლესიის პატრიარქმა დანიელმა ჩაატარეს. ღონისძიებაში 65 იერარქი, 70 მღვდელი და 12 დიაკვანი მონაწილეობდა. ათასობით ადამიანი ტაძრის გახსნას ტელევიზიით ადევნებდა თვალყურს.

წირვას რუმინეთის პრეზიდენტი ნიშორ დანი და პრემიერ-მინისტრი ილიე ბოლოშანი დაესწრნენ. მაღალი რანგის სტუმრებს შორის იყო მოლდოვის პრეზიდენტი მაია სანდუ.

ბუქარესტის ერის ხსნის საკათედრო ტაძრის სიმაღლე 125 მეტრზე მეტია (შედარებისთვის: თბილისის სამების საკათედრო ტაძრის სიმაღლე 87 მეტრია). ის 5000-მდე ადამიანს იტევს. Associated Press-ის ცნობით, ტაძარი 15 წელი შენდებოდა და მის მშენებლობაზე დაახლოებით 270 მლნ ევრო დაიხარჯა, რომლის უმეტესი ნაწილი საზოგადოებრივი ფონდებიდან შევიდა. საკათედრო ტაძრის ვებსაიტზე გამოქვეყნებული ინფორმაციის თანახმად, მოზაიკებისა და ხატების საერთო ფართობი 17 800 კვადრატული მეტრია. რუმინეთის მართლმადიდებელმა ეკლესიამ ახალ საკათედრო ტაძარს „ეროვნული იდენტობის სიმბოლო“ უწოდა.

ოპონენტები აცხადებენ, რომ ახალი ტაძრის მშენებლობაზე დახარჯული თანხები შეიძლებოდა სკოლებისა და ჯანდაცვის სისტემის განვითარებისთვის გამოეყენებინათ. როგორც ცნობილია, რუმინეთის ბიუჯეტის დეფიციტი ევროკავშირში ერთ-ერთი ყველაზე მასშტაბურია.

ნინო ხოშტარია

ვიდეო: ბუქარესტის ერის ხსნის საკათედრო ტაძრის გახსნის საზეიმო ცერემონია.

ავოკადო დიდი ხანია ჯანსაღი კვების სიმბოლოა და სამეცნიერო მტკიცებულებებიც ამას ადასტურებს. ცხიმის მაღალი შემცველობის მიუხედავად, ამ ხილის ყოველდღიური მოხმარება მრავალმხრივ სასარგებლოა, საჭმლის მონელების გაუმჯობესებიდან დაწყებული, ტვინის დახმარებითა და გულის დაცვით დამთავრებული.

აუმჯობესებს ნაწლავების ჯანმრთელობას

ავოკადო ბოჭკოს მდიდარი წყაროა, რომელიც ხელს უწყობს ნაწლავების ფლორის სიჯანსაღეს და საჭმლის მონელების სისტემის ნორმალურად ფუნქციონირებას. The Journal of Nutrition-ში გამოქვეყნებულმა კვლევამ აჩვენა, რომ ავოკადოს ყოველდღიური მოხმარება ზრდის სასარგებლო ბაქტერიების რაოდენობას, აუმჯობესებს მოკლეჯაჭვიანი ცხიმოვანი მჟავების გამომუშავებას და ამცირებს ნაღვლის მჟავების დონეს, რომლებიც ანთებას იწვევს.

ხელს უწყობს წონის მართვას

კალორიულობის მიუხედავად, ავოკადო ხელს უწყობს სხეულის წონის სტაბილიზაციას. 2022 წლის კვლევის თანახმად, მონაწილეებმა, რომლებიც ექვსი თვის განმავლობაში ყოველდღიურად ერთ ავოკადოს მიირთმევდნენ, წონაში არ მოიმატეს და ზოგიერთ შემთხვევაში რამდენიმე კილოც კი დაიკლეს. ჟურნალ Nutrients-ში 2019 წელს გამოქვეყნებულმა კვლევამ დაადასტურა, რომ ავოკადო ხელს უშლის წონის მატებას ბოჭკოსა და მონოუჯერი ცხიმების, განსაკუთრებით ოლეინის მჟავას წყალობით, რაც ამცირებს ცხიმის დაგროვებას და ახანგრძლივებს სისავსის შეგრძნებას.

ამცირებს გულ-სისხლძარღვთა დაავადებების რისკს

მაგნიუმი, კალიუმი, პოლიფენოლები და ანტიოქსიდანტები მნიშვნელოვანია გულის ჯანმრთელობისთვის. მწიფე ავოკადო ყველა ამ საკვებ ნივთიერებას შეიცავს. კვლევები აჩვენებს, რომ მისი რეგულარული მოხმარება გულ-სისხლძარღვთა დაავადებების რისკს 16–22%-ით ამცირებს. ეს ეფექტი განპირობებულია ცხიმების, ვიტამინებისა და ბუნებრივი ანტიოქსიდანტების ბალანსით, რომლებიც აძლიერებენ სისხლძარღვებს და ხელს უწყობენ ქოლესტერინის დონის ნორმალიზებას.

ხელს უწყობს ტვინის ფუნქციონირებას

ავოკადო მდიდარია ლუტეინით, ნაერთით, რომელიც გადალახავს ჰემატოენცეფალურ ბარიერს და აუმჯობესებს კოგნიტიურ ფუნქციას. International Journal of Psychology-ში 2020 წელს გამოქვეყნებულმა კვლევამ აჩვენა, რომ ლუტეინი ხელს უწყობს მეხსიერებისა და კონცენტრაციის შენარჩუნებას. Frontiers in Nutrition-ის 2021 წლის კვლევამ დაადასტურა, რომ ხანდაზმული ადამიანები, რომლებიც რეგულარულად მოიხმარდნენ ავოკადოს ან გუაკამოლეს, უკეთეს შედეგებს აჩვენებდნენ მეხსიერებისა და ყურადღების ტესტებში.

დღეში ერთი ავოკადო შეიძლება იყოს მარტივი და გემრიელი გზა ნაწლავების, გულისა და ტვინის ჯანმრთელობის მხარდასაჭერად. მთავარია გვახსოვდეს, რომ სარგებელი მოაქვს ზომიერებას და დაბალანსებულ კვებას.

თამარ ქავჟარაძე

დაკავშირებულ თემაზე: რატომ არ უნდა გადააგდოთ ავოკადოს კურკა – 4 მიზეზი

რატომ არ უნდა გადააგდოთ ავოკადოს კურკა – 4 მიზეზი

საბერძნეთის მთავრობის გადაწყვეტილებით, უახლოეს წლებში საპენსიო ასაკი აღარ გაიზრდება. როგორც გაზეთი Kathimerini და ეკონომიკური გამოცემა OT.gr იუწყებიან, მოქმედი კანონით გათვალისწინებული ცვლილებები მინიმუმ 2028 წლამდე გადაიდება, ხოლო საბოლოოდ ზრდა, სავარაუდოდ, მხოლოდ 2030 წლიდან დაიწყება.

მთავრობის გადაწყვეტილება დაკავშირებულია სიცოცხლის ხანგრძლივობის სტატისტიკასთან: პანდემიის შემდეგ საბერძნეთში სიცოცხლის საშუალო ხანგრძლივობა, ფაქტობრივად, არ შეცვლილა. სწორედ ეს მაჩვენებელი განსაზღვრავს საპენსიო ასაკის ზრდის შესაძლებლობას, რადგან საბერძნეთის კანონმდებლობით ის პირდაპირ არის მიბმული დემოგრაფიულ და სოციალური განვითარების ინდექსებზე: საბერძნეთის კანონმდებლობაში 2021 წლიდან გათვალისწინებულია საპენსიო ასაკის გაზრდის მექანიზმი, რომელიც პენსიაზე გასვლის დროის კორექტირებას სიცოცხლის მოსალოდნელი ხანგრძლივობიდან გამომდინარე მოახდენს.

დემოგრაფიული მაჩვენებლები – საპენსიო ასაკის ზრდის წინააღმდეგ

ბოლო მონაცემებით, საბერძნეთში ხანდაზმულთა წილი მოსახლეობაში თანდათან იზრდება, ხოლო შობადობა დაბალ დონეზე რჩება – დაახლოებით 1,5 ბავშვი ერთ ქალზე. ეს ტენდენცია, ექსპერტების შეფასებით, ქმნის სერიოზულ წნეხს სოციალური დაცვის სისტემაზე, თუმცა ამ დროისთვის არ მოითხოვს მკვეთრ ნაბიჯებს.

მოქმედი კანონის თანახმად, 2027 წლიდან საპენსიო ასაკი უნდა გადაიხედოს ყოველ სამ წელიწადში ერთხელ, დემოგრაფიული მდგომარეობის მიხედვით. თუმცა როგორც Kathimerini წერს, მთავრობის შიდა ანალიტიკური ჯგუფის ანგარიშები ცხადყოფს, რომ ზრდის საჭიროება ჯერ არ დგას. ამ მიზეზით, მოქმედი საპენსიო პარამეტრები მიმდინარე ათწლეულის ბოლომდე უცვლელი დარჩება.

ეტაპობრივი რეფორმის იდეა

თუ ცვლილებები მაინც განხორციელდება, ხელისუფლება გეგმავს, ეს პროცესი იყოს ეტაპობრივი – წელიწადში საპენსიო ასაკის მხოლოდ 3-4-თვიანი მატებით. ასეთი მიდგომა მიზნად ისახავს მომავალი პენსიონერებისთვის დატვირთვის მინიმუმამდე შემსუბუქებას და შრომის ბაზარზე სტაბილურობის შენარჩუნებას.

OT.gr-ის ინფორმაციით, ცვლილებებს ყველაზე დიდი გავლენა ექნება 35–55 წლის მოსახლეობაზე, რომლებმაც უკვე დააგროვეს სამუშაო სტაჟი და შესაძლოა საპენსიო ასაკის ზრდის შედეგად პენსიაზე გასვლა რამდენიმე წლით გადაუვადდეთ. ახალგაზრდა თაობისთვის კი, რომლებიც ახლა იწყებენ კარიერას, მომავალი საპენსიო სისტემა უფრო მკაცრი პირობებით იქნება განსაზღვრული.

„დროებითი ამოსუნთქვა“ სისტემისთვის

ექსპერტები აღნიშნავენ, რომ საპენსიო ასაკის ზრდის გადავადება მხოლოდ დროებითი გადაწყვეტილებაა – „დროებითი ამოსუნთქვა“, რომელიც ქვეყანას აძლევს შესაძლებლობას, შეაფასოს დემოგრაფიული დინამიკა და შრომის ბაზრის ტენდენციები.

თუმცა გრძელვადიან პერსპექტივაში საბერძნეთს მოუწევს რეფორმების გაგრძელება, რადგან მოსახლეობის დაბერება და შობადობის დაბალი დონე უკვე უქმნის წნეხს სისტემას და სოციალური ბალანსის შენარჩუნებას ართულებს.

საპენსიო რეფორმა ევროკავშირის ერთ-ერთ ყველაზე მგრძნობიარე თემად რჩება: საბერძნეთის მსგავსად, ანალოგიური პრობლემები დგას იტალიაში, ესპანეთსა და პორტუგალიაშიც, სადაც დემოგრაფიული ბალანსის შენარჩუნება სერიოზულ ეკონომიკურ გამოწვევად იქცა.

შეგახსენებთ, რომ საბერძნეთში 2027 წლიდან საპენსიო ასაკის 1,5 წლით გაზრდა გასული წლის აპრილის ბოლოს დაანონსდა.

ნინო ბაჯელიძე

საპენსიო ასაკი ევროპის ქვეყნებში – მოსალოდნელია თუ არა ზრდა?

ეს კვირა ცხოვრების ყველა სფეროში პოზიტიური ტრანსფორმაციების ფართო შესაძლებლობებს ხსნის. ხელსაყრელი დროა სტრატეგიული გეგმების განსახორციელებლად და შინაგანი პოტენციალის გამოსავლენად. ამ პერიოდში მნიშვნელოვანია მოუსმინოთ თქვენს ინტუიციას, რომელიც გადაწყვეტილებების მიღებისას საიმედო გზამკვლევი გახდება და დაგეხმარებათ შესაძლებლობების მაქსიმალურად გამოყენებაში.

ასევე, გაითვალისწინეთ, რომ ამ კვირაში ცაზე ხუთი მნიშვნელოვანი პლანეტარული ასპექტი ჩამოყალიბდება. მათ შორის, 28 ოქტომბერს – მარსი-იუპიტერის ტრინი, რომელიც ერთ-ერთი საუკეთესო დადებითი ასპექტია აქტიური მუშაობისთვის. ყველაზე წარმატებულები იქნებიან ისინი, ვინც ამ ასპექტის დროს ახალ პროექტს დაიწყებს, რომელიც ბიზნესის გაფართოებას და ეკონომიკურ წინსვლას მოიცავს. ეს ღია, თამამი და გადამწყვეტი მოქმედების ასპექტია. წარმატებისთვის მნიშვნელოვანია, თქვენი ქმედებები პერსპექტიული და ამბიციური მიმართულებით წარმართოთ. ამ ასპექტმა შესაძლოა ტურისტული მოგზაურობის წახალისებაც გამოიწვიოს.

მერკური-ნეპტუნის ტრინი 29 ოქტომბერს ხელს უწყობს წარმოსახვითი აზროვნების განვითარებას. ასევე, შეიძლება გაძლიერდეს ხელოვნების, მუსიკის, სიმღერის, პოეზიისა და მხატვრობისადმი მისწრაფება. ის ხელსაყრელია ყველაფრის იდუმალი და ენიგმატური შესწავლისა და კვლევისთვის, მათ შორის, ეზოთერული მეცნიერებებისაც. ამ ასპექტის გავლენით შეიძლება გაძლიერდეს ინტუიცია და ექსტრასენსორული შესაძლებლობები.

29-30 ოქტომბერს მარსი-სატურნის ტრინი ხელს უწყობს თანმიმდევრულ ქმედებებს. ამ ასპექტის გავლენით ადამიანი ჯერ შედეგებს განიხილავს და მხოლოდ ამის შემდეგ მოქმედებს. როგორც წესი, ამ ასპექტის დროს ადამიანი თავს არიდებს არასაჭირო ქმედებებს და, შესაბამისად, შეუძლია გამძლეობის დემონსტრირება ხანგრძლივი პერიოდის განმავლობაში. ეს კარგი ასპექტია სპორტსმენებისთვის, რომლებსაც გამარჯვების მისაღწევად საკუთარი ძლიერი მხარეების ზუსტად განსაზღვრა სჭირდებათ.

 29-30 ოქტომბერს მერკური-ურანის ოპოზიცია დაძაბული ასპექტია, რომელიც ნაჩქარევ და დაუფიქრებელ გადაწყვეტილებებთან არის დაკავშირებული. ამ ასპექტის ზეგავლენით განსჯა ზედაპირული და ფუჭია. ის არახელსაყრელია სწავლისთვის, კონტაქტებისა და საქმიანი შეთანხმებებისთვის.

30-31 ოქტომბერს მერკური-პლუტონის სექსტილი ჰარმონიული ასპექტია, რომელიც გაძლიერებულ აზროვნებას უკავშირდება. შეიძლება გაუმჯობესდეს მეხსიერება და გონების სისხარტე, რაც ხელს შეუწყობს პრობლემების სწრაფ და ეფექტიან გადაჭრას. სტუდენტებს შეუძლიათ წარმატებას მიაღწიონ სწავლაში, აღმოფხვრან ცოდნაში არსებული ხარვეზები. ამჟამინდელი პირობები იდეალურია თვითგანვითარებისა და ახალი პროექტების დასაწყებად.

ვარსკვლავებზე დაყრდნობით, Nostal.ge გირჩევთ, დაიცვათ ეს რეკომენდაციები და აქტიურად გამოიყენოთ ყველა შესაძლებლობა თქვენი მიზნების მისაღწევად.

ვერძი

მთავარი თემა: ენერგია ორიენტირებულია გადაწყვეტილებებზე.

ამ კვირაში ძველი ბარიერების გარღვევის დიდი შანსი გაქვთ. სამუშაო მოითხოვს სიზუსტეს და დისციპლინას, მაგრამ თქვენი ძალისხმევა შესამჩნევი იქნება. პირველი სამი დღე განსაკუთრებით მნიშვნელოვანია – სწორედ აქ ეყრება საფუძველი მთელ მომავალ თვეს. ახალი რამეების მოსინჯვის ნუ შეგეშინდებათ, ნებისმიერი ცვლილება უკეთესობისკენ წაგიყვანთ. ურთიერთობები შეიძლება ემოციების ქარიშხლით იყოს სავსე: ეჭვიანობით, ვნებით, კამათით. მოერიდეთ ხმის აწევას – ერთი გულწრფელი საუბარი ზედმეტი დრამისგან გიხსნით.

შაბათ-კვირას სასარგებლოა დრო დაუთმოთ სპორტს ან აქტიურ დასვენებას: ორგანიზმს მოძრაობის გზით დაძაბულობისგან გათავისუფლება სჭირდება.

სასიკეთო დღეები: 28, 29.

არასასიკეთო დღე: 31.

კურო

მთავარი თემა: გამძლეობის გამოცდა.

ამ კვირაში ისეთ სიტუაციაში აღმოჩნდებით, სადაც მოგიწევთ თქვენს შინაგან ძალაზე დაყრდნობა. სამუშაო მოითხოვს შეუპოვრობას: პარტნიორები შეიძლება არათანმიმდევრულად მოიქცნენ და თქვენზე იქნება დამოკიდებული ძირითადი ხაზის შენარჩუნება. გადადეთ ფინანსური გადაწყვეტილებები მინიმუმ ერთი კვირით – შეცდომის დაშვების რისკი ახლა მაღალია. თქვენი სასიყვარულო ცხოვრება გაღრმავდება: ურთიერთობები უფრო სერიოზული გახდება და ეს გულწრფელობას მოითხოვს. თუ მარტოხელა ხართ, ვარსკვლავები გირჩევენ, ყურადღება მიაქციოთ იმ ადამიანებს, რომლებიც დიდი ხანია თქვენ გვერდით არიან – მათ შეიძლება თქვენ მიმართ ნამდვილი გრძნობები ჰქონდეთ.

შაბათ-კვირას მოსალოდნელია საინტერესო თავგადასავლები.

სასიკეთო დღეები: 29, 1.

არასასიკეთო დღე: 28.

ტყუპი

მთავარი თემა: სიტყვებს შეუძლიათ განკურნებაც და განადგურებაც.

ეს კვირა სავსეა საუბრებით, შეხვედრებითა და მიმოწერით. მნიშვნელოვანია გახსოვდეთ: ყველა სიტყვას შედეგი მოჰყვება. აზრების სწორად ჩამოყალიბების უნარი სამსახურში წარმატების გასაღები იქნება – შეძლებთ გარიგების დადებას ან მოკავშირის პოვნას. მაგრამ პირად ცხოვრებაში უმჯობესია უფრო რბილად ისაუბროთ: თქვენი პარტნიორი განსაკუთრებით დაუცველია. ბავშვებთან ურთიერთობისას შესაძლებელია სირთულეები და დიდი მოთმინება გჭირდებათ.

კვირის ბოლოს მოულოდნელი ამბები გელოდებათ, რომლებიც თქვენს გეგმებს შეცვლის, მაგრამ სამაგიეროდ ახალ შესაძლებლობებს გაგიხსნით.

სასიკეთო დღეები: 31, 2.

არასასიკეთო დღე: 30.

კირჩხიბი

მთავარი თემა: თქვენი შინაგანი სამყარო სცენად იქცევა.

ამ კვირაში განსაკუთრებით მგრძნობიარე იქნებით მოვლენებისა და ირგვლივ მყოფების ნათქვამის მიმართ. ხალხი გენდობათ და თქვენს დახმარებას ელიან. სამსახურში მოგიწევთ დეტალებში ჩაღრმავება და სწორედ იქ იპოვით პასუხს, რომელიც სხვებმა ვერ შენიშნეს. ოჯახში თქვენი მზრუნველობის საჭიროება გაიზრდება. სიყვარულში ეს ნდობის დროა: ნუ შეგეშინდებათ დაუცველობის გამოვლენისა.

კვირის ბოლო ხელსაყრელია მარტოობისთვის: სიჩუმე და სიწყნარე ნებისმიერ რჩევაზე უკეთეს პასუხებს მოგცემთ. გაატარეთ შაბათ-კვირა ბუნებაში, მარტო.

სასიკეთო დღეები: 27, 2.

არასასიკეთო დღე: 29.

ლომი

მთავარი თემა: სცენა სიცხადეს მოითხოვს.

თქვენ კვლავ აღმოჩნდებით ყურადღების ცენტრში – თქვენგან გადაწყვეტილებებისა და მაგალითების მიწოდებას მოელიან. სამსახურში ეს კვირა ლიდერული თვისებების დემონსტრირების დროა: თქვენს იდეებს მოისმენენ, თუ ისინი ფაქტებით იქნება გამყარებული. ურთიერთობებში მოსალოდნელია ვნებიანი კვირა: სიყვარული ქარიშხლიანი იქნება, მაგრამ ასევე შესაძლებელია ეჭვიანობა. მარტოხელა ლომები შეიძლება შეხვდნენ ადამიანს, რომელიც მათ ამაყ გულს შეეხება.

შაბათ-კვირას ღირს საკუთარი თავისთვის დროის გამონახვა – ხელოვნება, ბუნება ან თუნდაც სიჩუმე ენერგიის აღდგენაში დაგეხმარებათ.

სასიკეთო დღეები: 27, 1.

არასასიკეთო დღე: 30.

ქალწული

მთავარი თემა: წესრიგი, როგორც დაცვა.

ამ კვირაში იგრძნობთ, რომ თქვენს ირგვლივ დიდი ქაოსია – და თქვენ ხართ ის, ვისაც შეუძლია წესრიგის დამყარება. სამსახურში ეს ხელშესახებ შედეგებს გამოიღებს. ფინანსები კონტროლს მოითხოვს: შეამოწმეთ თქვენი ანგარიშები, ნუ ენდობით სიტყვებს დოკუმენტაციის გარეშე. უფრთხილდით რისკებსა და თავგადასავლებს, ისინი იმედგაცრუებას მოგიტანენ. სიყვარულში უმჯობესია იყოთ უფრო ნაზი – თქვენი კრიტიკა შეიძლება მტკივნეული იყოს მაშინაც კი, თუ ვინმეს გულის ტკენის განზრახვა არ გაქვთ.

ამ შაბათ-კვირას ვარსკვლავები გირჩევენ, დრო დაუთმოთ თქვენს სხეულს: სეირნობა ან მსუბუქი ვარჯიში დაგეხმარებათ ძალების აღდგენაში.

სასიკეთო დღეები: 31, 2.

არასასიკეთო დღე: 29.

სასწორი

მთავარი თემა: ბალანსი სინათლესა და სიბნელეს შორის.

მზემ უკვე დატოვა თქვენი ნიშანი და თავს ცოტა დაღლილად გრძნობთ. ახლა მნიშვნელოვანია იმის გაგება, თუ რა გსურთ სინამდვილეში. სამსახურში უნდა აირჩიოთ პოტენციალის მქონე პროექტები, მაშინაც კი, თუ შედეგი თავიდანვე აშკარად არ ჩანს. ნუ ენდობით სხვების რჩევებს, შესაძლოა არაკეთილმოსურნეებისგან მოდიოდეს. ურთიერთობებში შესაძლებელია მაქსიმალური გულწრფელობა – გულწრფელი საუბარი შეიძლება მტკივნეული იყოს, მაგრამ აუცილებელი.

შაბათ-კვირას სასარგებლოა დროის დათმობა შემოქმედებისთვის, ხელოვნებისთვის – ეს ხელს შეუწყობს ჰარმონიის აღდგენას.

სასიკეთო დღეები: 28, 1.

არასასიკეთო დღე: 31.

მორიელი

მთავარი თემა: ძალისა და პატიოსნების დრო.

მზე თქვენს ნიშანშია – და ეს თქვენი დროა! ენერგიისა და თავდაჯერებულობის მოზღვავებას იგრძნობთ. ეს კვირა იდეალურია ახლის დასაწყისისთვის, თამამი გადაწყვეტილებებისთვის და, რაც მთავარია, საკუთარი თავის პირუთვნელად შესაფასებლად. სამსახურში წარმატება გელით, თუ ინიციატივას გამოიჩენთ. სიყვარულში თქვენი გრძნობები განსაკუთრებით ძლიერი იქნება: თქვენი პარტნიორი იგრძნობს თქვენს სიღრმეს და გულწრფელობას. მარტოხელა მორიელებს სასიამოვნო შეხვედრები ელოდებათ.

ამ შაბათ-კვირას საკუთარ თავს და ბედს მხოლოდ თქვენ აკონტროლებთ.

სასიკეთო დღეები: 31, 1.

არასასიკეთო დღე: 30.

მშვილდოსანი

მთავარი თემა: გზა გიხმობთ, მაგრამ ბილიკი ნისლშია გახვეული.

ამ კვირაში ცვლილებებისკენ ისწრაფით, მაგრამ გარემოებები მოთმინებას მოითხოვს. სამსახურში ყველაფერი ნათელი არ იქნება: ინფორმაცია ფრაგმენტებად მოვა და მხოლოდ კვირის ბოლოს დაინახავთ სრულ სურათს. ორშაბათს მოერიდეთ ნაჩქარევი გადაწყვეტილებების მიღებას. ფრთხილად იყავით ფინანსურ საკითხებთან დაკავშირებით. პირად ცხოვრებაში გაუგებრობები შესაძლებელია, მაგრამ ეს არ არის კამათის მიზეზი – პირიქით, ეს თქვენი მოქნილობის გამოცდაა.

შაბათ-კვირას საუკეთესოა გარემოს შეცვლა: მოკლე მოგზაურობაც კი ახალ პერსპექტივას გპირდებათ.

სასიკეთო დღეები: 28, 31.

არასასიკეთო დღე: 27.

თხის რქა

მთავარი თემა: პასუხისმგებლობა და შედეგები.

ეს კვირა თქვენგან სერიოზულობას მოითხოვს. სამსახურში მოგიწევთ ისეთი საქმეების შესრულება, რომელთა გაკეთებაც სხვებმა ვერ შეძლეს. ეს ადვილი არ იქნება, მაგრამ შედეგები თქვენს რეპუტაციას გააძლიერებს. თქვენი ფინანსური მდგომარეობა სტაბილური იქნება, თუ სწრაფი გადაწყვეტილებების ცდუნებას გაუძლებთ. ურთიერთობებში ყურადღება მიაქციეთ დეტალებს – თქვენი პარტნიორი აფასებს მცირე ჟესტებს და არა ბრტყელ-ბრტყელ სიტყვებს.

შაბათ-კვირისთვის სერიოზული არაფერი დაგეგმოთ, უბრალოდ დაისვენეთ.

სასიკეთო დღეები: 29, 30.

არასასიკეთო დღე: 1.

მერწყული

მთავარი თემა: ახალი იდეები, ახალი კავშირები.

ამ კვირაში სამსახურში არატრადიციული წინადადებები გაჩნდება და ეს წარმატებას მოგიტანთ. მნიშვნელოვანია თქვენი იდეების პრაქტიკაში გამოყენება: ყველაფერი არ შეიძლება მხოლოდ კონცეფციად დარჩეს. პირად ცხოვრებაში სიურპრიზი გელოდებათ – შესაძლებელია ახალი ნაცნობობა. ოჯახის წევრებთან ურთიერთობა გაუმჯობესდება.

სასარგებლოა შაბათ-კვირას მეგობრებთან ან თანამოაზრეებთან შეხვედრა: სწორედ აქ დაიბადება ახალი გეგმები.

სასიკეთო დღეები: 31, 2.

არასასიკეთო დღე: 29.

თევზები

მთავარი თემა: გრძნობების სიღრმე და ინტუიციის სიცხადე.

ეს კვირა დუმილისა და შინაგანი სიბრძნის დროა. სამსახურში იგრძნობთ, სადაა საფრთხე და შეძლებთ შეცდომების თავიდან აცილებას. თქვენი წინათგრძნობები განსაკუთრებით ზუსტი იქნება. ენერგიის მოზღვავებას იგრძნობთ და თქვენს პოტენციალს გამოავლენთ. სიყვარულში ეს ნდობისა და ღია საუბრების დროა: თუ არსებობს საიდუმლოებები, უმჯობესია პარტნიორს ისინი ახლავე გაუმჟღავნოთ.

ამ შაბათ-კვირას ვარსკვლავები მარტო ყოფნას გირჩევენ, ან დრო შემოქმედებით საქმიანობას დაუთმეთ – მუსიკა, წიგნები ან ხატვა შთაგონებისთვის ძლიერ სტიმულს მოგცემთ.

სასიკეთო დღეები: 28, 1.

არასასიკეთო დღე: 30.

თამთა გურული

იტალიას იმიგრანტების გარეშე ძალიან გაუჭირდებოდა როგორც ეკონომიკური ზრდის, ისე დემოგრაფიული მდგომარეობისა და სამუშაო ძალის მხრივ. Leone Moressa-ს ფონდის ახალი ანგარიშის თანახმად, რომელიც ორგანიზაციამ 20 ოქტომბერს წარადგინა CNEL-ში (დამსაქმებელთა ნაციონალური კონფერენციების ეროვნული საბჭო) და დეპუტატთა პალატაში, ბოლო ათწლეულის განმავლობაში (2014–2024) იმიგრანტი მეწარმეების რაოდენობა 24%-ით გაიზარდა, ხოლო იტალიელი მეწარმეების რაოდენობა 5%-ზე მეტით შემცირდა. დღეს უცხოელთა წვლილი ქვეყნის მშპ-ში 9%-ია, განსაკუთრებით მაღალია მათი წვლილი სოფლის მეურნეობაში (18%) და მშენებლობაში (16.4%). ამის შესახებ ilsole24ore წერს.

„ახალი იტალიელები“ ​​და დემოგრაფიული ზამთარი

2024 წელს იტალიაში 5.3 მლნ უცხოელი ცხოვრობდა (მთლიანი მოსახლეობის 8.9%), თუმცა საზღვარგარეთ დაბადებულთა რიცხვი 6.7 მილიონამდე გაიზარდა (11.3%). ეს სხვაობა, ძირითადად, განპირობებულია იტალიის მოქალაქეობის მიღებით (წელიწადში 200 000-ზე მეტი). იტალიის მოსახლეობას იმიგრაციული წარსულით კვლავაც დადებითი წვლილი შეაქვს იტალიის დემოგრაფიულ მონაცემებში, შობადობის უფრო მაღალი მაჩვენებლით (9.9 ახალშობილი ათას მოსახლეზე; იტალიელებში – 6.1) და სიკვდილიანობის უფრო დაბალი მაჩვენებლით (2.1 გარდაცვლილი ყოველ ათას მოსახლეზე; იტალიელთა შორის – 12.3). შობადობის მაღალი მაჩვენებლის წყალობით მიგრანტები, ფაქტობრივად, ხელს უშლიან იტალიის დემოგრაფიულ კოლაფსს. მაგალითად, 2023 წელს იტალიის მოსახლეობის რაოდენობა 385 000-ით შემცირდა, ხოლო იმიგრანტების – 375 000-ით გაიზარდა. იმიგრანტთა შორის მხოლოდ 6% არის 64 წელზე მეტი ასაკის, ხოლო იტალიელებს შორის ეს მაჩვენებელი 26%-ს აღწევს. ეს ნიშნავს, რომ იმიგრანტები საზოგადოების ახალგაზრდა, აქტიური ნაწილია, რომლებიც დღეს ბაზრებსა და გადასახადებს კვებავენ და ხვალ საპენსიო სისტემის მზარდ დეფიციტს აანაზღაურებენ.

სამუშაო ძალაზე მზარდი მოთხოვნა – იმიგრანტები შეუცვლელები არიან

დემოგრაფიული ტენდენციების გაგრძელება თავისთავად განაპირობებს სამუშაო ძალის მზარდ მოთხოვნას. Unioncamere – Excelsior-ის პროგნოზით, 5-წლიან პერიოდში – 2024-იდან 2028 წლამდე იტალიურ კომპანიებს დასჭირდებათ 3 მლნ ახალი მუშაკი (საჯარო სექტორის გამოკლებით), რომელთაგან 264 ათასი იმიგრანტი იქნება (21,3%). სამუშაო ძალაზე მოთხოვნა იტალიაში დამოკიდებული იქნება 80%-ით კადრების გადინებაზე დასაქმებულთა პენსიაზე გასვლის გამო და მხოლოდ 20%-ით – ეკონომიკური ზრდიდან გამომდინარე. ცენტრალურ და ჩრდილოეთ რეგიონებში იმიგრანტების წილი ოთხოვნილ მუშახელზე 25%-ს აჭარბებს, პიკი კი 31%-ია – ტოსკანასა და ტრენტინო-ალტო-ადიჯეში.

იმიგრანტ მეწარმეთა რაოდენობა კვლავ იზრდება

იმიგრანტი მეწარმეების რაოდენობა კვლავ იზრდება და 2024 წელს 787 000-ს მიაღწია (საერთო რაოდენობის 10.6%). ბოლო ათი წლის განმავლობაში (2014-2024) იმიგრანტ მეწარმეთა რაოდენობა გაიზარდა (+24.4%), ხოლო იტალიელ მეწარმეთა რაოდენობა შემცირდა (-5.7%). ყველაზე მაღალი მაჩვენებელი ქვეყნის ცენტრალურ და ჩრდილოეთის რეგიონებშია, დარგების მიხედვით კი – მშენებლობის, ვაჭრობისა და სტუმარმასპინძლობის სექტორებში. იმ ქვეყნების დემოგრაფიულ გაჯანსაღებასა და ეკონომიკის ზრდაში შეტანილი წვლილის გარდა, სადაც ამჟამად ცხოვრობენ, მიგრანტები ხელს უწყობენ თავიანთი წარმოშობის ქვეყნების განვითარებასაც, მათ შორის, ფულის გაგზავნით. 2024 წელს იტალიაში მცხოვრებმა იმიგრანტებმა 8.3 მილიარდი ევრო გაგზავნეს თავიანთი წარმოშობის ქვეყნებში საკუთარი ოჯახებისა და ახლობლების დასახმარებლად, რაც თვეში დაახლოებით 130 ევროს შეადგენს ერთ სულ მოსახლეზე.

ფისკალური წვლილი

იტალიაში 4.9 მილიონი იმიგრანტი გადასახადის გადამხდელია (საერთო რაოდენობის 11.5%). 2024 წელს მათი დეკლარირებული შემოსავალი 80.4 მილიარდი ევრო იყო, ხოლო 11.6 მილიარდი ევრო პირადი საშემოსავლო გადასახადის სახით გადაიხადეს იტალიის სახელმწიფო ბიუჯეტში. იტალიელებსა და იმიგრანტებს შორის ერთ სულ მოსახლეზე შემოსავლის სხვაობა კვლავ მაღალია (წლიურად თითქმის 9 000 ევრო), რაც დასაქმების სტრუქტურის პირდაპირი შედეგია.

სახელმწიფო ხარჯებზე გავლენა

იმიგრანტები, ძირითადად, შრომისუნარიანი, სამუშაო ასაკის ადამიანები არიან და მცირე გავლენა აქვთ სახელმწიფო ხარჯებზე (3%). გარდა ამისა, სახელმწიფო შემოსავლების (დასაქმებულთა მიერ გადახდილი გადასახადები და სოციალური უზრუნველყოფის შენატანები) სახელმწიფოს მიერ სოციალური მიზნით გაწეულ ხარჯებთან შედარებით, იმიგრანტების ბალანსი დადებითია (+1.2 მილიარდი ევრო ანუ უფრო მეტი შენატანი შეაქვთ გადასახადების სახით, ვიდრე სახელმწიფოსგან იღებენ სოციალურ თანხებს – მათ მცირე გავლენა აქვთ სახელმწიფო ხარჯების ძირითად პუნქტებზე, როგორიცაა ჯანდაცვა და პენსიები).

ამ ფონზე სახელმწიფოს გამოწვევაა იმიგრანტების ეფექტიანი ინტეგრაცია, რომლის ერთ-ერთი ყველაზე მთავარი ფაქტორია იტალიური სკოლა, თუმცა ასევე საჭირო იქნება სახელმწიფოს მხრიდან კიდევ გაძლიერებული ძალისხმევა – ენობრივი პროგრამების განვითარება, ოჯახების მხარდაჭერა, დიალოგი და ჩართულობა.

ნინო ხოშტარია

რატომ არის ზოგიერთ ადამიანთან ყოფნა ბუნებრივად მარტივი და მშვიდი, ზოგიერთთან კი – რთული და დამღლელი? პასუხი ხშირად ვარსკვლავებში „იმალება“.

იდეალური წყვილები ისინი კი არ არიან, რომლებიც არასდროს კამათობენ, არამედ ისინი, რომლებიც ინტუიციურად გრძნობენ და ესმით ერთმანეთის. ისინი ავსებენ, მხარს უჭერენ ერთმანეთს და საერთო ტალღაზე ცხოვრობენ.

გაიცანით ზოდიაქოს საუკეთესო წყვილები – ნიშნები, რომელთაც ერთად ყოფნა ნამდვილ ჰარმონიას ქმნის.

ვერძი და მერწყული

ორი თავისუფალი სულის გაერთიანება. ვერძს სჭირდება მოძრაობა და გამოწვევა, მერწყული კი მუდამ სიურპრიზებით სავსეა. ისინი შთაგონებენ ერთმანეთს, მხარს უჭერენ თამამ იდეებს და პატივს სცემენ პირად სივრცეს.
ეს კავშირი ენერგიისა და თავისუფლების ნაზავია – სიყვარული, რომელიც არასდროს ბეზრდებათ.

კურო და კირჩხიბი

კურო სტაბილურობას და სიწყნარეს აფასებს, კირჩხიბი კი ზრუნვასა და თბილ ატმოსფეროს ქმნის. მათი სიყვარული მშვიდია, მაგრამ ღრმად ფესვგადგმული.
ეს წყვილი ერთმანეთის უსაფრთხო ნავსაყუდელია – სიყვარული, რომელიც მშვიდად იზრდება და ძლიერდება.

ტყუპი და სასწორი

ჰაერის ორი ნიშანი, რომლებსაც ერთმანეთს იდეალურად ესმით. მათ შორის ურთიერთობა მსუბუქია, სავსე სილაღით, საუბარითა და გემოვნებით.
ინტელექტუალური ქიმია, რომელიც ორივეს აზროვნებას აღვიძებს და ურთიერთობას მუდმივად ცოცხლად ტოვებს.

კირჩხიბი და თევზები

მგრძნობიარე და ემოციური კავშირი, სადაც სიტყვებზე მეტი მნიშვნელობა თვალებსა და ჟესტებს აქვს.
ეს წყვილი ერთმანეთის სულიერი სარკეა – სიყვარული, სადაც სითბო და თანაგრძნობა მთავარ როლს ასრულებს.

ლომი და მშვილდოსანი

ცეცხლი ხვდება ცეცხლს. ორივეს უყვარს თავგადასავლები, ყურადღება და ვნება. მათი ურთიერთობა სავსეა ენერგიითა და ოპტიმიზმით.
მათი სიყვარული მზეა – ამაღლებული, შთამაგონებელი და დაუვიწყარი.

ქალწული და თხის რქა

ორივე მიწის სტიქიის ნიშანია – პრაქტიკული, გონიერი და მიზანდასახული. ისინი ერთად აშენებენ მომავალს, სადაც წესრიგი და განვითარება მთავარია.
ეს კავშირი ნდობაზე და სიძლიერეზეა აგებული – ორი ადამიანი, რომლებიც წარმატებისკენ ერთიანად მიდიან.

სასწორი და მერწყული

ორიგინალური და ესთეტიკური წყვილი, რომელიც ერთდროულად თბილია და გონიერი. მათ აერთიანებთ ჰარმონიის სიყვარული და თავისუფლების პატივისცემა.
მათი ურთიერთობა ჰაერივით მსუბუქია – როცა ორივე თავისუფალია, მაგრამ მაინც ერთად არიან.

მორიელი და კირჩხიბი

წყლის ორი ნიშანი, რომლებიც გრძნობებში ცხოვრობენ. მორიელი ვნებიანია, კირჩხიბი – ნაზი და თანაგრძნობით სავსე.
მათი კავშირი ემოციების ზღვაა – ღრმა, გულწრფელი და ერთგულებით გამყარებული.

მშვილდოსანი და ვერძი

ორივე ქარიშხალივით ენერგიულია. მათ იზიდავს გამოწვევები, მოძრაობა და თავგადასავლები.
ეს წყვილი ცეცხლოვანი ენერგიის სიმბოლოა – მეგობრობით დაწყებული სიყვარული, რომელიც არასდროს ქრება.

თხის რქა და კურო

პრაქტიკული და საიმედო წყვილი, რომელიც აფასებს სტაბილურობასა და შედეგს. ისინი ქმნიან ურთიერთობას, სადაც ნდობა ყველაფერია.
მათი სიყვარული ბრუნვის გარეშე იზრდება – როგორც მყარი ფუნდამენტი, რომელზეც მთელი ცხოვრება შენდება.

მერწყული და ტყუპი

ინტელექტუალური წყვილი, რომლის ურთიერთობა იდეებზე, ინტერესებსა და მეგობრობაზეა აგებული. მათთვის თავისუფლება ყველაზე მნიშვნელოვანი ცნებაა.
ეს კავშირი აზროვნების ჰარმონიაა – ერთად ისინი უფრო კრეატიულები და თამამები ხდებიან.

თევზები და მორიელი

სიღრმის, ვნებისა და ინტუიციის კომბინაცია. თევზები ოცნებობს, მორიელი მოქმედებს. ერთად ისინი ქმნიან სამყაროს, სადაც გრძნობები ყველაფერზე მაღლა დგას.
ეს სიყვარული მყუდრო და მაგიურია – როცა სიტყვები ზედმეტია, ხოლო გრძნობები უსიტყვოდაც ყველაფერს ამბობს.

ზოდიაქოს საუკეთესო წყვილები გვახსენებენ, რომ იდეალური ურთიერთობა არ არის შემთხვევითობა – ეს არის შინაგანი ჰარმონია, სულიერი თანხვედრა და ერთმანეთის მიღება ისეთებად, როგორებიც ვართ.

თამთა გურული

დაკავშირებულ თემაზე: რომელი ქვაა თქვენი ზოდიაქოს ნიშნის თილისმა?

ნახეთ, რომელი ქვაა თქვენი ზოდიაქოს ნიშნის თილისმა

ევროპარლამენტმა მართვის მოწმობის გაცემის ახალი წესები შემოიღო. ეს ნაბიჯი მიზნად ისახავს საგზაო უსაფრთხოების გაუმჯობესებას და ავტოსაგზაო შემთხვევების რაოდენობის შემცირებას, რომლებსაც ევროკავშირში ყოველწლიურად დაახლოებით 20 000 ადამიანი ეწირება.

ახალი დირექტივის თანახმად, მართვის მოწმობის ჩამორთმევის, შეჩერების ან შეზღუდვის შესახებ უნდა ეცნობოს იმ ქვეყანას, რომელმაც ის გასცა. ეს უზრუნველყოფს ტრანსსასაზღვრო სანქციების დაწესებას ისეთი სერიოზული დანაშაულებისთვის, როგორიცაა: ალკოჰოლის ან ნარკოტიკების ზემოქმედების ქვეშ ავტომობილის მართვა, ფატალური შემთხვევის გამოწვევა ან დაშვებული სიჩქარისთვის 50 კმ/სთ-ით ან უფრო მეტით გადაჭარბება.

ევროპარლამენტში ამ საკითხზე მომხსენებელი მატეო რიჩი („სოციალისტები“, იტალია) ამბობს: „ამჟამად, იმ მძღოლების თითქმის 40%, რომლებსაც ლიცენზია ჩამოერთვათ ან შეუჩერდათ ქვეყანაში, რომელიც მართვის მოწმობის გამცემ ქვეყანას არ წარმოადგენს, დაუსჯელი რჩება. ამიტომ მონიტორინგის უფრო ძლიერი და ეფექტიანი სისტემა ავარიების თავიდან აცილებასა და სიცოცხლის გადარჩენაში დაგვეხმარება“.

ევროპარლამენტის გადაწყვეტილებით, დაინერგება ციფრული მართვის მოწმობა, რომელიც მობილური ტელეფონის საშუალებით იქნება ხელმისაწვდომი და თანდათან მართვის მოწმობის ძირითადი ფორმა გახდება ევროკავშირში, თუმცა საბარათო ვერსია არ გაუქმდება.

ციფრული ლიცენზიების შესახებ მომხსენებელმა იუტა პაულუსმა („მწვანეები“, გერმანია) აღნიშნა: „2030 წლისთვის მოქალაქეებს საშუალება ექნებათ, ელექტრონულ და ფიზიკურ ბარათებს შორის არჩევანი გააკეთონ“.

რა იცვლება?

ახალი წესები ადგენს ორწლიან გამოსაცდელ პერიოდს ახალბედა მძღოლებისთვის და აწესებს უფრო მკაცრ ჯარიმებს ნასვამ მდგომარეობაში ავტომობილის მართვის, უსაფრთხოების ღვედის ან ბავშვის სავარძლის არგამოყენებისთვის. ამასთან, ავტომობილის მართვის მოწმობის მიღება შესაძლებელი იქნება 17 წლის ასაკიდან, იმ პირობით, რომ სრულწლოვანებამდე მათ გამოცდილი მძღოლი გაუწევს ზედამხედველობას.

პროფესიონალი მძღოლების დეფიციტის აღმოსაფხვრელად სატვირთო მანქანის მართვის მოწმობის აღება 18 წლის ასაკში იქნება შესაძლებელი, ხოლო ავტობუსის მართვის მოწმობა – 21 წლის ასაკში, იმ პირობით, რომ დაცული იქნება პროფესიული კომპეტენციის აუცილებელი მოთხოვნები.

ახალი დებულებები ევროკავშირის ოფიციალურ ჟურნალში გამოქვეყნებიდან 20 დღის შემდეგ შევა ძალაში. ამის შემდეგ, წევრ სახელმწიფოებს სამი წელი ექნებათ ამ დებულებების ეროვნულ კანონმდებლობაში გადმოსატანად, პლუს – კიდევ ერთი წელი განხორციელებისთვის მოსამზადებლად.

წყარო: EPT news

თარგმნილია ხელოვნური ინტელექტის მიერ

შეგახსენებთ, რომ ქართული ეროვნული მართვის მოწმობის გაცვლა ადგილობრივ მართვის მოწმობაში შესაძლებელია ევროკავშირის ქვეყნებში – ირლანდიაში, საბერძნეთსა და ესპანეთში, იტალიასთან კი ჯერჯერობით მხოლოდ სიტყვიერი შეთანხმებაა მიღწეული.

დაკავშირებულ თემაზე: უკვე შესაძლებელია ქართული ეროვნული მართვის მოწმობის ბერძნულში გადაცვლა და პირიქით

ევროპარლამენტმა ოთხშაბათს, 22 ოქტომბერს ანდრეი სახაროვის სახელობის პრემიის „აზრის თავისუფლებისთვის“ ლაურეატები დაასახელა – ადამიანის უფლებათა დაცვის სფეროში ევროკავშირის ეს უმაღლესი ჯილდო წელს ორ პატიმარ ჟურნალისტს მიენიჭა: 50 წლის მზია ამაღლობელს საქართველოდან და 52 წლის ანდჟეი პოჩობუტს ბელარუსიდან.

მზია ამაღლობელი სახაროვის პრემიის პირველი ლაურეატია საქართველოდან.

„ორივე ჟურნალისტი ამჟამად ციხეშია ყალბი ბრალდებებით – მხოლოდ იმიტომ, რომ ისინი თავიანთ სამუშაოს ასრულებდნენ და უსამართლობის წინააღმდეგ გამოდიოდნენ, – განაცხადა ევროპარლამენტის თავმჯდომარემ რობერტა მეცოლამ, რომელმაც პლენარულ სესიაზე სახაროვის პრემიის წლევანდელი ლაურეატები დაასახელა. – მათმა სიმამაცემ ისინი თავისუფლებისა და დემოკრატიისათვის ბრძოლის სიმბოლოებად აქცია. ეს პარლამენტი მათ მხარეზეა და ყველა იმ ადამიანის მხარეზე, რომელიც აგრძელებს თავისუფლების მოთხოვნას“.

„ბათუმელებისა“ და „ნეტგაზეთის“ დამფუძნებელი და რედაქტორი მზია ამაღლობელი ამჟამად ორწლიან პატიმრობას იხდის რუსთავის ქალთა №5 კოლონიაში აჭარის პოლიციის უფროსის, ირაკლი დგებუაძისთვის სილის გაწვნისთვის. ჟურნალისტი თავდაპირველად მიმდინარე წლის 11 იანვრის ღამეს ადმინისტრაციული წესით დააკავეს, შემდეგ ხელწერილის საფუძველზე გაათავისუფლეს, 12 იანვარს კი ხელმეორედ დააკავეს უკვე სისხლის სამართლის წესით პოლიციელზე თავდასხმის ბრალდებით, რისთვისაც მას 4-იდან 7 წლამდე პატიმრობა ემუქრებოდა. დაკავების შემდეგ მზია ამაღლობელი 38 დღე შიმშილობდა. მოგვიანებით მოსამართლე ნინო სახელაშვილმა ბრალდება გადააკვალიფიცირა და 6 აგვისტოს ჟურნალისტს ორწლიანი პატიმრობა მიუსაჯა 353-ე მუხლის პირველი ნაწილით, რომელიც საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობას, მუქარას ან ძალადობას გულისხმობს.

საპროცესო შეთანხმებაზე მზია ამაღლობელმა უარი განაცხადა: „უსამართლობასთან შერიგება ჩემთვის ცოცხლად დამარხვის ტოლფასია“, – წერდა იგი წერილში, რომელშიც ევროპას საქართველოში სამოქალაქო საზოგადოებისა და დამოუკიდებელი მედიის მხარდაჭერისკენ მოუწოდებდა.

სახაროვის პრემია ამაღლობელისთვის პირველი საერთაშორისო ჯილდო არ არის. იგი 2025 წელს „მსოფლიოში პრესის თავისუფლების გმირად“ დასახელდა. ოქტომბრის დასაწყისში მან პრაღაში მიიღო Forum 2000-ის საერთაშორისო ჯილდო გამბედაობისა და პასუხისმგებლობისთვის (მას ვაცლავ ჰაველის ჯილდოსაც უწოდებენ), ხოლო უფრო ადრე – პრესტიჟული „თავისუფალი მედიის ჯილდო“, რომელსაც ნორვეგიული ორგანიზაცია The Fritt Ord Foundation-ი ანიჭებს.

ჯილდოს გადაცემის ცერემონია, რომელიც 50 000 ევროს (($58,000) ოდენობის ფულად პრიზსაც მოიცავს, 16 დეკემბერს გაიმართება სტრასბურგში, ევროპარლამენტის პლენარულ სხდომაზე. ვინაიდან მზია ამაღლობელი და ანდჟეი პოჩობუტი ამჟამად ციხეში იმყოფებიან, პრიზს, სავარაუდოდ, მათი სახელით მათი რომელიმე ახლობელი ან ნათესავი მიიღებს.

ევროკავშირის უმაღლესი პრემია ადამიანის უფლებათა დაცვის სფეროში 1988 წელს დაარსდა საბჭოთა მეცნიერისა და დისიდენტის, ანდრეი სახაროვის პატივსაცემად. ჯილდო ყოველწლიურად გადაეცემათ ფიზიკურ პირებს ან ორგანიზაციებს ადამიანის უფლებების დაცვისა და დემოკრატიის სფეროში შეტანილი წვლილისთვის.

სახაროვის პრემიის ლაურეატობის კანდიდატებს წარადგენენ ევროპარლამენტის პოლიტიკური ჯგუფები, აგრეთვე, ცალკეული ევროპარლამენტარები. მზია ამაღლობელი პრემიაზე „ევროპის სახალხო პარტიის“ წევრმა, ლიტველმა ევროპარლამენტარმა რასა იუკნევიჩიენემ და კიდევ 60-მა ევროპარლამენტარმა წარადგინეს, ანდჟეი პოჩობუტი კი ევროპარლამენტარების – „ევროპელი კონსერვატორებისა და რეფორმისტების“ ჯგუფმა, რომელშიც სხვებთან ერთად შედის პოლონური პარტია „კანონი და სამართლიანობა“.

ნანა ძნელაძე

თბილისში რამდენიმე წელში ტრამვაი დაბრუნდება – ტრამვაის ხაზის აუცილებელი საპროექტო-სახარჯთაღრიცხვო დოკუმენტაციის შედგენისა და სამშენებლო/სამონტაჟო სამუშაოებისთვის ტენდერი უკვე გამოცხადდა.

სატენდერო წინადადებების მიღება 17 დეკემბერს დაიწყება და 22 დეკემბერს დასრულდება. შესყიდვის სავარაუდო ღირებულება 416 მლნ 592 ათასი ლარია.

ტრამვაის ხაზის დანიშნულება იქნება დიდი დიღმის დაკავშირება მეტროპოლიტენთან: სატენდერო დოკუმენტაციის თანახმად, ტრამვაის ხაზი დიდი დიღმის მე-3 და მე-4 მიკრორაიონების შერწყმის მიმდებარე ტერიტორიიდან დაიწყება, გაივლის დავით აღმაშენებლის ხეივანს, შემდეგ დიღმის მასივს (რობაქიძის გამზირს), შოთა შალიკაშვილის სახელობის ხიდს და მეტროსადგურ „დიდუბის“ მიმდებარე ტერიტორიაზე დასრულდება.

ტრამვაის ხაზის საორიენტაციო სიგრძე 7,5 კმ-ია, გაჩერებების რაოდენობა – 11, ტრამვაის შემადგენლობა – 10, ერთი შემადგენლობის ტევადობა – სულ ცოტა, 300 მგზავრი. მშენებლობის დასრულება 2028-2029 წლებისთვის იგეგმება.

შეგახსენებთ, რომ დედაქალაქში ტრამვაის დაბრუნების შესახებ განცხადება თბილისის მერმა კახა კალაძემ მიმდინარე წლის აგვისტოში გააკეთა. უფრო ადრე, 2025 წლის მარტში ამ პროექტთან დაკავშირებით ბაზრის კვლევა გამოცხადდა.

თბილისის ტრამვაის ერთსაუკუნოვანი ისტორია 19 წლის წინ, 2006 წლის 4 დეკემბერს დასრულდა თბილისის მთავრობის სხდომაზე იმავე წლის 10 ნოემბერს მიღებული დადგენილების საფუძველზე.

მერიის გადაწყვეტილებით, 2006 წლის 4 დეკემბრიდან ელექტროტრანსპორტი – ტროლეიბუსები და ტრამვაი – მთლიანად ჩაანაცვლა დიზელის საწვავზე მომუშავე ავტობუსებმა. მაშინ ამ გადაწყვეტილების არგუმენტებად ელექტროენერგიის ტარიფის გაძვირების გამო გაზრდილი ხარჯების დაზოგვა და მგზავრთა მომსახურების გაუმჯობესება დასახელდა. იმ დროისათვის დედაქალაქში ტრამვაი მხოლოდ ერთ 3,5 კმ სიგრძის ხაზზე მოძრაობდა, რომელიც კონიაკის დასახლებას დიდუბის სადგურთან აკავშირდებდა.

2010 წლის ნოემბერში თბილისის მერია, საზოგადოებრივი ტრანსპორტის ეფექტიანობის გაზრდის მიზნით, შიდაწვის ძრავაზე მომუშავე ავტობუსების ელექტროტრანსპორტით ნაწილობრივ ჩანაცვლების იდეაზე ალაპარაკდა. ჩატარდა კვლევებიც უცხოური კომპანიების მონაწილეობით, დასახელდა სავარაუდო მარშრუტებიც; თბილისის მაშინდელი მერი გიგი უგულავა ამბობდა, რომ თბილისში ტრამვაის სისტემის დანერგვა 3-4 წლის პერსპექტივა იყო, თუმცა 2012 წელს მთავრობა შეიცვალა და იდეის განხორციელება დიდი ხნით გადაიდო.

ნანა ძნელაძე

ლუვრში მომხდარი გახმაურებული ქურდობის შემდეგ საფრანგეთის პოლიცია ეძებს ოთხ პირს, რომლებიც სკუტერებით მიიმალნენ და მუზეუმიდან რვა ექსპონატი გაიტაცეს. საფრანგეთის პროკურატურა და პრეზიდენტი ემანუელ მაკრონი დარწმუნებულები არიან, რომ გამოძიება წარმატებით დასრულდება.

პარიზის მთავარი პროკურორის, ლორა ბეკოს განცხადებით, ლუვრის ძარცვასთან დაკავშირებით პოლიცია ოთხი მძარცველს ეძებს. შინაგან საქმეთა მინისტრმა ლორან ნუნიესმა აღნიშნა, რომ დანაშაული „ძალიან გამოცდილი ჯგუფის“ მიერაა ჩადენილი.

ბეკოს თქმით, ოთხი მამაკაცი იყო „დამრტყმელი ჯგუფი“, რომელმაც ლუვრის აპოლონის გალერეა დააცარიელა – სივრცე, სადაც საფრანგეთის სამეფო ძვირფასეულობა ინახებოდა. ისინი ნიღბებით იყვნენ, რომლებიც სახეებს უფარავდატ და გაქცევა მოახერხეს ძლიერი სკუტერებით. ნუნიესის ვარაუდით, მძარცველები შესაძლოა უცხოელები იყვნენ.

პირველადი ინფორმაციით, დამნაშავეებმა სატვირთო ამწე გამოიყენეს, რათა ფანჯარა გაეტეხათ და პირდაპირ შესულიყვნენ პირველ სართულზე (შეგახსენებთ, რომ ფრანგული პირველი სართული ჩვენებური მეორე სართულია, ჩვენებურ პირველ სართულს კი ფრანგები მიწისპირა სართულს – რედშოსეს / rez-de-chaussée -ს უწოდებენ) მდებარე აპოლონის გალერეაში. ძარცვის მთელმა ოპერაციამ სულ რაღაც შვიდ წუთს გასტანა, – განაცხადა ნუნიესმა. ტელეკომპანია BFM-მა გაავრცელა ვიდეო, სადაც ჩანს, როგორ ხსნის ერთ-ერთი ყვითელჟილეტიანი მძარცველი ვიტრინას. მოგვიანებით სწორედ ეს ჟილეტი და ერთ-ერთი სკუტერი იპოვა პოლიციამ.

EN DIRECT
Cambriolage au Louvre: la vidéo du cambriolage depuis l'intérieur du muséehttps://t.co/Bm4L1TxmcI pic.twitter.com/vM6WnYFiMn

— BFMTV (@BFMTV) October 19, 2025

გატაცებულია ძვირფასეულობა ნაპოლეონისა და ჟოზეფინას კოლექციიდან

მძარცველებმა გაიტაცეს რვა საგანი ნაპოლეონ ბონაპარტისა და იმპერატრიცა ჟოზეფინას ძვირფასეულობის კოლექციიდან – მათ შორის, ყელსაბამი, ბროში და დიადემა. ერთ-ერთი ექსპონატი – ძვირფასი ქვებით შემკული გვირგვინი – შემთხვევის ადგილზე დარჩა. „ეჭვი არ მეპარება, რომ მუზეუმი უახლოეს დღეებში შეძლებს მოპარული ნივთების დაბრუნებას“, – აღნიშნა პარიზის მთავარმა პროკურორმა და დასძინა, რომ საქმეზე დაახლოებით 60 გამომძიებელი მუშაობს.

მაკრონი: ლუვრის ძარცვა არის თავდასხმა ჩვენს კულტურულ მემკვიდრეობაზე

საფრანგეთის პრეზიდენტმა ემანუელ მაკრონმა ლუვრის ძარცვას უწოდა „თავდასხმა იმ მემკვიდრეობაზე, რომელსაც ვაფასებთ და ვიცავთ“. „ჩვენ დავაბრუნებთ ნამუშევრებს, ხოლო დამნაშავეები პასუხს აგებენ. ამისთვის ყველაფერი კეთდება – პარიზის პროკურატურის ხელმძღვანელობით“, – განაცხადა მაკრონმა.

ლუვრი მსოფლიოს ყველაზე პოპულარული მუზეუმია – ყოველწლიურად მას 9 მილიონზე მეტი ადამიანი სტუმრობს. აპოლონის გალერეაში ინახება მუზეუმის ყველაზე ფასეული ისტორიული კოლექციები. ის 2020 წლის 15 იანვარს კვლავ გაიხსნა ექსპოზიციის რეორგანიზაციისთვის საჭირო შესვენების შემდეგ.

ნანა ძნელაძე

ამ კვირაში ცაზე ერთდროულად რამდენიმე მნიშვნელოვანი ასპექტი იჩენს თავს, რაც ენერგიების ინტენსიურ ცვლილებას მოიტანს.

21 ოქტომბერს მერკურისა და იუპიტერის ოპოზიცია გადაჭარბებულ დაპირებებსა და რეალობის დამახინჯებულ აღქმასთან ასოცირდება. შესაძლოა, ადამიანებმა ზედმეტად ოპტიმისტური (ფაქტობრივად, შეუსრულებელი) დაპირებები მისცენ ერთმანეთს ან წამოიწყონ საქმე, რომელიც უფრო რთული აღმოჩნდება, ვიდრე თავდაპირველად ჩანდა. მნიშვნელოვანია, გადაამოწმოთ ინფორმაცია და მხოლოდ ენთუზიაზმს არ დაეყრდნოთ.

23 ოქტომბერს მზე მორიელის ნიშანში შევა – ეს გარდამტეხი პერიოდია, რომელიც სიღრმისეულ თემებსა და შინაგან სიმართლეზე კონცენტრაციას მოითხოვს. ემოციები ინტენსიური იქნება, ინტუიცია კი – გამძაფრებული.

24 ოქტომბერს ვენერასა და პლუტონის კვადრატი პირად ურთიერთობებში დაძაბულობასა და ექსტრემალურ ემოციურ „აფეთქებებს“ მოიტანს. ურთიერთობებში დომინაციისა და კონტროლის სურვილი შესაძლოა დაპირისპირებად გადაიქცეს. ამის თავიდან ასაცილებლად სასურველია ემოციების გაკონტროლება და გულწრფელი საუბარი.

25 ოქტომბერს მარსი სატურნთან ჰარმონიულ ტრინს ქმნის – ეს ასპექტი ძალის, ნებისა და რეალისტური მოქმედების ენერგიას ზრდის. ყველა, ვინც მიზანმიმართულად იმოქმედებს, შეძლებს სტაბილურ შედეგებს მიაღწიოს.

კვირის ბოლოს ემოციური ფონი თანდათან დასტაბილურდება, თუმცა მაინც დარჩება რეალობასა და სურვილებს შორის ბალანსის პოვნის საჭიროება.

კარგი დროა ძველი დავების მოსაგვარებლად, შეთანხმებების განსამტკიცებლად მოქმედებით, დაპირებების ნაცვლად და იმაზე ფოკუსირებისთვის, რაც ნამდვილად მნიშვნელოვანია.

Nostal.ge გთავაზობთ ამ კვირის გეგმას ზოდიაქოს თითოეული ნიშნისთვის – არ გამოტოვოთ!

ვერძი

ვერძებო, ეს კვირა მოტივაციისა და თვითდამტკიცების პერიოდი იქნება. სამსახურში შეიძლება მოულოდნელი დავალება მიიღოთ, რომელიც თქვენი ლიდერული თვისებების დემონსტრირებას მოითხოვს. თუ პასუხისმგებლობის აღების არ შეგეშინდებათ, შედეგი მალე გამოჩნდება. ფინანსურ საკითხებში სიფრთხილე გმართებთ – განსაკუთრებით 21 ოქტომბერს. პირად ცხოვრებაში მოსალოდნელია ემოციური გულახდილობა.

სასიკეთო დღეები: 22, 25.
არასასიკეთო დღე: 21.

კურო

ამ კვირის ენერგიის ფოკუსი პარტნიორობაზეა მიმართული – როგორც პირად, ისე საქმიან ურთიერთობებში. შესაძლოა გარკვეული უთანხმოებები ან გაუგებრობები გაჩნდეს, მაგრამ თუ მოთმინებას გამოიჩენთ, საბოლოოდ უკეთეს შედეგს მიიღებთ. კვირის მეორე ნახევარში ფინანსური სტაბილურობის გაძლიერების შანსი მოგეცემათ.

სასიკეთო დღეები: 23, 26.
არასასიკეთო დღე: 24.

ტყუპი

ტყუპებს კვირის დასაწყისში ბევრი საქმე და კომუნიკაცია გექნებათ. ახალ ინფორმაციას სიფრთხილით მიუდექით – შესაძლოა, ზოგიერთი წყარო არასწორი იყოს. სამუშაოში დაგჭირდებათ კონცენტრაცია და დეტალების მიმართ ყურადღება. კვირის ბოლოს შესაძლებელია სასიამოვნო შეხვედრა ან სასიყვარულო სიახლე.

სასიკეთო დღეები: 20, 25.
არასასიკეთო დღე: 21.

კირჩხიბი

ეს კვირა შინაგან დაბალანსებასა და ემოციურ გამძლეობას მოითხოვს. შესაძლოა სამსახურში სიტუაცია გართულდეს ან კოლეგასთან უთანხმოება წარმოიშვას, თუმცა მშვიდი მიდგომით დაძაბულ სიტუაციას ადვილად განმუხტავთ. ოჯახურ გარემოში სიახლე ან შერიგებაა მოსალოდნელი. შაბათ-კვირას უკეთ იგრძნობთ სითბოს და მხარდაჭერას ახლობლებისგან.

სასიკეთო დღეები: 22, 26.
არასასიკეთო დღე: 24.

ლომი

ლომებო, ეს პერიოდი თქვენს შემოქმედებით პოტენციალს გაააქტიურებს. შესაძლოა მოულოდნელად გაჩნდეს ახალი იდეები, პროექტები ან რომანტიკული ინიციატივები. ყურადღება მიაქციეთ ურთიერთობებს კოლეგებთან – კონფლიქტები ადვილად შეიძლება გაღრმავდეს. კვირის ბოლოს სასიამოვნო სიახლე გელოდებათ, რომელიც მოტივაციას აგიმაღლებთ.

სასიკეთო დღეები: 21, 25.
არასასიკეთო დღე: 23.

ქალწული

ამ კვირაში ბევრ სამუშაოსთან ერთად გარკვეულმა სტრესმაც შეიძლება შეგაწუხოთ, თუმცა მარსის ტრინი სატურნთან საშუალებას მოგცემთ, ყველაფერი დროულად და სტრუქტურულად მოაგვაროთ. ყურადღება მიაქციეთ ჯანმრთელობას – ორგანიზმს დასვენება სჭირდება. პარასკევს სასიამოვნო ამბავი შეიძლება მიიღოთ სამსახურიდან ან კოლეგისგან.

სასიკეთო დღეები: 22, 25.
არასასიკეთო დღე: 21.

სასწორი

თქვენი ენერგია კვლავ ურთიერთობებზეა მიმართული. პარტნიორთან ან თანამშრომელთან საერთო ენის პოვნა ახლა განსაკუთრებით მნიშვნელოვანია. შესაძლოა მცირე ფინანსური დაბრკოლება შეგექმნათ, მაგრამ სწორი დაგეგმვით პრობლემას სწრაფად მოაგვარებთ. შაბათ-კვირას მოტივაცია და შთაგონება დაგიბრუნდებათ.

სასიკეთო დღეები: 23, 25.
არასასიკეთო დღე: 20.

მორიელი

მზე თქვენს ნიშანში გადმოდის და თქვენთვის ახალი ციკლი იწყება. ამ ენერგიას შეუძლია ძველი ტვირთის მოცილება და ახალი მიზნების დასახვა. ფრთხილად იყავით ფინანსურ საკითხებში – ვენერა-პლუტონის კვადრატი კონფლიქტურ სიტუაციებს იწვევს. ემოციები შეიძლება გაძლიერდეს, ამიტომ მოერიდეთ მკვეთრ რეაქციებს.

სასიკეთო დღეები: 22, 25.
არასასიკეთო დღე: 24.

მშვილდოსანი

მშვილდოსნებისთვის ეს კვირა აქტიური კომუნიკაციისა და იდეების გაზიარების პერიოდია. შესაძლებელია საინტერესო შეთავაზება ან საქმიანი მოგზაურობა. ნუ მისცემთ თავს ზედმეტ იმედებს, სანამ დეტალებს არ დააზუსტებთ. კვირის ბოლოს მოსალოდნელია ემოციური თანხვედრა ან ახალი რომანტიკული ნაცნობობა.

სასიკეთო დღეები: 20, 25.
არასასიკეთო დღე: 21.

თხის რქა

თხის რქებო, ამ კვირას მეტი პასუხისმგებლობა და დაკვირვება დაგჭირდებათ. სამუშაოზე შედეგის მისაღებად მოთმინება და რეალისტური მიდგომა აუცილებელია. ფინანსურ სტაბილურობას ნელა მიაღწევთ, მაგრამ მყარი იქნება. შაბათ-კვირას კარგია დროის გატარება ოჯახურ გარემოში.

სასიკეთო დღეები: 22, 25.
არასასიკეთო დღე: 23.

მერწყული

მერწყულებო, კვირა აქტიურ და ინტელექტუალურ ტალღაზე ჩაივლის. ახალი იდეების განხორციელებას შეძლებთ, თუ ორგანიზებულად იმოქმედებთ. ემოციური დაძაბულობის თავიდან ასაცილებლად მოერიდეთ გადაღლას. მეგობრებთან კონტაქტი და მსუბუქი აქტივობები დაგეხმარებათ ენერგიის დაბალანსებაში.

სასიკეთო დღეები: 21, 25.
არასასიკეთო დღე: 24.

თევზები

ამ კვირაში ინტუიცია თევზების მთავარი მეგზური იქნება. ფინანსურ გადაწყვეტილებებში სიფრთხილე გმართებთ – ჯობს ბრმად არავის მიენდოთ. შესაძლებელია მოულოდნელი შემოსავალი ან ძველი ვალის დაბრუნება. პირად ურთიერთობებში მეტი გულწრფელობა სასიკეთოდ იმოქმედებს. კვირის ბოლოს შემოქმედებითი შთაგონება დაგიბრუნდებათ.

სასიკეთო დღეები: 22, 26.
არასასიკეთო დღე: 21.

თამთა გურული

ამერიკულ პასპორტთან შედარებით, იტალიური პასპორტი უვიზოდ უფრო მეტ ქვეყანაში შესვლის უფლებას იძლევა. ეს ყოველწლიურმა Henley Passport Index-მა აჩვენა, რომელიც საერთაშორისო მობილობის გლობალურ ცვლილებებს ასახავს.

Henley & Partners-ის მიერ შედგენილ ახალ გლობალურ პასპორტების რეიტინგში იტალია მეოთხე ადგილზე გავიდა, რითაც კიდევ ერთხელ დაადასტურა თავისი მაღალი საერთაშორისო სტატუსი. შეერთებული შტატები კი – რომელიც ამ რეიტინგში აქამდე მუდმივი ლიდერი იყო – 20 წლის განმავლობაში პირველად „გავარდა“ პირველი ათეულიდან და მეთორმეტე ადგილი დაიკავა.

რეიტინგის ლიდერები

წელს სიის სათავეში სინგაპურია, რომლის პასპორტით ვიზის გარეშე 193 ქვეყანაში მოგზაურობაა შესაძლებელი. მას მოსდევს სამხრეთ კორეა და იაპონია, მათი მოქალაქეებისთვის უვიზოდ, შესაბამისად, 190 და 189 ქვეყანაში შესვლაა ხელმისაწვდომი.

იტალია, როგორც უკვე აღვნიშნეთ, მეოთხე ადგილზეა და ამ პოზიციას ინაწილებს გერმანიასთან, ლუქსემბურგთან, ესპანეთთან და შვეიცარიასთან ერთად 188 ქვეყანაში უვიზოდ შესვლის უფლებით. პირველ ხუთეულს ავსტრია, ბელგია, დანია, ფინეთი, საფრანგეთი, ირლანდია და ნიდერლანდები ასრულებენ, – ამ ქვეყნების მოქალაქეებს უვიზოდ 187 ქვეყანაში შეუძლიათ მოგზაურობა. საბერძნეთის პასპორტსაც ძლიერი პოზიცია აქვს – ის მეექვსე ადგილზეა (უნგრეთთან, ახალ ზელანდიასთან, პორტუგალიასთან, ნორვეგიასა და შვედეთთან ერთად) 186 ქვეყანაში უვიზოდ შესვლის უფლებით.

რატომ გამოეთიშა აშშ პირველ ათეულს

შეერთებული შტატები, რომლის პასპორტით ამჟამად 180 ქვეყანაში მოგზაურობაა შესაძლებელი, მე-12 ადგილზე „ჩამოქვეითდა“. ეს მნიშვნელოვანი კლება, უპირველესად, იმით არის განპირობებული, რომ ზოგიერთმა ქვეყანამ გააუქმა ან შეზღუდა უვიზო მიმოსვლა ამერიკის მოქალაქეებისთვის ორმხრივი სავიზო ლიბერალიზაციის არარსებობის გამო: საქმე ისაა, რომ აშშ მკაცრ სავიზო მოთხოვნებს ინარჩუნებს რიგი ქვეყნებისთვის და არ ჩქარობს მათ შემსუბუქებას.

ექსპერტები აღნიშნავენ, რომ ეს საერთაშორისო დიპლომატიის დონეზე „რბილი ძალის“ განაწილების სიღრმისეული ცვლილებების სიმპტომია. იწყება მრავალპოლუსიანი ერა, რომელშიც გლობალური ძალებიც კი კარგავენ უნივერსალურ პრივილეგიებს.

როგორ დგება რეიტინგი

Henley Passport Index-ი უკვე 15 წელზე მეტია ყოველწლიურად ქვეყნდება და ეფუძნება საერთაშორისო საჰაერო ტრანსპორტის ასოციაციის (IATA) მონაცემებს, რომელიც აანალიზებს 199 ქვეყნის პასპორტის მფლობელებისთვის სხვადასხვა ქვეყანაში უვიზო შესვლას.

პასპორტის „სიძლიერე“ განისაზღვრება იმ ქვეყნების რაოდენობით, რომელთა მონახულებაც მოქალაქეს შეუძლია უვიზოდ ან ვიზის ჩასვლისთანავე მიღებით. დოკუმენტი, რომელიც უზრუნველყოფს სხვადასხვა დანიშნულების ადგილას მოგზაურობას ზედმეტი ბიუროკრატიის გარეშე, „ძლიერად“ ითვლება, რადგან ის საქმიან, ტურისტულ თუ ოჯახურ მოგზაურობას ამარტივებს.

რატომ რჩება იტალიის პასპორტი „ძლიერი“

იტალიური პასპორტი თავის ძლიერ პოზიციას რამდენიმე ძირითადი ფაქტორის წყალობით ინარჩუნებს:

• ევროკავშირში წევრობა ევროზონის ყველა ქვეყანაში და მათ პარტნიორ ქვეყნებში გადაადგილების თავისუფლების გარანტიას იძლევა;
• სტაბილური დიპლომატიური ურთიერთობები მრავალ ქვეყანასთან;
• ქვეყნის მიმართ მაღალი ნდობა გლობალურ დონეზე;
• იტალიის მოქალაქეების, როგორც საიმედო მოგზაურების იმიჯი, რომლებიც მიგრაციულ საფრთხეს არ წარმოადგენენ;
• იტალიის მოქალაქეებს არა მხოლოდ შეუძლიათ იმოგზაურონ მსოფლიოს ნებისმიერ წერტილში, არამედ უფრო ადვილად მიიღონ გრძელვადიანი ბინადრობის ნებართვა, სწავლის ნებართვა და სამუშაო ნებართვა საზღვარგარეთ.

ქართული პასპორტი და საქართველოს მოქალაქეების შესაძლებლობები

საქართველო რეიტინგში ბოლო მონაცემებით 46-ე ადგილზეა – მის მოქალაქეებს უვიზოდ ან ჩასვლისთანავე ვიზის მიღებით 123 ქვეყანაში შეუძლიათ შესვლა.

ეს მაჩვენებელი საქართველოსთვის პოზიტიურია, თუმცა ყოველდღიური მოგზაურობისთვის მნიშვნელოვანია არა მხოლოდ რაოდენობა, არამედ ისიც, თუ რომელი ქვეყნებია ხელმისაწვდომი – ევროპის, აზია-წყნარი ოკეანის რეგიონის, ლათინური ამერიკის თუ სხვა.

რატომ არის მნიშვნელოვანი პასპორტის „სიძლიერე“?

• პასპორტი აღარ არის მხოლოდ საბუთი საზღვრის გადასალახად – ის ქვეყნის გლობალური ნდობისა და დიპლომატიური აქტიურობის ერთგვარი საზომია.
• მოქალაქისთვის, რომელსაც პასპორტი ბევრ ქვეყანაში უვიზოდ ან ჩასვლისთანავე ვიზის მიღებით უხსნის გზას, მოგზაურობა, საქმიანი ვიზიტები, სწავლა და დასაქმება ბევრად მარტივდება.
• შესაბამისად, პასპორტის „სიძლიერე“ ინდიკატორია – თუ რამდენად „ღიაა მსოფლიო“ კონკრეტული ქვეყნისთვის.

ნინო ხოშტარია

ახალი დიზაინის პასპორტის და პირადობის მოწმობის გაცემის ვადამ ისევ გადაიწია – ვინ თავისუფლდება პირადობის მოწმობის საფასურისგან

ტომაჰაუკები იქნება მთავარი თემა ვოლოდიმირ ზელენსკის და დონალდ ტრამპის ვაშინგტონში დაგეგმილი შეხვედრის დროს პარასკევს. კიევი ცდილობს შეიძინოს ეს შორი მოქმედების რაკეტები რუსეთის შეტევების გახშირების ფონზე, რაც განსაკუთრებით გამწვავდა ბოლო დღეებში.

ექვსი მეტრის სიგრძის ფრთოსანი რაკეტა, რომელიც თითქმის ტონა-ნახევარს იწონის… სწორედ ასეთ იარაღს – „ტომაჰაუკს“ ესწრაფვის ვოლოდიმირ ზელენსკი. ის დიდად განსხვავდება ამერიკელ ინდიელთა ცნობილი საბრძოლო ცულისგან, რომელსაც ეს სახელი თავდაპირველად ერქვა. უკრაინის არმიისთვის ამ ამერიკული რაკეტების შესაძლო მიწოდება იქნება მთავარი თემა ზელენსკისა და დონალდ ტრამპის შეხვედრაზე, რომელიც პარასკევს, 17 ოქტომბერს ვაშინგტონში გაიმართება.

2500 კილომეტრამდე სიშორე და მაღალი სიზუსტე

BGM-109 ტიპის „ტომაჰაუკს“ შეუძლია დაარტყას მიზანს 2500 კილომეტრამდე მანძილზე, რაც უკრაინას საშუალებას მისცემდა, რუსეთის სიღრმეში მდებარე ობიექტებზეც მიეტანა დარტყმა, მათ შორის, ურალის მთებამდე. ეს რაკეტა რთულად შესამჩნევია: იგი დაბალ სიმაღლეზე დაფრინავს და საათში დაახლოებით 880 კმ სიჩქარით მოძრაობს.

„ტომაჰაუკი“ აღჭურვილია კამერით, რომელიც რეალურ დროში გადასცემს მიყენებულ ზიანს. მას შეუძლია გარკვეული დროით ერთ ზონაში გაჩერება, მოძრავი სამიზნის აღმოჩენა და მისი დადევნება. ეს არის იარაღი, რომელსაც უზარმაზარი ზიანი შეუძლია მიაყენოს დიდ მანძილზე, თუმცა მისი ფასი ასევე მაღალია – უახლესი მოდელები ორ მილიონ ევრომდე ღირს.

ბრძოლის ისტორია

„ტომაჰაუკები“ პირველად 1991 წელს, სპარსეთის ყურის ომის დროს გამოიყენეს. მას შემდეგ 2300-ზე მეტი ასეთი რაკეტა გაუშვეს სხვადასხვა საბრძოლო ოპერაციაში. 2014 წელს ისინი დიდი მხარდაჭერა გახდა ამერიკული არმიისთვის ერაყსა და სირიაში „ისლამური სახელმწიფოს“ წინააღმდეგ ჩატარებულ ოპერაციებში.

მნიშვნელოვანი დახმარება

„ტომაჰაუკების“ მიღება უკრაინისთვის მნიშვნელოვან სტრატეგიულ უპირატესობას ნიშნავს – ეს რაკეტები საშუალებას მისცემდა მას, არა მხოლოდ მოიგერიოს, არამედ თავადაც განახორციელოს შეტევები. ბოლო თვეებში კიევმა ყურადღება გადაიტანა რუსეთის ნავთობის ინფრასტრუქტურაზე დრონებით დარტყმებზე და სწორედ ასეთი ოპერაციებისთვის „ტომაჰაუკები“ სრულიად შესაფერისია.

ომის კვლევის ინსტიტუტის თანახმად, ამ იარაღით უკრაინას საშუალება ექნებოდა, სამიზნეში ამოეღო 1945 რუსული სამხედრო ობიექტი, მათ შორის, 76 საჰაერო ბაზა და ერთ-ერთი უდიდესი დრონების ქარხანა რუსეთში. როგორც ერთ-ერთმა უკრაინიელმა მაღალჩინოსანმა აღნიშნა, კიევი აპირებს, შეიძინოს იმდენი „ტომაჰაუკი“, „რომ პუტინმა ეს იგრძნოს“. ერთი რაკეტის ფასი მილიონ ევროზე მეტია.

ISW continues to assess that the Kremlin is waging a reflexive control campaign to deter the United States from authorizing the sale of Tomahawk missiles to Ukraine by threatening a deterioration in US-Russian relations.

ISW assesses that the US provisioning of Tomahawk missiles… https://t.co/g9u0WzR4IB pic.twitter.com/TomWt9peX1

— Institute for the Study of War (@TheStudyofWar) October 16, 2025

ISW-ის ინფორმაციით, კრემლი აწარმოებს კამპანიას, რათა შეერთებულმა შტატებმა უარი თქვას უკრაინისთვის „ტომაჰაუკის“ ტიპის რაკეტების მიყიდვაზე და ამას აშშ-რუსეთის ურთიერთობების გაუარესების მუქარით ცდილობს.

ტრამპის ეჭვები და პუტინის გაფრთხილება

დონალდ ტრამპი იდეას კატეგორიულად არ ეწინააღმდეგება, თუმცა გარიგების დადების გარანტიასაც არ იძლევა. „თუ ეს ომი არ დასრულდება, შესაძლოა გავრისკო „ტომაჰაუკების“ გაგზავნა. ეს საოცარი იარაღია, ძალიან შემტევი. მაგრამ გულწრფელად რომ ვთქვა – რუსეთს ეს არ სჭირდება“, – განაცხადა მან.

თავის მხრივ, ვლადიმირ პუტინმა გააფრთხილა ტრამპი, რომ ამერიკასა და უკრაინას შორის ასეთი შეთანხმება იქნება „ახალი ესკალაცია“ და სერიოზულად დააზიანებს მოსკოვსა და ვაშინგტონს შორის ურთიერთობებს.

ნათარგმნია ხელოვნური ინტელექტის მიერ

სტატიის ორიგინალი: franceinfo.fr

p. s. „ტომაჰავკები“ ძალიან საშიში იარაღია. ისინი წარმოუდგენელი იარაღია. ეს შეიძლება ნიშნავდეს დიდ ესკალაციას და ბევრ ცუდ რამეს. ჩვენც გვჭირდება „ტომაჰავკები“. ჩვენ არ გვინდა იმის გადაცემა, რაც ჩვენი ქვეყნის დასაცავად გვჭირდება“, – განაცხადა დონალდ ტრამპმა ვოლოდიმირ ზელენსკისთან შეხვედრისას.

თავის მხრივ, ვოლოდიმირ ზელენსკიმ აშშ-ის პრეზიდენტს შესთავაზა, რომ „ტომაჰავკების“ სანაცვლოდ უკრაინა ამერიკას საკუთარი წარმოების ათასობით უპილოტო საფრენ აპარატს მიაწვდის. მისი თქმით, ასეთი თანამშრომლობა ორივე მხარისთვის მომგებიანი იქნება.

ტრამპს შეთავაზებაზე დადებითი პასუხი არ გაუცია, თუმცა თქვა, რომ „ისინი [უკრაინა] ძალიან კარგ დრონებს აწარმოებენ“.

მოგვიანებით უკრაინის პრეზიდენტმა „ენბისი ნიუსს“  ინტერვიუ მისცა და „ტომაჰავკების“ საკითხზე ისაუბრა.

„კარგია, რომ „ტომაჰავკებთან“ დაკავშირებით პრეზიდენტმა ტრამპმა არ თქვა „არა“, მაგრამ არც „დიახ“ უთქვამს…“ – აღნიშნა ზელენსკიმ და იმედი გამოთქვა, რომ ამ საკითხზე დიალოგი გაგრძელდება.

„… ვფიქრობ, პუტინს ეშინია, რომ შეერთებული შტატები „ტომაჰავკებს“ მოგვაწვდის და ვფიქრობ, მას ნამდვილად ეშინია, რომ მათ გამოვიყენებთ“, – განაცხადა ვოლოდიმირ ზელენსკიმ.

მისივე თქმით, „ტომაჰავკის“ რაკეტებით შეიარაღებული უკრაინული ჯარი ვლადიმირ პუტინისთვის რეალურ საფრთხეს წარმოადგენს.

მოამზადა ნანა ძნელაძემ

საბერძნეთის პარლამენტმა 16 ოქტომბერს დაამტკიცა კანონი, რომელიც საშუალებას აძლევს დამსაქმებლებსა და თანამშრომლებს, ურთიერთშეთანხმებით დააწესონ 13-საათიანი სამუშაო დღე. კანონპროექტი მმართველმა პარტიამ „ნეა დიმოკრატიამ“ შეიტანა, რომელსაც პარლამენტში უმრავლერსობა აქვს. ამის შესახებ გამოცემა cnn.gr წერს.

შრომის მინისტრმა ნიკი კერამეოსმა განაცხადა, რომ „არსებობენ თანამშრომლები, რომლებიც თავად ითხოვენ სამუშაო დღის გახანგრძლივებას“, თუმცა ოპოზიცია და პროფკავშირები კანონპროექტს მკაცრად ეწინააღმდეგებიან.

ოპოზიციის და პროფკავშირების მწვავე პროტესტი

სოციალისტური პარტიის ლიდერმა ნიკოს ანდრულაკისმა განაცხადა, რომ დასაქმებულთა „შრომითი უფლებები სერიოზულად ირღვევა“, ხოლო „სირიზას“ თავმჯდომარე სოკრატის ფამელოსმა აღნიშნა, რომ საბერძნეთი უკვე იქცა დაბალანაზღაურებადი შრომის ქვეყნად, სადაც ადამიანები უფრო მეტს მუშაობენ, მაგრამ ნაკლებს იღებენ.

პროფკავშირები აფრთხილებენ მთავრობას, რომ 13-საათიანი სამუშაო დღე საფრთხეს უქმნის მუშაკთა ჯანმრთელობას, უსაფრთხოებასა და პირად ცხოვრებას. მათ თქმით, „მიუხედავად იმისა, რომ კანონი ფორმალურად ნებაყოფლობაზეა დაფუძნებული, ბევრი ვერ შეძლებს უარის თქმას, რადგან ძალთა ბალანსი დამსაქმებლებსა და მუშაკებს შორის დარღვეულია“.

მასობრივი გაფიცვები და ტრანსპორტის პარალიზება

კანონის მიღებამდე საბერძნეთში გაიმართა გაფიცვები და დემონსტრაციები, რომელთა შედეგად ათენსა და სხვა დიდ ქალაქებში პარალიზებული იყო საზოგადოებრივი ტრანსპორტი და მუნიციპალური სერვისები.

სახელმწიფო სექტორის მუშაკთა პროფკავშირების – ADEDY-ს განცხადებით, „მოქნილი სამუშაო გრაფიკი“ სინამდვილეში ნიშნავს რვასაათიანი სამუშაო დღის გაუქმებასა და გადაჭარბებული ექსპლუატაციის ლეგალიზებას.

უპრეცედენტო გადაწყვეტილება ევროკავშირში

გამოცემა Politico-ს შეფასებით, საბერძნეთი გახდა პირველი ქვეყანა ევროკავშირში, სადაც ოფიციალურად დაშვებულია 13-საათიანი სამუშაო დღე. ცვლილება განსაკუთრებით შეეხება ქარხნების, სასტუმროებისა და საცალო ქსელების მუშაკებს, რომელთაც შესაძლოა უფრო გრძელ ცვლებში მოუწიოთ მუშაობა.

ნინო ბაჯელიძე

ცნობილი იტალიელი მეღვინე, 44 წლის მატეო ფორნერი, კასტელკუკოში (ტრევიზოს პროვინცია) მდებარე პატ დელ კოლმელის (Pat del Colmél) ღვინის ქარხნის მფლობელი და დირექტორი, საკუთარი მცირე ზომის ყურძნის საწნეხის ქვეშ მოხვდა და გარდაიცვალა.

Corriero Del Veneto-ს ცნობით, „მას ეს ათასჯერ ჰქონდა გაკეთებული“ – კერძოდ, სამუშაოს დასრულების შემდეგ საწნეხის გაწმენდა – და ამჯერადაც ეგონა, რომ აპარატი გამორთული იყო, მაგრამ მოულოდნელად მანქანა ისევ ჩაირთო და საშინელი სცენა პირდაპირ მატეოს მამის თვალწინ დატრიალდა – საწნეხმა ჯერ დაბლოკა მსხვერპლი და შემდეგ კისერი გადაუმტვრია. მატეო fორნერი თითქმის მყისიერად გარდაიცვალა.

სასოწარკვეთილმა მამამ – ლინო ფორნერმა და მისმა ოჯახმა განგაში ატეხეს, მატეოს მამამ 118-ზე დარეკა, პოლიცია და სასწრაფო დახმარება გამოიძახა, თუმცა მედიკოსები ვერაფერს გახდნენ – მათ მხოლოდ გარდაცვალების ფაქტი დაადასტურეს.

პოლიციამ ჯერ ვერ დაადგინა, თუ რატომ ჩაირთო საწნეხი მოულოდნელად.

გამოცემის ცნობით, მატეო ფორნერი გრაპის რაიონში კარგად იყო ცნობილი არა მხოლოდ, როგორც კომპანიის მფლობელი, არამედ, როგორც თანამედროვე მეღვინეობის სექტორში დიდი გამოცდილების მქონე სპეციალისტი. იგი, აგრეთვე, იყო ქალაქის მერის არჩეული მრჩეველი.

ტრევიზოს პროკურატურამ მომხდართან დაკავშირებით გამოძიება დაიწყო.

ნინო ხოშტარია