“Qarabağ”ın baş məşqçisi Qurban Qurbanov sabah Avropa Liqasında “Vestri”yə qarşı keçiriləcək oyunla bağlı fikirlərini bölüşüb.

Futbolpress.az xəbər verir ki, mütəxəssis matçla bağlı bunları deyib:

– Komanda tam hazırdır. Rəqibi yaxından tanıyırıq. Uzun səfərə gəldik. Dünən demək olar ki, bütün günü yolda olduq. Bir az yorğunluq var. Buna baxmayaraq, inanıram ki, futbolçular sabahkı matça hazır olacaqlar. Hava şəraiti də yaxşıdır. Əsl futbol havasıdır. Heyətdə dəyişikliklər ola bilər. Sabaha kimi vaxtımız var”.

“Kəpəz” yoxlama oyununda “Qəbələ”yə uduzub.

Futbolpress.az xəbər verir ki, Gəncə təmsilçisinin baş məşqçisi Azər Məmmədov klubun saytına açıqlamasında 1:2 hesabıyla bitən matçı şərh edib:

“Premyer Liqaya hazırlıq dövrünün ilk mərhələsinin yekununda “Qəbələ” ilə yoxlama oyunu keçirdik. Qarşılaşmanın birinci hissəsində əsas heyət üzvlərinə şans verdik. Futbolçular çalışdılar, tapşırıqları yerinə yetirməyə cəhd göstərdilər və ümumilikdə pis təsir bağışlamadılar.

Qarşıda bizi daha bir neçə yoxlama görüşü gözləyir. Məqsədimiz oyundan-oyuna inkişaf etmək, çatışmazlıqları aradan qaldırmaq və komandanın oyununu daha da təkmilləşdirməkdir. Bu matç göstərdi ki, bəzi mövqelərdə güclənməyə ehtiyacımız var. Həmin mövqelərə uyğun futbolçuların transferi istiqamətində iş aparırıq. İnanıram ki, heyəti tam formalaşdırdıqdan sonra istədiyimiz komandanı quracağıq.

İkinci hissədə isə gənc futbolçulara, Akademiyamızın yetirmələrinə şans verdik. Onlardan bəziləri əsas komandanın heyətində ilk dəfə meydana çıxırdı. Təbii ki, həyəcan hiss olunurdu və bu, normaldır. Buna baxmayaraq, onlar özlərini yaxşı tərəfdən göstərməyə çalışdılar”.

“Şamaxı” yeni mövsüm heyətini formalaşdırmaq üçün çalışmalarını davam etdirir.

Futbolpress.az xəbər verir ki, “şirlər” israilli yarımmüdafiəçi Teşager Dequnu heyətinə qatıb. 25 yaşlı futbolçu ilə iki (1+1) illik müqavilə imzalanıb.

Degunun son klubu İsrailin “İroni” (Modin) olub.

“Sabah” Çempionlar Liqasında I təsnifat mərhələsində cavab oyununda TNS-i məğlub edib – 2:0.

“Bayquşlar”ın futbolçusu Umarali Rahmonaliyev “Futbolpress.az“a açıqlamasında nəticəni dəyərləndirdi:

“Oyun planına və intizama əməl etməməli, həm də xarakter göstərməli idik. Fikrimcə, bunu bacardıq. İlk oyundan sonra özümüzə daha çox inanırdıq, amma ilk matçdan sonra cütün taleyinin həll olunduğunu düşünmürdük. Biz hələ nəyə qadir olduğumuzu tam göstərməmişik. Qarşıda çox oyun var. Ümid edirəm ki, daha baxımlı futbol nümayiş etdirəcəyik və istədiyimiz nəticələri əldə edəcəyik”.

Özbəkistanlı yarımmüdafiəçi növbəti rəqibləri “KuPS” haqda fikirlərini bölüşdü:

“Rəqibi təhlil edəcəyik. Məncə, Çempionlar Liqasının təsnifat mərhələsində nə asan rəqib, nə də oyun olur. Buna görə də məqsədimizə çatmaq üçün hər oyuna ciddi hazırlaşacağıq. Qarşıda hazırlaşmaq üçün vaxtımız var. Bu oyunda da maksimumu edib, növbəti mərhələyə yüksəlmək istəyirik”.

Şahin Cəfərov

“Şirvan” yeni mövsüm heyətini formalaşdırmaq üçün çalışmalarını davam etdirir.

Futbolpress.az xəbər verir ki, bölgə təmsilçisi qapıçı Əmrah Buludu heyətinə qatıb. Futbolçu ilə bir illik müqavilə imzalanıb.

Əmrahın son klubu “Karvan-Yevlax” olub.

“Şirvan” yeni mövsümdə Azərbaycan II Liqasında mübarizə aparacaq.

Azərbaycan millisinin futbolçusu Toral Bayramovun formasını geyindiyi “Bursaspor” yoxlama oyunu keçirib.

Futbolpress.az xəbər verir ki, “timsahlar” “Pendikspor”la qarşılaşıb. Görüş 2:2 hesabıyla başa çatıb.

Toral bu görüşdə iştirak edib. O, penaltiyə səbəb olub və rəqib “11 metrə”dən ikinci qolu vurub.

Bayramov ötən ay “Qarabağ”dan “Bursaspor”a keçib.

Uelsin TNS komandasının baş məşqçisi Kreyq Harrison Çempionlar Liqasında “Sabah”a məğlub olduqları oyunu şərh edib.

Futbolpress.az xəbər verir ki, ölkəsinin mətbuatına danışan mütəxəssis 1:2 hesabıyla bitən matçla bağlı bunları deyib:

“Oyuna yaxşı başladıq. İlk 20 dəqiqədə bir neçə şans yaratdıq, ancaq qol vura bilmədik. “Sabah” kimi güclü komandalarla oyunlarda hər fürsəti dəyərləndirməlisən, yoxsa cəzalanacaqsan. Onlar sürətli əks-hücumdan hesabı açdılar və bununla da bizim üçün demək olar, oyun bitdi. Rəqibin keyfiyyətli futbolçuları var və bu keyfiyyət fərqi sözünü dedi. 

Fasilədə uşaqlara dedim ki, “məyus olmayın, meydana çıxın və vuruşun”. Qarşıda hələ avrokubok matçlarımız var, onlara hazır olmalıyıq”. 

“Sabah” iki oyunun nəticəsinə görə (2:0, 2:1) mərhələ adlayıb. “Bayquşlar” II təsnifatda Finlandiyanın “KuPS” komandası ilə qarşılaşacaq.

“Şirvan” yeni mövsüm heyətini formalaşdırmaq üçün çalışmalarını davam etdirir.

Futbolpress.az xəbər verir ki, bölgə təmsilçisi hücumçu Amil Yunanovu heyətinə qatıb. Futbolçu ilə bir illik müqavilə imzalanıb.

Amilin son klubu  “ASTA Mingəçevir” olub.

Hücumçu karyerası ərzində “Sumqayıt”, “Səbail” kimi komandalarda çıxış edib. O, Azərbaycan yığmasında 5 oyunda forma geyinib.

“Şirvan” Azərbaycan II Liqasında mübarizə aparacaq.

UEFA Çempionlar Liqasının I təsnifat mərhələsinin cavab oyununda TNS-i (Uels) məğlub edən “Sabah” Azərbaycanın UEFA reytinqi xallarını artırıb.

Futbolpress.az xəbər verir ki, 2:1 hesablı qələbə sayəsində Azərbaycanın aktivinə 0.250 əmsal əlavə olunub. Ölkəmiz 19.563 göstərici ilə reytinqdə 26-cı pillədə qərarlaşıb.

25-ci sırada 20.750 xalla İsrail, 27-ci pillədə isə 18.313 əmsalla Bolqarıstan yer alıb.

Reytinq cədvəlinə 98.520 xalla İngiltərə başçılıq edir.

“Sabah”ın baş məşqçisi Valdas Dambrauskas Çempionlar Liqasında TNS-ə qalib gəldikləri oyundan sonra fikirlərini bölüşüb.

Futbolpress.az xəbər verir ki, mütəxəssis oyundan sonra baş tutan mətbuat konfransında bunları deyib:

– İlk növbədə futbolçuları, Azərbaycan futbol ictimaiyyətini və “Sabah” azarkeşlərini UEFA Çempionlar Liqasının ikinci təsnifat mərhələsinə yüksəlməyimiz münasibətilə təbrik etmək istəyirəm. Düşünürəm ki, ən vacib məqam məhz budur. İki oyundan ibarət qarşılaşmaya bütöv şəkildə baxsaq, bu matç mübarizənin ikinci hissəsi idi. İlk oyunda 2:0 hesabı ilə qalib gəlmişdik. Bilirdik ki, rəqib daha açıq futbol oynamalı və daha çox risk etməli olacaq.

– Qələbəni necə şərh edərdiniz? 

– Oyunun ilk dəqiqələri meydana və şəraitə uyğunlaşmaqla keçdi. Təxminən 15-20 dəqiqədən sonra oyuna tam daxil olduq. Əvvəlcə bir, daha sonra isə ikinci qolu vurduq. Düşünürəm ki, bundan sonra ikinci hissə bizim üçün daha çox formal xarakter daşıdı. Rəqib də, demək olar ki, matçın bitməsini gözləyirdi. Bəzi futbolçularımız oyun təcrübəsi qazandılar. Əlbəttə, daha bir qol vurmaq istəyirdik. Bunun üçün imkanlarımız da oldu, lakin onlardan istifadə edə bilmədik. Rəqibin də bir neçə yarımfürsəti oldu, onlar da bu imkanları dəyərləndirmədilər. Matçın sonunda buraxdığımız qol isə səhvimizin nəticəsi idi. Qarşılaşmanı qapımızı toxunulmaz saxlamaqla başa vurmaq daha xoş olardı. Bununla belə, iki oyunun yekun nəticəsini, əlbəttə ki, müsbət qiymətləndirirəm.

– Növbəti turda Finlandiyanın “KuPS” komandası ilə qarşılaşacaqsınız… 

– İndi təhlükəsiz şəkildə Bakıya qayıtmalı və növbəti mərhələyə hazırlaşmağa başlamalıyıq. Çünki oyunlar çox sıx qrafiklə keçirilir. Artıq gələn çərşənbə axşamı ikinci təsnifat mərhələsində yeni rəqibə qarşı meydana çıxacağıq. Növbəti mərhələdə Finlandiyanın KuPS komandası ilə qarşılaşacağıq. Açığı, indiyədək bütün diqqətimi TNS-lə oyunlara yönəltmişdim. Əlbəttə, KuPS-un hansı taktiki düzülüşdən istifadə etdiyinə və necə futbol oynadığına müəyyən qədər baxmışam, lakin rəqibi hələ detallı şəkildə təhlil etməmişik.

Bakıya qayıdan kimi onların oyunlarını analiz etməyə başlayacağıq. Əlimizdə bütün materiallar və lazımi məlumatlar var. Qarşıdakı bir neçə gün ərzində çox çalışmalı və komandanı çərşənbə axşamı keçiriləcək oyuna ən yaxşı şəkildə hazırlamalıyıq.

Şahin Cəfərov 

Yeni mövsümə hazırlıqlarını davam etdirən “Qəbələ” və “Kəpəz” yoxlama oyununda üz-üzə gəlib.

Futbolpress.az xəbər verir ki, matç Qəbələ şəhər stadionunda baş tutub.

Görüş “qırmızı-qaralar”ın 2:1 hesablı qələbəsiylə başa çatıb.

“Sabah” UEFA Çempionlar Liqasının I təsnifat mərhələsinin cavab oyununda bu gün TNS-in qonağı olacaq.

Futbolpress.az xəbər verir ki, saat 21:30-da start götürəcək matça komandalar aşağıdakı heyətlə çıxacaqlar:

TNS: Natan Şepperd, Daniel Villiams, Dinel Simeu, Cek Bodenam, Daniel Redmond, Leo Smit, Dominik Korness, Eon Farrel, Rayan Brobbi, Cordan Villiams, Ris Haqs

“Sabah”: Stas Pokatilov, Rəhman Daşdəmirov, Erivaldo Almeyda, Timoteuş Puxaç, Akim Zedadka, İvan Lepinitsa, Umarali Rahmonaliyev, Velko Simiç, Aleksey İsayev, Aaron Maluda, Coy-Lens Mikels.

“Şamaxı” yeni mövsüm heyətini formalaşdırmaq üçün çalışmalarını davam etdirir.

Futbolpress.az xəbər verir ki, “şirlər” Portuqaliyanın “Paredes” klubundan mərkəz müdafiəçisi Rui Paçeçonu heyətinə qatıb. Bu barədə klubun mətbuat xidməti məlumat yayıb.

24 yaşlı futbolçu növbəti iki mövsümü “Şamaxı”da keçirəcək.

Məşqlərini davam etdirən “Araz-Naxçıvan” heyətini komplektləşdirmək istiqamətində də işləri davam etdirir.

Futbolpress.az xəbər verir ki, Naxçıvan təmsilçisi qvineyalı Mara Mohamedlə anlaşıb. Hücumçu ilə müqavilənin müddəti 1 illikdir.

Müxtəlif illərdə o, Fransanın “Loryan”, “Paris”, “Thonon Evian”, “Martiques”, “Stad Brioşan”, “Hyeres 83”, eləcə də Taylandın “Ratçaburi”, “Kançanaburi” klublarında çıxış edib. 30 yaşlı forvard 3 matçda Qvineya yığmasının formasını da geyinib.

Futbolçunun həm da Fransa vətəndaşlığı var.

Qeyd edək ki, “Araz-Naxçıvan” buna qədər Tərlan Əhmədli, Ömər Buludov, Slavik Alxasov, İbrahim Piriyev, Ülvi İsgəndərov, Rəşad Həsənov, Alberto Qarsia Fernandes, Alexandro Herrera, Rövlan Muradov, İssouf Paro, Artur Auqusto Da Silva, Mustafa Əhmədzadə və Luka Dumançiçlə yeni müqavilə imzalayıb.

“Sabah” bu gün UEFA Çempionlar Liqasında I təsnifat mərhələsinin cavab oyununa çıxıb.

Futbolpress.az xəbər verir ki, Valdas Dambrauskasın rəhbərlik etdiyi kollektiv səfərdə TNS ilə qarşılaşıb. Görüş Azərbaycan təmsilçisinin qələbəsiylə başa çatıb.

“Sabah” ilk oyunda rəqibini 2:0 hesabıyla məğlub edib.

UEFA Çempionlar Liqası
I təsnifat mərhələsi, cavab oyunu

14 iyul

21:30 TNS (Uels) – Sabah 1:2
Qollar: Lok, 89 – Mikels, 28, Rəhman, 42