ამ კვირაში ცაზე ოთხი მნიშვნელოვანი პლანეტარული ასპექტი ყალიბდება. ერთ-ერთი – მარსი-ნეპტუნის ტრინია (4 ნოემბერი), რომელიც შეიძლება დაკავშირებული იყოს რწმენასა და შეხედულებებზე დაფუძნებულ ქმედებებთან. ამ ასპექტის გავლენის ქვეშ მყოფი ადამიანი მზადაა, თავგანწირვით იმოქმედოს, თუ დარწმუნებულია, რომ მისი ქმედებები სიკეთეს და სამართლიანობას ემსახურება. შეიძლება გააქტიურდეს რელიგიური მოტივებით მოქმედება.

4-5 ნოემბერი, მარსი-ურანის ოპოზიცია – ეს ასპექტი მიანიშნებს მოულოდნელ ფორსმაჟორულ მოვლენებზე, რომლებმაც შეიძლება მკვეთრად შეცვალონ გეგმები და გარემოებები. ის ხშირად ასოცირდება ტექნიკურ გაუმართაობასთან, ტრანსპორტის ან სამრეწველო ავარიებთან. ფსიქოლოგიური თვალსაზრისით, ეს ასპექტი შეიძლება ასოცირდეს სპონტანურ, უკონტროლო ქმედებებთან, მათ შორის, აგრესიულ ქცევასთან, რომელიც დანაშაულის ზღვარზეა. ამ ასპექტის გავლენის ქვეშ მყოფმა ადამიანმა შეიძლება გამოავლინოს აგრესია, ან პირიქით – აგრესიის მსხვერპლი გახდეს. იზრდება ტრავმის რისკი.

6-7 ნოემბერი, მარსი-პლუტონის სექსტილი – ეს ასპექტი აძლიერებს იმ ადამიანების ენერგეტიკულ პოტენციალს, რომელთა ზოდიაქოზეც მოქმედებს. სპორტული ვარჯიშები და შეჯიბრებები წარმატებულია, შესაძლებელია პირადი რეკორდების დამყარება, ხოლო შესრულებისა და გამძლეობის დონე გაუმჯობესებულია. ფიზიკური აქტივობა შედეგიანია.

8 ნოემბერი, ვენერა-პლუტონის კვადრატი – დაძაბულ სიტუაციაში პლანეტების ამ კავშირმა შეიძლება გამოიწვიოს სექსუალური მიზიდულობის გაზრდა, სიყვარულის ობიექტის ფლობის ვნებიანი სურვილი. ასევე, შესაძლებელია ეჭვიანობა. უფრო ზოგადად, ეს ასპექტი ხელს უწყობს მესაკუთრეობის ინსტინქტის გაძლიერებას. საყვარელი ადამიანის დაუფლების გარდა, შეიძლება გაძლიერდეს მატერიალური ფასეულობების, ქონების დაუფლებისა და ფულის შოვნის სურვილი.

ამ კვირაში ენერგია უფრო სწრაფად იწყებს დინებას, სურვილები ყალიბდება და ოცნებები წინ გადადგმულ ნაბიჯს მოითხოვს. Notal.ge-ს ეს ჰოროსკოპი დაგეხმარებათ. კარგად მოემზადოთ ახალი კვირისთვის და წარმატებით გადაჭრათ მიმდინარე საკითხები.

ვერძი

მოსალოდნელია, რომ ეს კვირა ნათელი, დინამიკური და პროდუქტიული იქნება. ბევრთან გექნებათ ურთიერთობა, მაგრამ ნუ იჩქარებთ ყველა ახალი ნაცნობის მეგობრად დამატებას. სამშაბათი განაკუთრებით აქტიური დღე იქნება, სავსე დადებითი ემოციებით. სამსახურში ენერგიულობა განსაკუთრებით სასარგებლოა კარიერული წინსვლისთვის. ყურადღებით მოუსმინეთ კოლეგების რჩევებს და ერთად იმუშავეთ, გაითვალიწინეთ ერთმანეთის ინტერესები. თქვენი იუმორის გრძნობა დაგეხმარებათ, თავიდან აიცილოთ კამათი და კონფლიქტები.

შაბათ-კვირა საყვარელ ადამიანებს დაუთმეთ – მათ თქვენი ყურადღება სჭირდებათ.

სასიკეთო დღეები: 4, 7.

არასასიკეთო დღე: 3.

კურო

ამ კვირაში მოგიწევთ თქვენი ინტერესების დაცვა, რაც ზოგჯერ შეიძლება ძალიან რთული იყოს, მაგრამ დიდი ხნის პრობლემები უკანა რიგში გადაიწევს და თქვენი მოულოდნელი გადაწყვეტილებები კარგ შედეგებს მოგიტანთ. თქვენი შრომა შეუმჩნეველი არ დარჩება და შესაძლოა დაწინაურებითაც კი დაჯილდოვდეთ. იყავით გულწრფელი და მიუკერძოებელი. თუ მარტოხელა ხართ, დიდი შანსია, ამ კვირაში შეხვდეთ ადამიანს, რომელიც თქვენს გულს დაიპყრობს.

ნუ იჯდებით სახლში შაბათ-კვირას, იდეალურია მეგობრების მონახულება ან, უბრალოდ, ბუნებაში გასეირნება.

სასიკეთო დღეები: 6, 9.

არასასიკეთო დღე: 5.

ტყუპი

ამ კვირაში სამსახურში თქვენი საქმეები საკმაოდ წარმატებული იქნება. შესაძლოა გაძლიერდეს კავშირები უცხოელ ან ქალაქგარეთ მყოფ პარტნიორებთან. შეგიძლიათ პერსპექტიული შემოთავაზებებისა და წარმატებული შეხვედრების იმედი გქონდეთ. გონივრულ კომპრომისზე წასვლამ შეიძლება მოგება მოგიტანოთ. უბრალოდ ნუ აჰყვებით ემოციებს, შეინარჩუნეთ სიმშვიდე. გახსოვდეთ, თქვენ თავად ქმნით თქვენს სამყაროს მრავალი თვალსაზრისით, მოეპყარით მას ყურადღებითა და ზრუნვით. ნეგატიური ჭორების თავიდან ასაცილებლად იყავით გულწრფელი, მაგრამ ბევრს ნუ ილაპარაკებთ საკუთარ თავზე.

შაბათ-კვირას სახლში ინტერიერის განახლებას მარტო ნუ დაგეგმავთ, ოჯახის წევრების აზრიც გაითვალისწინეთ.

სასიკეთო დღეები: 4, 8.

არასასიკეთო დღე: 7.

კირჩხიბი

ამ კვირაში ყურადღება მიაქციეთ ახალ პროექტებს და ნუ მიიღებთ ნაჩქარევ გადაწყვეტილებებს. აჩქარებამ შეიძლება ფინანსური დანაკარგები გამოიწვიოს. მოაგვარეთ ნებისმიერი უმნიშვნელო მიმდინარე საკითხი. მოულოდნელი მოვლენები გავლენას მოახდენს თქვენს მომავალზე, მაგრამ იმისათვის, რომ ეს გავლენა დადებითი იყოს, შეეცადეთ, შეინარჩუნოთ წონასწორობა ნებისმიერ სიტუაციაში. გამოიჩინეთ მიზანდასახულობა და თავდაჯერებულობა თქვენი მიზნების მისაღწევად.

გაატარეთ შაბათ-კვირა მეგობრებთან ერთად ან სხვა კარგ კომპანიაში.

სასიკეთო დღეები: 4, 7.

არასასიკეთო დღე: 6.

ლომი

ამ კვირაში თქვენი დროის უმეტესი ნაწილი სამუშაო საკითხებს დაეთმობა. არ დაგავიწყდეთ საყვარელი ადამიანებისთვის მიცემული დაპირებები. სავარაუდოა კონფლიქტები. კრიტიკულად შეხედეთ პრობლემებს და მოერიდეთ სხვების დადანაშაულებას. წარმატების გასაღები ოპტიმიზმის არდაკარგვა და ნებისმიერ სიტუაციაში სიმშვიდის შენარჩუნებაა. შეეცადეთ, ჩაუღრმავდეთ ყველა პრობლემას და მიიღოთ სწორი გადაწყვეტილებები.

შაბათი სასიამოვნო სიურპრიზების დღეა. მარტოხელა ლომებისთვის შესაძლებელია რომანტიკული შეხვედრები ყველაზე მოულოდნელ და იდუმალ ვითარებაში.

სასიკეთო დღეები: 5, 8.

არასასიკეთო დღე: 7.

ქალწული

ამ კვირის პირველ ნახევარში დაგროვილი დავალებების შესრულების შემდეგ შეძლებთ ცოტათი მოდუნებას და საკუთარი თავის შემოქმედებითად გამოხატვას. ნუ უგულებელყოფთ საინტერესო აზრებსა და ორიგინალურ იდეებს. შესაძლოა ზოგიერთი მათგანის განხორციელების შესაძლებლობაც კი გქონდეთ. ეცადეთ, კოლეგებთან საუბრებში უფრო თავშეკავებული იყოთ. მოსალოდნელია პოზიტიური ცვლილებები პირად ცხოვრებაში.

შაბათ-კვირას ნუ აჰყვებით იმპულსურ სურვილებს.

სასიკეთო დღეები: 3, 7.

არასასიკეთო დღე: 6.

სასწორი

ნუ გამოტოვებთ ხელსაყრელ შესაძლებლობებს, რომლებსაც ბედი ამ კვირაში შემოგთავაზებთ. ყველაფერი მარტივად, თითქოს თავისით წარიმართება. კვირის პირველ ნახევარში რუტინული სამუშაოც კი სიამოვნებას მოგანიჭებთ, რომ აღარაფერი ვთქვათ შინაარსობრივ და შემოქმედებით აქტივობებზე, თუმცა შესაძლოა თქვენმა პარტნიორმა იმედები გაგიცრუოთ. არ იდარდოთ, ბევრ რთულ ამოცანას წარმატებით გაართმევთ თავს. ვარსკვლავების გავლენა ამ კვირაში დადებით ენერგიას შემატებს თქვენს პირად ურთიერთობებს, სადაც სიმშვიდე და ჰარმონია დაისადგურებს.

შაბათ-კვირას შეეცადეთ, დაეხმაროთ მათ, ვისაც თქვენი მხარდაჭერა სჭირდება.

სასიკეთო დღეები: 6, 9.

არასასიკეთო დღე: 4.

მორიელი

ამ კვირაში სამსახურში ცვლილებებზე სწრაფად რეაგირება და ინოვაციური გადაწყვეტილებების პოვნა დაგჭირდებათ. მყისიერი შედეგები გარანტირებულია და თქვენი ავტორიტეტიც გაიზრდება. შესაძლებლობა გექნებათ, ბიზნესში ლიდერის პოზიცია დაიკავოთ და თქვენი შემოსავალიც გაიზარდოს. შეძლებთ თქვენი მაღალი ინტელექტუალური შესაძლებლობების დემონსტრირებას, რაც შეიძლება კარიერული წინსვლისკენ მნიშვნელოვანი ნაბიჯი იყოს. პარასკევი შესანიშნავი დღეა დაწყებული საქმეების დასასრულებლად და დაპირებების შესასრულებლად.

შაბათ-კვირას სახლიდან არასაჭირო ნივთები მოიშორეთ, გაათავისუფლეთ სივრცე დადებითი ენერგიისთვის.

სასიკეთო დღეები: 6, 7.

არასასიკეთო დღე: 5.

მშვილდოსანი

ბევრი საინტერესო იდეა და ახალი გეგმა გაქვთ, მაგრამ ამ კვირაში ყველაზე პერსპექტიულზე უნდა გაამახვილოთ ყურადღება, რადგან ყველაფრის ერთდროულად განხორციელებას ვერ შეძლებთ. იფიქრეთ შემოსავლის ახალ წყაროზე. ღირს დროის გამოყოფა საქმიანი კავშირების დასამყარებლად. პრობლემები შეიძლება წარმოიშვას არაკეთილმოსურნეთა თავდასხმების ან ნათესავების უსაფუძვლო პრეტენზიების გამო. გაბედულად დაიცავით თქვენი ინტერესები. თქვენი კარგი განწყობა დადებითად იმოქმედებს თქვენს ფინანსურ მდგომარეობაზე და პირად ურთიერთობებზე.

შაბათ-კვირას ახალი ინფორმაცია გაგახარებთ. იყავით ყურადღებიანი საყვარელი ადამიანების მიმართ.

სასიკეთო დღეები: 5, 8.

არასასიკეთო დღე: 4.

თხის რქა

ამ კვირაში ფინანსური საკითხები პრიორიტეტული გახდება. გარემოებები ხელს შეუწყობს პროდუქტიულობას და შინაგან მობილიზებას, რაც მოლაპარაკებებში და პირადი ურთიერთობების განმტკიცებაში დაგეხმარებათ. კვირის ბოლოს შეიძლება მიიღოთ საინტერესო შემოთავაზება, ან მოკლე მოგზაურობის შესაძლებლობა გქონდეთ. ნუ დაკარგავთ ენერგიას ეჭვებზე: ყველაფერი, რასაც ახლა დაიწყებთ, გრძელვადიან შედეგს გამოიღებს.

კარგი იქნება, თუ შაბათ-კვირას მეგობრებს შეხვდებით და მათთან ერთად თეატრში ან კინოში წახვალთ. ეს შინაგანი ჰარმონიის პოვნაში დაგეხმარებათ.

სასიკეთო დღეები: 5, 7.

არასასიკეთო დღე: 3.

მერწყული

შეეცადეთ, ზედმეტად არ იტრაბახოთ თქვენი მიღწევებით. კვირის პირველი ნახევარი საუკეთესოა ნებისმიერი დაუმთავრებელი საქმის დასასრულებლად და ხარვეზების გამოსასწორებლად. რაც უფრო მეტ ალტრუიზმს და მხარდაჭერას გამოიჩენთ სხვების მიმართ, მით უფრო პოზიტიური იქნება ცვლილებები თქვენს ცხოვრებაში. დაეყრდენით საყვარელი ადამიანების მხარდაჭერას და დაეხმარეთ ირგვლივ მყოფებს. გამოჩნდება ახალი პროექტები და გეგმები, რომლებიც წარმატებით განხორციელდება და შემოსავალს მოგიტანთ.

კვირის ბოლოს შეეცადეთ, მშვიდ გარემოში დაისვენოთ. მარტოხელა მერწყულების პირად ცხოვრებაში მოსალოდნელია ცვლილებები.

სასიკეთო დღეები: 6, 8.

არასასიკეთო დღე: 3.

თევზები

ამ კვირაში შეიძლება საკუთარ თავზე დიდი პასუხისმგებლობა აიღოთ. ნუ მისცემთ სხვებს თქვენთვის პირობების წამოყენების უფლებას და წარმატებას მიაღწევთ. დროა, საჭიროების შემთხვევაში, ხელახლა შეაფასოთ თქვენი ურთიერთობები ხელმძღვანელებთან და კოლეგებთან. ყველაფერში თავშეკავება და ზომიერება გამოიჩინეთ და ეს კარგ ნაყოფს გამოიღებს. ღირს პროფესიული უნარების გაუმჯობესებაზე ან ახალი პროფესიის შესწავლაზე ფიქრი. საყვარელი ადამიანები მხარს დაუჭერენ თქვენს მცდელობებს.

შაბათ-კვირას ოჯახის წევრებისგან სასიამოვნო სიურპრიზს ელოდეთ.

სასიკეთო დღეები: 7, 8.

არასასიკეთო დღე: 4

თამთა გურული

31 ოქტომბერს, გვიან საღამოს საბერძნეთის კუნძულ სალამინაზე, რომელიც ათენთან ახლოს მდებარეობს, სისხლიანი ძარცვა მოხდა, ლეტალური შედეგით. უცნობმა ბოროტმოქმედებმა 75 წლის ქალი საკუთარ სახლში მოკლეს.

პოლიციის მონაცემებით, სათვალთვალო კამერებმა დააფიქსირა, როგორ ჩაამტვრიეს ფანჯრის მინა ბოროტმოქმედებმა და ქალის სახლში შეიჭრნენ.

„კათიმერინის“ ინფორმაციით, მოხუცი ქალი მისმა ქალიშვილმა აღმოაჩინა სახლში გარდაცვლილი და პოლიციას შეატყობინა.

მსხვერპლს თავის არეში ჰქონდა მიყენებული მძიმე ტრავმა. გამომძიებლების ვარაუდით, გარდაცვლილ მოხუცს თავში მინის ბოთლი ჩაარტყეს, რომელიც დანაშაულის ადგილზე იპოვეს.

75 წლის ქალი საავადმყოფოში გადაიყვანეს, სადაც ექიმებმა გარდაცვალება დაადასტურეს.

გამოძიების წინასწარი ინფორმაციით, მძარცველებმა, სავარაუდოდ, იცოდნენ, რომ ხანდაზმული ქალი სახლში მარტო იყო.

პოლიცია ინტენსიურად იძიებს საქმეს, სწავლობს სათვალთვალო კამერების ჩანაწერებს და შესაძლო სამხილებს. რეგიონში მიმდინარეობს „ნადირობა“ მძარცველებზე ბოროტმოქმედთა ვინაობის დადგენისა და დაკავების მიზნით.

ნინო ხოშტარია

თურქეთის სასამართლომ 11 პირს სამუდამო პატიმრობა მიუსაჯა იანვარში ქვეყნის ჩრდილო-დასავლეთში, ბოლუს პროვინციაში, კარტალკაიას სათხილამურო კურორტზე მდებარე Grand Kartal Hotel-ში მომხდარი ხანძრის საქმეზე, რომელსაც 78 ადამიანის სიცოცხლე ემსხვერპლა.

ხანძრისას დაიღუპა 58 წლის ქართველი ემიგრანტი ქალი, ლაურა სალუაშვილიც. იგი კურორტზე იმ ოჯახთან ერთად იმყოფებოდა, სადაც მუშაობდა. სამწუხაროდ, ამ ოჯახის წევრებიც დაიღუპნენ: ორი მცირეწლოვანი გოგონა (6 და 9 წლისები) და მათი დედა. ლაურა სალუაშვილი, 6 წლის გოგონა და ბავშვების დედა ბოლით გაიგუდნენ, ხოლო უფროსი გოგონა დაიწვა და მისი ცხედრის ამოცნობა მხოლოდ მამის დნმ-ით გახდა შესაძლებელი.

ხანძარი 12-სართულიანი სასტუმროს მეოთხე სართულზე მდებარე რესტორანში 21 იანვარს, ღამის 03:21 საათზე გაჩნდა. ცეცხლი სწრაფად გავრცელდა, რის შედეგადაც 78 ადამიანი დაიღუპა, მათ შორის, 36 არასრულწლოვანი, 51 ადამიანი კი დაშავდა. ტრაგედია მოხდა სასკოლო არდადეგებისას, როდესაც სასტუმრო განსაკუთრებულად დატვირთული იყო. ხანძრის დროს Grand Kartal-ში 238 ადამიანი იმყოფებოდა, მათ შორის, ბევრი ოჯახი არასრულწლოვან ბავშვებთან ერთად. გარდაცვლილთა დიდი ნაწილი ბოლით გაიგუდა.

ამ ტრაგედიის გამო თურქეთში 22 იანვარი ეროვნული გლოვის დღედ გამოცხადდა.

გამოძიების ფარგლებში სამართალდამცველებმა დააკავეს 20-მდე პირი, მათ შორის, სასტუმროს მფლობელი – ჰალიტ ერგული. გამოძიების ცნობით, ხანძრის მიზეზი გახდა საუზმის მომზადებისას სამზარეულოში გრილზე დაღვრილი ცხიმი, რომელსაც ცეცხლი გაუჩნდა. ხანძრის ჩასაქრობად სამზარეულოს თანამშრომლებმა ცეცხლმაქრის ნაცვლად წყალი გამოიყენეს, რის გამოც ცეცხლი უფრო სწრაფად გავრცელდა და ზედა სართულებსაც მოედო. სასტუმროში არ ამუშავდა სახანძრო სიგნალიზაცია, ამიტომ დამსვენებლებმა, რომლებსაც ეძინათ, საფრთხის შესახებ დროულად ვერ შეიტყვეს.

თურქეთის პრეზიდენტმა რეჯეფ თაიფ ერდოღანმა დაღუპულთა ოჯახებს მიუსამძიმრა და განაცხადა, რომ მკაცრად დაისჯებოდა ყველა, ვისაც ამ ტრაგედიაში ბრალი მიუძღოდა.

ექსპერტების თქმით, სათხილამურო კურორტზე მდებარე სასტუმროს არ ჰქონდა ხანძარსაწინააღმდეგო უსაფრთხოების ელემენტარული ზომები.

სასამართლომ სამუდამო პატიმრობა მიუსაჯა 11 პირს, მათ შორის, სასტუმროს მფლობელს – ჰალიტ ერგულს, ადმინისტრაციის წევრებს, მენეჯერებს, პერსონალს, მერის ერთ-ერთ მოადგილეს და სახანძრო სამსახურის თანამშრომლებს.

ნინო ხოშტარია

ამავე თემაზე:

თურქეთში სასტუმროში მომხდარ ხანძარს ქართველი ემიგრანტი ქალი ემსხვერპლა

ევროკავშირის გაფართოების პოლიტიკამ ახალი დინამიკა შეიძინა უკრაინაში რუსეთის შეჭრის შემდეგ. 4 ნოემბერს ბრიუსელში ევროკავშირის წევრი სახელმწიფოების და კანდიდატი ქვეყნების წარმომადგენლები შეიკრიბებიან Euronews-ის მიერ ორგანიზებულ შეხვედრაზე, სადაც სწორედ გაფართოების თემაზე იმსჯელებენ.

ევროკავშირის გაფართოების საკითხი, რომელიც ბოლო პერიოდში პოლიტიკური ინტერესის ცენტრში მოექცა, ევროპელთა მნიშვნელოვანი მხარდაჭერით სარგებლობს: ახალი გამოკითხვის თანახმად, ევროპელთა ნახევარზე მეტი მხარს უჭერს ამ პროცესს.

კერძოდ, გამოკითხულთა 56% თანახმაა, რომ ევროკავშირის პროექტი სხვა ქვეყნებზეც გავრცელდეს. „ევრობარომეტრის“ მონაცემებით, გაფართოების ყველაზე ძლიერი მხარდამჭერები არიან შვედეთი (79%), დანია (75%) და ლიეტუვა (74%). ავსტრიაში (45%), ჩეხეთსა (43%) და საფრანგეთში (43%) მხარდაჭერა კი, პირიქით, შედარებით დაბალია.

გაფართოებას განსაკუთრებით დადებითად აფასებს ახალგაზრდობა: 15-24 წლის ევროპელთა 67% უჭერს მხარს ევროკავშირის გაფართოებას, ხოლო 25-39 წლის ასაკობრივ ჯგუფში ეს მაჩვენებელი 63%-ია. საერთო ჯამში, გამოკითხულ ევროპელთა ორი მესამედი მიიჩნევს, რომ გაფართოება ევროკავშირის მომავალი განვითარებისათვის სასარგებლო იქნება.

მათგან 37% ფიქრობს, რომ ახალი წევრების მიღება გააძლიერებს ევროკავშირის გავლენას გლობალურ დონეზე, ხოლო კიდევ 37% მიიჩნევს, რომ ის ეკონომიკურ ბაზარს და კონკურენტუნარიანობას გაზრდის. დამატებით, გამოკითხულთა 30%-ს მიაჩნია, რომ გაფართოება წევრ ქვეყნებს შორის სოლიდარობასაც განამტკიცებს.

თუმცა, როგორც ევროპული პოლიტიკის ცენტრის დირექტორის მოადგილე კორინა სტრატულატი აღნიშნავს, მხოლოდ საზოგადოებრივი მხარდაჭერა საკმარისი არ არის – საჭიროა პოლიტიკური ნება:

„სასურველი იქნებოდა, პოლიტიკოსებმა გამოიყენონ ეს საზოგადოებრივი მუხტი და გაბედული ნაბიჯები გადადგან ახალი წევრების მისაღებად და წინასწარი სამუშაოების დასასრულებლად, რათა მეტი ქვეყანა იყოს მზად გადაწყვეტილების მისაღებად“, – აცხადებს სტრატულატი.

გაფართოების საკითხი იქნება მთავარი თემა Euronews-ის მიერ ორგანიზებული სპეციალური სამიტისა, რომელიც 4 ნოემბერს ბრიუსელში გაიმართება.
სამიტზე კანდიდატი ქვეყნების ლიდერები ევროკავშირის წევრი სახელმწიფოების წარმომადგენლებთან ერთად იმსჯელებენ გაფართოების სირთულეებსა და გამოწვევებზე.

თუმცა, უნდა აღინიშნოს, რომ საზოგადოების ნაწილს გაფართოება აშფოთებს: გამოკითხულთა 40% შეშფოთებულია უკონტროლო მიგრაციით, 39% – კორუფციისა და დანაშაულის რისკებით, ხოლო 37% – გადასახადების ზრდითა და ფინანსური ტვირთით.

ევროპელთა აზრით, გაფართოება წარმატებული იქნება მხოლოდ იმ შემთხვევაში, თუ მას თან ახლავს კანონის უზენაესობის უზრუნველყოფა და კორუფციასთან ბრძოლა (44%). ასევე, მოქალაქეთა 38% მიიჩნევს, რომ კანდიდატმა ქვეყნებმა მკაფიო ვალდებულებები უნდა აიღონ ევროკავშირის რეფორმების განსახორციელებლად.

ევროპის საზოგადოებრივი მაუწყებლების ახალი ამბები, ნათარგმნი ხელოვნური ინტელექტის მიერ.

ორიგინალური სტატია: ertnews.gr

4 დღე დარჩა ქონებრივი დეკლარაციის შესავსებად მათთვის, ვისაც კანონი ამას ავალდებულებს. დეკლარაციის შევსების ვადა, წესით, პირველ ნოემბრამდე იყო, თუმცა რადგან პირველი ნოემბერი შაბათია, ვადა 3 ნოემბრამდე – ორშაბათამდე გახანგრძლივდა.

ვინ არის ვალდებული, რომ დეკლარაცია შეავსოს

ყველა, ვისმა შემოსავალმაც გასულ წელს (2024 წლის 1 იანვრიდან 31 დეკემბრის ჩათვლით) 40 000 ლარს გადააჭარბა (დარიცხული გადასახადების ჩათვლით) და ქონებასაც ფლობს, ვალდებულია დეკლარაცია შეავსოს, შემდეგ კი გადასახადი გადაიხადოს.

თუ ოჯახთან ერთად ცხოვრობთ და მთლიანად თქვენი ოჯახის შემოსავალი 40 000 ლარზე მეტი იყო (დარიცხული გადასახადების ჩათვლით), დეკლარაციის შევსების ვალდებულება გეკისრებათ. ოჯახის წევრებად ითვლებიან ის ადამიანები, რომლებთან ერთადაც ხანგრძლივი პერიოდის განმავლობაში ცხოვრობთ.

იგივე წესი ვრცელდება ინდმეწარმეებზეც.

სად და როგორ უნდა შეავსოთ დეკლარაცია?

თქვენი შემოსავალი ყველა გადასახადის ჩათვლით შეგიძლიათ ნახოთ rs.ge-ზე – შემოსავლების სამსახურის ვებგვერდზე: მენიუდან გადადიხართ „ზოგად ინფორმაციაში“, შემდეგ კი – „პირადი შემოსავლის“ გვერდზე.

შეგიძლიათ მონაცემები სხვადასხვა პერიოდის მიხედვით მოიძიოთ, თუმცა ამ შემთხვევაში თქვენ გჭირდებათ 2024 წლის 1-ლი იანვრიდან 2024 წლის 31 დეკემბრამდე პერიოდის ინფორმაცია.

დეკლარაცია ივსება მხოლოდ ელექტრონულად, ამისათვის კი უნდა დარეგისტრირდეთ შემოსავლების სამსახურის ვებგვერდზე. რეგისტრაციის შემდეგ პირველივე გვერდზე გამოვა ველი – „ფიზიკური პირის ქონება“. ამ ველის არჩევის შემდეგ რამდენიმე წამში გამოჩნდება „ახალი დეკლარაცია“, რომელიც შეგიძლიათ შეავსოთ.

დეკლარაციაში მიუთითეთ, რამდენი იყო თქვენი შემოსავალი – 40-იდან 100 ათასამდე თუ უფრო მეტი. ამ შემოსავალზეა დამოკიდებული, რა თანხით დაიბეგრებით.

შემოსავლის მითითების შემდეგ ირჩევთ დეკლარაციის ფორმას – „ინდივიდუალურს“ ან „საოჯახოს“ და უთითებთ ქონებას (ოჯახის წევრებს შეუძლიათ ცალ-ცალკეც შეავსონ დეკლარაციები, თუმცა „საოჯახო დეკლარაციის“ შევსებისას დროს ზოგავთ).

ამის შემდეგ სისტემა ავტომატურად დაგითვლით ქონების გადასახადის სახით გადასახდელი თანხის ოდენობას.

ქონების გადასახადის გადახდის ვადა, ზოგადად, 15 ნოემბრამდეა, მაგრამ რადგან 15 ნოემბერი შაბათი და, შესაბამისად, არასამუშაო დღეა, წელს ვადა 17 ნოემბრამდე გადაიწევს.

ფინანსთა სამინისტროს შემოსავლების სამსახურის გაცხადება

ფინანსთა სამინისტროს შემოსავლების სამსახურმა ქონების გადასახადის წლიური დეკლარაციის შევსებასთან დაკავშირებით განცხადება გაავრცელა, რომელშიც აღნიშნავს, რომ წლიური დეკლარაციის წარდგენისა და ადმინისტრირების ნაწილში საკანონმდებლო ცვლილებები არ განხორციელებულა.

„გადასახადის გადამხდელთა ინტერესებიდან გამომდინარე, ფინანსთა სამინისტროს შემოსავლების სამსახური დეტალურად განმარტავს იმ პირთა კატეგორიას, რომელთაც, პირველი ნოემბრის ჩათვლით, ქონების გადასახადის წლიური დეკლარაციის წარდგენის ვალდებულება წარმოეშობათ.

დეკლარაციის წარდგენა ევალება ფიზიკურ პირს, მათ შორის, მეწარმე ფიზიკურ პირს: თუ პირის და მისი ოჯახის წევრების შემოსავალი გასული (2024) წლის მიხედვით აღემატება 40 000 ლარს და საკუთრებაში აქვთ დასაბეგრი ქონება (უძრავი ქონება, მათ შორის, დაუმთავრებელი მშენებლობა, შენობა-ნაგებობა ან მათი ნაწილი, იახტა (კატარღა), შვეულმფრენი, თვითმფრინავი და მსუბუქი ავტომობილ(ებ)ი (გარდა მოტოციკლისა და მოპედისა) და სხვა; ეკონომიკური საქმიანობის განხორციელების შემთხვევაში კი – ბალანსზე ძირითად საშუალებად აღრიცხული აქტივები, მოწყობილობები და სხვა.

ამასთან, დამატებით განვმარტავთ, რომ დეკლარაციის წარდგენის ვალდებულება არ წარმოეშობა პირს, თუ გასულ საგადასახადო წელს წარდგენილი აქვს დეკლარაცია ან დარიცხული აქვს გადასახადი და არ იცვლება მონაცემები (სისტემა ავტომატურად მოახდენს წინა წლის ინფორმაციის რეგისტრაციას).

ხაზგასმით გვინდა განვმარტოთ, რომ მოქმედი კანონმდებლობით არანაირი ცვლილება დასაბეგრი ქონების წლიური დეკლარაციის წარდგენისა და ადმინისტრირების ნაწილში არ განხორციელებულა. შესაბამისად, მეწარმე სუბიექტები/ფიზიკური პირები ვალდებულნი არიან, წარდგენილ დეკლარაციაში მონაცემები დასაბეგრი ქონების შესახებ შეიტანონ გასული საგადასახადო წლის მიხედვით, ხოლო დასაბეგრი მიწის შესახებ – მიმდინარე საგადასახადო წლის პირველი აპრილის მდგომარეობით.

ფინანსთა სამინისტროს შემოსავლების სამსახური მოუწოდებს მედიასაშუალებებს და ფინანსური/საბუღალტრო/საკონსულტაციო მომსახურების განმახორციელებელ კომპანიებს, ასევე ცალკეულ ექსპერტებს, თავი შეიკავონ ცრუ, გადასახადის გადამხდელებისთვის საზიანო ინფორმაციის გავრცელებისგან, რაც ემსახურება საზოგადოების შეცდომაში შეყვანას.

დეტალური ინფორმაცია ფიზიკურ პირთა მიერ ქონების გადასახადის გამოანგარიშებისა და გადახდის წესის შესახებ, მათ შორის ფიზიკური პირის ქონების გადასახადის გამომთვლელი, ასევე, ვიდეოინსტრუქცია და გზამკვლევი შეგიძლიათ იხილოთ ვებგვერდსა და შესაბამის ბმულებზე, ასევე, გაეცნოთ ვიდეოინსტრუქციას, ფიზიკური პირის ქონების გადასახადის ახალ გამომთვლელს.  ინფორმაციის მისაღებად, ასევე, შეგიძლიათ ისარგებლოთ შემოსავლების სამსახურის ციფრული სერვისებით – „RS ჩათი“ და „RS ბოტი“ ან დაუკავშირდეთ საკონსულტაციო სატელეფონო ცენტრს – 2 299 299“, – ნათქვამია შემოსავლების სამსახურის განცხადებაში.

ნანა ძნელაძე

საბერძნეთის პოლიციამ (ELAS) თესალონიკში, აეროპორტ „მაკედონიაში“ საქართველოს მოქალაქე 35 წლის მამაკაცი დააკავა. იგი ისრაელში გაფრენას ისრაელის მოქალაქის სახელზე გაცემული ყალბი პასპორტით ცდილობდა. ამის შესახებ „პროტოთემა“ წერს.

ELAS-ის ოფიციალური განცხადების თანახმად, მამაკაცი 2025 წლის 28 ოქტომბერს, დილით დააკავეს. საპასპორტო შემოწმებისას აეროპორტის უსაფრთხოების თანამშრომლებმა აღმოაჩინეს, რომ მგზავრის მიერ წარდგენილი დოკუმენტი ყალბი იყო.

„თესალონიკის აეროპორტის პოლიციის დეპარტამენტის უსაფრთხოების განყოფილების თანამშრომლებმა დააკავეს საქართველოს მოქალაქე 35 წლის მამაკაცი, რომელიც ისრაელში გაფრენას ცდილობდა ყალბი პასპორტით, სხვა პირის მონაცემებით“, – ნათქვამია პოლიციის განცხადებაში.

იმავე დღეს, გვიან საღამოს პოლიციამ დააკავა კიდევ ერთი უცხოელი, 29 წლის მამაკაცი, რომელმაც, როგორც შემოწმების შედეგად დაადგინა, უკანონოდ გადაკვეთა საზღვარი და ქვეყანაში ნებართვის გარეშე იმყოფებოდა.

ორივე დაკავებული პოლიციის განყოფილებაში გადაიყვანეს და მათ წინააღმდეგ სისხლის სამართლის საქმე აღიძრა. ფორმალობების დასრულების შემდეგ მასალები გადაეგზავნა კომპეტენტურ სასამართლო ორგანოებს შემდგომი სამართლებრივი დევნისთვის.

საბერძნეთის ხელისუფლება აგრძელებს აეროპორტებში კონტროლის გაძლიერებას, განსაკუთრებით ყალბი დოკუმენტებისა და საიმიგრაციო წესების დარღვევების მხრივ; არსებული ინფორმაციით, ბოლო თვეებში ასეთი ინციდენტების რაოდენობა გაიზარდა.

ნინო ბაჯელიძე

იტალიაში ბოლო დღეებში მომხდარი ორი შოკისმომგვრელი შემთხვევა კიდევ ერთხელ აჩვენებს ქალებზე ძალადობის პრობლემის სიმწვავეს. ერთი ინციდენტი სიცილიაზე, პალაგონიაში (კატანია), მეორე კი ტოსკანის პროვინციაში – სკანდიჩიში მოხდა. ორივე შემთხვევაში მამაკაცები ქალების გატაცებისა და ფიზიკური ან სექსუალური ძალადობის ბრალდებით დააკავეს. ამის შესახებ იტალიური მედია იუწყება.

პალაგონიაში კარაბინერებმა დააკავეს 60 წლის მამაკაცი, რომელსაც ბრალი ედება გატაცებასა და სექსუალურ ძალადობაში. გამოძიების მიხედვით, მამაკაცმა სოციალურ ქსელებში გამოაქვეყნა ყალბი განცხადება დასაქმებაზე – თითქოს ხანდაზმული ადამიანების მომვლელს (იტ. badante – ბადანტე) ეძებდა.

44 წლის რუმინელი ქალი განცხადებას გამოეხმაურა და მისამართზე მივიდა, რათა სამუშაოს პირობები გაერკვია. როდესაც ქალმა უწესრიგოდ დაყრილი ლუდის ბოთლები დაინახა და მამაკაცის ქცევა საეჭვოდ მიიჩნია, ამ უკანასკნელმა აღიარა, რომ ბადანტეს აყვანის საბაბით შეიტყუა, მობილური ტელეფონი ძალით წაართვა და ქალი სახლში ჩაკეტა. იმ დღიდან ერთი თვის განმავლობაში იგი დატყვევებულ ქალს სცემდა და სექსუალურად ძალადობდა.

დაზარალებული მარტოხელა დედაა და 12 წლის ქალიშვილი ჰყავს. მან დახმარების გამოძახება მხოლოდ მაშინ შეძლო, როცა მოძალადეს ერთხელაც სახლიდან გასვლისას შემთხვევით მობილური ტელეფონი დარჩა. ქალმა მეგობარს მესიჯი გაუგზავნა, შემდეგ კი წაშალა. მეგობარმა დაუყოვნებლივ დარეკა პოლიციაში.

ადგილზე მისვლისას მამაკაცმა კარაბინერებს უთხრა, რომ „თავის პარტნიორთან“ ერთად ცხოვრობდა, თუმცა ამ დროს ქალი გამოვარდა სახლიდან და დახმარება ითხოვა.

კარაბინერებმა რუმინელი ქალი კალტაჯირონეს საავადმყოფოში გადაიყვანეს. სამედიცინო შემოწმებით დადასტურდა ქალის როგორც ფიზიკური, ისე ფსიქოლოგიური დაზიანებები, რომლებიც სექსუალურ ძალადობაზე მიუთითებდა. 60 წლის მამაკაცი დაკავებულია.

მეორე შემთხვევა მოხდა ტოსკანაში, სკანდიჩიში, სადაც 51 წლის ფლორენციელი მამაკაცი დააკავეს გატაცებისა და მკვლელობის მცდელობის ბრალდებით.

გამოძიების თანახმად, მამაკაცმა სცადა 41 წლის ქალის გატაცება, რომელმაც უარი უთხრა ინტიმურ ურთიერთობაზე. გამოძიების თანახმად, თავში მიყენებული ტრავმის გამო შოკურ მდგომარეობაში მყოფი ფლორენციელი ქალი მამაკაცს ფურგონში 24 საათის განმავლობაში ჰყავდა დამალული საბნების ქვეშ, რათა ვერავის შეემჩნია.

შემთხვევით გამვლელმა ვია დელ ფონტისთან ახლოს გზაზე საეჭვო პიკაპი შეამჩნია, რომელშიც მამაკაცი იჯდა და პოლიციას შეატყობინა. ადგილზე მისულმა კარაბინერებმა მამაკაცი ადგილზე დააკავეს, ხოლო მსხვერპლი სასწრაფო დახმარების ბრიგადამ ფლორენციის კარეჯის საავადმყოფოში გადაიყვანა. როგორც RaiNews-ი იუწყება, ქალს დაზიანება, სავარაუდოდ, ჩაქუჩით ჰქონდა მიყენებული, რომელიც პოლიციამ ნივთმტკიცებად ამოიღო. ამჟამად მის სიცოცხლეს საფრთხე არ ემუქრება.

სკანდიჩის მერმა კლაუდია სერენიმ მხარდაჭერა გამოხატა მსხვერპლისადმი და მადლობა გადაუხადა გამვლელს, რომელმაც სამართალდამცავებს სავარაუდო დანაშაულის შესახებ შეატყობინა. მან მადლობა გადაუხადა კარაბინერებსაც „მათი დროული ჩარევისთვის“. მერის თქმით:

„ეს უკიდურესად მძიმე ინციდენტია, რომელიც აჩვენებს, რომ არცერთი რეგიონი არ არის დაცული ქალებზე ძალადობისა და ფემიციდისგან. საჭიროა სიღრმისეული კულტურული ცვლილება, რათა მსგავსი ტრაგედიები მომავალში აღარ განმეორდეს“.

იტალიაში ფემიციდის შემთხვევები კვლავ ზრდის ტენდენციით გამოირჩევა. შინაგან საქმეთა სამინისტროს მონაცემებით, 2025 წელს უკვე მამაკაცების ჩადენილი ფემიციდის 80-ზე მეტი შემთხვევა დაფიქსირდა, ხოლო გატაცებისა და სექსუალური ძალადობის შემთხვევები კვლავაც ერთ-ერთ ყველაზე სერიოზულ სოციალურ პრობლემად რჩება.

ნინო ხოშტარია

რუმინეთის დედაქალაქ ბუქარესტში კვირას, 26 ოქტომბერს საზეიმოდ გაიხსნა მსოფლიოში უდიდესი მართლმადიდებლური ეკლესია – ერის ხსნის საკათედრო ტაძარი. ტაძრის გახსნაზე მთელი მსოფლიოდან ათასობით მომლოცველი ჩავიდა, – წერს სააგენტო AP.

ეკლესიის ფრესკების კურთხევის ცერემონია კონსტანტინოპოლის პატრიარქმა ბართლომე I-მა და რუმინეთის მართლმადიდებელი ეკლესიის პატრიარქმა დანიელმა ჩაატარეს. ღონისძიებაში 65 იერარქი, 70 მღვდელი და 12 დიაკვანი მონაწილეობდა. ათასობით ადამიანი ტაძრის გახსნას ტელევიზიით ადევნებდა თვალყურს.

წირვას რუმინეთის პრეზიდენტი ნიშორ დანი და პრემიერ-მინისტრი ილიე ბოლოშანი დაესწრნენ. მაღალი რანგის სტუმრებს შორის იყო მოლდოვის პრეზიდენტი მაია სანდუ.

ბუქარესტის ერის ხსნის საკათედრო ტაძრის სიმაღლე 125 მეტრზე მეტია (შედარებისთვის: თბილისის სამების საკათედრო ტაძრის სიმაღლე 87 მეტრია). ის 5000-მდე ადამიანს იტევს. Associated Press-ის ცნობით, ტაძარი 15 წელი შენდებოდა და მის მშენებლობაზე დაახლოებით 270 მლნ ევრო დაიხარჯა, რომლის უმეტესი ნაწილი საზოგადოებრივი ფონდებიდან შევიდა. საკათედრო ტაძრის ვებსაიტზე გამოქვეყნებული ინფორმაციის თანახმად, მოზაიკებისა და ხატების საერთო ფართობი 17 800 კვადრატული მეტრია. რუმინეთის მართლმადიდებელმა ეკლესიამ ახალ საკათედრო ტაძარს „ეროვნული იდენტობის სიმბოლო“ უწოდა.

ოპონენტები აცხადებენ, რომ ახალი ტაძრის მშენებლობაზე დახარჯული თანხები შეიძლებოდა სკოლებისა და ჯანდაცვის სისტემის განვითარებისთვის გამოეყენებინათ. როგორც ცნობილია, რუმინეთის ბიუჯეტის დეფიციტი ევროკავშირში ერთ-ერთი ყველაზე მასშტაბურია.

ნინო ხოშტარია

ვიდეო: ბუქარესტის ერის ხსნის საკათედრო ტაძრის გახსნის საზეიმო ცერემონია.

ავოკადო დიდი ხანია ჯანსაღი კვების სიმბოლოა და სამეცნიერო მტკიცებულებებიც ამას ადასტურებს. ცხიმის მაღალი შემცველობის მიუხედავად, ამ ხილის ყოველდღიური მოხმარება მრავალმხრივ სასარგებლოა, საჭმლის მონელების გაუმჯობესებიდან დაწყებული, ტვინის დახმარებითა და გულის დაცვით დამთავრებული.

აუმჯობესებს ნაწლავების ჯანმრთელობას

ავოკადო ბოჭკოს მდიდარი წყაროა, რომელიც ხელს უწყობს ნაწლავების ფლორის სიჯანსაღეს და საჭმლის მონელების სისტემის ნორმალურად ფუნქციონირებას. The Journal of Nutrition-ში გამოქვეყნებულმა კვლევამ აჩვენა, რომ ავოკადოს ყოველდღიური მოხმარება ზრდის სასარგებლო ბაქტერიების რაოდენობას, აუმჯობესებს მოკლეჯაჭვიანი ცხიმოვანი მჟავების გამომუშავებას და ამცირებს ნაღვლის მჟავების დონეს, რომლებიც ანთებას იწვევს.

ხელს უწყობს წონის მართვას

კალორიულობის მიუხედავად, ავოკადო ხელს უწყობს სხეულის წონის სტაბილიზაციას. 2022 წლის კვლევის თანახმად, მონაწილეებმა, რომლებიც ექვსი თვის განმავლობაში ყოველდღიურად ერთ ავოკადოს მიირთმევდნენ, წონაში არ მოიმატეს და ზოგიერთ შემთხვევაში რამდენიმე კილოც კი დაიკლეს. ჟურნალ Nutrients-ში 2019 წელს გამოქვეყნებულმა კვლევამ დაადასტურა, რომ ავოკადო ხელს უშლის წონის მატებას ბოჭკოსა და მონოუჯერი ცხიმების, განსაკუთრებით ოლეინის მჟავას წყალობით, რაც ამცირებს ცხიმის დაგროვებას და ახანგრძლივებს სისავსის შეგრძნებას.

ამცირებს გულ-სისხლძარღვთა დაავადებების რისკს

მაგნიუმი, კალიუმი, პოლიფენოლები და ანტიოქსიდანტები მნიშვნელოვანია გულის ჯანმრთელობისთვის. მწიფე ავოკადო ყველა ამ საკვებ ნივთიერებას შეიცავს. კვლევები აჩვენებს, რომ მისი რეგულარული მოხმარება გულ-სისხლძარღვთა დაავადებების რისკს 16–22%-ით ამცირებს. ეს ეფექტი განპირობებულია ცხიმების, ვიტამინებისა და ბუნებრივი ანტიოქსიდანტების ბალანსით, რომლებიც აძლიერებენ სისხლძარღვებს და ხელს უწყობენ ქოლესტერინის დონის ნორმალიზებას.

ხელს უწყობს ტვინის ფუნქციონირებას

ავოკადო მდიდარია ლუტეინით, ნაერთით, რომელიც გადალახავს ჰემატოენცეფალურ ბარიერს და აუმჯობესებს კოგნიტიურ ფუნქციას. International Journal of Psychology-ში 2020 წელს გამოქვეყნებულმა კვლევამ აჩვენა, რომ ლუტეინი ხელს უწყობს მეხსიერებისა და კონცენტრაციის შენარჩუნებას. Frontiers in Nutrition-ის 2021 წლის კვლევამ დაადასტურა, რომ ხანდაზმული ადამიანები, რომლებიც რეგულარულად მოიხმარდნენ ავოკადოს ან გუაკამოლეს, უკეთეს შედეგებს აჩვენებდნენ მეხსიერებისა და ყურადღების ტესტებში.

დღეში ერთი ავოკადო შეიძლება იყოს მარტივი და გემრიელი გზა ნაწლავების, გულისა და ტვინის ჯანმრთელობის მხარდასაჭერად. მთავარია გვახსოვდეს, რომ სარგებელი მოაქვს ზომიერებას და დაბალანსებულ კვებას.

თამარ ქავჟარაძე

დაკავშირებულ თემაზე: რატომ არ უნდა გადააგდოთ ავოკადოს კურკა – 4 მიზეზი

რატომ არ უნდა გადააგდოთ ავოკადოს კურკა – 4 მიზეზი

საბერძნეთის მთავრობის გადაწყვეტილებით, უახლოეს წლებში საპენსიო ასაკი აღარ გაიზრდება. როგორც გაზეთი Kathimerini და ეკონომიკური გამოცემა OT.gr იუწყებიან, მოქმედი კანონით გათვალისწინებული ცვლილებები მინიმუმ 2028 წლამდე გადაიდება, ხოლო საბოლოოდ ზრდა, სავარაუდოდ, მხოლოდ 2030 წლიდან დაიწყება.

მთავრობის გადაწყვეტილება დაკავშირებულია სიცოცხლის ხანგრძლივობის სტატისტიკასთან: პანდემიის შემდეგ საბერძნეთში სიცოცხლის საშუალო ხანგრძლივობა, ფაქტობრივად, არ შეცვლილა. სწორედ ეს მაჩვენებელი განსაზღვრავს საპენსიო ასაკის ზრდის შესაძლებლობას, რადგან საბერძნეთის კანონმდებლობით ის პირდაპირ არის მიბმული დემოგრაფიულ და სოციალური განვითარების ინდექსებზე: საბერძნეთის კანონმდებლობაში 2021 წლიდან გათვალისწინებულია საპენსიო ასაკის გაზრდის მექანიზმი, რომელიც პენსიაზე გასვლის დროის კორექტირებას სიცოცხლის მოსალოდნელი ხანგრძლივობიდან გამომდინარე მოახდენს.

დემოგრაფიული მაჩვენებლები – საპენსიო ასაკის ზრდის წინააღმდეგ

ბოლო მონაცემებით, საბერძნეთში ხანდაზმულთა წილი მოსახლეობაში თანდათან იზრდება, ხოლო შობადობა დაბალ დონეზე რჩება – დაახლოებით 1,5 ბავშვი ერთ ქალზე. ეს ტენდენცია, ექსპერტების შეფასებით, ქმნის სერიოზულ წნეხს სოციალური დაცვის სისტემაზე, თუმცა ამ დროისთვის არ მოითხოვს მკვეთრ ნაბიჯებს.

მოქმედი კანონის თანახმად, 2027 წლიდან საპენსიო ასაკი უნდა გადაიხედოს ყოველ სამ წელიწადში ერთხელ, დემოგრაფიული მდგომარეობის მიხედვით. თუმცა როგორც Kathimerini წერს, მთავრობის შიდა ანალიტიკური ჯგუფის ანგარიშები ცხადყოფს, რომ ზრდის საჭიროება ჯერ არ დგას. ამ მიზეზით, მოქმედი საპენსიო პარამეტრები მიმდინარე ათწლეულის ბოლომდე უცვლელი დარჩება.

ეტაპობრივი რეფორმის იდეა

თუ ცვლილებები მაინც განხორციელდება, ხელისუფლება გეგმავს, ეს პროცესი იყოს ეტაპობრივი – წელიწადში საპენსიო ასაკის მხოლოდ 3-4-თვიანი მატებით. ასეთი მიდგომა მიზნად ისახავს მომავალი პენსიონერებისთვის დატვირთვის მინიმუმამდე შემსუბუქებას და შრომის ბაზარზე სტაბილურობის შენარჩუნებას.

OT.gr-ის ინფორმაციით, ცვლილებებს ყველაზე დიდი გავლენა ექნება 35–55 წლის მოსახლეობაზე, რომლებმაც უკვე დააგროვეს სამუშაო სტაჟი და შესაძლოა საპენსიო ასაკის ზრდის შედეგად პენსიაზე გასვლა რამდენიმე წლით გადაუვადდეთ. ახალგაზრდა თაობისთვის კი, რომლებიც ახლა იწყებენ კარიერას, მომავალი საპენსიო სისტემა უფრო მკაცრი პირობებით იქნება განსაზღვრული.

„დროებითი ამოსუნთქვა“ სისტემისთვის

ექსპერტები აღნიშნავენ, რომ საპენსიო ასაკის ზრდის გადავადება მხოლოდ დროებითი გადაწყვეტილებაა – „დროებითი ამოსუნთქვა“, რომელიც ქვეყანას აძლევს შესაძლებლობას, შეაფასოს დემოგრაფიული დინამიკა და შრომის ბაზრის ტენდენციები.

თუმცა გრძელვადიან პერსპექტივაში საბერძნეთს მოუწევს რეფორმების გაგრძელება, რადგან მოსახლეობის დაბერება და შობადობის დაბალი დონე უკვე უქმნის წნეხს სისტემას და სოციალური ბალანსის შენარჩუნებას ართულებს.

საპენსიო რეფორმა ევროკავშირის ერთ-ერთ ყველაზე მგრძნობიარე თემად რჩება: საბერძნეთის მსგავსად, ანალოგიური პრობლემები დგას იტალიაში, ესპანეთსა და პორტუგალიაშიც, სადაც დემოგრაფიული ბალანსის შენარჩუნება სერიოზულ ეკონომიკურ გამოწვევად იქცა.

შეგახსენებთ, რომ საბერძნეთში 2027 წლიდან საპენსიო ასაკის 1,5 წლით გაზრდა გასული წლის აპრილის ბოლოს დაანონსდა.

ნინო ბაჯელიძე

საპენსიო ასაკი ევროპის ქვეყნებში – მოსალოდნელია თუ არა ზრდა?

ეს კვირა ცხოვრების ყველა სფეროში პოზიტიური ტრანსფორმაციების ფართო შესაძლებლობებს ხსნის. ხელსაყრელი დროა სტრატეგიული გეგმების განსახორციელებლად და შინაგანი პოტენციალის გამოსავლენად. ამ პერიოდში მნიშვნელოვანია მოუსმინოთ თქვენს ინტუიციას, რომელიც გადაწყვეტილებების მიღებისას საიმედო გზამკვლევი გახდება და დაგეხმარებათ შესაძლებლობების მაქსიმალურად გამოყენებაში.

ასევე, გაითვალისწინეთ, რომ ამ კვირაში ცაზე ხუთი მნიშვნელოვანი პლანეტარული ასპექტი ჩამოყალიბდება. მათ შორის, 28 ოქტომბერს – მარსი-იუპიტერის ტრინი, რომელიც ერთ-ერთი საუკეთესო დადებითი ასპექტია აქტიური მუშაობისთვის. ყველაზე წარმატებულები იქნებიან ისინი, ვინც ამ ასპექტის დროს ახალ პროექტს დაიწყებს, რომელიც ბიზნესის გაფართოებას და ეკონომიკურ წინსვლას მოიცავს. ეს ღია, თამამი და გადამწყვეტი მოქმედების ასპექტია. წარმატებისთვის მნიშვნელოვანია, თქვენი ქმედებები პერსპექტიული და ამბიციური მიმართულებით წარმართოთ. ამ ასპექტმა შესაძლოა ტურისტული მოგზაურობის წახალისებაც გამოიწვიოს.

მერკური-ნეპტუნის ტრინი 29 ოქტომბერს ხელს უწყობს წარმოსახვითი აზროვნების განვითარებას. ასევე, შეიძლება გაძლიერდეს ხელოვნების, მუსიკის, სიმღერის, პოეზიისა და მხატვრობისადმი მისწრაფება. ის ხელსაყრელია ყველაფრის იდუმალი და ენიგმატური შესწავლისა და კვლევისთვის, მათ შორის, ეზოთერული მეცნიერებებისაც. ამ ასპექტის გავლენით შეიძლება გაძლიერდეს ინტუიცია და ექსტრასენსორული შესაძლებლობები.

29-30 ოქტომბერს მარსი-სატურნის ტრინი ხელს უწყობს თანმიმდევრულ ქმედებებს. ამ ასპექტის გავლენით ადამიანი ჯერ შედეგებს განიხილავს და მხოლოდ ამის შემდეგ მოქმედებს. როგორც წესი, ამ ასპექტის დროს ადამიანი თავს არიდებს არასაჭირო ქმედებებს და, შესაბამისად, შეუძლია გამძლეობის დემონსტრირება ხანგრძლივი პერიოდის განმავლობაში. ეს კარგი ასპექტია სპორტსმენებისთვის, რომლებსაც გამარჯვების მისაღწევად საკუთარი ძლიერი მხარეების ზუსტად განსაზღვრა სჭირდებათ.

 29-30 ოქტომბერს მერკური-ურანის ოპოზიცია დაძაბული ასპექტია, რომელიც ნაჩქარევ და დაუფიქრებელ გადაწყვეტილებებთან არის დაკავშირებული. ამ ასპექტის ზეგავლენით განსჯა ზედაპირული და ფუჭია. ის არახელსაყრელია სწავლისთვის, კონტაქტებისა და საქმიანი შეთანხმებებისთვის.

30-31 ოქტომბერს მერკური-პლუტონის სექსტილი ჰარმონიული ასპექტია, რომელიც გაძლიერებულ აზროვნებას უკავშირდება. შეიძლება გაუმჯობესდეს მეხსიერება და გონების სისხარტე, რაც ხელს შეუწყობს პრობლემების სწრაფ და ეფექტიან გადაჭრას. სტუდენტებს შეუძლიათ წარმატებას მიაღწიონ სწავლაში, აღმოფხვრან ცოდნაში არსებული ხარვეზები. ამჟამინდელი პირობები იდეალურია თვითგანვითარებისა და ახალი პროექტების დასაწყებად.

ვარსკვლავებზე დაყრდნობით, Nostal.ge გირჩევთ, დაიცვათ ეს რეკომენდაციები და აქტიურად გამოიყენოთ ყველა შესაძლებლობა თქვენი მიზნების მისაღწევად.

ვერძი

მთავარი თემა: ენერგია ორიენტირებულია გადაწყვეტილებებზე.

ამ კვირაში ძველი ბარიერების გარღვევის დიდი შანსი გაქვთ. სამუშაო მოითხოვს სიზუსტეს და დისციპლინას, მაგრამ თქვენი ძალისხმევა შესამჩნევი იქნება. პირველი სამი დღე განსაკუთრებით მნიშვნელოვანია – სწორედ აქ ეყრება საფუძველი მთელ მომავალ თვეს. ახალი რამეების მოსინჯვის ნუ შეგეშინდებათ, ნებისმიერი ცვლილება უკეთესობისკენ წაგიყვანთ. ურთიერთობები შეიძლება ემოციების ქარიშხლით იყოს სავსე: ეჭვიანობით, ვნებით, კამათით. მოერიდეთ ხმის აწევას – ერთი გულწრფელი საუბარი ზედმეტი დრამისგან გიხსნით.

შაბათ-კვირას სასარგებლოა დრო დაუთმოთ სპორტს ან აქტიურ დასვენებას: ორგანიზმს მოძრაობის გზით დაძაბულობისგან გათავისუფლება სჭირდება.

სასიკეთო დღეები: 28, 29.

არასასიკეთო დღე: 31.

კურო

მთავარი თემა: გამძლეობის გამოცდა.

ამ კვირაში ისეთ სიტუაციაში აღმოჩნდებით, სადაც მოგიწევთ თქვენს შინაგან ძალაზე დაყრდნობა. სამუშაო მოითხოვს შეუპოვრობას: პარტნიორები შეიძლება არათანმიმდევრულად მოიქცნენ და თქვენზე იქნება დამოკიდებული ძირითადი ხაზის შენარჩუნება. გადადეთ ფინანსური გადაწყვეტილებები მინიმუმ ერთი კვირით – შეცდომის დაშვების რისკი ახლა მაღალია. თქვენი სასიყვარულო ცხოვრება გაღრმავდება: ურთიერთობები უფრო სერიოზული გახდება და ეს გულწრფელობას მოითხოვს. თუ მარტოხელა ხართ, ვარსკვლავები გირჩევენ, ყურადღება მიაქციოთ იმ ადამიანებს, რომლებიც დიდი ხანია თქვენ გვერდით არიან – მათ შეიძლება თქვენ მიმართ ნამდვილი გრძნობები ჰქონდეთ.

შაბათ-კვირას მოსალოდნელია საინტერესო თავგადასავლები.

სასიკეთო დღეები: 29, 1.

არასასიკეთო დღე: 28.

ტყუპი

მთავარი თემა: სიტყვებს შეუძლიათ განკურნებაც და განადგურებაც.

ეს კვირა სავსეა საუბრებით, შეხვედრებითა და მიმოწერით. მნიშვნელოვანია გახსოვდეთ: ყველა სიტყვას შედეგი მოჰყვება. აზრების სწორად ჩამოყალიბების უნარი სამსახურში წარმატების გასაღები იქნება – შეძლებთ გარიგების დადებას ან მოკავშირის პოვნას. მაგრამ პირად ცხოვრებაში უმჯობესია უფრო რბილად ისაუბროთ: თქვენი პარტნიორი განსაკუთრებით დაუცველია. ბავშვებთან ურთიერთობისას შესაძლებელია სირთულეები და დიდი მოთმინება გჭირდებათ.

კვირის ბოლოს მოულოდნელი ამბები გელოდებათ, რომლებიც თქვენს გეგმებს შეცვლის, მაგრამ სამაგიეროდ ახალ შესაძლებლობებს გაგიხსნით.

სასიკეთო დღეები: 31, 2.

არასასიკეთო დღე: 30.

კირჩხიბი

მთავარი თემა: თქვენი შინაგანი სამყარო სცენად იქცევა.

ამ კვირაში განსაკუთრებით მგრძნობიარე იქნებით მოვლენებისა და ირგვლივ მყოფების ნათქვამის მიმართ. ხალხი გენდობათ და თქვენს დახმარებას ელიან. სამსახურში მოგიწევთ დეტალებში ჩაღრმავება და სწორედ იქ იპოვით პასუხს, რომელიც სხვებმა ვერ შენიშნეს. ოჯახში თქვენი მზრუნველობის საჭიროება გაიზრდება. სიყვარულში ეს ნდობის დროა: ნუ შეგეშინდებათ დაუცველობის გამოვლენისა.

კვირის ბოლო ხელსაყრელია მარტოობისთვის: სიჩუმე და სიწყნარე ნებისმიერ რჩევაზე უკეთეს პასუხებს მოგცემთ. გაატარეთ შაბათ-კვირა ბუნებაში, მარტო.

სასიკეთო დღეები: 27, 2.

არასასიკეთო დღე: 29.

ლომი

მთავარი თემა: სცენა სიცხადეს მოითხოვს.

თქვენ კვლავ აღმოჩნდებით ყურადღების ცენტრში – თქვენგან გადაწყვეტილებებისა და მაგალითების მიწოდებას მოელიან. სამსახურში ეს კვირა ლიდერული თვისებების დემონსტრირების დროა: თქვენს იდეებს მოისმენენ, თუ ისინი ფაქტებით იქნება გამყარებული. ურთიერთობებში მოსალოდნელია ვნებიანი კვირა: სიყვარული ქარიშხლიანი იქნება, მაგრამ ასევე შესაძლებელია ეჭვიანობა. მარტოხელა ლომები შეიძლება შეხვდნენ ადამიანს, რომელიც მათ ამაყ გულს შეეხება.

შაბათ-კვირას ღირს საკუთარი თავისთვის დროის გამონახვა – ხელოვნება, ბუნება ან თუნდაც სიჩუმე ენერგიის აღდგენაში დაგეხმარებათ.

სასიკეთო დღეები: 27, 1.

არასასიკეთო დღე: 30.

ქალწული

მთავარი თემა: წესრიგი, როგორც დაცვა.

ამ კვირაში იგრძნობთ, რომ თქვენს ირგვლივ დიდი ქაოსია – და თქვენ ხართ ის, ვისაც შეუძლია წესრიგის დამყარება. სამსახურში ეს ხელშესახებ შედეგებს გამოიღებს. ფინანსები კონტროლს მოითხოვს: შეამოწმეთ თქვენი ანგარიშები, ნუ ენდობით სიტყვებს დოკუმენტაციის გარეშე. უფრთხილდით რისკებსა და თავგადასავლებს, ისინი იმედგაცრუებას მოგიტანენ. სიყვარულში უმჯობესია იყოთ უფრო ნაზი – თქვენი კრიტიკა შეიძლება მტკივნეული იყოს მაშინაც კი, თუ ვინმეს გულის ტკენის განზრახვა არ გაქვთ.

ამ შაბათ-კვირას ვარსკვლავები გირჩევენ, დრო დაუთმოთ თქვენს სხეულს: სეირნობა ან მსუბუქი ვარჯიში დაგეხმარებათ ძალების აღდგენაში.

სასიკეთო დღეები: 31, 2.

არასასიკეთო დღე: 29.

სასწორი

მთავარი თემა: ბალანსი სინათლესა და სიბნელეს შორის.

მზემ უკვე დატოვა თქვენი ნიშანი და თავს ცოტა დაღლილად გრძნობთ. ახლა მნიშვნელოვანია იმის გაგება, თუ რა გსურთ სინამდვილეში. სამსახურში უნდა აირჩიოთ პოტენციალის მქონე პროექტები, მაშინაც კი, თუ შედეგი თავიდანვე აშკარად არ ჩანს. ნუ ენდობით სხვების რჩევებს, შესაძლოა არაკეთილმოსურნეებისგან მოდიოდეს. ურთიერთობებში შესაძლებელია მაქსიმალური გულწრფელობა – გულწრფელი საუბარი შეიძლება მტკივნეული იყოს, მაგრამ აუცილებელი.

შაბათ-კვირას სასარგებლოა დროის დათმობა შემოქმედებისთვის, ხელოვნებისთვის – ეს ხელს შეუწყობს ჰარმონიის აღდგენას.

სასიკეთო დღეები: 28, 1.

არასასიკეთო დღე: 31.

მორიელი

მთავარი თემა: ძალისა და პატიოსნების დრო.

მზე თქვენს ნიშანშია – და ეს თქვენი დროა! ენერგიისა და თავდაჯერებულობის მოზღვავებას იგრძნობთ. ეს კვირა იდეალურია ახლის დასაწყისისთვის, თამამი გადაწყვეტილებებისთვის და, რაც მთავარია, საკუთარი თავის პირუთვნელად შესაფასებლად. სამსახურში წარმატება გელით, თუ ინიციატივას გამოიჩენთ. სიყვარულში თქვენი გრძნობები განსაკუთრებით ძლიერი იქნება: თქვენი პარტნიორი იგრძნობს თქვენს სიღრმეს და გულწრფელობას. მარტოხელა მორიელებს სასიამოვნო შეხვედრები ელოდებათ.

ამ შაბათ-კვირას საკუთარ თავს და ბედს მხოლოდ თქვენ აკონტროლებთ.

სასიკეთო დღეები: 31, 1.

არასასიკეთო დღე: 30.

მშვილდოსანი

მთავარი თემა: გზა გიხმობთ, მაგრამ ბილიკი ნისლშია გახვეული.

ამ კვირაში ცვლილებებისკენ ისწრაფით, მაგრამ გარემოებები მოთმინებას მოითხოვს. სამსახურში ყველაფერი ნათელი არ იქნება: ინფორმაცია ფრაგმენტებად მოვა და მხოლოდ კვირის ბოლოს დაინახავთ სრულ სურათს. ორშაბათს მოერიდეთ ნაჩქარევი გადაწყვეტილებების მიღებას. ფრთხილად იყავით ფინანსურ საკითხებთან დაკავშირებით. პირად ცხოვრებაში გაუგებრობები შესაძლებელია, მაგრამ ეს არ არის კამათის მიზეზი – პირიქით, ეს თქვენი მოქნილობის გამოცდაა.

შაბათ-კვირას საუკეთესოა გარემოს შეცვლა: მოკლე მოგზაურობაც კი ახალ პერსპექტივას გპირდებათ.

სასიკეთო დღეები: 28, 31.

არასასიკეთო დღე: 27.

თხის რქა

მთავარი თემა: პასუხისმგებლობა და შედეგები.

ეს კვირა თქვენგან სერიოზულობას მოითხოვს. სამსახურში მოგიწევთ ისეთი საქმეების შესრულება, რომელთა გაკეთებაც სხვებმა ვერ შეძლეს. ეს ადვილი არ იქნება, მაგრამ შედეგები თქვენს რეპუტაციას გააძლიერებს. თქვენი ფინანსური მდგომარეობა სტაბილური იქნება, თუ სწრაფი გადაწყვეტილებების ცდუნებას გაუძლებთ. ურთიერთობებში ყურადღება მიაქციეთ დეტალებს – თქვენი პარტნიორი აფასებს მცირე ჟესტებს და არა ბრტყელ-ბრტყელ სიტყვებს.

შაბათ-კვირისთვის სერიოზული არაფერი დაგეგმოთ, უბრალოდ დაისვენეთ.

სასიკეთო დღეები: 29, 30.

არასასიკეთო დღე: 1.

მერწყული

მთავარი თემა: ახალი იდეები, ახალი კავშირები.

ამ კვირაში სამსახურში არატრადიციული წინადადებები გაჩნდება და ეს წარმატებას მოგიტანთ. მნიშვნელოვანია თქვენი იდეების პრაქტიკაში გამოყენება: ყველაფერი არ შეიძლება მხოლოდ კონცეფციად დარჩეს. პირად ცხოვრებაში სიურპრიზი გელოდებათ – შესაძლებელია ახალი ნაცნობობა. ოჯახის წევრებთან ურთიერთობა გაუმჯობესდება.

სასარგებლოა შაბათ-კვირას მეგობრებთან ან თანამოაზრეებთან შეხვედრა: სწორედ აქ დაიბადება ახალი გეგმები.

სასიკეთო დღეები: 31, 2.

არასასიკეთო დღე: 29.

თევზები

მთავარი თემა: გრძნობების სიღრმე და ინტუიციის სიცხადე.

ეს კვირა დუმილისა და შინაგანი სიბრძნის დროა. სამსახურში იგრძნობთ, სადაა საფრთხე და შეძლებთ შეცდომების თავიდან აცილებას. თქვენი წინათგრძნობები განსაკუთრებით ზუსტი იქნება. ენერგიის მოზღვავებას იგრძნობთ და თქვენს პოტენციალს გამოავლენთ. სიყვარულში ეს ნდობისა და ღია საუბრების დროა: თუ არსებობს საიდუმლოებები, უმჯობესია პარტნიორს ისინი ახლავე გაუმჟღავნოთ.

ამ შაბათ-კვირას ვარსკვლავები მარტო ყოფნას გირჩევენ, ან დრო შემოქმედებით საქმიანობას დაუთმეთ – მუსიკა, წიგნები ან ხატვა შთაგონებისთვის ძლიერ სტიმულს მოგცემთ.

სასიკეთო დღეები: 28, 1.

არასასიკეთო დღე: 30.

თამთა გურული

იტალიას იმიგრანტების გარეშე ძალიან გაუჭირდებოდა როგორც ეკონომიკური ზრდის, ისე დემოგრაფიული მდგომარეობისა და სამუშაო ძალის მხრივ. Leone Moressa-ს ფონდის ახალი ანგარიშის თანახმად, რომელიც ორგანიზაციამ 20 ოქტომბერს წარადგინა CNEL-ში (დამსაქმებელთა ნაციონალური კონფერენციების ეროვნული საბჭო) და დეპუტატთა პალატაში, ბოლო ათწლეულის განმავლობაში (2014–2024) იმიგრანტი მეწარმეების რაოდენობა 24%-ით გაიზარდა, ხოლო იტალიელი მეწარმეების რაოდენობა 5%-ზე მეტით შემცირდა. დღეს უცხოელთა წვლილი ქვეყნის მშპ-ში 9%-ია, განსაკუთრებით მაღალია მათი წვლილი სოფლის მეურნეობაში (18%) და მშენებლობაში (16.4%). ამის შესახებ ilsole24ore წერს.

„ახალი იტალიელები“ ​​და დემოგრაფიული ზამთარი

2024 წელს იტალიაში 5.3 მლნ უცხოელი ცხოვრობდა (მთლიანი მოსახლეობის 8.9%), თუმცა საზღვარგარეთ დაბადებულთა რიცხვი 6.7 მილიონამდე გაიზარდა (11.3%). ეს სხვაობა, ძირითადად, განპირობებულია იტალიის მოქალაქეობის მიღებით (წელიწადში 200 000-ზე მეტი). იტალიის მოსახლეობას იმიგრაციული წარსულით კვლავაც დადებითი წვლილი შეაქვს იტალიის დემოგრაფიულ მონაცემებში, შობადობის უფრო მაღალი მაჩვენებლით (9.9 ახალშობილი ათას მოსახლეზე; იტალიელებში – 6.1) და სიკვდილიანობის უფრო დაბალი მაჩვენებლით (2.1 გარდაცვლილი ყოველ ათას მოსახლეზე; იტალიელთა შორის – 12.3). შობადობის მაღალი მაჩვენებლის წყალობით მიგრანტები, ფაქტობრივად, ხელს უშლიან იტალიის დემოგრაფიულ კოლაფსს. მაგალითად, 2023 წელს იტალიის მოსახლეობის რაოდენობა 385 000-ით შემცირდა, ხოლო იმიგრანტების – 375 000-ით გაიზარდა. იმიგრანტთა შორის მხოლოდ 6% არის 64 წელზე მეტი ასაკის, ხოლო იტალიელებს შორის ეს მაჩვენებელი 26%-ს აღწევს. ეს ნიშნავს, რომ იმიგრანტები საზოგადოების ახალგაზრდა, აქტიური ნაწილია, რომლებიც დღეს ბაზრებსა და გადასახადებს კვებავენ და ხვალ საპენსიო სისტემის მზარდ დეფიციტს აანაზღაურებენ.

სამუშაო ძალაზე მზარდი მოთხოვნა – იმიგრანტები შეუცვლელები არიან

დემოგრაფიული ტენდენციების გაგრძელება თავისთავად განაპირობებს სამუშაო ძალის მზარდ მოთხოვნას. Unioncamere – Excelsior-ის პროგნოზით, 5-წლიან პერიოდში – 2024-იდან 2028 წლამდე იტალიურ კომპანიებს დასჭირდებათ 3 მლნ ახალი მუშაკი (საჯარო სექტორის გამოკლებით), რომელთაგან 264 ათასი იმიგრანტი იქნება (21,3%). სამუშაო ძალაზე მოთხოვნა იტალიაში დამოკიდებული იქნება 80%-ით კადრების გადინებაზე დასაქმებულთა პენსიაზე გასვლის გამო და მხოლოდ 20%-ით – ეკონომიკური ზრდიდან გამომდინარე. ცენტრალურ და ჩრდილოეთ რეგიონებში იმიგრანტების წილი ოთხოვნილ მუშახელზე 25%-ს აჭარბებს, პიკი კი 31%-ია – ტოსკანასა და ტრენტინო-ალტო-ადიჯეში.

იმიგრანტ მეწარმეთა რაოდენობა კვლავ იზრდება

იმიგრანტი მეწარმეების რაოდენობა კვლავ იზრდება და 2024 წელს 787 000-ს მიაღწია (საერთო რაოდენობის 10.6%). ბოლო ათი წლის განმავლობაში (2014-2024) იმიგრანტ მეწარმეთა რაოდენობა გაიზარდა (+24.4%), ხოლო იტალიელ მეწარმეთა რაოდენობა შემცირდა (-5.7%). ყველაზე მაღალი მაჩვენებელი ქვეყნის ცენტრალურ და ჩრდილოეთის რეგიონებშია, დარგების მიხედვით კი – მშენებლობის, ვაჭრობისა და სტუმარმასპინძლობის სექტორებში. იმ ქვეყნების დემოგრაფიულ გაჯანსაღებასა და ეკონომიკის ზრდაში შეტანილი წვლილის გარდა, სადაც ამჟამად ცხოვრობენ, მიგრანტები ხელს უწყობენ თავიანთი წარმოშობის ქვეყნების განვითარებასაც, მათ შორის, ფულის გაგზავნით. 2024 წელს იტალიაში მცხოვრებმა იმიგრანტებმა 8.3 მილიარდი ევრო გაგზავნეს თავიანთი წარმოშობის ქვეყნებში საკუთარი ოჯახებისა და ახლობლების დასახმარებლად, რაც თვეში დაახლოებით 130 ევროს შეადგენს ერთ სულ მოსახლეზე.

ფისკალური წვლილი

იტალიაში 4.9 მილიონი იმიგრანტი გადასახადის გადამხდელია (საერთო რაოდენობის 11.5%). 2024 წელს მათი დეკლარირებული შემოსავალი 80.4 მილიარდი ევრო იყო, ხოლო 11.6 მილიარდი ევრო პირადი საშემოსავლო გადასახადის სახით გადაიხადეს იტალიის სახელმწიფო ბიუჯეტში. იტალიელებსა და იმიგრანტებს შორის ერთ სულ მოსახლეზე შემოსავლის სხვაობა კვლავ მაღალია (წლიურად თითქმის 9 000 ევრო), რაც დასაქმების სტრუქტურის პირდაპირი შედეგია.

სახელმწიფო ხარჯებზე გავლენა

იმიგრანტები, ძირითადად, შრომისუნარიანი, სამუშაო ასაკის ადამიანები არიან და მცირე გავლენა აქვთ სახელმწიფო ხარჯებზე (3%). გარდა ამისა, სახელმწიფო შემოსავლების (დასაქმებულთა მიერ გადახდილი გადასახადები და სოციალური უზრუნველყოფის შენატანები) სახელმწიფოს მიერ სოციალური მიზნით გაწეულ ხარჯებთან შედარებით, იმიგრანტების ბალანსი დადებითია (+1.2 მილიარდი ევრო ანუ უფრო მეტი შენატანი შეაქვთ გადასახადების სახით, ვიდრე სახელმწიფოსგან იღებენ სოციალურ თანხებს – მათ მცირე გავლენა აქვთ სახელმწიფო ხარჯების ძირითად პუნქტებზე, როგორიცაა ჯანდაცვა და პენსიები).

ამ ფონზე სახელმწიფოს გამოწვევაა იმიგრანტების ეფექტიანი ინტეგრაცია, რომლის ერთ-ერთი ყველაზე მთავარი ფაქტორია იტალიური სკოლა, თუმცა ასევე საჭირო იქნება სახელმწიფოს მხრიდან კიდევ გაძლიერებული ძალისხმევა – ენობრივი პროგრამების განვითარება, ოჯახების მხარდაჭერა, დიალოგი და ჩართულობა.

ნინო ხოშტარია

რატომ არის ზოგიერთ ადამიანთან ყოფნა ბუნებრივად მარტივი და მშვიდი, ზოგიერთთან კი – რთული და დამღლელი? პასუხი ხშირად ვარსკვლავებში „იმალება“.

იდეალური წყვილები ისინი კი არ არიან, რომლებიც არასდროს კამათობენ, არამედ ისინი, რომლებიც ინტუიციურად გრძნობენ და ესმით ერთმანეთის. ისინი ავსებენ, მხარს უჭერენ ერთმანეთს და საერთო ტალღაზე ცხოვრობენ.

გაიცანით ზოდიაქოს საუკეთესო წყვილები – ნიშნები, რომელთაც ერთად ყოფნა ნამდვილ ჰარმონიას ქმნის.

ვერძი და მერწყული

ორი თავისუფალი სულის გაერთიანება. ვერძს სჭირდება მოძრაობა და გამოწვევა, მერწყული კი მუდამ სიურპრიზებით სავსეა. ისინი შთაგონებენ ერთმანეთს, მხარს უჭერენ თამამ იდეებს და პატივს სცემენ პირად სივრცეს.
ეს კავშირი ენერგიისა და თავისუფლების ნაზავია – სიყვარული, რომელიც არასდროს ბეზრდებათ.

კურო და კირჩხიბი

კურო სტაბილურობას და სიწყნარეს აფასებს, კირჩხიბი კი ზრუნვასა და თბილ ატმოსფეროს ქმნის. მათი სიყვარული მშვიდია, მაგრამ ღრმად ფესვგადგმული.
ეს წყვილი ერთმანეთის უსაფრთხო ნავსაყუდელია – სიყვარული, რომელიც მშვიდად იზრდება და ძლიერდება.

ტყუპი და სასწორი

ჰაერის ორი ნიშანი, რომლებსაც ერთმანეთს იდეალურად ესმით. მათ შორის ურთიერთობა მსუბუქია, სავსე სილაღით, საუბარითა და გემოვნებით.
ინტელექტუალური ქიმია, რომელიც ორივეს აზროვნებას აღვიძებს და ურთიერთობას მუდმივად ცოცხლად ტოვებს.

კირჩხიბი და თევზები

მგრძნობიარე და ემოციური კავშირი, სადაც სიტყვებზე მეტი მნიშვნელობა თვალებსა და ჟესტებს აქვს.
ეს წყვილი ერთმანეთის სულიერი სარკეა – სიყვარული, სადაც სითბო და თანაგრძნობა მთავარ როლს ასრულებს.

ლომი და მშვილდოსანი

ცეცხლი ხვდება ცეცხლს. ორივეს უყვარს თავგადასავლები, ყურადღება და ვნება. მათი ურთიერთობა სავსეა ენერგიითა და ოპტიმიზმით.
მათი სიყვარული მზეა – ამაღლებული, შთამაგონებელი და დაუვიწყარი.

ქალწული და თხის რქა

ორივე მიწის სტიქიის ნიშანია – პრაქტიკული, გონიერი და მიზანდასახული. ისინი ერთად აშენებენ მომავალს, სადაც წესრიგი და განვითარება მთავარია.
ეს კავშირი ნდობაზე და სიძლიერეზეა აგებული – ორი ადამიანი, რომლებიც წარმატებისკენ ერთიანად მიდიან.

სასწორი და მერწყული

ორიგინალური და ესთეტიკური წყვილი, რომელიც ერთდროულად თბილია და გონიერი. მათ აერთიანებთ ჰარმონიის სიყვარული და თავისუფლების პატივისცემა.
მათი ურთიერთობა ჰაერივით მსუბუქია – როცა ორივე თავისუფალია, მაგრამ მაინც ერთად არიან.

მორიელი და კირჩხიბი

წყლის ორი ნიშანი, რომლებიც გრძნობებში ცხოვრობენ. მორიელი ვნებიანია, კირჩხიბი – ნაზი და თანაგრძნობით სავსე.
მათი კავშირი ემოციების ზღვაა – ღრმა, გულწრფელი და ერთგულებით გამყარებული.

მშვილდოსანი და ვერძი

ორივე ქარიშხალივით ენერგიულია. მათ იზიდავს გამოწვევები, მოძრაობა და თავგადასავლები.
ეს წყვილი ცეცხლოვანი ენერგიის სიმბოლოა – მეგობრობით დაწყებული სიყვარული, რომელიც არასდროს ქრება.

თხის რქა და კურო

პრაქტიკული და საიმედო წყვილი, რომელიც აფასებს სტაბილურობასა და შედეგს. ისინი ქმნიან ურთიერთობას, სადაც ნდობა ყველაფერია.
მათი სიყვარული ბრუნვის გარეშე იზრდება – როგორც მყარი ფუნდამენტი, რომელზეც მთელი ცხოვრება შენდება.

მერწყული და ტყუპი

ინტელექტუალური წყვილი, რომლის ურთიერთობა იდეებზე, ინტერესებსა და მეგობრობაზეა აგებული. მათთვის თავისუფლება ყველაზე მნიშვნელოვანი ცნებაა.
ეს კავშირი აზროვნების ჰარმონიაა – ერთად ისინი უფრო კრეატიულები და თამამები ხდებიან.

თევზები და მორიელი

სიღრმის, ვნებისა და ინტუიციის კომბინაცია. თევზები ოცნებობს, მორიელი მოქმედებს. ერთად ისინი ქმნიან სამყაროს, სადაც გრძნობები ყველაფერზე მაღლა დგას.
ეს სიყვარული მყუდრო და მაგიურია – როცა სიტყვები ზედმეტია, ხოლო გრძნობები უსიტყვოდაც ყველაფერს ამბობს.

ზოდიაქოს საუკეთესო წყვილები გვახსენებენ, რომ იდეალური ურთიერთობა არ არის შემთხვევითობა – ეს არის შინაგანი ჰარმონია, სულიერი თანხვედრა და ერთმანეთის მიღება ისეთებად, როგორებიც ვართ.

თამთა გურული

დაკავშირებულ თემაზე: რომელი ქვაა თქვენი ზოდიაქოს ნიშნის თილისმა?

ნახეთ, რომელი ქვაა თქვენი ზოდიაქოს ნიშნის თილისმა

ევროპარლამენტმა მართვის მოწმობის გაცემის ახალი წესები შემოიღო. ეს ნაბიჯი მიზნად ისახავს საგზაო უსაფრთხოების გაუმჯობესებას და ავტოსაგზაო შემთხვევების რაოდენობის შემცირებას, რომლებსაც ევროკავშირში ყოველწლიურად დაახლოებით 20 000 ადამიანი ეწირება.

ახალი დირექტივის თანახმად, მართვის მოწმობის ჩამორთმევის, შეჩერების ან შეზღუდვის შესახებ უნდა ეცნობოს იმ ქვეყანას, რომელმაც ის გასცა. ეს უზრუნველყოფს ტრანსსასაზღვრო სანქციების დაწესებას ისეთი სერიოზული დანაშაულებისთვის, როგორიცაა: ალკოჰოლის ან ნარკოტიკების ზემოქმედების ქვეშ ავტომობილის მართვა, ფატალური შემთხვევის გამოწვევა ან დაშვებული სიჩქარისთვის 50 კმ/სთ-ით ან უფრო მეტით გადაჭარბება.

ევროპარლამენტში ამ საკითხზე მომხსენებელი მატეო რიჩი („სოციალისტები“, იტალია) ამბობს: „ამჟამად, იმ მძღოლების თითქმის 40%, რომლებსაც ლიცენზია ჩამოერთვათ ან შეუჩერდათ ქვეყანაში, რომელიც მართვის მოწმობის გამცემ ქვეყანას არ წარმოადგენს, დაუსჯელი რჩება. ამიტომ მონიტორინგის უფრო ძლიერი და ეფექტიანი სისტემა ავარიების თავიდან აცილებასა და სიცოცხლის გადარჩენაში დაგვეხმარება“.

ევროპარლამენტის გადაწყვეტილებით, დაინერგება ციფრული მართვის მოწმობა, რომელიც მობილური ტელეფონის საშუალებით იქნება ხელმისაწვდომი და თანდათან მართვის მოწმობის ძირითადი ფორმა გახდება ევროკავშირში, თუმცა საბარათო ვერსია არ გაუქმდება.

ციფრული ლიცენზიების შესახებ მომხსენებელმა იუტა პაულუსმა („მწვანეები“, გერმანია) აღნიშნა: „2030 წლისთვის მოქალაქეებს საშუალება ექნებათ, ელექტრონულ და ფიზიკურ ბარათებს შორის არჩევანი გააკეთონ“.

რა იცვლება?

ახალი წესები ადგენს ორწლიან გამოსაცდელ პერიოდს ახალბედა მძღოლებისთვის და აწესებს უფრო მკაცრ ჯარიმებს ნასვამ მდგომარეობაში ავტომობილის მართვის, უსაფრთხოების ღვედის ან ბავშვის სავარძლის არგამოყენებისთვის. ამასთან, ავტომობილის მართვის მოწმობის მიღება შესაძლებელი იქნება 17 წლის ასაკიდან, იმ პირობით, რომ სრულწლოვანებამდე მათ გამოცდილი მძღოლი გაუწევს ზედამხედველობას.

პროფესიონალი მძღოლების დეფიციტის აღმოსაფხვრელად სატვირთო მანქანის მართვის მოწმობის აღება 18 წლის ასაკში იქნება შესაძლებელი, ხოლო ავტობუსის მართვის მოწმობა – 21 წლის ასაკში, იმ პირობით, რომ დაცული იქნება პროფესიული კომპეტენციის აუცილებელი მოთხოვნები.

ახალი დებულებები ევროკავშირის ოფიციალურ ჟურნალში გამოქვეყნებიდან 20 დღის შემდეგ შევა ძალაში. ამის შემდეგ, წევრ სახელმწიფოებს სამი წელი ექნებათ ამ დებულებების ეროვნულ კანონმდებლობაში გადმოსატანად, პლუს – კიდევ ერთი წელი განხორციელებისთვის მოსამზადებლად.

წყარო: EPT news

თარგმნილია ხელოვნური ინტელექტის მიერ

შეგახსენებთ, რომ ქართული ეროვნული მართვის მოწმობის გაცვლა ადგილობრივ მართვის მოწმობაში შესაძლებელია ევროკავშირის ქვეყნებში – ირლანდიაში, საბერძნეთსა და ესპანეთში, იტალიასთან კი ჯერჯერობით მხოლოდ სიტყვიერი შეთანხმებაა მიღწეული.

დაკავშირებულ თემაზე: უკვე შესაძლებელია ქართული ეროვნული მართვის მოწმობის ბერძნულში გადაცვლა და პირიქით

ევროპარლამენტმა ოთხშაბათს, 22 ოქტომბერს ანდრეი სახაროვის სახელობის პრემიის „აზრის თავისუფლებისთვის“ ლაურეატები დაასახელა – ადამიანის უფლებათა დაცვის სფეროში ევროკავშირის ეს უმაღლესი ჯილდო წელს ორ პატიმარ ჟურნალისტს მიენიჭა: 50 წლის მზია ამაღლობელს საქართველოდან და 52 წლის ანდჟეი პოჩობუტს ბელარუსიდან.

მზია ამაღლობელი სახაროვის პრემიის პირველი ლაურეატია საქართველოდან.

„ორივე ჟურნალისტი ამჟამად ციხეშია ყალბი ბრალდებებით – მხოლოდ იმიტომ, რომ ისინი თავიანთ სამუშაოს ასრულებდნენ და უსამართლობის წინააღმდეგ გამოდიოდნენ, – განაცხადა ევროპარლამენტის თავმჯდომარემ რობერტა მეცოლამ, რომელმაც პლენარულ სესიაზე სახაროვის პრემიის წლევანდელი ლაურეატები დაასახელა. – მათმა სიმამაცემ ისინი თავისუფლებისა და დემოკრატიისათვის ბრძოლის სიმბოლოებად აქცია. ეს პარლამენტი მათ მხარეზეა და ყველა იმ ადამიანის მხარეზე, რომელიც აგრძელებს თავისუფლების მოთხოვნას“.

„ბათუმელებისა“ და „ნეტგაზეთის“ დამფუძნებელი და რედაქტორი მზია ამაღლობელი ამჟამად ორწლიან პატიმრობას იხდის რუსთავის ქალთა №5 კოლონიაში აჭარის პოლიციის უფროსის, ირაკლი დგებუაძისთვის სილის გაწვნისთვის. ჟურნალისტი თავდაპირველად მიმდინარე წლის 11 იანვრის ღამეს ადმინისტრაციული წესით დააკავეს, შემდეგ ხელწერილის საფუძველზე გაათავისუფლეს, 12 იანვარს კი ხელმეორედ დააკავეს უკვე სისხლის სამართლის წესით პოლიციელზე თავდასხმის ბრალდებით, რისთვისაც მას 4-იდან 7 წლამდე პატიმრობა ემუქრებოდა. დაკავების შემდეგ მზია ამაღლობელი 38 დღე შიმშილობდა. მოგვიანებით მოსამართლე ნინო სახელაშვილმა ბრალდება გადააკვალიფიცირა და 6 აგვისტოს ჟურნალისტს ორწლიანი პატიმრობა მიუსაჯა 353-ე მუხლის პირველი ნაწილით, რომელიც საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობას, მუქარას ან ძალადობას გულისხმობს.

საპროცესო შეთანხმებაზე მზია ამაღლობელმა უარი განაცხადა: „უსამართლობასთან შერიგება ჩემთვის ცოცხლად დამარხვის ტოლფასია“, – წერდა იგი წერილში, რომელშიც ევროპას საქართველოში სამოქალაქო საზოგადოებისა და დამოუკიდებელი მედიის მხარდაჭერისკენ მოუწოდებდა.

სახაროვის პრემია ამაღლობელისთვის პირველი საერთაშორისო ჯილდო არ არის. იგი 2025 წელს „მსოფლიოში პრესის თავისუფლების გმირად“ დასახელდა. ოქტომბრის დასაწყისში მან პრაღაში მიიღო Forum 2000-ის საერთაშორისო ჯილდო გამბედაობისა და პასუხისმგებლობისთვის (მას ვაცლავ ჰაველის ჯილდოსაც უწოდებენ), ხოლო უფრო ადრე – პრესტიჟული „თავისუფალი მედიის ჯილდო“, რომელსაც ნორვეგიული ორგანიზაცია The Fritt Ord Foundation-ი ანიჭებს.

ჯილდოს გადაცემის ცერემონია, რომელიც 50 000 ევროს (($58,000) ოდენობის ფულად პრიზსაც მოიცავს, 16 დეკემბერს გაიმართება სტრასბურგში, ევროპარლამენტის პლენარულ სხდომაზე. ვინაიდან მზია ამაღლობელი და ანდჟეი პოჩობუტი ამჟამად ციხეში იმყოფებიან, პრიზს, სავარაუდოდ, მათი სახელით მათი რომელიმე ახლობელი ან ნათესავი მიიღებს.

ევროკავშირის უმაღლესი პრემია ადამიანის უფლებათა დაცვის სფეროში 1988 წელს დაარსდა საბჭოთა მეცნიერისა და დისიდენტის, ანდრეი სახაროვის პატივსაცემად. ჯილდო ყოველწლიურად გადაეცემათ ფიზიკურ პირებს ან ორგანიზაციებს ადამიანის უფლებების დაცვისა და დემოკრატიის სფეროში შეტანილი წვლილისთვის.

სახაროვის პრემიის ლაურეატობის კანდიდატებს წარადგენენ ევროპარლამენტის პოლიტიკური ჯგუფები, აგრეთვე, ცალკეული ევროპარლამენტარები. მზია ამაღლობელი პრემიაზე „ევროპის სახალხო პარტიის“ წევრმა, ლიტველმა ევროპარლამენტარმა რასა იუკნევიჩიენემ და კიდევ 60-მა ევროპარლამენტარმა წარადგინეს, ანდჟეი პოჩობუტი კი ევროპარლამენტარების – „ევროპელი კონსერვატორებისა და რეფორმისტების“ ჯგუფმა, რომელშიც სხვებთან ერთად შედის პოლონური პარტია „კანონი და სამართლიანობა“.

ნანა ძნელაძე