“Qəbələ”nin baş məşqçisi Kaxaber Sxadadze Premyer Liqaya vəsiqə uğrunda “Mingəçevir”ə qarşı keçirdikləri pley-off matçını şərh edib.

Arena.az xəbər verir ki, sözügedən komandaların bu gün Sumqayıtda baş tutmuş görüşü “Qəbələ”nin 2:0 hesablı qələbəsi ilə başa çatıb.

Kaxaber Sxadadze matçdan sonra təşkil edilmiş mətbuat konfransında bunları söyləyib:

“Azarkeşləri bu qələbə münasibətilə təbrik edirəm. Bu qələbə vacib idi. Yaxşı oyun oynadığımıza və qalib gəldiyimizə çox şadam. Bu qədər şansımız olsa da, kifayət qədər qol vura bilmədiyimizə görə narazıyam. Bu oyunda çox çalışdıq. Güclü məşqçi ilə qarşılaşdıq. Bu, “Mingəçevir”in üstünlüyü idi. Amma biz daha güclü idik və layiqli şəkildə qalib gəldik.

Hazırda çox yorğunam. Sabah Gürcüstana getmək haqqında düşünürəm. Klub prezidenti ilə də az əvvəl danışdıq. Geri döndükdən sonra bəzi məsələləri müzakirə edəcəyik. Həqiqətən, jurnalistlərə böyük hörmətlə yanaşıram. Sadəcə, indi çox yorğunam. Qayıtdıqdan sonra heyətlə bağlı məsəslələri müzakirə edəcəyik”.

Misli Premyer Liqasına vəsiqə uğrunda keçirilən “Qəbələ” – “Mingəçevir” oyunundan (2:0) sonra “Qəbələ”nin baş məşqçisi Kaxaber Sxadadze jurnalistlərin suallarını cavablandırdı.

Futbolpress.az xəbər verir ki, mütəxəssis əvvəlcə görüşlə bağlı fikirlərini bildirdi:

– “Qəbələ” azarkeşlərini təbrik edirəm və onlardan mövsümə görə üzr istəyirəm, sabiq oynamadıq. Bəzi məqamlarda gərginlik də oldu. Oyuna gəlincə, favorit tərəf biz idik. Şadam ki, futbolçular matça ciddi yanaşdı və yaxşı futbol nümayiş etdirdi. Az qol vurduğumuza görə müəyyən narazılıq var. Real epizodları qaçırdıq, amma heyətdə gənc oyunçularımızın olduğunu da nəzərə almaq lazımdır. İlk hissədə oyunun taleyini həll etdik. Çoxlu qol imkanları yaratmağı bacardıq. Rəqibə gəlincə, onların təcrübəli baş məşqçisi var. “Mingəçevir”in əsas üstünlüyü də məhz bu amildir. Məmmədovun sayəsində bu mərhələyə gəliblər. Ümumi götürəndə, üstün tərəf biz olduq və liqada qalmağa layiq idik.

– İddialara görə, klubdakı son oyununuz idi…
– Bu sualı rəhbərliyə vermək lazımdır. Müqaviləm davam edir.

– Ramiz Məmmədov bildirdi ki, baş hakim Tural Qurbanov oyunu yaxşı idarə edə bilmədi. O, məğlubiyyətə səbəb bunu görürdü. Siz necə düşünürsünüz?
– Elə düşünmürəm, böyük hesablı qələbə qazanmalıydıq. Rəqibin demək olar ki, bir qol imkanı da olmadı.

– Komandada qalacağınız halda, heyətdə hansı dəyişiklikləri etməyi düşünürsünüz?
– Düzü, çox yorğunam. Sabah ölkəmə qayıtmağı düşünürəm. Qayıtdıqdan sonra bir çox məsələləri müzakirə edəcəyik. Gələcəklə bağlı danışmaq üçün hələ tezdir.

– Milliyə cəlb olunan Rza Cəfərov bu gün nə üçün meydanda yox idi?
– Belə qərar verdik. Rza ilə danışdım və o, mövsümün ortasında bizə gəldi. Yarım il oynamamışdı və praktikaya ehtiyac var idi. Qərara gəldik ki, son matçlarda daha təcrübəli Səlahət Ağayevə şans verək. Məncə, yanılmadıq.

– “Qəbələ”  göstərdiyi oyuna görə 12 komanda arasında 11-ci olmamalı idi. Üstəlik, sizin məşqçilik bacarığınıza da şübhə yoxdur. Bəs problem nədə idi?
– Problem ondadır ki, qeyri-sabitlik yaşandı. İndi sakit şəkildə bunları təhlil etməliyəm. Klubun prezidenti ilə danışanda da bildirdim ki, səhvləri analiz etməliyik.

Şahin Cəfərov