Peşəkar Futbol Liqası efir qrafikası ilə bağlı pilot layihənin təfərrüatlarını açıqlayıb.

Futbolpress.az layihə ilə bağlı videoçarxı təqdim edir.

Azərbaycan Premyer Liqasında XXII turun oyun cədvəli məlum olub.

Futbolpress.az xəbər verir ki, turun bütün görüşləri “CBC Sport” telekanalı vasitəsilə canlı yayımlanacaq.

27 fevral (cümə)

“Kəpəz” – “Sumqayıt”
Yevlax şəhər stadionu, 14:30

“Araz-Naxçıvan” – “Zirə”
“Liv Bona Dea Arena”, 18:00

28 fevral (şənbə)

“Şamaxı” – “Neftçi”
Şamaxı şəhər stadionu, 14:30

“Qəbələ” – “Karvan-Yevlax”
Qəbələ şəhər stadionu, 17:00

1 mart (bazar)

“Turan Tovuz” – “İmişli”
“Azersun Arena”, 16:30

“Qarabağ” – “Sabah”
Tofiq Bəhramov adına Respublika Stadionu, 19:00

Azərbaycan Premyer Liqasının XIV turundan təxirə salınmış “Qəbələ” – “Turan Tovuz” görüşünün oyun cədvəli məlum olub.

Futbolpress.az xəbər verir ki, qarşılaşma “CBC Sport” telekanalı vasitəsilə canlı yayımlanacaq.

24 fevral (çərşənbə axşamı)

“Qəbələ” – “Turan Tovuz”
Qəbələ şəhər stadionu, 15:00

Azərbaycan Premyer Liqasında XX və XXI turun oyun cədvəli açıqlanıb.

Futbolpress.az xəbər verir ki, XXI turun “Neftçi” – “Qarabağ” oyunu fevralın 21-də keçiriləcək.

XX tur

14 fevral (şənbə)

“İmişli” – “Qarabağ”
Quba OİK stadionu, 14:30

“Zirə” – “Karvan-Yevlax”
Zirə İdman Kompleksinin stadionu, 17:00

15 fevral (bazar)

“Kəpəz” – “Neftçi”
Yevlax şəhər stadionu, 14:30

“Araz-Naxçıvan” – “Sumqayıt”
“Liv Bona Dea Arena”, 17:00

16 fevral (bazar ertəsi)

“Şamaxı” – “Turan Tovuz”
Şamaxı şəhər stadionu, 14:30

“Qəbələ” – “Sabah”
Qəbələ şəhər stadionu, 17:00

XXI tur

20 fevral (cümə)

“Turan Tovuz” – “Zirə”
“Azersun Arena”, 17:00

“Sumqayıt” – “Qəbələ”
Mehdi Hüseynzadə adına Sumqayıt şəhər stadionu, 19:30

21 fevral (şənbə)

“Karvan-Yevlax” – “Araz-Naxçıvan”
Yevlax şəhər stadionu, 14:30

“Neftçi” – “Qarabağ”
“Palms Sports Arena”, 19:00

22 fevral (bazar)

“İmişli” – “Şamaxı”
Quba OİK stadionu, 14:30

“Sabah” – “Kəpəz”
“Bank Respublika Arena”, 17:00

Azərbaycan Premyer Liqasında XVIII tura yekun vurulub. Lider “Sabah” növbəti qələbəsini qazanıb, ikinci “Qarabağ” “Turan Tovuz”dan üstün olub.

“Neftçi” bu turda “Araz-Naxçıvan” səfərindən darmadağınla dönüb, “Şamaxı” “Kəpəz”ə, “Sumqayıt” isə “Karvan-Yevlax”a qalib gəlib. “Qəbələ” “İmişli”ni məğlub edib.

Karvan-Yevlax – Sumqayıt 0:2
Turun ilk matçında autsayder yenə xalsız qaldı. Yevlaxı təmsil edən “Karvan-Yevlax” uzun müddətdir, qələbəyə həsrət qalıb. Elitanı tərk etməyə əsas namizəd olan bölgə klubunun oyun planında çatışmazlıqları var. Son zərbələrdə uğursuzluq yaşayan “Karvan-Yevlax” müdafiədəki səhvləri də başqa problemdir. Gedişat yaxşı görünmür.

“Sumqayıt” isə avrokubok zonasında qalmaq yolunda mühüm qələbə qazandı. “Zirə”nin xal itirdiyi turda bu qələbə “kimyaçılar” üçün xüsusi önəm daşımış oldu. Saşa İliçin komandası hücumda yaxşı təsir bağışlasa da, bəzən yarımmüdafiə xəttindəki ötürmə səhvləri komandanın qapısı qarşısında təhlükəyə səbəb olur. “Kimyaçılar” bu problemi də yoluna qoysa, avrokuboklar zonasında qala bilər.

Qəbələ – İmişli 3:2
İkinci dövrənin ən yaxşı komandalarından biri “Qəbələ”dir. Kaxaber Sxadadzenin yetirmələri ardıcıl ikinci matçında qələbə qazanaraq, autsayderlər bölgəsindən uzaqlaşa bildi. Sonuncu sıradakı “Karvan-Yevlax”ı 8 xal qabaqlayan “qırmızı-qaralar” liqada qalmaq yolunda inamla irəliləyir. Hücumda realizasiya problemini həll etdiyi görünən bölgə klubu artıq iki oyuna yeddi qol vurmağı bacarıb.

“İmişli” isə eniş yaşayır. Qəbələ səfərində ikinci hissədə daha gümrah oyun göstərən bölgə klubu son dəqiqələrdə müdafiədəki boşluğa görə cəzalandı. “Qəbələ”nin qələbəsi tərəflər arasındakı xal fərqini 4-ə endirdi. “İmişli” gedişatı dəyişməlidir, yoxsa komanda təhlükəli zonaya düşə bilər.

Kəpəz – Şamaxı 0:2
Ötən turda “Qarabağ” səfərindən üç xalla dönən “Kəpəz” “şirlər”lə bacarmadı. Yevlaxda baş tutan matçda ilk hissədə buraxdığı qollarla xalsız qalan gəncəlilər autsayder “Karvan-Yevlax”ın uduzduğu turda yaxşı fürsəti boşa verdi.

“Şamaxı” isə “Qəbələ”yə 0:4 hesablı ağır məğlubiyyətdən sonra toparlanmağı bacardı. İki qol vuran və daha artığını vurmaqçün imkanları olan “şirlər” mövqeyini möhkəmləndirdi.

Zirə – Sabah 1:3
Lider “Sabah” çətin səfərdən inamlı qələbə ilə döndü. “Qarabağ”la 4 xallıq fərqi qoruyan “bayquşlar” çempionluq yolunda irəliləməkdədir. “Zirə” kimi intizamlı müdafiəsi ilə seçilən komandaya 30 dəqiqədə üç qol vuran “Sabah” oyunun taleyini məhz bu anlarda həll etdi.

“Zirə” isə rəqibin müqavimətini qıra bilmədi. Hər iki hissədə qol şansları yaradan “qartallar” qapıya düşməkdə çətinlik çəkdi. Hücumda realizasiya problemləri yaşayan “Zirə” azarkeşləri önündə ağır məğlubiyyət yaşadı.

Araz-Naxçıvan – Neftçi 0:4
Andrey Demçenkonun gəlişindən sonra Premyer Liqada ikinci oyunda da xal itirən naxçıvanlıların oyun planında çatışmazlıqları var. Müdafiədə və hücumda dişsiz görünən “Araz-Naxçıvan” yekunda layiq olduğu məğlubiyyəti yaşadı. Elmar Baxşıyevlə vidalaşan klub hələ uğursuz seriyadan çıxa bilmir. Sanki Baxşıyevin “ahı tutub”. Gedişat yaxşı görünmür, nəticələr belə davam etsə, Demçenkonun da Bakı günləri qısa çəkəcək.

“Neftçi” isə mövsümün ən yaxşı oyunlarından birini keçirdi. “Futbol ili”ndə ilk dəfə böyükhesablı qələbəyə sevinən “ağ-qaralar” pozitiv siqnallar verir. Avrokubok zonasından komanda çox uzaq deyil və qələbə seriyasının davam etməsi komandanı “beşlik” mübarizəsinə qoşa bilər.

Qarabağ – Turan Tovuz 1:0
Çempionlar Liqasında tarix yazan “Qarabağ” liqadakı “Kəpəz” məğlubiyyətindən sonra tovuzlular üzərində mühüm qələbəyə sevindi. “Sabah”ın öncədən üç xalı qazanması oyundan əvvəl təzyiqi daha artırmışdı. Xal itkisi fərqi böyüdə bilərdi. Lakin “Qarabağ” oyunboyu üstün olduğu matçda qələbəyə sevindi və xal fərqinin böyüməsinə imkan vermədi.

“Turan Tovuz” isə son dəqiqələrini daha basqılı oynadığı matçda xalsız qaldı. İlk hissədə bir neçə imkan yaradan tovuzlular qol vura bilmədi. “Qarabağ”ı geridə qəbul edən, bəzən ani hücuma çıxan bölgə təmsilçisinin oyunu göstərirdi ki, komanda bir xala razıdır. Son dəqiqələrdə dirəyə dəyən top komandanı xaldan məhrum etdi. Məğlubiyyətdən qaçmağa çalışan tovuzluların hesabı bərabərləşdirməyə gücü çatmadı.

Şahin Cəfərov

“Kəpəz” Azərbaycan çempionatlarının yüksək dəstəsində 700-cü oyununu keçirib.

Futbolpress.az xəbər verir ki, Gəncə klubunun yubileyi Azərbaycan Premyer Liqasının XVIII turuna təsadüf edib.

Qərb təmsilçisi “Şamaxı” ilə ev matçında 0:2 hesabı ilə uduzub. “Kəpəz” 700 oyunda 293 qələbə qazanıb, 146 heç-heçə edib və 261 dəfə uduzub. 1040 qola sevinən komanda 889 top buraxıb.

Gəncə klubu evdə 342, səfərdə 346, neytral meydanda 12 oyun keçirib. “Kəpəz” oyun sayında yalnız “Qarabağ”, “Neftçi” və “Şamaxı”dan geri qalır.

Qeyd edək ki, ilk matçını 1992-ci il mayın 3-də keçirən Gəncə təmsilçisi evdə “Turan”a 2:1 hesabı ilə qalib gəlib.

“Sabah” Azərbaycan Premyer Liqasında ardıcıl 7-ci qələbəsini qazanıb.

Futbolpress.az xəbər verir ki, bu, XVIII turun “Zirə” ilə görüşündə gerçəkləşib.

Bunadək “İmişli” (3:0), “Neftçi” (2:0), “Turan Tovuz” (3:1), “Qarabağ” (2:1), “Sumqayıt” (3:1) və “Karvan-Yevlax” (4:1) üzərində qələbə qazanan paytaxt təmsilçisi bu dəfə 3:1 hesabına sevinib. Bu, klub tarixinin rekordunun təkrarıdır.

“Sabah” Premyer Liqada ən uzun qələbə seriyasına 2022-ci ildə imza atmışdı. Həmin vaxt da komanda ardıcıl 7 dəfə qalib gəlib. 2022/23 mövsümünün ilk yarısındakı seriya dövründə 17 qol vuran paytaxt klubu 4 top buraxıb. Bu dəfə isə top fərqi 20-5-dir.

“Sabah” həm də ardıcıl 3-cü matçda 3 və ya daha çox qol vurub. Bu da klubun Premyer Liqadakı rekordunun təkrarıdır. Bakı təmsilçisi 2021/22 mövsümünün ilk yarısında “Sumqayıt” (3:0), “Qəbələ” (3:1) və “Zirə” (3:3) ilə qarşılaşmalarda məhsuldarlıq göstərib.

Azərbaycan Premyer Liqasının XVIII turu mövsümün ikinci het-triki ilə əlamətdar olub.

Futbolpress.az xəbər verir ki, “Qəbələ”nin futbolçusu Domi Massumo “İmişli” ilə ev oyununda (3:2) qol vurub.

Konqoluya qədər Toral Bayramov fərqlənib. “Qarabağ”ın futbolçusu V turun “Araz-Naxçıvan”la səfər görüşündə (5:0) üç dəfə qol sevinci yaşayıb.

Domi Premyer Liqanın tarixində milliləşənlər də daxil olmaqla legionerlərin ümumilikdə 50-ci het-trikinə imza atıb. Bunlardan 42-si legioner statuslu, 8-i Azərbaycan pasportuna malik xarici futbolçuların payına düşür.

Azərbaycan çempionatlarında ən çox het-trik edən legioner Davit Volkovdur. Cari mövsümdə “Zirə”də çıxış edən gürcüstanlı 4 matçda fərqlənib. Əcnəbilərin ilk het-trikinə isə onun həmyerlisi, sonradan milliləşən Badri Kvaratsxeliya imza atıb. O, “Kəpəz” forması geyindiyi 1997/98 mövsümündə 2 het-trik müəllifi olub.

Azərbaycan Premyer Liqasının XVIII turunda “Araz-Naxçıvan”la qarşılaşan “Neftçi” mövsümdə ilk dəfə səfərdə böyükhesablı qələbə qazanıb.

Futbolpress.az xəbər verir ki, paytaxt təmsilçisi rəqib meydanında 4:0 hesabı ilə qalib gəlib.

“Ağ-qaralar” sonuncu dəfə belə nəticəyə 2023/24 mövsümündə imza atmışdı. Bunu 624 gün gözləyən Bakı klubu 2024-cü il mayın 18-də “Səbail”in meydanında 3 cavabsız qola sevinib.

“Neftçi”nin səfərdəki 4 və ya daha çox top fərqli qələbəsi isə 2022/23 mövsümündə qeydə alınmışdı. “Liv Bona Dea”dakı uğurdan 1030 gün əvvəl – 2023-cü il aprelin 8-də “Sumqayıt” qonaqların 4 cavabsız qoluna üzülüb.

Azərbaycan Premyer Liqasının XVIII turunun “Qarabağ” – “Turan Tovuz” oyunundan (1:0) sonra meydan sahibi komandanın baş məşqçisi Qurban Qurbanov jurnalistlərin suallarını cavablandırdı.

Futbolpress.az xəbər verir ki, mütəxəssis əvvəlcə görüşlə bağlı fikirlərini bildirdi…

– Vacib qələbə idi. Futbolçularım xarakter göstərdilər. Azarkeşlərə təşəkkür edirəm, bizi dəstəklədilər. Yaxşı, bərk komandaya qarşı oynayırdıq. “Turan Tovuz”un özünəxas oyunu var. Belə matçlarda ritmi tutmaq asan deyil. Hər pauza, cərimə zərbəsi rəqibin üstünlüyü idi. Sona yaxın standart vəziyyətlərdən təhlükə yaratdılar.

– Adətən, səfər oyunlarından sonra ikinci heyətə üstünlük verirsiniz. Bu gün isə “Turan Tovuz”a qarşı əsas heyəti buraxmışdınız. Bu addımı çempionluq yolunda təhlükə yarandığı üçün atdınız?
– Belə hallar olur. Uzaq səfərdən gəlmişdik, yorğunluq var idi. Lakin futbolçulara bildirmişdim ki, bu oyuna hazır olmalıdırlar. Həm də artıq ehtiyac var. Narahat olduğum zədələrdir. Belə matçlarda mikro zədələr yarana bilər. Futbolçuların hazırlığına baxandan sonra qərar verdik ki, bu heyətlə çıxaq.

– Çempionlar Liqasında yüksək səviyyədə oyunlar və hakimlər görmüsünüz. Bizim yerli FIFA referilərinə nə tövsiyə verə bilərsiniz?
– Heç nə, oyun zamanı emosiyalar olur. Sadəcə bir az çox oyun dayanırdı. Bəzi epizodları davam etdirmək olardı. Elçin Məsiyev təyinat alanda rahat oluram. Çünki Avropa təcrübəsi var, oyun tempini yaxalaya bilər. Bəzi anlarda emosiyalara qapıldıq, lakin sonra ona bildirdim səbəbi. Normal qarşıladı. Biz kənardayıq və bəzi epizodlarda yanıla bilərik. Sadəcə oyun çox dayananda bir az aqressiya yaranır. Tempin düşməsinə görə fikirlərimi bildirmişdim. Amma ümumi götürəndə onlar bizdən daha yaxşı bilirlər.

– 21 il sonra “Nyukasl”ın stadionuna gedəcəksiniz. Xatirənizdə necə qalıb?
– Normal, olduğu kimi. O vaxt çılğın azarkeşlər var idi, bir az vahiməli idi. Orda sanki başqa bir futbol var. İngiltərə Premyer Liqası bütün liqaları üstələyir. Dünən yəqin “Liverpul” – “Nyukasl” oyununa baxdınız, ilk hissədə demək olar, oyun 2 dəfə dayandı, ya yox. Orda futbol başqadır. Hər komanda sona kimi mübarizə aparır. Elə bil forma yaranıb ki, sanki oyunun sonlarını azarkeşlər üçün oynayırlar. Daha çox mübarizə, qol olur.

– İbrahima Vadjinin epizodunda qırmızı vərəqə və sizin qolunuzda ofsayd şübhəsi var idi. Təkrara baxmışdınız?
– “Qırmızı”ya ehtiyac yoxdur. İstəmərəm ki, bəsit vərəqələr verilsin. Futbol mübarizələr oyunudur. O epizodlar azarkeşlərdə daha həvəs yaradır. 100 faizlik epizodlara qırmızı vərəqə verilməlidir, amma Vadjidə məncə, ehtiyac yox idi. Qola gəlincə, təkrara baxdım, təmiz qol idi.

– Çempionlar Liqasındakı uğurunuza görə, bəzi klublar sizi təbrik etmədi. Münasibətiniz necədir?
– Normal. Dünya futbolunda belə hallar var. Hamısı dostlarımızdır, özümüzünkülərdir. Hər klubun öz strukturu, sistemi var. Neqativ düşüncələrim yoxdur.

– “Liverpul”la oyunun ikinci hissəsində böyük ekranlarda məyus görünmüşdünüz. Belə hallarda sizi kim təsəlli edir?
– Mənə 90 dəqiqə baxsanız, məyus görünürəm (gülür). Özüm, klubum, Azərbaycan futbolu üçün bizim pley-off mərhələsinə çıxmaq böyük uğurdur. 10 xal topladıq, sevinməliyik. Amma hamımız məyus idik. Azarkeşlər də fərqli yanaşırlar. İstər-istəməz bəzi anlarda təəssüf hissi yaranır. Hər birimizin həyatda problemi olur. Futbol elədir ki, bir oyun qəhrəman olursan, bir oyun əksi. İndi futbol elə həddədir ki… İngiltərə Premyer Liqasında hər oyunda 4-5 qol olur, hər komanda bir-birinə qalib gələ bilir. İndiki 4-5 qollu oyunlar o vaxtın 0:0-larına bənzəyir. Futbol çox inkişaf edir. Çempionlar Liqasında 13 qol vurmuşuq, az deyil. Əvvəl il ərzində demək olar, 1-2 oyun böyükhesab qeydə alınırdı, amma indi hər tur bolqollu qarşılaşmalar olur.

– Vaxtilə futbolçusu olduğunuz “Baltika” sizi təbrik etdi. Sizinlə birbaşa əlaqəyə keçiblər?
– Xeyr. Amma yenə sağ olsunlar, hər birinə təşəkkür edirəm. Yuri Syominlə danışmışdım, təbrik etdi.

– “Sabah”ın davamlı yüksəlişi şəxsinizdə və komandada həyəcan yaradır?
– Narahatlıq həmişə olur. Qarşımıza çempionluq məqsədi qoymuşuqsa, bu, normaldır. Digər tərəfdən də sevinirik ki, çempionatda mübarizə gərginləşir. İdmandır, bir gün udursan, bir gün uduzursan. “Sabah” gəlir, həyəcanlı olaq, deyə fikirləşməməliyik.

– “Nyukasl”la səfər oyunundan öncə “Neftçi” ilə matç var. Təxirə salınma istəyəcəksini?
– Planda var, amma qarşıdakı günlərdə daha dəqiqləşəcək. Uzun səfərdir və oyunlar arasında vaxt azdır. Proqramımıza baxacağıq, uyğun görsək, təxirə salına ilər.

– “Nyukasl”la oyunöncəsi Şamaxı və Quba səfəriniz var. Burda meydançalar süni örtüklüdür. Narahatlıq var?
– Çox narahatam. “İmişli” ilə oyunda həva şəraiti pis olsa, həmin meydançada oynamaq çətin olacaq. Zədələrə görə narahatlıq var. Ümumilikdə, bu matçları “Nyukasl”la qarşı yaxşı hazırlıq kimi düşünmürəm. Narahatam. Qarşıdakı günlərdə hansısa rotasiya edə bilərik. Bizim daha çox oynamağa, oyun təcrübəsinə ehtiyac var. Lazım olsa, risklərə gedəcəyik.

– Pley-off üçün üç oyunçu sifariş edə bilərsiniz. Yeni transfer Jereminin Bakıya gələcəyi deyilir…
– Bəli, var. Bakıya gəlməlidir. Rəhbərliklə danışmamışam tam.

– Digər iki yer üçün Ramil və Kadi heyətə salına bilər?
– Baxacağıq. Hansı xəttə daha çox oyunçu lazım olacaq, mütləq edəcəyik. Hazırda boş yer yoxdur və əvəzetmə üçün kimisə çıxarmalıyıq. Götür-qoy edəcəyik. Qarşıda vaxtımız var.

– Quba və Şamaxı səfərinin yerinin dəyişməsi variantı var?
– Deyəsən, bir dəfə dəyişmişik. Olsaydı, böyük məmnuniyyətlə edərdim. Amma idman qaydaları var.

– “Nyukasl”la oyuna kimisə göndərmək fikriniz var?
– Xeyr. Püşkatmadan öncə də onların oyunlarına baxırdıq. Burda da işimiz çox olacaq.

Şahin Cəfərov

Azərbaycan Premyer Liqasının XVIII turunun “Qarabağ” – “Turan Tovuz” oyunundan (1:0) sonra qonaq komandanın baş məşqçisi Kurban Berdıyev jurnalistlərin suallarını cavablandırdı.

Futbolpress.az xəbər verir ki, mütəxəssis əvvəlcə görüşlə bağlı fikirlərini bildirdi…

– “Qarabağ”ı Çempionlar Liqasındakı uğuruna görə təbrik edirəm. Bu, Azərbaycan futbolunun uğurudur. Oyuna gəlincə, yaxşı məqamlar var idi. Ümumilikdə isə məyusedici nəticə oldu. Sonda imkanlar yaratsaq da, dəyərləndirə bilmədik.

– Burdan xal və ya xallar qazanmaq üçün nə çatmadı?
– Realizasiya.

– Transferlər bitib, ya axtarışdasınız?
– Axtarışdayıq.

– Vadjinin ilk hissədəki müdaxiləsinə qırmızı vərəqə verilə bilərdi. Bu haqda fasilədə onunla danışdınız?
– Xeyr, söhbət olmayıb. Pis niyyəti olmayıb. Oyun epizodu idi. Vadji sonra yaxınlaşıb, üzr istədi.

– “Qarabağ”ın qolundan sonra nəyə etiraz edirdiniz?
– Ofsaydla bağlı şübhələrimiz var idi. Nədənsə, VAR da xətti göstərmədi. Hər oyun göstərir, bu gün yox. Bəlkə də, mən də səhv edirəm. Elə başa düşülməsin ki, bəhanədir, buna görə uduzduq.

– Stadionla bağlı tez-tez yer dəyişirsiniz. Bu, komandanın oyununa təsir edir?
– Stadionumuzun hazır olmasını gözləyirik. Azarkeşlərimiz önündə oynamaq istəyirik.

– Avrokuboklara getməkçün kuboku, ya liqanı düşünürsünüz?
– İkisini də.

– Qolda müdafiəçiniz Zubirə ötürmə etdi. Bu səhvi necə qarşılayırsınız?
– Futboldur, ola bilər.

– Yeni hücumçunuz Çinellidən gözləntiləriniz nədir?
– Vaxt lazımdır. Düşünürəm ki, kömək edəcək.

Şahin Cəfərov

Azərbaycan Premyer Liqasının XVIII turunun “Araz-Naxçıvan” – “Neftçi” oyunundan (0:4) sonra meydan sahibi komandanın baş məşqçisi Andrey Demçenko jurnalistlərin suallarını cavablandırıb.

Futbolpress.az xəbər verir ki, mütəxəssis əvvəlcə görüşlə bağlı fikirlərini bölüşdü…

– Birinci hissə bizim üçün əlverişli olmadı. Standart vəziyyətdən qollar buraxdıq. Səhvlərə yol verdik və “Neftçi” iki qol vurdu. Fasilədən sonra daha yaxşı oynadıq, fürsətlər yaratdıq.  Hücum oyunu oynamaq üçün xüsusi istək lazımdır. Futbolçularda müəyyən psixoloji vəziyyət olmalıdır ki, hücum futbolu oynayasan. Bunu futbolçularda görmədim. “Neftçi”ni təbrik edirəm, yaxşı oynayaraq 4 qol vurdular.

– “Araz-Naxçıvan” rəhbərliyi tələbkarlığı ilə seçilir. Qələbəsizlik oyunlar davam edərsə, mövsüm başa çatmamış komandadan ayrılmaq ehtimalınız ola bilər?
– Başa düşürəm ki, 0:4 xoşagəlməz hesabdır. Komandaya hücum futbolu oynamağı öyrətmək istəyirəm. Üç həftənin içərisində psixoloji olaraq dəyişmək də asan deyil. Zaman bunu göstərəcək. Burada qalmağım nəticədən asılıdır.

– Hücum bir kənara, müdafiədə də problemlər var…
– Bəli, böyük problemdir. Hücuma çıxdıq və qapımızda 90 dəqiqədə 4 qol gördük. Daim müdafiə olunmaq Avropa futbolu deyil. Müasir Avropa futbolunun tələbini yerinə yetirmək istəyirik.

– Ötən mövsüm komandanı avrokuboklara çıxarmış Felipe Santos, Ramon Maçado, Nuno Rodriqes əsas heyətdən kənarda qalır. Səbəb nədir?
– Mənim üçün birinci olan məşq prosesidir. Kim daha güclüdür, kim mənim fəlsəfəmi daha tez qavrayır, o da oynayır.

– Həmyerliniz Vernidub sizi yaxşı tanıyır. Məğlubiyyətdə bu amil nə dərəcə rol oynadı?
– Vernidubu yaxşı tanıyıram, Ukraynada işləyib. Onun işini də izləmişəm. Amma bu gün öz oyunumuzu öyrətməyə çalışmalıyıq.

– Sizin üçün daha önəmli məşqlərdə özünü yaxşı göstərib, matçda rəqibi keçə bilməyən Hamidu Keytadır, yoxsa meydana sonradan daxil olan və cinahda aktivlik gətirən Felipe Santos?
– Bunu oyunda görürük. Felipe Santos qeyri-standart oyunçudur. Futbol təkcə hücumdan asılı deyil, müdafiədən ibarətdir. Bütün komanda ilə həm hücumda, həm də müdafiədə olmaq lazımdır.

Şahin Cəfərov

Azərbaycan Premyer Liqasının XVIII turunun “Araz-Naxçıvan” – “Neftçi” oyunundan (0:4) sonra qonaq komandanın baş məşqçisi Yuri Vernidub jurnalistlərin suallarını cavablandırıb.

Futbolpress.az xəbər verir ki, mütəxəssis media nümayəndələri ilə görüşdə bunları deyib…

– Sizdən öncəki məşqçilər komandanın fiziki durumundan şikayətlənirdi. Bu gün isə komandada həm oyun intizamı var idi, həm də yüksək pressinq tətbiq edirdi.Qışda komandada nəyi dəyişdiniz?
– Əvvəldən istəyim o olmuşdu ki, bu performansımız bir oyunluq olmasın, hər matçda belə olaq. Çünki futbolçularım bunu edə bilərlər. Fiziki vəziyyətə gəldikdə, daha yaxşı olmalıyıq, önümüzdə daha çox işlər var. Çünki komandanın yaxşı fiziki durumu yaxşı olarsa, gözəl də oynayar, yaxşı pressinq edib, yaxşı hücumlar həyata keçirərlər. Bunların arxasında həm də sürət dayanır. Hətta oyundan əvvəl İmad Fərəc və Cordan Rezabala xəstlənmişdi, onlar yox idi. Heç bizimlə deyildilər. Çünki onlar 5 gün xəstə oldular, digər oyunçular meydanda yaxşı görünürdülər. Bizdə ulduz yoxdur, kollektiv var. Hamı bir nəfər üçün, bir nəfər hamı üçün – bizim şüarımızdır. Ona görə hər biri ilə fəxr edirəm.

– “Zirə” ilə ötən turda edə bilmədiyiniz nələri bu gün etdiz?
– Demişdim ki, “Zirə” ilə oyun çətin idi. Düşünmürəm ki, “Zirə” ilə oyuna hazır deyildik. Orada psixoloji durum faktoru rol oynadı. Yoldaşlıq matçlarındakı gözəl oynamışdıq, məhz bu gün oynadığımız matç kimi. Mənim üçün ən önəmlisi odur ki, futbolçularrın hər biri bugünkü kimi oynamasını çatdırım. O zaman mən də sakit, səbirli olacam.

– Freddi Varqasın durumu nə yerdədir?
– Dəqiq deyə bilmərəm. Ayağına tikiş qoyublar. Orada çox ciddi kəsik var. ümid etməlk istəyirəm ki, hər şey yaxşı olacaq.

– Azərbaycanlı futbolçular rəqabətə görə çox da oynamırlar. Onların icarəyə yollanmasına icazə verəcəksiz?
– Heç kimi icarəyə verməyə hazırlaşmırıq. 22 futbolçumuz və 4 qapıçımız var. Buna qədər kim icarəyə verilibsə, olub. Hamısı oynamaq istəyir. Hər birinə şərait yaradacam. “Qəbələ”yə icarəyə verilən Rza Cəfərovu da izləyəcəyik.

– Növbəti görüş sabiq klubunuz “Qəbələ”yə qarşı olacaq…
– Mən o komandaya böyük hörmətlə yanaşıram, oğlum orada 3 il oynayıb. Hörmət başqa, oyun başqa. Mən “Neftçi”nin udmasını istəyirəm. “Qəbələ”nin də baş məşqçisi də öz qələbələrini. Son turlarda yaxşı çıxış edirlər, maraqlı oyun olacaq.

– Həm Andrey Ştoqrin, həm də Murad Məmmədov 90 dəqiqə oynamır. Səbəb fiziki durumlarıdır, ya necə?
– Ştoqrin oyunun gedişində dizindən zərbə aldı. Ona afərin ki, o cür vəziyyətdə olsa da, oynadı. Əgər fiziki duruma gəldikdə, rahat şəkildə 120-130 dəqiqə qaça bilər. Özü əvəzetmə istədi. Hesab da bizə imkan verirdi ki, dəyişikliyə gedək. Eyni məsələ Murada da aiddir. 22 oyunçum var, hamısı oynamaq istəyir. Mütləq şəkildə bütün oyunçuların oynamasına şərait yaratmalıyam ki, daim ehtiyatda oturmasınlar, meydanda oyun göstərsinlər. Oyun praktikası tam başqadır, 30 dəqiqə oyun, saatyarımlıq məşqdən daha faydalıdır

Şahin Cəfərov

“Qarabağ” Azərbaycan Premyer Liqasının XVIII turunda bu gün “Turan Tovuz”la qarşılaşacaq.

Futbolpress.az xəbər verir ki, saat 18:30-da start götürəcək oyuna komandalar aşağıdakı heyətlə çıxacaqlar:

“Qarabağ”: 99. Mateus Koxalski  13. Bəhlul Mustafazadə 44. Elvin Cəfərquliyev, 10. Abdullah Zubir (k) 81. Kevin Medina 8. Marko Yankoviç 2. Mateus Silva 9. Joni Montiel 15. Leandro Andrade 35. Pedro Bikalyo 17. Kamilo Duran

Ehtiyat oyunçular: 97. Fabian Buntiç 77. Ramil Şeydayev 27. Toral Bayramov 22. Musa Qurbanlı 7. Nəriman Axundzadə 32. Hikmət Cəbrayılzadə 20. Kadi Borqes 3. Sami Mmae 18. Dani Bolt 6. Kris Kuaku 21. Aleksey Kaşuk 11. Emmanuel Addai

Baş məşqçi: Qurban Qurbanov

“Turan Tovuz”: 1. Oleq Baklov 29. Filip Ozobiç 17. Rəhim Sadıxov 88. Faiq Hacıyev (k) 11. Ayxan Hüseynov 5. Roderik Miller 3. Enrike Silva 23. Alexandro Serrano 99. Vadji İbrahima 15. Emmanuel Hakman  32. Hayderson Hurtado

Ehtiyat oyunçular: 41. Sergey Samok 13. Mehman Hacıyev 4. Şəhriyar Əliyev 10. Xəyal Nəcəfov 6. Fərid Yusifli 73. Ülvü Mədətov 14. Murad Dadaşev 30. Mircamal Əlizadə 90. Joarlem Santos 19. Roberto Olabe 9. Coş Cinnelli 8. David Tavareş

Baş məşqçi: Kurban Berdiyev

“Neftçi” Azərbaycan Premyer Liqasının XVIII turunda bu gün “Araz-Naxçıvan”ın qonağı olacaq.

Futbolpress.az xəbər verir ki, saat 16:00-da, Mərdəkanda, “Liv Bona Dea Arena”da keçiriləcək görüşə komandalar aşağıdakı heyətlə çıxacaqlar:

“Araz-Naxçıvan”: 12. Kristian Avram 34. Urfan Abbasov (k) 5. Slavik Alxasov 8. Coşqun Diniyev 24. Mustafa Əhmədzadə 6. Patrik Andrade 29. Vanderson Melo 7. Hamidu Keyta 11. Ba-Muaka Simakala 77. Bruno Franko 70. Şarl Boli
Ehtiyat oyunçular: 94. Tərlan Əhmədli 4. Rahil Məmmədov 14. Ülvi İsgəndərov26. Ömər Buludov33. Elmir Cəfərov16. Ramon Maçado 23. Nuno Rodriqes 10. Felipe Santos 19. Bar Kohen
Baş məşqçi: Andrey Demçenko

“Neftçi”: 13. Kenan Piriç 8. Emin Mahmudov (k) 15. Elvin Bədəlov 47. Murad Məmmədov 77. Falaye Sako 24. Mustafa Sek5. İqor Ribeyro 18. İfeanyi Metyu 9. Bassala Sambu 70. Andrey Ştoqrin 10. Freddi Varqas
Ehtiyat oyunçular: 1. Emil Balayev 81. Məhdi Həsənov 4. Elvin Camalov 17. Murad Xaçayev 7. Emil Səfərov 19. Ağadadaş Salyanski 45. Vensan Abubakar 14. Edvin Kuç 6. Sessi Dalmeyda 27. Kristian Kostin 22. Luis Ortis 28. Alessio Kurçi
Baş Məşqçi: Yuri Vernidub

Bu gün Azərbaycan Premyer Liqasında XVIII tura yekun vurulub.

Futbolpress.az xəbər verir ki, sonuncu oyun günündə iki qarşılaşma keçiriləcək.

“Araz-Naxçıvan” “Neftçi”ni qəbul edib. Matç qonaqların qələbəsiylə başa çatıb. “Turan Tovuz” isə səfərdə “Qarabağ”a uduzub.

Azərbaycan Premyer Liqası
XVIII tur
1 fevral

16:00 Araz-Naxçıvan – Neftçi 0:4
Qollar: İqor Ribeyro, 4, Bassalu Sambu, 40, Kurçi, Abubakar, 90+2

Baş hakim: Rauf Cabarov
“Liv Bona Dea Arena”

18:30 Qarabağ – Turan Tovuz 1:0
Qol: Zubir, 41
Baş hakim: Elçin Məsiyev
Tofiq Bəhramov adına Respublika stadionu