“Sanderlend” futbol üzrə İngiltərə Premyer Liqasının 2025/2026-cı illər mövsümünün son oyununda “Çelsi”ni 2:1 hesabı ilə məğlub edib.

Arena.az xəbər verir ki, sözügedən komanda bu qələbə sayəsində Premyer Liqanın yarış cədvəlində 7-ci yeri tutub və Avropa Liqasına vəsiqə qazanıb.

Bu isə “qara pişiklər”in təxminən yarım əsrlik həsrətinə son qoyub. Belə ki, bu komanda 53 ildən sonra ilk dəfə avrokuboklarda oynayacaq.

Xatırladaq ki, “Sanderlend” sonuncu dəfə 1973/1974-cü illər mövsümündə avrokuboklarda mübarizə aparmışdı.

Maraqlıdır ki, bu komanda əvvəlki mövsümü Çempionşipdə keçirdiyi halda 2025/2026-cı illər mövsümündən etibarən Premyer Liqaya qayıtmışdı. Amma elitadakı uğurlu çıxış fransalı mütəxəssis Rejis Le Brinin rəhbərlik etdiyi kollektivə möhtəşəm nəticə qazanmağa kömək edib.