Portuqaliya millisinin yeni baş məşqçisisi Jorje Jezus hücumçu Kriştiano Ronaldo haqda fikirlərini bölüşüb.

Futbolpress.az xarici KİV-ə istinadən xəbər verir ki, mütəxəssis 41 yaşlı futbolçu üçün yığmanın qapılarının açıq olduğunu bildirib:

“Ronaldo Portuqaliyanın simvoludur. O, heç vaxt milli üçün problem ola bilməz. “Əl Nəsr”də karyerasına davam edir və güman ki, orada da futbolla vidalaşacaq. Millidə də oynamağa hazır olduğu müddətdə qapılarımız açıqdır”.

Ronaldonun çıxış etdiyi Portuqaliya millisi dünya çempionatına 1/8 finalda vida edib. Komanda İspaniyaya uduzub – 0:1. Ronaldo matçdan sonra millidəki karyerasını bitirməyi düşündüyünü deyib.

Portuqaliya Futbol Federasiyası bu ölkənin milli komandasının baş məşqçi vəzifəsinə təyinatla bağlı Jorje Jezus ilə razılıq əldə olunduğunu açıqlayıb.

Arena.az qurumun mətbuat xidmətinə istinadən xəbər verir ki, 71 yaşlı mütəxəssislə 4 illik (2030-cu ilin 31 iyulunadək) müqavilə imzalanıb.

Jezus bu vəzifədə dünya çempionatının (DÇ-2026) 1/8 final mərhələsində İspaniyaya 0:1 hesabı ilə məğlub olaraq mübarizəni dayandırmış komandanın baş məşqçiliyi postundan ayrılmış Roberto Martinesi əvəzləyib.

Təcrübəli portuqaliyalı mütəxəssis son olaraq 2025-ci ilin iyulundan 2026-cı ilin mayınadək Səudiyyə Ərəbistanının “Əl-Nəsr” komandasını çalışdırıb. O, komandanı ölkə çempionluğuna daşıdıqdan sonra vəzifəsindən ayrıldığını açıqlamışdı.

Bundan əvvəl Jezus iki fərqli dövrdə “Əl-Hilal”a rəhbərlik edib (2018–2019 və 2023–2025). Onun rəhbərliyi altında Ər-Riyad təmsilçisi bir dəfə Səudiyyə Ərəbistanı çempionu və ölkə kubokunun qalibi olub, üç dəfə isə super kuboku qazanıb.

Jorje Jezus məşqçilik karyerası ərzində Portuqaliyanın “Benfika”, “Sportinq”, “Braqa”, “Belenenseş”, “Moreyrense” və “Vitoriya” (Gimaraynş), Braziliyanın “Flamenqo”, həmçinin Türkiyənin “Fənərbağça” komandalarını da çalışdırıb.

Jezus “Benfika” ilə üç dəfə Portuqaliya çempionu (2010, 2014, 2015), bir dəfə ölkə kubokunun (2014), beş dəfə isə super kubokun (2010, 2011, 2012, 2014, 2015) qalibi olub.