Azərbaycan Basketbol Liqasında (ABL) 2026/2027-ci illər mövsümünün yarış formatı, iştirak şərtləri və əsas normativ dəyişiklikləri açıqlanıb.

Arena.az xəbər verir ki, bu barədə Azərbaycan Basketbol Federasiyasının (ABF) mətbuat xidməti məlumat yayıb.

Xəbərdə bildirilir ki, yeni mövsümə 2026-cı il oktyabrın 3-də start veriləcək. 8 komanda 3 dövrədən ibarət müntəzəm çempionatda, ümumilikdə 21 tur ərzində mübarizə aparacaq. Müntəzəm mövsüm başa çatdıqdan sonra turnir cədvəlində ilk iki yeri tutmuş komandalar birbaşa yarımfinala vəsiqə qazanacaqlar. 3, 4, 5 və 6-cı yerləri tutmuş komandalar isə “pley-in” mərhələsində iştirak edəcəklər.

Yarımfinal və final mərhələləri maksimum beş oyundan ibarət seriya formatında keçiriləcək. Yarımfinal seriyasında ən tez üç qələbə qazanmış komanda finala yüksələcək. Final seriyasında da ən tez üç qələbə qazanmış komanda Azərbaycan Basketbol Liqasının çempionu elan olunacaq.

Müntəzəm mövsümü 7-ci və 8-ci pillələrdə başa vurmuş komandalar isə daha yüksək pillədə qərarlaşmış klubun meydanında keçiriləcək “pley-out” oyununda qarşılaşacaqlar. Qalib komanda növbəti mövsüm üçün ABL-də iştirak hüququnu qoruyacaq.

2025/2026-cı illər mövsümünün yekununa əsasən, yeni mövsümdə “Sabah”, “Landau Lions”, “Gəncə”, “Neftçi” İK, “Şəki”, “Naxçıvan”, “Ordu” və NTD klubları iştirak hüququ qazanıblar. Bu komandalardan hər hansı biri iştirak üçün tələb olunan sənədləri təqdim etmədiyi və ya Əsasnamədə (2026/2027) müəyyən edilmiş inzibati və idman tələblərinə cavab vermədiyi halda, ABF ötən mövsümü 9–12-ci yerlərdə başa vurmuş klublar arasında dəvət prosesinə başlayacaq.

Yeni mövsümdə də oyunlar əvvəlki mövsümdə olduğu kimi, “4+1” qaydası ilə keçiriləcək. Hər bir komanda oyun ərzində meydanda eyni vaxtda ən azı 1 yerli basketbolçunun iştirakını təmin etməlidir. Bununla yanaşı, ABL-də iştirak edən hər bir klub mövsüm başlamazdan əvvəl ABF-də ən azı 5 yerli basketbolçunu qeydiyyatdan keçirməlidir.

Azərbaycan Basketbol Liqasının sonuncu qalibi olan “Sabah” komandasının FIBA Çempionlar Liqasının əsas mərhələsindəki rəqibləri bəlli olub.

Arena.az xəbər verir ki, bu, turnirin püşkatma mərasimindən sonra müəyyənləşib.

Azərbaycan çempionu A qrupunda Türkiyənin “Trabzonspor”, Fransanın “Nanter” və Litvanın “Ritas” klubları ilə üz-üzə gələcək.

Xatırladaq ki, əsas mərhələyə oktyabrın 6-da start veriləcək. Qrupun qalibi birbaşa ən güclü “16-lığ”a vəsiqə qazanacaq. İkinci və üçüncü yerləri tutan komandalar isə yan qrupun müvafiq təmsilçiləri ilə 3 oyunluq seriyada 2 qələbəyədək davam edən “pley-in” mərhələsində üz-üzə gələcəklər.

“Sabah”ın baş məşqçisi Lazar Spasiç püşkatmanın nəticələrini dəyərləndirib. O, klubun mətbuat xidmətinə açıqlamasında bunları söyləyib:

“Püşkatmanın nəticəsindən razı qaldığımı deyə bilmərəm. Fikrimcə, bu dəfə bəxtimiz gətirmədi. Açığı, sonuncu səbətdə yer alan Bilbao və Trabzon təmsilçiləri kimi güclü rəqiblərlə qarşılaşmaq istəməzdik. “Trabzonspor” artıq öz gücünü təsdiqləmiş və turnirin sürpriz komandalarından birinə çevrilmiş kollektivdir. Onların böyük büdcəyə malik olduğunu və turnirin ən güclü komandaları sırasında yer aldığını düşünürəm. “Nanter” də çox güclü çempionatda çıxış edən ciddi rəqibdir. Onlar ölkə çempionatını ilk üçlükdə başa vurublar. “Ritas” isə ötən mövsümün çempionudur. Bütün bunlara baxmayaraq, təslim olmaq fikrində deyilik. Bəli, kağız üzərində qrupun autsayderi hesab oluna bilərik, amma hər oyunda əlimizdən gələni edərək, sona qədər mübarizə aparacağıq. Ümid edirəm ki, bu mövsüm yaxşı nəticələr göstərə biləcəyik”.

Yeri gəlmişkən, Azərbaycanın “Landau Lions” basketbol komandasının da FIBA Çempionlar Liqasındakı rəqibi bəlli olub. Komanda 2-ci təsnifat mərhələsinin 1/8 finalında Latviyanın “Riqa” kollektivi ilə üz-üzə gələcək. Oyunlar sentyabrın 14-20-si aralığında keçiriləcək.