Bu yay “Nyukasl”dan azad agent kimi ayrılmış sağ cinah müdafiəçisi Kiran Trippyer bundan sonra “Vulverhempton”un uğurları üçün çalışacaq.

Arena.az xəbər verir ki, bu barədə “Vulverhempton” rəsmi saytı vasitəsilə məlumat yayıb.

Təcrübəli futbolçu ilə 2 illik (2028-ci ilin yayına qədər) müqavilə imzalanıb.

Xatırladaq ki, “Vulverhempton” 2025/2026-cı illər mövsümünün yekunlarına əsasən Premyer Liqadan Çempionşipə düşüb.

Kiran Trippyer “Mançester Siti”nin yetirməsidir. O, “şəhərlilər”in heyətində olarkən “Barnsli” və “Börnli” kimi klublarda icarədə olub. 2012-ci ildə “Börnli” onu birdəfəlik transfer edib. Müdafiəçi 2015-2019-cu illər aralığında “Tottenhem”də, 2019-2022-ci illər aralığında isə Madrid “Atletiko”sunda forma geyinib.

Trippyer 2022-ci ilin yanvarında İspaniyanın “Atletiko” (Madrid) klubundan 14 milyon avro qarşılığında “Nyukasl”a keçib. 35 yaşlı futbolçu bu komandanın heyətində 160 oyuna çıxıb. O, bu görüşlərdə 4 qol vurub, 29 məhsuldar ötürmə ilə yadda qalıb.

Trippyer 2017-ci ilin iyun ayında, özünün 26 yaşı olarkən İngiltərə yığmasında debüt edib. O, millinin heyətində 54 qarşılaşmada meydana çıxıb və 1 qol vurub. Müdafiəçinin hesabında 5 qol ötürməsi də var. Kiran İngiltərə millisi ilə AÇ-2020 və AÇ-2024-də gümüş medal qazanıb.

“Transfermarkt” internet-portalı 35 yaşlı müdafiəçinin transfer dəyərini 2,5 milyon avro məbləğində qiymətləndirir.

Futbol üzrə İngiltərə Premyer Liqasında uğursuz mövsümü (2025/2026) geridə qoymuş “Nyukasl” klubu 6 oyunçusu ilə yollarını ayırıb.

Arena.az xəbər verir ki, bu barədə klubun rəsmi saytı məlumat yayıb.

Xəbərdə bildirilir ki, qapıçı Aaron Remsdeyl icarə müqaviləsinin müddəti başa çatdığı üçün məxsus olduğu “Sauthempton” klubuna geri dönəcək.

Müdafiəçi Mett Targett, eləcə də qapıçılar Con Raddi və Maks Tompsonun isə klubla başa çatmış müqavilələrinin yenilənməməsinə qərar verilib.

Kiran Trippyer və Emil Kraft da komandanı tərk ediblər. Onlar da klubla yeni müqavilə bağlamayıblar.

Klub onlara xidmətlərinə görə təşəkkür edib, gələcək karyeralarında uğurlar arzulayıb.

Fabian Şer isə klubla yeni müqaviləyə imza atıb. O, daha bir il klubda qalmağa qərar verib. Yeni müqavilə 2026/2027-ci illər mövsümünün sonunadək nəzərdə tutulub.

Xatırladaq ki, “Nyukasl” İngiltərə Premyer Liqasının 2025/2026-cı illər mövsümünü 49 xalla 20 iştirakçı arasında 12-ci pillədə başa vurub. Komanda keçirdiyi 38 oyunda 14 qələbə qazanıb, 7 heç-heçə edib, 17 məğlubiyyətə üzülüb.