“Nyukasl”ın sağ cinah müdafiəçisi, 35 yaşlı ingilis futbolçu Kiran Trippyer cari mövsümün sonunda İngiltərə klubunu tərk edəcək.

Arena.az xəbər verir ki, bu barədə klubun mətbuat xidməti məlumat yayıb.

Təcrübəli futbolçunun Premyer Liqa təmsilçisi ilə müqaviləsinin müddəti bitmək üzrədir. Tərəflər yeni anlaşmaya ehtiyac duymadıqları üçün yollarını ayırmağa qərar veriblər. Trippyer klubu azad agent statusu ilə tərk edəcək. Amma onun karyerasını bitirmək fikrində olmadığı və digər təklifləri nəzərdən keçirəcəyi iddia olunur.

Kiran Trippyer “Mançester Siti”nin yetirməsidir. O, “şəhərlilər”in heyətində olarkən “Barnsli” və “Börnli” kimi klublarda icarədə olub. 2012-ci ildə “Börnli” onu birdəfəlik transfer edib. Müdafiəçi 2015-2019-cu illər aralığında “Tottenhem”də, 2019-2022-ci illər aralığında isə Madrid “Atletiko”sunda forma geyinib.

Trippyer 2022-ci ilin yanvarında İspaniyanın “Atletiko” (Madrid) klubundan 14 milyon avro qarşılığında “Nyukasl”a gəlib. 35 yaşlı futbolçu indiyə qədər bu komandanın heyətində 157 oyuna çıxıb. O, bu görüşlərdə 4 qol vurub, 29 məhsuldar ötürmə ilə yadda qalıb.

Trippyer 2017-ci ilin iyun ayında, özünün 26 yaşı olarkən İngiltərə yığmasında debüt edib. O, millinin heyətində 54 qarşılaşmada meydana çıxıb və 1 qol vurub. Müdafiəçinin hesabında 5 qol ötürməsi də var. Kiran İngiltərə millisi ilə AÇ-2020 və AÇ-2024-də gümüş medal qazanıb.

“Transfermarkt” internet-portalı 35 yaşlı müdafiəçinin transfer dəyərini 2,5 milyon avro məbləğində qiymətləndirir.