Futbol üzrə İspaniya milli komandasının 19 yaşlı cinah hücumçusu Lamin Yamalın Barselona yaxınlığındakı evi qarət olunmağa cəhd edilib.

Arena.az xəbər verir ki, bu barədə “La Vanguardia” nəşri məlumat yayıb.

Hadisənin DÇ-2026-nın yarımfinalında İspaniyanın Fransanı 2:0 hesabı ilə məğlub etməsindən sonra, yerli vaxtla saat 04:00 radələrində Espluqes-de-Llobreqat yaşayış məntəqəsində baş verdiyi bildirilir.

Məlumata görə, futbolçunun şəxsi mühafizə xidmətinin əməkdaşı müşahidə kameralarında iki nəfərin evin hasarına dırmaşdığını görüb. Şübhəlilər izlənildiklərini anlayan kimi hasardan enərək hadisə yerindən qaçıblar.

Hadisə ilə bağlı Kataloniya polisi araşdırmalara başlayıb. Hüquq-mühafizə orqanları qarət cəhdinin baş verdiyini təsdiqləsələr də, evin sahibinin kimliyini açıqlamayıblar.

“La Vanguardia” yazır ki, sözügedən ev əvvəllər İspaniya millisinin sabiq futbolçusu Jerar Pike ilə dünya şöhrətli müğənni Şakiranın birgə yaşadığı mülk olub və bu səbəbdən geniş ictimaiyyətə yaxşı tanınır. Bir neçə ay öncə həmin evi Lamin Yamalın aldığı barədə xəbərlər yayılmışdı.

Qeyd edək ki, 19 yaşlı Lamin Yamal “Barselona” akademiyasının yetirməsidir. O, əsas komandada 2023-cü ilin aprelindən çıxış edir. Hücumçu Kataloniya klubu ilə üç dəfə İspaniya çempionu (2023, 2025, 2026), iki dəfə İspaniya Superkubokunun (2025, 2026), bir dəfə isə ölkə kubokunun (2025) qalibi olub.

Norveç millisinin hücumçusu Aleksander Sörlot DÇ-2026-nın 1/4 finalında İngiltərə ilə oyundan sonra təhqir və ölüm təhdidlərinə məruz qalıb.

Arena.az xəbər verir ki, o, İngiltərə 1:2 hesabı ilə əlavə vaxtda məğlub olduqları oyundan sonra sosial şəbəkələrdə əsas müzakirə olunan futbolçulardan birinə çevrilib.

Futbolçunun sevgilisi Lena Selnes sosial şəbəkə hesabında onlara göndərilən bəzi mesajları paylaşıb. Sörlotun ünvanına “Axmaq, özünü öldür”, “Onu öldürmək istəyirəm” kimi təhdidlər, həmçinin onun yanaraq ölməsini arzulayan mesajlar göndərilib.

Qeyd olunur ki, qarşılaşmanın ilk hissəsində Sörlot əlverişli vəziyyətdə olan Erlinq Haalanda ötürmə verməyib. Həmin epizod qol ilə nəticələnsəydi, Norveç millisi hesabı 2:0-a çatdıra və oyunun gedişini öz xeyrinə dəyişə bilərdi.

Buna baxmayaraq, İngiltərə millisi geridönüş edərək əlavə vaxtda 2:1 hesablı qələbə qazanıb və yarımfinala yüksəlib.

BƏƏ-li iş adamı və milyarder Xələf əl-Həbtur futbol üzrə Misir millisinin dünya çempionatındakı uğurlu çıxışını xüsusi hədiyyə ilə mükafatlandıracaq.

Arena.az xəbər verir ki, bu barədə “The National” nəşri məlumat yayıb.

Əl-Həbtur komandanın futbolçularına, eləcə də məşqçi, inzibati və tibbi heyətinə ümumilikdə 59 ədəd “Mitsubishi Eclipse Cross” markalı krossover hədiyyə edəcəyini açıqlayıb:

“Misirin sevinci bütün ərəb dünyasının sevincidir. Bu hədiyyə ölkəsini ucaldan, azarkeşlərini sevindirən və bütün ərəblərə qətiyyət, əzm və döyüş ruhunun nümunəsini göstərən Misir qəhrəmanlarına sevgimizin və minnətdarlığımızın ifadəsidir”, – deyə milyarder sosial şəbəkə hesabında yazıb.

Əl-Həbturun təsis etdiyi “Al Habtoor Group” şirkətinin nümayəndəsi bildirib ki, 59 avtomobil artıq göndərilməyə hazırlanır. İş adamı mükafatın yalnız futbolçulara deyil, bütün texniki, inzibati və tibbi heyətə təqdim olunacağını vurğulayıb. Onun sözlərinə görə, əldə olunan uğur bütün kollektivin əməyinin nəticəsidir. Bu barədə artıq Misir Futbol Assosiasiyasına da məlumat verilib.

Qeyd edək ki, Misir millisi tarixində ilk dəfə dünya çempionatının 1/8 final mərhələsinə yüksəlib. Afrika təmsilçisi bu mərhələdə dünya çempionu Argentina yığmasına 2:3 hesabı ilə məğlub olaraq mübarizəni dayandırıb. Daha əvvəl BƏƏ-nin vitse-prezidenti, baş naziri və Dubay əmiri Şeyx Məhəmməd bin Rəşid Əl Məktum da Misir millisinin çıxışını yüksək qiymətləndirərək, komandanın son dəqiqəyədək dünya çempionuna qarşı mübarizə apardığını bildirmişdi.

Fransanın PSJ klubunun qapıçısı Matvey Safonov aliment ödənişi ilə bağlı hüquqi normaya etiraz edərək Konstitusiya Məhkəməsinə şikayət verib.

Arena.az xəbər verir ki, bu barədə futbolçunun vəkili Andrey Kryuçkov TASS-a açıqlamasında bildirib.

Onun sözlərinə görə, hazırda məhkəmənin müraciəti icraata qəbul edib-etməyəcəyi gözlənilir:

“Məhkəmənin müraciəti icraata qəbul edib-etməyəcəyini öyrənəcəyik. Əgər qəbul olunarsa, işə baxılıb-baxılmayacağı müəyyənləşəcək. Bununla bağlı qərarın təxminən iki aydan sonra məlum olacağını gözləyirik”, – deyə Kryuçkov bildirib.

Vəkil qeyd edib ki, şikayətin məqsədi alimentlə bağlı mübahisəli hüquq normasının Konstitusiyaya uyğunluğunun yoxlanılmasıdır:

“İstərdik ki, məhkəmə işi icraata qəbul etsin. Çünki etiraz etdiyimiz normalarda Konstitusiyaya uyğun olmayan məqamların olduğunu düşünürük. Ötən il keçirilən hüquq forumunda Ali Məhkəmənin nümayəndəsi də alimentlərin tutulması mexanizmində qeyri-bərabərlikdən danışmışdı. Buna görə də bu hüquqi yola əl atmaq qərarına gəldik”, – deyə o əlavə edib.

Qeyd edək ki, Matvey Safonov ötən ilin iyununda 3 il yarım ərzində yığılan və 64 milyon rubldan çox olan aliment borcunu tam ödəyib.

Futbolçunun keçmiş həyat yoldaşı Anastasiya Kazaçekin məsələ ilə bağlı mövqeyi açıqlanmır.