Premyer Liqada çıxış etmək uğrunda “Qəbələ” və “Mingəçevir” arasında keçiriləcək pley-off matçının proqramı müəyyənləşib.
Arena.az xəbər verir ki, bu barədə Peşəkar Futbol Liqasının (PFL) rəsmi saytı məlumat yayıb.
Xəbərdə bildirilir ki, həlledici görüş mayın 28-də Sumqayıtda baş tutacaq. Qarşılaşmaya saat 18:30-da start veriləcək.
Xatırladaq ki, “Qəbələ” Azərbaycan Premyer Liqasında 33 oyuna 27 xal toplayaraq 12 iştirakçı arasında 11-ci yeri tutub. Sözügedən komanda cari mövsümdə Birinci Liqanı ikinci sırada başa vurmuş “Mingəçevir”lə üz-üzə gələcək. Bir matçdan ibarət olan bu dueldə qələbə qazanacaq tərəf 2026/2027-ci illər mövsümündə Premyer Liqada çıxış etmək hüququ qazanacaq. Məğlub tərəf isə Birinci Liqada mübarizə aparacaq.
Premyer Liqaya vəsiqə uğrunda pley-off oyunu 28 may
Premyer Liqaya vəsiqə uğrunda pley-off oyununun nominal meydan sahibinin müəyyənləşdirilməsi məqsədilə püşkatma mərasimi keçirilib.
Arena.az xəbər verir ki, mərasimdə Peşəkar Futbol Liqasının (PFL), Premyer Liqanın 11-cisi “Qəbələ”nin və Birinci Liqanın son turunda 2-ci yeri tutmağı bacarmış “Mingəçevir”in nümayəndələri iştirak ediblər.
PFL Yarışların təşkili və qeydiyyatı şöbəsinin baş mütəxəssisi Elvin Yaqubov, “Qəbələ” idman direktoru Səbuhi Səfiyarlı, “Mingəçevir” isə İdarə Heyətinin sədr müavini Ruslan Həmidov ilə təmsil olunub. Püşkatmaya əsasən “Qəbələ” nominal meydan sahibi olub.
Püşkatmadan sonra klub nümayəndələri ilə Peşəkar Futbol Liqası arasında görüş keçirilib. Görüşdə Peşəkar Futbol Liqasının texniki-idman direktoru Elgiz Abbasov pley-off oyunu ilə bağlı ilkin təşkilati məsələlər, pley-off oyununun qaydaları, nəzərə alınacaq digər məqamlarla bağlı ətraflı məlumat verib, klub rəsmilərinin oyunla bağlı planları dinlənilib.
PFL-in qərarına əsasən, Premyer Liqa uğrunda pley-off oyunu mayın 28-də “Sumqayıt Arena”da keçiriləcək. Həlledici görüşə saat 18:30-da start veriləcək. Bu oyunda VAR sistemi tətbiq ediləcək. Qalib gələcək Premyer Liqaya yüksələcəksə, məğlub tərəf Birinci Liqada çıxış etmək məcburiyyətində qalacaq.
Bu gün futbol üzrə Azərbaycan Birinci Liqasında 2025/2026-cı illər mövsümünün sonuncu – 27-ci turuna yekun vurulub.
Arena.az xəbər verir ki, sonuncu oyun günündə üç qarşılaşma baş tutub.
Məhz bu oyunlardan sonra Azərbaycan Premyer Liqasına vəsiqə uğrunda pley-off mərhələsinin ikinci iştirakçısı müəyyənləşib. “Səbail”i məğlub edən “Mingəçevir” “Qəbələ”yə rəqib olub. Yaşar Məmmədzadə adına Mingəçevir şəhər stadionunun ehtiyat meydançasında keçirilmiş oyun ev sahiblərinin 4:1 hesablı qələbəsi ilə yekunlaşıb. Bu nəticədən sonra xallarının sayını 51-ə çatdırmış “Mingəçevir” turnir cədvəlində ikinci sıraya yüksəlib və adını pley-offa yazdırıb. “Səbail” isə mövsümü 50 xalla üçüncü pillədə başa vurub.
Beləliklə, Birinci Liqada ikinci yeri tutmuş bölgə təmsilçisi Azərbaycan Premyer Liqasında 11-ci sırada yer almış “Qəbələ” ilə pley-off maçında üz-üzə gələcək.
Bu gün keçirilmiş digər oyunlarda “Şahdağ Qusar”la “Baku Sportinq”lə sülh bağlayıb – 1:1. “Zaqatala” isə çempion “Şəfa”ya 2:1 hesabıyla qalib gəlib.
Login
