“Brügge”nin futbolçusu Kristos Tzolis karyerasını İngiltərədə davam etdirə bilər.

Futbolpress.az xəbər verir ki, “Arsenal” vingerin xidmətində maraqlıdır. Bu barədə İngiltərə mətbuatı məlumat yayıb. London klubu “Beşiktaş”a keçən Leandro Trossardın əvəzinə Tzolisi transfer etmək istəyir.

Kristos özü də “topçular”da oynamaq niyyətindədir.

Yunanıstanlı futbolçu ötən mövsüm 36 oyunda 17 qol vurub, 23 məhsuldar ötürmə edib.

Futbol üzrə Belçika milli komandasının yarımmüdafiəçisi Leandro Trossard İngiltərənin “Arsenal” klubundan ayrılaraq “Beşiktaş”a keçib.

Arena.az xəbər verir ki, bu barədə Türkiyə klubunun mətbuat xidməti məlumat yayıb.

Transfer müqabilində “Arsenal”a ümumilikdə 18 milyon avro ödəniləcək. Bu məbləğ üç il ərzində altı bərabər hissə şəklində köçürüləcək. Tərəflər arasında 3 illik müqavilə imzalanıb. Razılaşmada əlavə olaraq 1 illik uzatma opsiyası da nəzərdə tutulub. Müqavilənin şərtlərinə əsasən, Trossard hər mövsüm üçün 6,5 milyon avro zəmanətli əməkhaqqı alacaq.

Leandro Trossard Belçikanın “Genk” klubunun yetirməsidir. O, bu klubda olarkən “Lommel Yunayted”, “Vesterlo”, “Leuven” kimi klublarda icarədə də oynayıb. 2019-cu ildə “Brayton”a üz tutmuş yarımmüdafiəçi 2023-cü ildə məhz bu klubdan 24 milyon avro qarşılığında “Arsenal”a keçmişdi. Belçikalı futbolçu London təmsilçisinin heyətində 174 oyun keçirib, 36 qol və 34 məhsuldar ötürmə müəllifi olub.

Trossard 2020-ci ildə debüt etdiyi Belçika milli komandasının heyətində 57 oyuna çıxıb, 14 qol vurub, 8 məhsuldar ötürmə verib.

“Transfermarkt” internet-portalı 31 yaşlı vingerin transfer dəyərini 18 milyon avro məbləğində qiymətləndirir.

Futbol üzrə İngiltərə Premyer Liqasının 2025/2026-cı illər mövsümünün qalibi olan “Arsenal” heyətini yeni qapıçı – İllan Melye ilə gücləndirib.

Arena.az xəbər verir ki, bu barədə London təmsilçisi rəsmi saytı vasitəsilə məlumat yayıb.

İngiltərə klubu fransalı qolkiperi azad agent kimi heyətinə qatıb. 26 yaşlı qapıçı ilə imzalanmış müqavilənin müddəti açıqlanmayıb. O, yeni komandasına mövsümöncəsi hazırlıq toplanışı zamanı qoşulacaq.

Qeyd edək ki, İllan Melye son 7 mövsümü İngiltərənin digər klubu “Lids Yunayted”də keçirib. O, bu müddətdə bütün turnirlərdə 215 oyunda meydana çıxıb, 286 qol buraxıb, 70 matçda qapısını toxunulmaz saxlayıb.

Fransanın “Loryan” klubunun yetirməsi olan qolkiper “Arsenal”da 30 nömrəli formanı geyinəcək.

Melye Fransanın U-18, U-19, U-20 və U-21 yığmalarında çıxış etsə də, əsas millidə debüt şansı qazanmayıb.