“İmişli”nin baş məşqçisi Xorxe Kaskilya Azərbaycan Premyer Liqasının 28-ci turunda “Kəpəz”ə qarşı keçirdikləri oyunu şərh edib.

Arena.az xəbər verir ki, sözügedən komandaların bu gün Yevlaxda baş tutmuş görüşündə “İmişli” 1:0 hesablı qələbəyə sevinib.

Xorxe Kaskilya matçdan sonra təşkil edilmiş mətbuat konfransında bunları söyləyib:

“Oyunu yaxşı analiz etmişdik. Bu matça bütün komanda hazır idi. Düşüncəmiz Yevlaxdan 3 xal ilə ayrılmaq idi. Bu da baş verdi. Bu oyunu Yav Mozesə həsr edirik. 3 gün öncə atasını itirmişdi. Lakin bu matçda çox yaxşı çıxış edərək qələbəmizdə pay sahibi oldu. Azarkeşlərimizə də bizə səfərdə dəstək olduqları üçün təşəkkür edirik. Standart vəziyyətlərin üzərində çox işləyirik. Qolu da bu vəziyyətlərin birindən sonra vurduq. İlk hissədə hesabı artıra da bilərdik. İkinci hissədə rəqib daha yaxşı çıxış etdi. Lakin biz də müdafiə futbolunda uğurlu olaraq qələbə qazana bildik. Nəticə oyuna görə oldu.

Hamı bildiyi kimi, əsas məqsədimiz Premyer Liqada qalmaqdır. Şanslarımız çox olsa da, bunu 100 faiz əldə etməmişik. Mövsümün əvvəlində texniki heyət komandanın bu keyfiyyətinə çox inanırdı. Çətinliklər “İmişli”ni daha da formalaşdırdı. Bu, zarafat deyil. Birinci Liqadan yüksələn komanda üçün ilk ilində bu xalları yığmaq heç də asan sayılmamalıdır”.

Misli Premyer Liqasının XXVIII turunun “Kəpəz” – “İmişli” oyunundan (0:1) sonra qonaq komandanın baş məşqçisi Jorj Kaşkilya jurnalistlərin suallarını cavablandırıb.

Futbolpress.az xəbər verir ki, mütəxəssis əvvəlcə görüşlə bağlı fikirlərini bölüşüb:

– Oyuna bütün komanda hazır idi. Kollektiv olaraq ancaq qələbə haqda düşünürdük. Bu qalibiyyəti Mozesə həsr edirik. Üç gün əvvəl atası rəhmətə gedib, bu gün çox əzmkar oynadı. Psixoloji köklənmək çətin olsa da, özünü yaxşı tərəfdən göstərdi, diqqətini maksimum səviyyədə saxladı. Bura gəlib bizi dəstəkləyən azarkeşlərə təşəkkür edirəm. Standart vəziyyətlər üzərində çox hazırlaşırıq, bu gün də bunun bəhrəsini gördük – qol vurduq. İlk hissədə hesab fərqini artıra, oyunu daha tez bitirə bilərdik, amma futbolçular real qol imkanlarından yararlana bilmədi. İkinci hissədə “Kəpəz” üstünlüyü ələ aldı və daha açıq oynamağa başladılar. Əks-hücumlarda şanslarımız yaransa da, fərqlənə bilmədik. Oyunun sonları gərgin keçdi və çalışdıq ki, tempi aşağı salaq. Oyuna baxanda nəticəni ədalətli saymaq olar. Qarşıdakı oyunlara köklənəcəyik.

– Mətbuatda sizin növbəti mövsümdə komandadan ayrılacağınız yazılır. Bu barədə rəhbərliklə söhbətiniz olubmu?
– Bütün diqqətimiz bu mövsümdədir. Məqsədimizə çatdıqdan sonra bu barədə danışıqlarımız ola bilər. Hamının bildiyi kimi, əsas hədəf Premyer Liqada qalmaqdır. Şanslarımız çox olsa da, hələ heç nə yüz faiz təmin olunmayıb.

– Uzun müddətdir zədəli olan Vüsal Qənbərovun bundan sonraklı matçlarda daha çox oyunda olacağını gözləmək olarmı?
– Zədəsini tam sağaltsa da, 3-4 ay futboldan uzaq qaldığı üçün bu proses mərhələli şəkildə getməlidir. Növbəti matçlarda oyun vaxtının artacağını gözləmək olar.

– Mövsümün əvvəlində “İmişli”nin sonuncu yer tutacağı proqnozlaşdırılırdı. İndiki halda sonuncu pillədən 15 xal irəlidəsiniz…
– Çətinliklərə, əlverişsiz şərtlərə baxmayaraq komandanın öz xarakterini göstərir. Mövsümün əvvəlində texniki heyət komandanın bu keyfiyyətinə çox inanırdı. Bu çətinliklər “İmişli”ni formalaşdırdı. Bu zarafat deyil – 1-ci Liqadan yüksələn komanda üçün ilk mövsümdə bu qədər xal toplamaq asan deyil.

Şahin Cəfərov

“İmişli”nin baş məşqçisi Xorxe Kaskilya Azərbaycan Premyer Liqasının 27-ci turunda “Qəbələ”yə qarşı keçirdikləri oyunu şərh edib.

Arena.az xəbər verir ki, sözügedən komandaların bu gün Qəbələdə baş tutmuş görüşündə qonaqlar 1:0 hesablı qələbəyə seviniblər.

Xorxe Kaskilya matçdan sonra təşkil edilmiş mətbuat konfransında bunları söyləyib:

“Oyunçularımı gözəl nəticəyə görə təbrik edirəm. Azarkeşlərimizə dəstəyə görə təşəkkürümü bildirirəm. Az olsalar da, hər zaman bizə dəstək göstərirlər. “Neftçi” ilə oyundan sonra komandada ruh düşkünlüyü var idi. Bu komanda öz xarakteri ilə geri dönüş edə bildi. Son iki oyunda 4 xal yığmışıq. Bu da bizim üçün çox vacib idi. “Turan Tovuz” da ağır rəqibdir, “Qəbələ” də. “Qəbələ” xüsusilə öz meydanında yaxşı oynayır. Bu cür rəqiblərlə görüşlərdən xallar götürə bildik.

Bu gün taktikamız və strategiyamız gözəl işlədi. Belə oyunlarda qol az olur, daha çox taktiki mübarizə gedir. Qol vurduqdan sonra da oyunda diqtə etməyə çalışdıq. Rəqib də çox qol şansı yarada bilmədi. Yaxşı müdafiə olunduq. Belə çətin oyundan xalla ayrılmaq çox pozitiv amildir. Bu oyunu klub prezidentimizə həsr edirik. Bu gün onun doğum günüdür.

Qalib gəlmək nə qədər vacib olsa da, əsas olan Premyer Liqada yerimizi qorumaqdır. “Karvan”, “Qəbələ”, “Kəpəz” kimi komandalar arasında biz də varıq. Amma xala baxsaq, biz öz mövqeyimizi itirməmişik. 26 xalımız var”.