Argentina millisinin kapitanı Lionel Messi futbol üzrə dünya çempionatları tarixində məhsuldar ötürmələrin sayına görə öz rekordunu yaxşılaşdırıb.

Arena.az xəbər verir ki, 39 yaşlı hücumçu DÇ-2026-nın İngiltərə ilə yarımfinal görüşündə iki məhsuldar ötürmə müəllifi olub.

Bununla da Messinin dünya çempionatlarındakı məhsuldar ötürmələrinin sayı 12-yə yüksəlib.

Bu göstəricidə ikinci pillədə Argentinanın digər əfsanəsi Dieqo Maradona qərarlaşıb. Onun hesabında 8 məhsuldar ötürmə var.

2023-cü ildən ABŞ-ın “İnter Mayami” klubunda çıxış edən Messi daha əvvəl “Barselona” və PSJ formalarını geyinib. O, Argentina millisi ilə 2022-ci il dünya çempionu, 2014-cü il dünya çempionatının gümüş mükafatçısı, 2008-ci il Olimpiya çempionu, həmçinin 2021 və 2024-cü illərdə Amerika Kubokunun qalibi olub. Hücumçu eyni zamanda 8 “Qızıl top” mükafatı ilə də rekordçudur.

Qeyd edək ki, ABŞ, Kanada və Meksikanın birgə təşkil etdiyi DÇ-2026 iyulun 19-da başa çatacaq.

Futbol üzrə İngiltərə milli komandasının mərkəz hücumçusu Harri Keyn yığma tarixində ən çox oyun keçirmiş meydan oyunçusuna çevrilib.

Arena.az xəbər verir ki, 32 yaşlı forvard DÇ-2026-nın Argentina ilə yarımfinal matçına start heyətində çıxmaqla milli komandadakı oyunlarının sayını 121-ə çatdırıb.

Bununla da o, İngiltərə millisinin sabiq hücumçusu Ueyn Runiyə məxsus 120 oyunluq rekordu geridə qoyub.

Milli komandanın ümumi rekordçusu isə hələ də sabiq qapıçı Piter Şiltondur. O, İngiltərə yığmasının heyətində 125 görüş keçirib.

2023-cü ilin avqustundan Almaniyanın “Bayern” klubunda çıxış edən Hari Keyn daha əvvəl İngiltərənin “Tottenhem” komandasında forma geyinib. O, 86 qolla İngiltərə millisinin tarixində ən məhsuldar futbolçu hesab olunur. Hücumçu 2018-ci il dünya çempionatında vurduğu 6 qolla turnirin bombardiri adını qazanmışdı.

ABŞ, Kanada və Meksikanın birgə ev sahibliyi etdiyi DÇ-2026 iyulun 19-da başa çatacaq.

Argentina millisinin kapitanı Lionel Messi futbol üzrə dünya çempionatlarının yarımfinal mərhələsində meydana çıxan ən yaşlı meydan oyunçusu olub.

Arena.az xəbər verir ki, 39 yaş 21 günlük olan hücumçu DÇ-2026-nın İngiltərə ilə yarımfinal görüşünə start heyətində çıxmaqla bu rekorda imza atıb.

Bununla da Messi 1958-ci il dünya çempionatının yarımfinalında 37 yaş 236 günlük olarkən meydana çıxmış Almaniya millisinin futbolçusu Frits Valter və İsveç yığmasının üzvü Qunnar Qrenə məxsus rekordu geridə qoyub.

Ümumi rekord isə hələ də İngiltərə millisinin sabiq qapıçısı Piter Şiltona məxsusdur. O, 1990-cı il dünya çempionatının yarımfinalında 40 yaşında meydana çıxmışdı.

Qeyd edək ki, ABŞ, Kanada və Meksikanın birgə ev sahibliyi etdiyi DÇ-2026 iyulun 19-da başa çatacaq.

ABŞ, Kanada və Meksikanın birgə ev sahibliyi etdiyi futbol üzrə dünya çempionatının (DÇ-2026) həlledici oyununun iştirakçıları müəyyənləşib.

Arena.az xəbər verir ki, yarımfinal görüşlərindən sonra həm mundialın finalında, həm də üçüncü yer uğrunda üz-üzə gələcək komandalar bəlli olublar.

Finalda İspaniya və Argentina milliləri üz-üzə gələcəklər. Fransa və İngiltərə milli komandaları isə üçüncü yer – bürünc medal uğrunda mübarizə aparacaqlar. Hər iki qarşılaşma iyulun 19-da keçiriləcək.

Xatırladaq ki, mundialın yarımfinal mərhələsi çərçivəsində keçirilmiş oyunlarda İspaniya millisi Fransanı 2:0, Argentina yığması isə İngiltərəni 2:1 hesabı ilə məğlub edib.

DÇ-2026
19 iyul

Üçüncü yer uğrunda oyun

01:00. Fransa – İngiltərə
Mayami. Florida. ABŞ

Final

23:00. İspaniya– Argentina
Nyu-Cersi. Nyu-York. ABŞ

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün mundialda yarımfinal mərhələsinə yekun vurulub.

Sonuncu finalçı İngiltərə – Argentina matçında müəyyənləşib. Atalanta şəhərində baş tutmuş qarşılaşma Cənubi Amerika təmsilçisinin əzmkar qələbəsi ilə yekunlaşıb.

Matçda hesabı avropalılar açıblar. 55-ci dəqiqədə Entoni Qordon ingilis azarkeşləri ayağa qaldırıb. Bununla belə, geri dönüş etməyi bacaran “tanqoçular” arıdıcıl iki qol vurmağa müvəffəq olublar. 85-ci dəqiqədə Entso Fernandes, 90+2-ci dəqiqədə isə Lautaro Martines fərqləniblər.

Beləliklə, Argentina yığması finalda İspaniyaya rəqib olub. İngiltərəni isə Fransa ilə üçüncü yer uğrunda qarşılaşma gözləyir.

DÇ-2026
Yarımfinal
15 iyul

İngiltərə – Argentina 1:2
Qollar: Entoni Qordon, 55 – Entso Fernandes, 85. Lautaro Martines, 90+2.
Kanzas Siti şəhər stadionu. Missuri, ABŞ.

İspaniya millisinin futbolçusu Pedro Porro DÇ-2026-da yarımfinal mərhələsində Fransa ilə matçda (2:0) fərqlənib.

Futbolpress.az xəbər verir ki, bu, müdafiəçinin mundialdakı ikinci qolu olub. O, daha öncə pley-offda Avstriya ilə matçda da fərqlənmişdi.

Porro İspaniya millisi ilə bir dünya çempionatında iki qol vuran ikinci futbolçudur. Daha əvvəl DÇ-2002-də Fernando Yorro bunu bacarıb.

Dünya çempionatının (DÇ-2026) yarımfinalında Fransa ilə oyun İspaniya millisinin futbolçuları Rodri və Emerik Laport üçün əlamətdar olub.

Arena.az xəbər verir ki, onlar 2:0 hesablı qələbəyə sevindikləri bu matçda dünya çempionatları tarixinə düşüblər.

Rodri mundialın yarımfinal görüşündə 67 dəqiq ötürmə yerinə yetirib. Bununla da “Mançester Siti”nin futbolçusunun DÇ-2026 ərzində etdiyi dəqiq ötürmələrin sayı 655-ə çatıb. Beləliklə, 30 yaşlı yarımmüdafiəçi 1966-cı ildən etibarən statistikanın aparıldığı dövrdə dünya çempionatlarında ən çox dəqiq ötürmə edən futbolçu rekordunu yeniləyib.

İspaniya millisinin müdafiəçisi Emerik Laport da tarixi göstəriciyə imza atıb. 31 yaşlı futbolçu dünya çempionatları tarixində doğulduğu ölkəni yarımfinal mərhələsində məğlub edən ilk oyunçu olub.

Fransada anadan olan Laport bu ölkənin aşağı yaş qrupları üzrə milli komandalarında 50-dən çox oyun keçirib. Lakin o, baş məşqçi Didye Deşamın rəhbərliyi altında Fransa millisində debüt etmək imkanı əldə etməyib.

Daha sonra İspaniyanın “Atletik” (Bilbao) klubuna transfer olunan müdafiəçi 2021-ci ildə İspaniya vətəndaşlığı alaraq bu ölkənin millisində çıxış etməyə başlayıb.

Qeyd edək ki, İspaniya millisi DÇ-2026-nın yarımfinalında Fransanı 2:0 hesabı ilə məğlub edərək finala vəsiqə qazanıb.

İspaniya millisinin futbolçusu Rodri DÇ-2026-da unikal göstəriciyə imza atıb.

Futbolpress.az xəbər verir ki, yarımmüdafiəçi mundiallar tarixində ən çox dəqiq ötürmə edən futbolçudur.

Rodri 7 oyunda ümumilikdə 705 ötürmə edib ki, bunların da 655-i dəqiq olub. Onun pas dəqiqliyi 92.91 faizdir və bu, mundiallardakı rekord göstəricidir.

Bundan əvvəlki ən yaxşı göstərici DÇ-2014-də Toni Kroosa məxsus idi. O, həmin mundialda 643 dəqiq ötürmə etmişdi.

İspaniya millisinin futbolçusu Pau Kubarsi DÇ-2026-da Fransaya qalib gəldikləri yarımfinal oyunundan sonra fikirlərini bölüşüb.

Futbolpress.az xəbər verir ki, müdafiəçi komandanı tənqid edənlərə cavab verib:

“Müdafiəçilərimiz və qapıçılarımız çox tənqid olunurdu. Hərə bir fikir deyirdi. Mundialda finala qədər cəmi bir qol buraxmışıq. Məncə, bir çox insanın ağzını yumduq”.

İspaniya finalda Argentina – İngiltərə cütünün qalibi ilə qarşılaşacaq. Matç bu gün saat 23:00-da start götürəcək.

İngiltərə millisinin baş məşqçisi Tomas Tuxel DÇ-2026-da Argentinaya qarşı keçirəcəkləri yarımfinal oyunu haqda fikirlərini bölüşüb.

Futbolpress.az “The Telegraph”a istinadən xəbər verir ki, mütəxəssis rəqib komandanın hücumçusu Lionel Messidən danışıb:

“Messi meydanda istədiyi boşluğu tapmaqda mahirdir. Komandası onun üçün döyüşür və hər an yanındadır. Hər kəs Messini topla təmin etməyi düşünür. Bunları bilirik və planımızı qurmuşuq.

Bütün diqqətimiz Messidə olmalıdır? Düşünmürəm. Sadəcə cəsarətli oynamalı, onu idarə etməliyik. Messini dayandırmağa hazırıq. Görək, necə olacaq”.

Argentina – İngiltərə oyunu saat 23:00-da start götürəcək.

DÇ-2026-nın final matçında hissələrarası fasilə 30 dəqiqə olacaq.

Futbolpress.az xəbər verir ki, bu barədə “The Times” nəşri məlumat yayıb. Matçın fasiləsində bir neçə müğənninin ifası nəzərdə tutulub və buna görə fasilə müddətinin 15 yox, 30 dəqiqə olması planlaşdırılır.

İspaniya millisi finala yüksələn ilk komandadır. Digər finalçı isə Argentina – İngiltərə cütünün qalibi olacaq. Bu gün keçiriləcək matça saat 23:00-da start veriləcək.

Futbol üzrə İspaniya millisinin hücumçusu Lamin Yamal dünya çempionatları və Avropa çempionatları tarixində unikal rekorda imza atıb.

Arena.az xəbər verir ki, 19 yaşlı hücumçu bu nailiyyətə DÇ-2026-nın yarımfinalında Fransa üzərində qazandıqları 2:0 hesablı qələbədən sonra imza atıb.

Belə ki, Lamin Yamal dünya və Avropa çempionatlarında start heyətində meydana çıxdığı 12 matçın hamısında qələbə sevinci yaşayıb. Bununla da o, bu iki mötəbər turnirin tarixində start heyətində keçirdiyi ilk 12 oyunun hamısını qazanan ilk futbolçu olub.

Qeyd edək ki, İspaniya millisi Fransa üzərində qazandığı inamlı qələbə sayəsində dünya çempionatının finalına yüksəlib. Sözügedən komanda finalda İngiltərə – Argentina cütünün qalibi ilə qarşılaşacaq.

DÇ-2026-nın həlledici görüşü iyulun 19-da keçiriləcək.

Futbol üzrə Fransa millisinin kapitanı Kilian Mbappe DÇ-2026-nın yarımfinalında İspaniyaya 0:2 hesablı məğlubiyyətin səbəblərini açıqlayıb.

Arena.az xəbər verir ki, 27 yaşlı hücumçu komandasının nə texniki, nə də taktiki baxımdan oyun planını həyata keçirə bildiyini bildirib:

“Nə texniki, nə də taktiki baxımdan göstərmək istədiyimiz oyunu nümayiş etdirə bilmədik. Dünya çempionatının yarımfinalında etməli olduqlarını yerinə yetirmirsənsə, qalib gəlmək mümkün deyil.

İspaniya öz oyun planına və futbol fəlsəfəsinə sadiq qaldı. Onlar topa və oyunun tempinə nəzarət etməyi sevirlər. Bizim planımız isə onlara yüksək təzyiq göstərmək, öz ritmlərini tapmalarına imkan verməmək idi”.

Mbappe topu qazandıqları epizodlarda belə səhvlərə yol verdiklərini vurğulayıb:

“Hətta topu ələ keçirdiyimiz anlarda belə ilk toxunuşlarımız kifayət qədər keyfiyyətli deyildi. Məhz bu cür detallar məğlubiyyətə səbəb oldu.

Bu, bizim üçün böyük məyusluqdur. Amma obyektiv olsaq, finala yüksəlmək üçün lazım olan bütün şərtlərə malik deyildik”.

Xatırladaq ki, İspaniya yarımfinalda Fransanı 2:0 hesabı ilə məğlub edərək DÇ-2026-nın finalına yüksəlib. Turnirin ikinci yarımfinalında Argentina və İngiltərə milliləri üz-üzə gələcək. Final oyunu isə iyulun 19-da keçiriləcək.

İspaniya millisinin hücumçusu Mikel Oyarsabal dünya çempionatlarının bir turnirində vurulan qolların sayına görə yığmanın rekordunu təkrarlayıb.

Arena.az xəbər verir ki, 29 yaşlı futbolçu DÇ-2026-nın yarımfinalında Fransaya qarşı keçirilən oyunda fərqlənərək turnirdəki 5-ci qolunu vurub.

Bununla da Oyarsabal bu göstəricidə 1986-cı il dünya çempionatında 5 qol vuran Emilio Butragenyo və 2010-cu ildə eyni sayda qol vuran David Vilya ilə eyni səviyyəyə yüksəlib.

“Real Sosyedad”ın kapitanı olan Oyarsabal 2015-ci ildən San Sebastyan klubunun əsas komandasında çıxış edir. O, klubu ilə 2020 və 2026-cı illərdə İspaniya Kubokunun qalibi olub.

İspaniya millisinin heyətində isə Mikel Oyarsabal 2024-cü il Avropa çempionu, həmçinin 2021 və 2025-ci illərdə UEFA Millətlər Liqasının gümüş mükafatçısı adını qazanıb. 30 qolla o, İspaniya millisinin tarixində ən məhsuldar futbolçular siyahısında 6-cı pillədə qərarlaşıb.

Fransa milli komandasının baş məşqçisi Didye Deşam futbol üzrə dünya çempionatları tarixində ən çox oyun keçirən baş məşqçi olub.

Arena.az xəbər verir ki, 57 yaşlı mütəxəssis bu rekorda DÇ-2026-nın ABŞ-ın Texas ştatının Arlinqton şəhərində keçirilmiş İspaniyaya qarşı yarımfinal matçında imza atıb.

Beləliklə, Deşam dünya çempionatlarında 26-cı oyununa çıxaraq bu göstəricidə Almaniya millisinin sabiq baş məşqçisi Helmut Şönü geridə qoyub.

Didye Deşam 2012-ci ildən Fransa millisini çalışdırır. Onun rəhbərliyi altında “xoruzlar” 2018-ci ildə dünya çempionu, 2022-ci ildə UEFA Millətlər Liqasının qalibi olub, həmçinin 2016-cı il Avropa çempionatının və 2022-ci il dünya çempionatının gümüş mükafatçısı adını qazanıb.

Bundan əvvəl açıqlanıb ki, Deşam 2026-cı il dünya çempionatı başa çatdıqdan sonra Fransa millisinin baş məşqçisi vəzifəsindən ayrılacaq.

Xatırladaq ki, fransızlar İspaniya ilə matçda 0:2 hesabıyla məğlub olaraq finala çıxa bilməyiblər. Amma bu komandanı qarşıda üçüncü yer uğrunda oyun gözləyir.

Fransa millisinin hücumçusu Kilian Mbappe futbol üzrə dünya çempionatları tarixində yığmanın ən çox oyun keçirən futbolçusu olub.

Arena.az xəbər verir ki, 27 yaşlı forvard bu rekorda DÇ-2026-nın yarımfinalında İspaniyaya qarşı keçirilən matçda imza atıb.

Mbappe start heyətində meydana çıxmaqla dünya çempionatlarında 21-ci oyununu keçirib.

Beləliklə, o, bu göstəricidə 20 oyunla ikinci pillədə qərarlaşan, 2018-ci il dünya çempionu və Fransa millisinin sabiq kapitanı Uqo Lyorisi geridə qoyub. Təcrübəli qapıçı 2022-ci il dünya çempionatından sonra milli komanda ilə vidalaşmışdı.

Mbappe 2024-cü ildən İspaniyanın “Real” klubunun formasını geyinir. O, Madrid təmsilçisi ilə 2024/2025 mövsümündə İspaniya Super Kubokunu və Qitələrarası Kuboku qazanıb.

Fransa millisinin heyətində isə Mbappe 2018-ci ildə dünya çempionu, 2022-ci ildə dünya çempionatının gümüş mükafatçısı olub. O, Qətərdə keçirilən DÇ-2022-də vurduğu 8 qolla turnirin bombardiri adına layiq görülmüşdü.

İspaniya millisinin futbolçusu Lamin Yamal unikal göstəriciyə imza atıb.

Futbolpress.az “Opta”ya istinadən xəbər verir ki, “Qırmızı furiya” dünya və Avropa çempionatlarında 18 yaşlı vingerin start heyətdə meydana çıxdığı son 12 oyunda qələbə qazanıb.

İspanlar dünən dünya çempionatında Fransaya qalib gələrək (2:0) finala yüksəlib. Yamal bu görüşə “11-lik”də başlayıb.

 

Futbol üzrə İspaniya millisi dünya çempionatının (DÇ-2026) yarımfinalında Fransa yığmasını 2:0 hesabı ilə məğlub edərək tarixi rekorda imza atıb.

Arena.az xəbər verir ki, Luis de la Fuentenin rəhbərlik etdiyi komanda bununla da ardıcıl 37-ci oyununda məğlub olmayaraq İtaliya millisinin dünya rekordunu təkrarlayıb.

İspanların məğlubiyyətsiz seriyası 2024-cü ilin mart ayından davam edir. Bu göstərici ilə onlar 2018–2021-ci illərdə Roberto Mançininin rəhbərliyi altında 37 oyunluq məğlubiyyətsizlik seriyası yaşamış İtaliya millisinin rekorduna şərik olublar.

Xatırladaq ki, İspaniya millisi yarımfinalda Fransaya 2:0 hesabı ilə qalib gələrək ABŞ, Kanada və Meksikanın ev sahibliyi etdiyi 2026-cı il dünya çempionatının ilk finalçısı olub. İspanların finaldakı rəqibinin adına bu gün keçiriləcək Argentina – İngiltərə matçında aydınlıq gələcək.

DÇ-2026-ya iyulun 19-da keçiriləcək final görüşü ilə yekun vurulacaq.

Bu gün dünya çempionatında ikinci finalçı məlum olub.

Futbolpress.az xəbər verir ki, yarımfinalın digər görüşündə son çempion Argentina İngiltərəyə qalib gəlib.

Cütün qalibi finalda İspaniya ilə qarşılaşacaq.

DÇ-2026
Yarımfinal

15 iyul

23:00 Argentina – İngiltərə 2:1

Qollar: Enzo, 86, Martines, 90+2 – Qordon, 55

Fransa millisinin baş məşqçisi Didye Deşam DÇ-2026-da İspaniyaya məğlub olduqları yarımfinal oyunundan sonra fikirlərini bölüşüb.

Futbolpress.az “RMC Sport”a istinadən xəbər verir ki, mütəxəssis 0:2 hesabıyla bitən görüşlə bağlı bunları deyib:

“Başa düşürəm, məyusuq, istədiyimiz kimi oynamadıq. Dünya çempionatında ən zəif performansı göstərdik. Ancaq soruşuram, bu hakimin yarımfinalda nə işi var? Özüm cavab verməyəcəyəm, amma şübhəli məqamlar var idi. Məğlubiyyətə bəhanə gətirmirəm, zəif oynadığımızı qəbul edirəm, ancaq hakimin işi də çox aşağı oldu. Sanki ispanlara simpatiyası var idi”.

Fransa – İspaniya oyununu salvadorlu İvan Barton idarə edib. O, görüşdə fransızların qapısına penalti təyin edib.

Fransa millisinin baş məşqçisi Didye Deşam DÇ-2026-nın yarımfinalında İspaniyaya 0:2 hesabı ilə uduzduqları oyundan sonra fikirlərini bölüşüb.

Arena.az xəbər verir ki, təcrübəli mütəxəssis komandasının texniki baxımdan rəqibdən geri qaldığını etiraf edib.

Deşam eyni zamanda oyunun hakimliyi ilə bağlı da sual ünvanlayıb:

“Futbolçularımız məyusdurlar. Ancaq obyektiv yanaşsaq, texniki cəhətdən lazımi səviyyədə deyildik. Bu, bizim öz günahımızdır.

İndi nəsə desəm, məğlubiyyətdən sonra məni ağlayan tərəf kimi qələmə verəcəklər. Amma bir sual vermək istəyirəm: bu hakim yarımfinalı idarə etmək üçün lazımi səviyyədədirmi? Buna özüm cavab verməyəcəyəm. Oyunda kifayət qədər mübahisəli epizodlar oldu.

Əsas səbəb isə odur ki, biz öz səviyyəmizdən aşağı çıxış etdik. Təhlükəli vəziyyətlər yarada biləcək çoxlu texniki səhvlərə, uğursuz ötürmələrə yol verdik.

Bu, ən yüksək səviyyədir və bunu qəbul etmək ağrılı olsa da, reallıqdır. İndi üçüncü yer uğrunda oyuna çıxacağıq. İndiyədək gördüyümüz işi kiçiltmək istəmirəm. Sadəcə, bu matçda İspaniya bizdən daha üstün olduğunu göstərdi.

Özüm haqqında düşünmürəm. Futbolçularla birlikdə finala qədər irəliləmək üçün hazırlaşmışdıq. Buna nail ola bilmədik və bu, böyük məyusluqdur. Bununla belə, komandamızın gördüyü yaxşı işi kölgə altına salmaq istəmirəm. Hesab edirəm ki, toparlanmağı bacarmışdıq. Eyni zamanda, İspaniyanın da haqqını vermək lazımdır. Onlar oyuna tam nəzarət edirdilər.

Bizə dəqiqlik və enerji çatmadı. İspanlar rəqibin hücumlarını oxumaqda, ötürmələri ələ keçirməkdə çox ustadırlar. Onların müdafiəsini daha çox çətin vəziyyətə salmaq istəyirdik”.

“Bu yanaşma bizi bu nöqtəyə gətirdi”

İspaniya millisinin baş məşqçisi Luis de la Fuente isə Fransa üzərindəki qələbəni komanda birliyi ilə əlaqələndirib:

“Demək olar ki, dörd il əvvəl müəyyən bir ideya ilə yola çıxmışdıq və bu ideyaya sadiq qaldıq. Məhz bu yanaşma bizi bu nöqtəyə gətirdi.

Bu gün dünyanın ən güclü milli komandalarından biri ilə qarşılaşdıq. Ancaq onların qarşısında dünyanın ən yaxşı komandası dayanmışdı.

Biz vahid komandayıq. Bu uğuru fədakarlığımız və istedadımız sayəsində tam haqq etmişik. Futbolçularımız hər gün öz sədaqətlərini, birliklərini, səxavətlərini və bacarıqlarını nümayiş etdirirlər. Onlar çətin görünən işləri asanlaşdırırlar”.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün mundialda yarımfinal mərhələsinə start verilib.

İlk finalçı Fransa – İspaniya matçında müəyyənləşib. Arlinqton şəhərində baş tutmuş qarşılaşma ispanların inamlı qələbəsi ilə yekunlaşıb. 22-ci dəqiqədə Mikel Oyarsabal penalti zərbəsini dəqiq yerinə yetirib. 58-ci dəqiqədə isə Pedro Porro fəqlənib.

Digər finalçının adına sabah keçiriləcək İngiltərə – Argentina matçında aydınlıq gələcək.

Qeyd edək ki, dünya çempionatına iyulun 19-da keçiriləcək final qarşılaşması ilə yekun vurulacaq. Bundan öncə isə 3-cü yer uğrunda qarşılaşma baş tutacaq.

DÇ-2026
Yarımfinal
14 iyul

Fransa – İspaniya 0:2
Qollar: Mikel Oyarsabal, 22-pen. Pedro Porro, 58.
Arlinqton şəhər stadionu. Texas, ABŞ.

15 iyul

23:00. İngiltərə – Argentina
Kanzas Siti şəhər stadionu. Missuri, ABŞ

İspaniya millisinin futbolçusu Lamin Yamal açıqlama verib.

Futbolpress.az xarici KİV-ə istinadən xəbər verir ki, 19 yaşlı vinger DÇ-2026-da qol vura bilməməsindən danışıb:

“Mundialda qol vura bilməməyin məni narahat etmir. Hər turnir fərqlidir. Futbolda belə hallar olur, həmişə qol vurmaq mümkün deyil. Əsas diqqətim komandanın irəli getməyindədir. Millidə kimin fərqlənməsinin önəmi yoxdur. Qarşıda Fransa ilə çox vacib oyunumuz var. Ümid edirəm ki, yaxşı nəticə ilə finala çıxarıq. Bu oyunda qol hesabımı açacağıma ümid edirəm”.

Bu gün keçiriləcək Fransa – İspaniya oyununa 23:00-da start veriləcək.

Fransa millisinin futbolçusu Kilian Mbappe zədəsini tam sağaltmayıb.

Futbolpress.az xəbər verir ki, bu barədə “RMC Sport” məlumat yayıb. Forvardın hələ də sağ ayaq topuğunda ağrılar var. Buna baxmayaraq, onun İspaniya ilə yarımfinal matçına start heyətdə başlamaq ehtimalı yüksəkdir. Onun ağrıkəsicilərlə meydana çıxacağı bildirilir.

Bu gün keçiriləcək Fransa – İspaniya oyununa saat 23:00-da start veriləcək.

Bu gün dünya çempionatında yarımfinal mərhələsinə start veriləcək. Turnirin favoriti Fransa ilə İspaniya üz-üzə gələcək. Matça saat 23:00-da start veriləcək.

Azərbaycan millisinin sabiq futbolçusu Saşa Yunisoğlu “Futbolpress.az“a açıqlamasında görüşlə bağlı fikirlərini bildirdi:

“Dünya çempionatı başlayandan favoritim Fransadır. İndi artıq yarımfinaldadırlar. Fransanın çox güclü heyəti var. Sürətli hücumlar təşkil edirlər və müdafiədə də kompaktdırlar. Lakin İspaniyanı da göz ardı etmək olmaz. Gənc və dinamik heyətə sahibdirlər. Məncə, bu cütün qalibi dünya çempionu olacaq. Mənim favoritim Fransadır”.

Keçmiş oyunçu ABŞ, Meksika və Kanadada təşkil olunan mundialla bağlı təəssüratlarını bölüşdü:

“Ümumi götürəndə bu çempionatı çox bəyəndim. Təşkilatçılıq əla idi, demək olar, bütün oyunlarda stadionlar doldu. Mundialda sürpriz komanda olduğunu deyə bilmərəm. Sadəcə Kabo Verde möhtəşəm işlər gördü və onlar xalqına bir müddətlik bayram yaşatdılar. Etdikləri qəhrəmanlıq idi, halal olsun. Təəssüflər olsun ki, Braziliya və Portuqaliya milliləri tez dayandı. Onları yarımfinalda görmək çox maraqlı olardı”.

Şahin Cəfərov

İngiltərə millisinin futbolçusu Niko Orayli DÇ-2026-nın yarımfinalında Argentinaya qarşı keçirəcəkləri oyundan əvvəl açıqlama verib.

Futbolpress.az “BBC Sport”a istinadən xəbər verir ki, yarımmüdafiəçi “tanqoçular”ın kapitanı Lionel Messidən danışıb:

“Messi ilə qarşılaşmaq üçün səbirsizlənirəm. O, artıq karyerasının sonuna yaxınlaşır. Messi mənim üçün meydanda qarşılaşacağım ən yaxşı futbolçudur. Çətin olacaq, amma onunla üz-üzə gəlməyə hazıram”.

Sabah keçiriləcək Argentina – İngiltərə matçına saat 23:00-da start veriləcək.

Futbol üzrə Kolumbiya millisinin hücumçusu Xaminton Kampas ölüm təhdidləri aldığı üçün dünya çempionatından sonra vətəninə qayıtmayıb.

Arena.az bu barədə “Infobae” nəşrinin məlumatına əsasən xəbər verir.

26 yaşlı futbolçu Amerika Birləşmiş Ştatlarında (ABŞ) qalmaq qərarı verib. Buna səbəb DÇ-2026-nın 1/8 final mərhələsində İsveçrə ilə oyundan sonra sosial şəbəkələrdə ünvanına göndərilən ölüm təhdidləridir.

Həmin görüşdə Xaminton Kampas matçın son dəqiqələrində əlverişli qol fürsətindən yararlana bilməyib. Qarşılaşmanın əsas və əlavə vaxtı qolsuz bərabərliklə başa çatıb. Penaltilər seriyasında isə Kolumbiya millisi 3:4 hesabı ilə məğlub olaraq turnirlə vidalaşıb.

Qeyd edək ki, Kolumbiya futbolu tarixində buna bənzər faciəli hadisə yaşanıb. 1994-cü il dünya çempionatından sonra ABŞ-la oyunda avtoqol vuran müdafiəçi Andres Eskobar vətənində güllələnərək qətlə yetirilmişdi. Həmin hadisə dünya futbolunun ən faciəvi səhifələrindən biri hesab olunur.

Daha öncə “Deportes Tolima” və “Qremio”da da oynamış Kampas 2023-cü ildən Argentinanın “Rosario Sentral” komandasında çıxış edir. 26 yaşlı futbolçu 2021-ci ildən formasını geyindiyi Kolumbiya millisinin heyətində 13 oyuna çıxıb, 2 qol vurub.

Fransa millisi DÇ-2026-nın yarımfinalında bu gün İspaniya ilə qarşılaşacaq.

Futbolpress.az xarici KİV-ə istinadən xəbər verir ki, fransızların baş məşqçisi Didye Deşam matçın favoritinin ispanlar olduğunu deyib:

“Şübhəsiz ki, favorit İspaniyadır. Onlar çox gözəl futbol sərgiləyilər. Top onlarda olanda hər an təhlükə yaratmaq bacarığındadırlar. Mundialda da çoxlu qol vurublar və yalnız birini buraxıblar”.

Fransa – İspaniya oyununa saat 23:00-da start veriləcək.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün mundialda yarımfinal mərhələsinə start veriləcək.

İlk finalçı Fransa – İspaniya matçında müəyyənləşəcək. Arlinqton şəhərində baş tutacaq qarşılaşmaya Bakı vaxtı ilə saat 23:00-da start veriləcək.

Digər finalçının adına isə sabah keçiriləcək İngiltərə – Argentina matçında aydınlıq gələcək.

Qeyd edək ki, dünya çempionatına iyulun 19-da keçiriləcək final qarşılaşması ilə yekun vurulacaq. Bundan öncə isə 3-cü yer uğrunda qarşılaşma baş tutacaq.

DÇ-2026
Yarımfinal
14 iyul

23:00. Fransa – İspaniya
Arlinqton şəhər stadionu. Texas, ABŞ.

15 iyul

23:00. İngiltərə – Argentina
Kanzas Siti şəhər stadionu. Missuri, ABŞ

Bu gün dünya çempionatında yarımfinal mərhələsinə start verilib.

Futbolpress.az xəbər verir ki, favoritlər Fransa ilə İspaniya üz-üzə gəlib. Görüş ispanların qələbəsiylə başa çatıb.

Yarımfinalın digər görüşü sabah Argentina ilə İngiltərə arasında olacaq.

DÇ-2026
Yarımfinal 

14 iyul

23:00 Fransa – İspaniya 0:2

Qol: Oyarsabal, 22 (pen.) ,Porro, 58

Argentina millisi dünya çempionatının (DÇ-2026) yarımfinalında İngiltərə yığması ilə keçirəcəyi oyun öncəsi FIFA-ya xüsusi müraciət ünvanlayıb.

Arena.az bu barədə məşhur jurnalist Qaston Edulun məlumatına əsasən xəbər verir.

İddia olunur ki, Argentina Futbol Federasiyası komandanın İngiltərə yığmasına qarşı səfər formasında meydana çıxmasına icazə verilməsini istəyib. Bu məsələ ilə bağlı yekun qərarın iyulun 14-də veriləcəyi gözlənilir.

Xatırladaq ki, Argentina millisi mundialın 1/4 final mərhələsində əlavə vaxtda İsveçrəni 3:1 hesabı ilə məğlub edərək yarımfinala yüksəlib. Lionel Skaloninin komandası bundan əvvəl isə Misir və Kabo Verde yığmalarını eyni – 3:2 hesabı ilə üstələmişdi.

İyulun 15-də keçiriləcək Argentina – İngiltərə qarşılaşmasının qalibi finalda Fransa – İspaniya cütünün qalibi ilə üz-üzə gələcək.

DÇ-2026-ya iyulun 19-da yekun vurulacaq.

Argentina millisinin kapitanı Lionel Messi DÇ-2026-nın 1/4 finalında İsveçrə ilə keçirilən oyunda dünya çempionatları tarixinə daha iki rekord yazdırıb.

Arena.az xəbər verir ki, 39 yaşlı hücumçu start heyətində meydana çıxmaqla dünya çempionatlarının pley-off mərhələlərində keçirdiyi oyunların sayını 15-ə çatdırıb və bu göstəricidə Almaniya millisinin sabiq hücumçusu Miroslav Klozenu geridə qoyaraq mütləq rekordçu olub. Messi daha əvvəl Kloze ilə birlikdə 14 oyunla ilk pilləni bölüşürdü.

Bununla yanaşı, argentinalı ulduz qarşılaşmada Aleksis Makallisterin vurduğu ilk qolda məhsuldar ötürmə müəllifi olub. Bununla da o, dünya çempionatları tarixində məhsuldar ötürmələrinin sayını 10-a çatdırmış ilk futbolçu kimi tarixə düşüb.

Qeyd edək ki, Lionel Messi əvvəlki – Misirlə 1/8 final matçında (3:2) dünya çempionatları tarixinin məhsuldar ötürmələr üzrə rekordunu yeniləmiş, bu göstəricidə həmyerlisi Dieqo Maradonanı geridə qoymuşdu.

Lakin İsveçrə ilə görüşdə qol vura bilməyən Messi iki rekord seriyasının da başa çatmasına səbəb olub. O, DÇ-2022-nin 1/8 finalından bəri davam edən ardıcıl doqquz oyunluq qol seriyasını başa vurub. Bu müddətdə argentinalı hücumçu 13 dəfə fərqlənmişdi.

Bundan başqa, onun dünya çempionatlarının pley-off mərhələsində ardıcıl altı oyunda qol vurmaq seriyası da qırılıb. Messi DÇ-2022-də pley-offun dörd görüşündə, DÇ-2026-da isə ilk iki pley-off matçında rəqib qapısına yol tapmışdı.

Hazırda ABŞ klubu “İnter Mayami”nin formasını geyinən Lionel Messi karyerası ərzində “Barselona” və PSJ-də çıxış edib. O, Argentina millisinin heyətində 2022-ci ildə dünya çempionu olub, 2014-cü ildə gümüş medal qazanıb, həmçinin iki dəfə Amerika Kubokunun (2021, 2024) qalibi olub. Messi həmçinin 8 dəfə “Qızıl top” mükafatına layiq görülməklə də rekordçudur.

ABŞ, Kanada və Meksikanın birgə ev sahibliyi etdiyi futbol üzrə dünya çempionatının (DÇ-2026) yarımfinal mərhələsinin cütləri müəyyənləşib.

Arena.az xəbər verir ki, bu raundda üz-üzə gələcək bütün komandaların adlarına 1/4 finalın son oyunundan sonra aydınlıq gəlib.

Argentina millisi İsveçrə üzərindəki inamlı qələbə sayəsində sonuncu yarımfinalçı olub.

Xatırladaq ki, daha öncə Fransa, İspaniya və İngiltərə milli komandaları da yarımfinala yüksəlmişdilər.

Beləliklə, mundialın yarımfinal mərhələsində aşağıdakı qarşılaşmalar baş tutacaq:

14 iyul
23:00. Fransa – İspaniya
Arlinqton şəhər stadionu. Texas, ABŞ.

15 iyul
23:00. İngiltərə – Argentina
Kanzas Siti şəhər stadionu. Missuri, ABŞ

Qeyd edək ki, DÇ-2026-ya iyulun 19-da keçiriləcək final qarşılaşması ilə yekun vurulacaq. Bundan öncə isə 3-cü yer uğrunda qarşılaşma baş tutacaq.

Futbol üzrə Argentina millisinin baş məşqçisi Lionel Skaloni DÇ-2026-nın 1/4 finalında İsveçrə üzərində qazandıqları 3:1 hesablı qələbəni şərh edib.

Arena.az xəbər verir ki, mütəxəssis rəqibin komandası üçün ciddi problemlər yaratdığını bildirib:

“Bu gün həqiqətən çox əziyyət çəkdik. Bilirdik ki, rəqib fiziki cəhətdən çox güclü komandadır. Düşünürəm ki, onlar bizə ciddi çətinliklər yaratdılar. Bəzi məqamlarda vəziyyətdən çıxış yolu tapa bilmirdik.

Açığını desəm, bu gün şans da bizim tərəfdə idi. Rəqibin futbolçularından biri qırmızı vərəqə aldı və bundan sonra hücumlarımızı daha da artırdıq. Reallığı qəbul etməliyik – hələ üzərində işləməli olduğumuz məqamlar var. Amma istənilən halda, qələbə qazanmaq hər zaman xoşdur”, deyə Skaloni vurğulayıb.

İsveçrə millisinin baş məşqçisi Murat Yakın isə uduzduqları oyundan sonra hakim qərarlarını sərt tənqid edib. O, xüsusilə Bril Emboloya göstərilmiş ikinci sarı vərəqənin haqsız olduğunu bildirib:

“Brel Embolonun ikinci sarı vərəqə alması üçün heç bir əsas görmədim. Bu, tamamilə adi oyun epizodu idi. Hakimin səhvi bizi cəzalandırdı və qəbuledilməz qərar ucbatından bu şəkildə mübarizəni dayandırmalı olduq.

Hakim və VAR-ın həmin qərarı necə qəbul etdiyini başa düşmürəm. Məhz bu qərar oyunun taleyini həll etdi. Bir daha təkrar edirəm, həmin epizodda sarı vərəqə göstərilməsi üçün heç bir səbəb yox idi. Belə vəziyyətdə hakim sadəcə oyunu davam etdirməli idi”.

Xatırladaq ki, Argentina millisi İsveçrəni 3:1 hesabı ilə məğlub edərək DÇ-2026-nın yarımfinalında İngiltərə yığmasına rəqib olub.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün 1/4 final mərhələsinin oyunlarına yekun vurulub.

Sonuncu yarımfinalçının adına Argentina – İsveçrə oyununda aydınlıq gəlib. Kanzas Siti şəhərində (Missuri, ABŞ) təşkil edilmiş bu matç Cənubi Amerika təmsilçisinin əzmkar qələbəsi ilə yekunlaşıb.

Maçtın əsas vaxtı 1:1 hesablı heç-heçə ilə yekunlaşıb. Qalib hər biri 15 dəqiqədən ibarət əlavə hissələrdə müəyyənləşib.

Qalib komandanın heyətində Aleksis Makallister, Xulian Alvares və Lautaro Martines fərqləniblər. İsveçrənin tək qoluna isə Dan Ndoye imza atıb.

Qeyd edək ki, Argentina seçməsi yarımfinalda İngiltərə ilə qarşılaşacaq. Digər yarımfinal görüşündə isə İspaniya və Fransa yığmaları üz-üzə gələcəklər.

DÇ-2026
1/4 final
12 iyul

Argentina – İsveçrə 3:1
Qollar: Aleksis Makallister, 10. Xulian Alvares, 112. Lautaro Martines, 120+1 – Dan Ndoye, 67.

BƏƏ-li iş adamı və milyarder Xələf əl-Həbtur futbol üzrə Misir millisinin dünya çempionatındakı uğurlu çıxışını xüsusi hədiyyə ilə mükafatlandıracaq.

Arena.az xəbər verir ki, bu barədə “The National” nəşri məlumat yayıb.

Əl-Həbtur komandanın futbolçularına, eləcə də məşqçi, inzibati və tibbi heyətinə ümumilikdə 59 ədəd “Mitsubishi Eclipse Cross” markalı krossover hədiyyə edəcəyini açıqlayıb:

“Misirin sevinci bütün ərəb dünyasının sevincidir. Bu hədiyyə ölkəsini ucaldan, azarkeşlərini sevindirən və bütün ərəblərə qətiyyət, əzm və döyüş ruhunun nümunəsini göstərən Misir qəhrəmanlarına sevgimizin və minnətdarlığımızın ifadəsidir”, – deyə milyarder sosial şəbəkə hesabında yazıb.

Əl-Həbturun təsis etdiyi “Al Habtoor Group” şirkətinin nümayəndəsi bildirib ki, 59 avtomobil artıq göndərilməyə hazırlanır. İş adamı mükafatın yalnız futbolçulara deyil, bütün texniki, inzibati və tibbi heyətə təqdim olunacağını vurğulayıb. Onun sözlərinə görə, əldə olunan uğur bütün kollektivin əməyinin nəticəsidir. Bu barədə artıq Misir Futbol Assosiasiyasına da məlumat verilib.

Qeyd edək ki, Misir millisi tarixində ilk dəfə dünya çempionatının 1/8 final mərhələsinə yüksəlib. Afrika təmsilçisi bu mərhələdə dünya çempionu Argentina yığmasına 2:3 hesabı ilə məğlub olaraq mübarizəni dayandırıb. Daha əvvəl BƏƏ-nin vitse-prezidenti, baş naziri və Dubay əmiri Şeyx Məhəmməd bin Rəşid Əl Məktum da Misir millisinin çıxışını yüksək qiymətləndirərək, komandanın son dəqiqəyədək dünya çempionuna qarşı mübarizə apardığını bildirmişdi.

İngiltərə millisinin qapıçısı Cordan Pikford futbol üzrə dünya çempionatlarında keçirdiyi oyunların sayına görə yığmanın yeni rekordçusu olub.

Arena.az xəbər verir ki, 32 yaşlı qolkiper bu göstəriciyə DÇ-2026-nın 1/4 final mərhələsində Norveçə qarşı keçirdikləri oyunda start heyətində meydana çıxmaqla nail olub.

Bununla da Pikford dünya çempionatlarında keçirdiyi matçların sayını 18-ə çatdıraraq İngiltərə millisinin tarixinə düşüb.

Əvvəlki rekord 17 oyunla sabiq qapıçı Piter Şilton və hazırkı hücumçu Harri Keynə məxsus idi. Keyn də Norveçlə qarşılaşmada meydana çıxıb.

Pikford üçün bu, karyerasında üçüncü dünya çempionatıdır. O, daha əvvəl 2018 və 2022-ci illərdə keçirilən mundiallarda da İngiltərə millisinin əsas qapıçısı olub. Komanda həmin turnirlərin hər ikisində 1/4 finala qədər irəliləmişdi.

2017-ci ilin yayından “Everton”un formasını geyinən qolkiper İngiltərə millisinin heyətində iki dəfə Avropa çempionatının gümüş medalını da qazanıb (2020, 2024).

Qeyd edək ki, Piter Şilton 1982, 1986 və 1990-cı illər dünya çempionatlarında iştirak edib. O, 125 oyunla İngiltərə millisinin tarixində ən çox oyun keçirən futbolçudur.

Harri Keyn üçün isə DÇ-2026 karyerasında üçüncü mundialdır. O, həmçinin İngiltərə millisinin tarixində 85 qolla ən məhsuldar futbolçu rekordunun sahibidir.

İngiltərə millisinin baş məşqçisi Tomas Tuxel DÇ-2026-nın 1/4 finalında Norveç yığmasına qarşı keçirdikləri oyundan sonra fikirlərini paylaşıb.

Arena.az xəbər verir ki, o, rəqib üzərində qazandıqları 2:1 hesablı qələbədən sonra komandasının oyunundan narazı qaldığını bildirib.

Alman mütəxəssis nəticənin sevindirici olduğunu desə də, futbolçularının çıxışını sərt tənqid edib:

“Heç vaxt deməmişdim ki, bu oyunda əziyyət çəkməli olacağıq. Bu gün həyatı özümüz üçün çox, çox çətinləşdirdik. Nəticə fantastikdir. Yarımfinala yüksəlmişik və bu, möhtəşəmdir. Amma oyunumuzdan razı deyiləm. Heç bir baxımdan.

Komandada əzmkarlıq var idi, lakin oynadığımız futbol səbəbindən problemləri özümüz yaratdıq. Çox sayda texniki səhvlər etdik, diqqətsiz davrandıq, topu kifayət qədər sürətli hərəkət etdirmədik və oyunumuzda ardıcıllıq yox idi. Bu gün bir qədər bəxtimiz gətirdi”.

Tomas Tuxel bunun psixoloji problemlərlə bağlı olmadığını vurğulayıb:

“Bilmirəm, bunun psixologiya ilə əlaqəsi var, ya yox. Məncə, məsələ bunda deyil. Xarakter baxımından komandada problem yoxdur. Hətta o qədər güclüdür ki, onu qablaşdırıb satmaq olar. Problem oyun keyfiyyətindədir. Daha yaxşı oynamalıyıq”.

Tuxel bir neçə futbolçunun çıxışını xüsusi qeyd edib:

“Ris Ceyms möhtəşəm oynadı. Morqan Rocers fantastik oyun keçirdi. Ebereçi Eze və Cəd Spens də matç ərzində performanslarını artırdılar. Onların hamısını təbrik edirəm. Amma ümumilikdə bu gün bəxt bizim tərəfdə idi”.

Alman mütəxəssis Cud Bellingemin performansına da toxunub:

“Bellinqem haqqında danışmağa ehtiyac yoxdur. O, bunu hər oyunda edir. Dünya səviyyəli futbolçudur”.

Sonda baş məşqçi komandanın inkişaf etməli olduğunu bildirib:

“Biz daha yaxşı olacağıq. Buna məcburuq. Amma indi bu uğuru qeyd etməli və anın dadını çıxarmalıyıq. Qarşıda üç günümüz var və bütün gücümüzə ehtiyac duyacağıq”.

Solbakken: “Braziliya ilə oyunda bəxt bizim tərəfdə idi, bu gün isə yox”

Norveç millisinin baş məşqçisi Stol Solbakken isə İngiltərəyə 1:2 hesablı məğlubiyyətdən sonra futbolçularına görə təəssüfləndiyini deyib:

“Uşaqlara görə çox üzülürəm. Amma yüksək səviyyəli idman bəzən belə amansız olur. Braziliya ilə oyunda bəxt bizim tərəfdə idi, bu gün isə yox. Bu dəfə şans bizdən üz döndərdi və bir çox məqam əleyhimizə işlədi.

İlk 20 dəqiqədə yaşadığımız çətinliklərdən sonra futbolçularımı tərifləməyə bilmərəm. Amma nəticə budur…”, – deyə göz yaşlarını saxlamaqda çətinlik çəkən Solbakken bildirib.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün 1/4 final mərhələsinin növbəti qarşılaşması baş tutub.

Üçüncü yarımfinalçının adına Norveç – İngiltərə oyununda aydınlıq gəlib. Mayami şəhərində (Florida, ABŞ) təşkil edilmiş bu matç ingilislərin çətin qələbəsiylə yekunlaşıb.

Maçtın əsas vaxtı 1:1 hesablı heç-heçə ilə yekunlaşıb. Qalib hər biri 15 dəqiqədən ibarət əlavə hissələrdə müəyyənləşib. İngilislərin heyətində Cud Bellingem dubla imza atıb. Skandinaviyalıların tək qolu isə Andreas Şelderupdan gəlib.

Qeyd edək ki, İngiltərə seçməsi yarımfinalda Argentina – İsveçrə cütünün qalibi ilə qarşılaşacaq. Bu oyun da yaxın saatlarda start götürəcək.

DÇ-2026
1/4 final
12 iyul

Norveç – İngiltərə 1:2
Qollar: Anderas Şelderup, 36 – Cud Bellingem, 45+2; 93.

Futbol üzrə Cənubi Afrika milli komandasının və bu ölkənin “Mamelodi Sandauns” klubunun yarımmüdafiəçisi Ceyden Adams 25 yaşında vəfat edib.

Arena.az xəbər verir ki, bu barədə “Soccer Laduma” portalı məlumat yayıb. Futbolçunun ölüm səbəbi açıqlanmayıb.

Ceyden Adams 2025-ci ildə “Mamelodi Sandauns”a transfer olunmuşdu. O, klubun heyətində 27 oyuna çıxaraq 4 qol vurmuşdu. Bundan əvvəl isə futbolçu beş mövsüm Cənubi Afrikanın “Stellenboş” klubunda çıxış etmişdi.

Yarımmüdafiəçi 2025/2026-cı illər mövsümündə “Mamelodi Sandauns”la birlikdə Afrika Çempionlar Liqasının qalibi olmuşdu.

Cənubi Afrika millisində 9 oyun keçirmiş və 1 qolla yadda qalmış Adams DÇ-2026-da komandasının qrup mərhələsində keçirdiyi hər üç matçda meydana çıxmışdı. O, turnirin 1/16 finalında Kanada ilə keçirilən və 0:1 hesabı ilə uduzduqları qarşılaşmada isə iştirak etməmişdi.

DÇ-2026-nın İngiltərə və Norveç yığmaları arasında keçirilməsi planlaşdırılan 1/4 final oyunu daha gec vaxta təxirə salına bilər.

Arena.az bu barədə Britaniya mətbuatına istinadən xəbər verir.

Bildirilir ki, iyulun 12-də Mayamidə (Florida, ABŞ) keçirilməsi nəzərdə tutulmuş oyunun əlverişsiz hava şəraiti səbəbindən daha gec vaxta təxirə salınması gündəmdədir.

Görüşün nəzərdə tutulan vaxtda başlamasına ekstremal istilər və yüksək rütubət mane ola bilər. Sinoptiklər havanın faktiki temperaturunun 34 dərəcə, hiss olunan temperaturun isə 43 dərəcəyə çatacağını proqnozlaşdırırlar. Bundan əlavə, ildırımlı leysan ehtimalı da yüksək qiymətləndirilir.

FIFA-nın qaydalarına əsasən, ildırım təhlükəsi yarandığı halda matçın başlanması və ya davam etdirilməsi təhlükəsizlik məqsədilə ən azı 30 dəqiqə təxirə salına bilər.

Hələlik qarşılaşmanın vaxtının dəyişdirilməsi ilə bağlı rəsmi qərar verilməyib.

Xatırladaq ki, DÇ-2026-ya iyulun 19-da yekun vurulacaq.

Futbol üzrə İspaniya milli komandasının qapıçısı Unai Simonun dünya çempionatları tarixindəki rekord “quru” seriyasına son qoyulub.

Arena.az xəbər verir ki, onun bu uğurlu seriyasında Belçika millisi son qoyub.

Belçika yığması DÇ-2026-nın 1/4 finalında İspaniya millisi ilə oyunda 1:2 hesabıyla uduzaraq mübarizəni dayandırıb. Amma Şarl De Ketelarenin matçın 41-ci dəqiqəsində vurduğu qol ispan qolkiperin qol buraxmadan keçirdiyi seriyanı 649 dəqiqədə dayandırıb. Həmin qol hesabı 1:1-ə çatdırıb.

Beləliklə, Simon dünya çempionatları tarixində ən uzun qol buraxmama seriyasının müəllifi olub. Əvvəlki rekord 1990-cı il mundialında 517 dəqiqə qol buraxmayan İtaliya millisinin keçmiş qapıçısı Valter Zenqaya məxsus idi.

29 yaşlı qolkiper seriyasına DÇ-2022-nin qrup mərhələsinin son 39 dəqiqəsindən başlayaraq həmin turnirin Mərakeşlə 1/8 final matçında (əsas və əlavə vaxt – 0:0, penaltilər – məğlubiyyət) və DÇ-2026-da keçirdiyi ilk beş oyunda qapısını toxunulmaz saxlamaqla nail olmuşdu.

Qeyd edək ki, bundan əvvəl Unai Simon bir dünya çempionatında 5 “quru” oyun keçirməklə də Valter Zenqanın rekordunu təkrarlamışdı.

2018-ci ildən Bilbao “Atletik”inin formasını geyinən Unai Simonun klub karyerasında əsas uğurları da məhz bu komanda ilə bağlıdır. Simon bu komanda ilə İspaniya Kubokunu (2024) və İspaniya Super Kubokunu (2021) qazanıb. Təcrübəli qolkiper İspaniya millisi ilə də AÇ-2024-ün və UEFA Millətlər Liqasının (2022/2023) qalibi olub.

Belçika millisinin qapıçısı Tibo Kurtua dünya çempionatları tarixində ən çox oyun keçirən qapıçılar sırasında ikinci pilləyə yüksəlib.

Arena.az xəbər verir ki, 34 yaşlı qolkiper DÇ-2026-nın 1/4 final mərhələsində İspaniyaya qarşı matça start heyətində çıxmaqla mundiallardakı 21-ci oyununu keçirib.

Bununla da Kurtua bu göstəricidə Fransa millisinin sabiq qapıçısı Uqo Lyorisi (20 oyun) geridə qoyaraq təkbaşına ikinci pilləyə yüksəlib. Rekord isə Almaniya millisinin heyətində dünya çempionu olmuş Manuel Noyerə məxsusdur. Təcrübəli qolkiper dünya çempionatlarında ümumilikdə 23 oyunda meydana çıxıb.

Tibo Kurtua 2018-ci ildən Madrid “Real”ının formasını geyinir. O, “kral klubu” ilə üç dəfə İspaniya çempionu, iki dəfə UEFA Çempionlar Liqasının, UEFA Super Kubokunun və İspaniya Super Kubokunun qalibi olub. Bundan əlavə, bir dəfə İspaniya Kubokunu, klublararası dünya çempionatını və Qitələrarası Kuboku qazanıb.

Belçikalı qapıçı karyerası ərzində “Genk”, “Çelsi” və Madrid “Atletiko”sunda da çıxış edib. O, Belçika millisinin heyətində 2018-ci il dünya çempionatının bürünc medalını qazanıb.

Belçika millisinin baş məşqçisi Rudi Qarsiya DÇ-2026-nın 1/4 finalında İspaniyaya 1:2 hesabı ilə uduzduqları oyundan sonra fikirlərini bölüşüb.

Arena.az xəbər verir ki, təcrübəli mütəxəssis komandasının ciddi itkilərlə üzləşdiyini vurğulayıb:

“Təbii ki, bəxtimiz gətirmədi. Yuri Tilemans start heyətində meydana çıxa bilmədi, Tibo Kurtua zədələndi, Kevin de Bröyne isə matçı sona çatdıra bilmədi. Buna baxmayaraq, oyunda qaldıq və görüşü əlavə vaxta daşımağa ümid edirdik.

İspaniya ilə bərabər səviyyədə mübarizə apardıq və onları tərəddüd etməyə məcbur etdik. Lakin belə oyunların taleyini xırda detallar həll edir. Səhv etmək və rəqibə hədiyyə vermək olmaz. Təəssüf ki, gənc futbolçularımızdan biri belə bir səhvə yol verdi.

Bununla belə, komandamla qürur duyuram. Dünya çempionatında Belçikanın böyük futbol ölkəsi olduğunu göstərdik.

Ümid edirəm ki, ölkəyə yenidən xəyal qurmaq imkanı verdik və artıq bütün belçikalılar millinin arxasında dayanır. Komandada işləməyə başlayanda əsas məqsədlərimdən biri də bu idi. Düşünürəm ki, buna nail olduq və bunun davam edəcəyinə inanıram”, deyə Rudi Qarsiya vurğulayıb.

İspaniya millisinin baş məşqçisi Luis de la Fuente isə Belçika üzərindəki 2:1 hesablı qələbədən sonra yarımfinalda Fransa ilə keçiriləcək qarşılaşma barədə danışıb:

“Hər şey bu komandanın xarakteri ilə bağlıdır. Belə məqsədyönlü və daim inkişaf etməyə çalışan futbolçularla işləmək mənim üçün böyük şərəfdir.

Fransaya qalib gələ biləcəyimizi düşünmək üçün əsasımız var. Bunun üçün ciddi çalışacağıq. Biz Fransanı iki dəfə məğlub etməyi bacaran yeganə milliyik. Qarşıda iki böyük komandanın mübarizəsi var”.

Belçika millisinin aparıcı futbolçuları Yuri Tilemans və Tibo Kurtua DÇ-2026-nın 1/4 finalında İspaniyaya qarşı keçirilən oyunda zədələniblər.

Arena.az xəbər verir ki, komandanın kapitanı Yuri Tilemans qarşılaşma başlamazdan əvvəl isinmə zamanı zədə alıb.

Nəticədə o, start heyətindən çıxarılıb və onun yerinə Hans Vanaken meydana buraxılıb.

Turnirdə keçirdiyi beş oyunda iki qol vuran Tilemansın zədəsinin ağırlığı ilə bağlı hələlik rəsmi məlumat verilməyib.

Belçika millisi oyun ərzində daha bir ciddi itki ilə üzləşib. Təcrübəli qapıçı Tibo Kurtua ikinci hissədə aldığı zədə səbəbindən görüşü davam etdirə bilməyib.

71-ci dəqiqədə onu Senne Lammens əvəzləyib. Dəyişiklikdən sonra Kurtuanın göz yaşlarını saxlaya bilməməsi diqqət çəkib.

34 yaşlı qolkiper 2018-ci ildən Madrid “Real”ının formasını geyinir. O, İspaniya klubu ilə üç dəfə La Liqanın, iki dəfə UEFA Çempionlar Liqasının qalibi olub. Kurtua həmçinin Belçika millisinin heyətində 2018-ci il dünya çempionatının bürünc medalını qazanıb.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün 1/4 final mərhələsinin növbəti qarşılaşması baş tutub.

İkinci yarımfinalçının adına İspaniya – Belçika oyununda aydınlıq gəlib. Los Anceles şəhərində (Kaliforniya, ABŞ) təşkil edilmiş bu matç ispanların çətin qələbəsiylə yekunlaşıb.

Oyunda hesabı ispanlar açıblar. 30-cu dəqiqədə Fabian Ruis fərqlənib. 41-ci dəqiqədə Şarl de Ketelare başla dəqiq oynayaraq hesabı bərabərləşdirib. 88-ci dəqiqədə isə Mikel Merino fərqlənib və ispanları yarımfinala daşıyıb – 2:1.

İspaniya millisi yarımfinalda Fransa yığması ilə qarşılaşacaq.

Digər yarımfinalçıların adına iyulun 12-də keçiriləcək Norveç – İngiltərə və Argentina – İsveçrə görüşlərində aydınlıq gələcək.

DÇ-2026
1/4 final
10 iyul

İspaniya – Belçika 2:1
Qollar: Fabian Ruis, 30. Mikel Merino, 88 – Şarl de Ketelare, 31.

ABŞ, Kanada və Meksikanın birgə ev sahibliyi etdiyi dünya çempionatında (DÇ-2026) penaltilərin dəqiqliyi ilə bağlı tarixi antirekord qeydə alınıb.

Arena.az xəbər verir ki, bu barədə “Opta” məlumat yayıb.

Məlumata görə, turnirdə əsas vaxt və oyundansonrakı penaltilər seriyası da daxil olmaqla yerinə yetirilmiş 60 onbirmetrlik zərbədən cəmi 39-u qolla nəticələnib. Bu, son 60 ildə aparılan statistikaya əsasən dünya çempionatları tarixində ən aşağı göstəricidir.

Bu mundialda penaltidən yararlana bilməyən futbolçular arasında Fransa millisinin hücumçusu Kilian Mbappe və Argentina yığmasının kapitanı Lionel Messi də yer alır.

Messi isə daha bir göstərici ilə tarixə düşüb. O, eyni dünya çempionatı ərzində iki dəfə penalti qaçırmış ilk futbolçu olub.

Statistikaya əsasən, ən ciddi problemlər oyundansonrakı penaltilər seriyalarında yaşanıb. Belə ki, Mərakeşlə Niderland arasında keçirilmiş 1/16 final qarşılaşmasının penaltilər seriyasında futbolçular 10 zərbədən cəmi 5-ni dəqiq yerinə yetirə biliblər.

Xatırladaq ki, DÇ-2026-ya iyulun 19-da yekun vurulacaq.

Fransa millisinin hücumçuları Kilian Mbappe və Usman Dembele dünya çempionatında 24 il əvvəl qeydə alınmış nailiyyəti təkrarlayıblar.

Arena.az xəbər verir ki, DÇ-2026-nın 1/4 finalında Mərakeşi 2:0 hesabı ilə məğlub etmiş Fransa yığmasının hər iki qolunu məhz Mbappe və Dembele vurub.

Bununla da Mbappe turnirdəki qol sayını 8-ə, Dembele isə 5-ə çatdırıb. Nəticədə Fransa millisi 2002-ci ildən bəri heyətində eyni dünya çempionatında ən azı 5 qol vuran iki futbolçuya sahib olan ilk komanda olub.

Sonuncu dəfə bu göstəriciyə 2002-ci il dünya çempionatında Braziliya millisi nail olmuşdu. Həmin mundialda Ronaldo 8, Rivaldo isə 5 qol vurmuşdu.

Qeyd edək ki, Kilian Mbappe hazırda DÇ-2026-nın bombardirlər siyahısına da şərikli liderlik edir. Fransa millisinin kapitanı Argentina yığmasının hücumçusu Lionel Messi ilə birlikdə 8 qola malikdir.

Oyundan sonra Mbappe ilk hissədə yerinə yetirə bilmədiyi penalti zərbəsinin səbəbini də açıqlayıb:

“Çox çətin vəziyyət idi. Hakim əvvəlcə penalti təyin etdi və mən zərbəyə hazırlaşmağa başladım. Sonra isə epizodun VAR-da yoxlanılacağını bildirdi. Bu, diqqətimi tamamilə yayındırdı, çünki əvvəllər belə vəziyyətlə heç vaxt qarşılaşmamışdım”, – deyə Mbappe bildirib.

Xatırladaq ki, fransız hücumçu qaçırdığı penaltidən sonra özünü toparlayaraq bir qol vurub və bir məhsuldar ötürmə ilə komandasının 2:0 hesablı qələbəsində əsas pay sahiblərindən biri olub.

İngiltərə millisinin futbolçuları Deklan Rays və Carell Kuansa DÇ-2026-nın 1/4 final mərhələsində Norveçlə matçda iştirak edə bilməyəcəklər.

Arena.az xəbər verir ki, onlardan biri cəzalandırılıbsa, digəri xəstəlik səbəbindən düşərgədən kənarda qalıb.

Deklan Rays komandanın son məşqlərini buraxıb. Buna 27 yaşlı yarımmüdafiəçinin xəstələnməsi səbəb olub. Digər oyunçuları da infeksiyadan qorumaq məqsədi ilə oyunçu yığmadan kənarda qalıb. O, daha əvvəl nevroloji problemlər ucbatından hazırlığa qatılmamışdı.

Müdafiəçi Carell Kuansa isə DÇ-2026-nın 1/8 finalında Meksika ilə matçda (2:3) qırmızı vərəqə alması ilə əlaqədar 2 oyunluq diskvalifikasiya cəzası alıb. Kuansa Norveçlə 1/4 final matçını, eləcə də İngiltərə yığması qalib gələcəyi təqdirdə dünya birinciliyinin yarımfinal oyununu buraxacaq.

Xatırladaq ki, İngiltərə yığmasının müdafiəçisi baş hakim Əlirza Fəqaninin qərarı ilə birbaşa qırmızı vərəqə alıb. Kuansa sürüşərək müdaxilə zamanı rəqibin müdafiəçisi Xesus Qalyardonun ayağına zərbə endirib. İngiltərə Futbol Assosiasiyası öz müdafiəçisinin diskvalifikasiya qərarını şikayət etmək istəyir.

Xatırladaq ki, İngiltərə millisi dünya çempionatının 1/4 finalında Norveçlə üz-üzə gələcək. Qarşılaşma iyulun 12-də baş tutacaq.

DÇ-2026-nın 1/4 finalında Mərakeşi məğlub edərək yarımfinala çıxan Fransa millisinin baş məşqçisi Didye Deşam oyundan sonra fikirlərini bölüşüb.

Arena.az xəbər verir ki, təcrübəli mütəxəssis komandasının ardıcıl üçüncü dünya çempionatında ilk “dördlük”də yer almasını yüksək qiymətləndirib:

“Ardıcıl üçüncü dəfə dünya çempionatının yarımfinalına yüksəldik. Bu, kənardan adi və təbii görünə bilər, amma buna nail olmaq heç də asan deyil. Çətin oyun oldu, penalti epizodu da yaşandı. Mbappeyə gəlincə, onunla bağlı heç bir problem yoxdur. O, heç vaxt özünə inamını itirmir.

Kilianın topuq nahiyəsində yüngül zədəsi var idi və ağrı hiss edirdi. Manu Kone isə dizindən zərbə almışdı. Bu cür gərgin və sürətli oyunlarda belə hallar təəccüblü deyil.

Fransadakı insanların necə sevindiyini təsəvvür edirəm. Biz burada sanki öz dünyamızdayıq. Bu gün daha bir addım atdıq və yenidən son dörd komanda arasındayıq. Deməli, hələ də mübarizədəyik”, – deyə Deşam bildirib.

Mərakeş millisinin baş məşqçisi Məhəmməd Uahbi isə məğlubiyyətə baxmayaraq, komandasının inkişafını davam etdirəcəyini vurğulayıb:

“Etiraf etməliyik ki, çox güclü rəqibə qarşı oynadıq. İlk hissədə çətinlik çəkdik, Bunu penaltini dəf etdi.

İkinci hissədə həm müdafiədə daha yaxşı çıxış etdik, həm də topa daha sakit nəzarət etdik. Oyunumuz xeyli yaxşılaşdı. İlk hissədə bəzi futbolçuların nəfəsinin çatmadığı hiss olunurdu, amma eyni oyunçular fasilədən sonra daha yaxşı başladılar.

İlk qol mübahisəli epizoddan sonra vuruldu. Bəzi futbolçular əl oyunu gördükləri üçün dayanmışdılar. Əl ilə oyun var idi, amma bunun qayda pozuntusu olub-olmadığını dəqiq deyə bilmərəm. Daha sonra Mbappe fərdi keçidlə fərqləndi və qol vurdu.

Son dəqiqələr çox ağır keçdi. Amma biz inanmağa və işləməyə davam edəcəyik. Həmçinin zədələr və futbolçuların yorğun olduğu vaxtlarda seçim imkanımızın daha geniş olması üçün heyəti gücləndirməliyik.

Dayanmaq fikrində deyilik. Əlbəttə, çox məyusuq və daha artığını istəyirdik. Amma bu nəticəni qəbul etməliyik”, – deyə Uahbi bildirib.

Fransa millisinin hücumçusu Kilian Mbappe DÇ-2026-nın 1/4 finalında Mərakeşə qarşı keçirdikləri oyunda növbəti tarixi rekordlara imza atıb.

Arena.az xəbər verir ki, 27 yaşlı futbolçu 2:0 hesabıyla qalib gəldikləri bu matçda 1 qol vurub, 1 məhsuldar ötürmə verib.

Düzdür, Kilian matçın 28-ci dəqiqəsində qazandığı penaltini qola çevirə bilməyib. Onun zərbəsini Mərakeş millisinin qapıçısı Yasin Bunu dəf edib. Buna baxmayaraq, Mbappe ikinci hissədə öz sözünü deyib.

O, 60-cı dəqiqədə hesabı açaraq DÇ-2026-da 8-ci qolunu vurub və həmin anda Argentina millisinin kapitanı Lionel Messiyə çataraq turnirin bombardirləri siyahısında birinci pilləni bölüşüb. Cəmi altı dəqiqə sonra isə Usman Dembelenin qoluna məhsuldar ötürmə verərək mundialda assistlərinin sayını 3-ə çatdırıb və 8 qol, 3 assistlə DÇ-2026-nın ən məhsuldar futbolçusuna çevrilib. Messinin aktivində isə hazırda 8 qol və 1 məhsuldar ötürmə var. Bombardirlər yarışında növbəti pillədə 7 qolla norveçli Erlinq Haland qərarlaşıb.

Mərakeşlə oyundakı qolu Mbappe üçün daha bir neçə tarixi nailiyyətlə əlamətdar olub. Fransalı hücumçu dünya çempionatlarında vurduğu qolların sayını 20-yə çatdıraraq bu həddi aşan tarixdə ikinci futbolçu olub. Bu göstəricidə o, yalnız 21 qolu olan Lionel Messidən geri qalır.

Kilian Mbappe eyni zamanda dünya çempionatlarında vurduğu qələbə qollarının sayını 8-ə yüksəldərək bu göstəricidə yeni mütləq rekord müəyyənləşdirib. O, indiyədək rekordu əlində saxlayan polyak Qjeqoj Lyatonu geridə qoyub.

Fransalı forvard pley-off mərhələsində də Lionel Messinin rekordunu təkrarlayıb. Mərakeşlə görüşdən sonra onun mundialların pley-off oyunlarında məhsuldar fəaliyyətlərinin sayı 14-ə (12 qol, 2 assist) çatıb. Messinin də pley-off mərhələsində 14 məhsuldar fəaliyyəti (7 qol, 7 assist) var.

Mbappe Fransa millisində də ilkə imza atdı

Kilian Mbappe Fransa millisinin heyətində də tarixi göstəriciyə imza atıb. O, yığmada 100 məhsuldar fəaliyyət həddini aşan ilk futbolçu olub. Hazırda onun hesabında milli komandada keçirdiyi 104 oyunda 64 qol və 37 məhsuldar ötürmə var.

Mbappe dünya çempionatlarında keçirdiyi oyunların sayına görə yığmanın rekordunu təkrarlayıb. 27 yaşlı futbolçu Mərakeşə qarşı oyuna start heyətində çıxmaqla dünya çempionatlarında 20-ci matçını keçirib. Bununla da Mbappe bu göstəricidə Fransa millisinin sabiq qapıçısı Uqo Lyorisin rekorduna şərik olub. 2018-ci il dünya çempionu olmuş Lyoris yığma karyerasını DÇ-2022-dən sonra başa vurmuşdu.

Bundan başqa, Mbappe dünya çempionatları tarixində iki müxtəlif mundialda ən azı 8 qol vurmuş ilk futbolçu olub. O, 2022-ci ildə Qətərdə keçirilmiş dünya çempionatında da 8 qol vuraraq turnirin bombardiri olmuşdu. Daha əvvəl Mbappe və Messi iki müxtəlif mundialda ən azı 7 qol vurmuş ilk futbolçular kimi tarixə düşmüşdülər.

Fransa millisi növbəti mərhələdə İspaniya – Belçika cütünün qalibi ilə qarşılaşacaq.

Fransa millisinin baş məşqçisi Didye Deşam dünya çempionatlarında keçirilən oyunların sayına görə məşqçilər arasında rekorda şərik olub.

Arena.az xəbər verir ki, DÇ-2026-nın 1/4 finalında Mərakeş yığmasına qarşı keçirdikləri görüş 56 yaşlı mütəxəssisin mundiallarda 25-ci oyunu olub.

Bununla Deşam 1966–1978-ci illərdə Almaniya Federativ Respublikasının (AFR) millisini çalışdırmış Helmut Şönün rekordunu təkrarlayıb.

Fransa milli komandası yarımfinala yüksəldiyi üçün Didye Deşam növbəti görüşdə komandasını meydana çıxaracağı təqdirdə dünya çempionatları tarixində ən çox oyun keçirən baş məşqçi olacaq. Bununla da o, bu göstəricidə yeni mütləq rekorda imza atacaq.

Xatırladaq ki, Fransa millisi Mərakeş yığması ilə oyundan 2:0 hesablı qələbə ilə ayrılıb və ilk yarımfinalçı olub. Bu komanda növbəti raundda İspaniya – Belçika görüşünün qalibi ilə üz-üzə gələcək.

Futbol üzrə Fransa milli komandasının hücumçusu Kilian Mbappe DÇ-2026-nın 1/4 final mərhələsində Mərakeşə qarşı keçirdikləri oyunda zədə alıb.

Arena.az xəbər verir ki, 26 yaşlı futbolçu görüşün 77-ci dəqiqəsində zədələndiyi üçün əvəzlənib.

Madrid “Real”ına məxsus oyunçu meydanı öz ayağı ilə tərk edib və tribunadakı azarkeşləri alqışlayaraq onlara təşəkkürünü bildirib. Onun zədəsinin nə dərəcədə ciddi olduğu ətraflı müayinələrdən sonra müəyyənləşəcək. Amma böyük ehtimalla bu, ona növbəti matçda iştirak etməyə problem yaratmayacaq.

Mbappe özü də Mərakeşlə oyunda aldığı zədənin ciddi olmadığını bildirib:

“Topuğuma zərbə dəydi, amma hər şey qaydasındadır”, – deyə fransalı futbolçu M6 telekanalına açıqlamasında bildirib.

Xatırladaq ki, Fransa yığması Mərakeşlə görüşdə 2:0 hesablı qələbə qazanaraq yarımfinala yüksəlib. Mbappe bu matçda bir qol vurub, bir məhsuldar ötürmə edib, eyni zamanda qazandığı penaltini qola çevirə bilməyib. Onun 28-ci dəqiqədə yerinə yetirdiyi 11 metrlik cərimə zərbəsini Mərakeş millisinin qapıçısı Yasin Bunu dəf edib.

Kilian Mbappe hazırda Argentina millisinin kapitanı Lionel Messi ilə birlikdə DÇ-2026-nın ən sərrast futbolçusudur. Hər iki oyunçunun aktivində 8 qol var.

Fransa millisi yarımfinalda İspaniya – Belçika cütünün qalibi ilə qarşılaşacaq.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün 1/4 final mərhələsinə start verilib.

İlk yarımfinalçının adına Fransa – Mərakeş oyununda aydınlıq gəlib. Foksboro şəhərində (Massaçusets, ABŞ) təşkil edilmiş bu matç fransızların inamlı qələbəsiylə yekunlaşıb. Kilian Mbappe ilə Usman Dembelenin qolları Fransa yığmasını yarımfinala daşıyıb.

Növbəti yarımfinalçı iyulun 10-da keçiriləcək və Bakı vaxtı ilə saat 23:00-da başlayacaq İspaniya – Belçika görüşündə müəyyənləşəcək. Məhz bu cütün qalibi Fransa yığmasına rəqib olacaq.

Sonuncu yarımfinalçıların adına isə Norveç – İngiltərə və Argentina – İsveçrə görüşlərindən sonra aydınlıq gələcək.

DÇ-2026
1/4 final
9 iyul

Fransa – Mərakeş 2:0
Qollar: Kilian Mbappe, 60. Usman Dembele, 66.

İngiltərə millisinin və “Brentford”un yarımmüdafiəçisi Cordan Henderson DÇ-2026-nın 1/8 finalından sonra aldığı zədə səbəbindən əməliyyat olunub.

Arena.az xəbər verir ki, təcrübəli futbolçu bu barədə sosial şəbəkə hesabında məlumat verib.

Hadisə İngiltərənin Meksika üzərində 3:2 hesablı qələbəsindən sonra yaşanıb. Henderson komandasının 1/4 finala yüksəlməsini qeyd edərkən reklam lövhələrinin üzərindən tullanmağa çalışıb, lakin uğursuz eniş edərək biləyini sındırıb.

Futbolçu meydanı xərəkdə və oksigen maskası ilə tərk edib, daha sonra isə təcili xəstəxanaya çatdırılıb. Müayinələrdən sonra onun bilək nahiyəsindən əməliyyat olunmasına qərar verilib.

Henderson bu zədə səbəbindən dünya çempionatının qalan hissəsini buraxacaq.

36 yaşlı yarımmüdafiəçi turnirdə əsasən ehtiyat oyunçular skamyasında yer alıb. O, yalnız qrup mərhələsinin Panama ilə son oyununda (2:0) sonradan meydana daxil olub. Bununla belə, Henderson İngiltərə millisinin tarixində dörd dünya çempionatında çıxış edən ilk futbolçu kimi tarixə düşüb.

Qeyd edək ki, Cordan Henderson 2025-ci ilin yayından “Brentford”un formasını geyinir. O, karyerasının böyük hissəsini “Liverpul”da keçirərək İngiltərə çempionluğu, UEFA Çempionlar Liqası, klublararası dünya çempionatı, UEFA Super Kuboku, İngiltərə Kuboku, İngiltərə Super Kuboku və iki dəfə İngiltərə Liqa Kubokunu qazanıb.

İngiltərə millisinin heyətində isə 90 oyuna çıxmış Cordan Henderson 3 qol vurub və 11 məhsuldar ötürmə müəllifi olub.

ABŞ, Kanada və Meksikanın birgə ev sahibliyi etdiyi DÇ-2026 futbol üzrə dünya çempionatları tarixində daha bir yeni rekordla yadda qalıb.

Arena.az xəbər verir ki, İsveçrə ilə Kolumbiya yığmaları arasında keçirilən və əsas, eləcə də əlavə vaxtı 0:0 hesabı ilə başa çatan, penaltilər seriyasında isə İsveçrənin 4:3 hesablı qələbəsi ilə yekunlaşan 1/8 final görüşü turnirin əsas və əlavə vaxtında qol vurulmayan sayca səkkizinci matçı olub.

Bununla da hazırda davam edən mundial bu göstəricidə dünya çempionatlarının rekordunu yeniləyib. Əvvəlki rekord 1982, 2006, 2010, 2014 və 2022-ci illərdə keçirilmiş mundiallara məxsus idi. Həmin turnirlərin hər birində əsas və əlavə vaxtı qolsuz başa çatmış 7 qarşılaşma qeydə alınmışdı.

Qeyd edək ki, DÇ-2026 ilk dəfə 48 komandanın iştirakı ilə keçirilir. Mundiala iyulun 19-da yekun vurulacaq. Turnirin sonuncu qalibi Argentina millisidir.

Futbol üzrə Kolumbiya yığmasının yarımmüdafiəçisi Xames Rodriges milli komandada keçirdiyi oyunların sayına görə ölkə rekordunu təkrarlayıb.

Arena.az xəbər verir ki, 34 yaşlı futbolçu DÇ-2026-nın 1/8 finalında İsveçrə ilə keçirilən və əsas, həmçinin əlavə vaxtı qolsuz bərabərliklə başa çatan (penaltilər seriyasında 3:4) qarşılaşmada Kolumbiya yığmasının heyətində 131-ci matçına çıxıb.

Bununla da o, bu göstəricidə komandanın sabiq qapıçısı David Ospinanın rekorduna şərik olub. Ospina dünya çempionatı üçün heyətə daxil edilsə də, turnirdə meydana çıxmayıb.

2026-cı ilin fevralında ABŞ-nin “Minnesota” klubuna keçən Rodrigesin müqaviləsinin müddəti iyulun 1-də başa çatıb. Təcrübəli futbolçu karyerası ərzində Kolumbiya, Argentina, Portuqaliya, Fransa, İspaniya, Almaniya, İngiltərə, Qətər, Yunanıstan, Braziliya və Meksika çempionatlarında çıxış edib.

“Real”ın heyətində iki dəfə UEFA Çempionlar Liqasının, UEFA Super Kubokunun, klublararası dünya çempionatının və İspaniya çempionatının qalibi olan Rodriges, həmçinin bir dəfə İspaniya Super Kubokunu qazanıb. “Bayern”lə iki dəfə Almaniya çempionu olan yarımmüdafiəçi ölkə kubokunu da başı üzərinə qaldırıb. “Portu”nun formasında isə üç dəfə Portuqaliya çempionluğu, bir dəfə UEFA Avropa Liqası, Portuqaliya Kuboku və Super Kuboku sevinci yaşayıb.

Xames Rodriges Kolumbiya millisinin heyətində keçirdiyi 131 oyunda 31 qol vurub və 43 məhsuldar ötürmə edib. O, yığmanın bombardirlər siyahısında 36 qolla lider olan Radamel Falkaodan sonra ikinci pillədə qərarlaşıb. Rodriges 2014-cü il dünya çempionatının 6 qolla ən məhsuldar futbolçusu olub. O, həmçinin Amerika Kubokunun gümüş (2024) və bürünc (2016) mükafatçısıdır.

Futbol üzrə İsveçrə millisi DÇ-2026-nın 1/8 finalında Kolumbiyanı penaltilər seriyasında məğlub edərək (0:0, pen. 4:3) 72 illik həsrətinə son qoyub.

Arena.az xəbər verir ki, sözügedən komanda məhz 72 illik fasilədən sonra dünya çempionatının 1/4 finalına vəsiqə qazanıb.

Beləliklə, İsveçrə yığması tarixində dördüncü dəfə mundialın 1/4 final mərhələsində çıxış edəcək. Komanda daha əvvəl 1934, 1938 və 1954-cü illərdə də bu mərhələyə yüksəlib. Amma isveçrəlilərin mundiallardakı ən böyük uğuru elə 1/4 finala çıxmaqdır. Bu komanda heç vaxt yarımfinala vəsiqə qazana bilməyib.

İsveçrəlilər son üç dünya çempionatında mübarizəni ardıcıl olaraq 1/8 finalda başa vurmuşdular. DÇ-2026-da isə bu uğursuz seriyaya son qoyaraq 72 illik həsrəti bitiriblər.

İsveçrə millisi 1/4 finalda turnirin son çempionu Argentina yığması ilə üz-üzə gələcək. Argentina millisi 1/8 finalda Misir yığmasını dramatik oyunda 3:2 hesabı ilə məğlub edərək növbəti mərhələyə yüksəliblər.

Argentina millisinin kapitanı Lionel Messi DÇ-2026-nın 1/8 finalında Misir üzərindəki qələbəni komanda xarakterinin növbəti nümayişi adlandırıb.

Arena.az xəbər verir ki, 79-cu dəqiqəyədək 0:2 hesabı ilə geridə olan Argentina millisi oyunu çevirərək 3:2 hesablı qələbə sayəsində 1/4 finala yüksəlib.

Qarşılaşmanın ən yaxşı futbolçusu seçilən Messi matçdan sonra emosiyalarını bölüşüb:

“Bu komandanın bu gün etdikləri əsl dəlilikdir. Azarkeşlərin bundan həzz almağa davam etməsinə görə çox sevinirəm. Növbəti mərhələyə yüksəlmək üçün çox əziyyət çəkməli olduq. Amma bu, dünya çempionatıdır, burada hər oyun çox çətindir. Bu komanda rəqibdən və matçdan asılı olmayaraq sonadək mübarizə apardığını həmişə göstərir. Bugünkü oyun da xarakterimizin növbəti sübutu oldu. Belə bir komandanın üzvü olduğum üçün xoşbəxtəm”.

Lionel Messi oyundan sonra göz yaşlarını saxlaya bilməməsinin səbəbinə də aydınlıq gətirib. O bildirib ki, bunun milli karyerasının sona çatacağı qorxusu ilə heç bir əlaqəsi olmayıb:

“Xeyr. Bu, son oyunum ola biləcəyi fikri deyildi. Sadəcə sevinc və böyük bir rahatlıq hissi idi. Mübarizəni davam etdirmək istəyirdik və hər şeyin bu gün bitməsini istəmirdik. Göz yaşlarım matç ərzində baş verənlərə, gördüyümüz işə və bu komandanın yoluna davam etməyə layiq olduğuna görə idi. 0:2 hesabı ilə geridə olanda oynamaq heç də asan deyil. Amma mən həmişə demişəm, bu komanda heç vaxt təslim olmur”.

Qeyd edək ki, son dünya çempionu Argentina millisi 1/4 finalda İsveçrə yığması ilə qarşılaşacaq.

İsveçrə millisinin baş məşqçisi Murat Yakın DÇ-2026-nın 1/8 finalında Kolumbiya yığma komandasına qarşı keçirdikləri oyunu şərh edib.

Arena.az xəbər verir ki, o, rəqibi penaltilər seriyasında məğlub etdikləri oyundan (0:0, pen. 4:3) sonra komandasının matça hazırlıq planının tam reallaşdığını bildirib.

Təcrübəli mütəxəssis oyunun gedişatının əvvəlcədən hazırladıqları ssenari üzrə keçdiyini vurğulayıb:

“Bu oyun üçün hazırladığımız planı tam açıqlamaq istəmirəm. Amma hər şey istədiyimiz kimi alındı və ən vacibi də budur. Matçın əvvəlində təcrübəyə və düzgün yanaşmaya ehtiyacımız var idi. İkinci hissədə etdiyimiz dəyişiklik topa nəzarəti daha da artırdı. Həmçinin penaltilər seriyasında görmək istədiyimiz futbolçuları da meydana buraxa bildik. Həmişə bir planın olur. O plan işləyəndə bundan daha böyük məmnunluq duyursan. Əlbəttə, bu gün bir qədər bəxt də bizim tərəfimizdə idi, amma futbolun bir hissəsi də budur”, deyə Murat Yakın etiraf edib.

Kolumbiya millisinin baş məşqçisi Nestor Lorenso isə komandasının məğlubiyyəti haqq etmədiyini bildirib. Onun sözlərinə görə, Kolumbiya həm əsas, həm də əlavə vaxt ərzində rəqibdən daha təhlükəli çıxış etsə də, qol vurmağı bacarmayıb:

“Şübhəsiz ki, bizə çatışmayan yeganə şey qol idi. Bilirdik ki, çox qapalı və taktiki mübarizə olacaq. Buna baxmayaraq, hesab edirəm ki, 90 dəqiqə ərzində yaratdığımız epizodlara və zərbələrə görə daha artığına layiq idik”.

Lorenso bildirib ki, matçın sonlarına doğru hər iki komanda yoruldu və oyunun tempi aşağı düşdü. O, yarımmüdafiəçi Con Ariası yorğunluq və mümkün ikinci sarı vərəqə riski səbəbindən əvəzlədiyini açıqlayıb. Hücumçu Luis Suares də eyni səbəbdən meydandan çıxarılıb:

“Rəqib qapısı qarşısında 15 təhlükəli hücumumuz oldu. Bu kifayət qədər böyük göstəricidir. Belə imkanlardan istifadə etməyəndə bunun əvəzini ödəyirsən. Futbolçularımı qınaya bilmərəm. Bəzən top qapıya daxil olur, bəzən isə yox”.

ABŞ, Kanada və Meksikada təşkil edilmiş futbol üzrə dünya çempionatında (DÇ-2026) 1/4 final mərhələsinin bütün cütləri müəyyənləşib.

Arena.az xəbər verir ki, bu raundda üz-üzə gələcək bütün komandaların adlarına 1/8 finalın son oyunundan sonra aydınlıq gəlib.

Bununla da turnirin 1/4 final mərhələsinin bütün cütləri bəlli olub.

Bu mərhələdə aşağıdakı qarşılaşmalar keçiriləcək:

DÇ-2026
1/4 final mərhələsi

10 iyul
00:00. Fransa – Mərakeş
23:00. İspaniya – Belçika

12 iyul
01:00. Norveç – İngiltərə
05:00. Argentina– İsveçrə

Qeyd edək ki, tarixdə ilk dəfə 48 komandanın iştirak etdiyi dünya çempionatı iyulun 19-da başa çatacaq. Son gündə mundialın final, bundan bir gün öncə isə 3-cü yer uğrunda oyunu baş tutacaq.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün 1/8 final mərhələsinə yekun vurulub.

Sonuncu 1/4 finalçının adına İsveçrə – Kolumbiya oyununda aydınlıq gəlib. Vankuver şəhərində (Kanada) təşkil edilmiş bu matçın əsas və əlavə vaxtında qapılara qol vurulmayıb. Bu üzdən də qalibi müəyyənləşdirmək üçün penaltilər seriyasına ehtiyac duyulub. 11 metrlik zərbələri daha dəqiq yerinə yetirmiş İsveçrə milli komandası sonuncu 1/4 finalçı olub.

Beləliklə, İsveçrə yığması 1/4 final mərhələsində sonuncu dünya çempionu Argentina millisi ilə üz-üzə gələcək.

Xatırladaq ki, daha öncə Fransa, Mərakeş, İspaniya, Norveç, İngiltərə, Belçika və Argentina yığmaları da 1/4 finala vəsiqəni təmin etmişdilər.

DÇ-2026
1/8 final
8 iyul

İsveçrə – Kolumbiya 0:0 (penaltilər 4:3)

Argentina millisi DÇ-2026-nın 1/8 final mərhələsində Misir üzərində qazandığı dramatik qələbə ilə dünya çempionatları tarixinə düşüb.

Arena.az xəbər verir ki, Lionel Skaloninin rəhbərlik etdiyi komanda bu matçın 79-cu dəqiqəsinə qədər 0:2 hesabı ilə geridə olsa da, oyunun sonlarında ardıcıl üç qol vuraraq 3:2 hesablı əzmkar qələbə qazanıb.

“Opta” statistik platformasının məlumatına görə, bu, dünya çempionatları tarixində əsas vaxtda 79-cu dəqiqəyədək iki top fərqi ilə geri düşmüş komandanın qalib gəldiyi ilk matç olub.

Beləliklə, Argentina milli komandası mundiallar tarixinin ən gec geridönüşlə qazanılmış qələbəsinin müəllifi kimi rekord müəyyənləşdirib.

Xatırladaq ki, DÇ-2026-nın 1/4 final mərhələsində Argentina millisi İsveçrə – Kolumbiya cütünün qalibi ilə qarşılaşacaq.

ABŞ, Kanada və Meksikanın birgə ev sahibliyi etdikləri bu dünya çempionatına iyulun 19-da yekun vurulacaq. Bundan əvvəlki dünya çempionatında məhz Argentina milli komandası çempion olub.

Futbol üzrə Argentina millisinin baş məşqçisi Lionel Skaloni DÇ-2026-nın 1/8 final mərhələsində Misir yığmasına qarşı keçirdikləri oyunu şərh edib.

Arena.az xəbər verir ki, o, rəqib üzərində qazandıqları dramatik 3:2 hesablı qələbədən sonra emosiyalarını gizlədə bilməyib.

79-cu dəqiqəyədək 0:2 hesabı ilə geridə olan son dünya çempionu oyunun sonlarında ardıcıl üç qol vuraraq 1/4 finala yüksəlib.

“Bağışlayın, gözlərimi qaldıra bilmirəm. Hazırda məni çox güclü emosiyalar bürüyüb. Nə möhtəşəm komandadır, uşaqlar! Oyun boyunca üstünlük bizim tərəfdə idi. Qol vurmaq üçün çoxlu imkan yaratdıq. Mən də ehtiyat oyunçular skamyasında sizin kimi eyni həyəcanı yaşayıram. Komandamız heç vaxt irəli getməkdən və mübarizədən vaz keçmir. Çox kövrəlmişəm. Bu oyun bizim üçün əsl sınaq oldu. Biz məhz belə komandayıq. İşlər çətinləşəndə bütün gücümüzü ortaya qoyuruq. İnanırdıq ki, nə vaxtsa şans yaranacaq və oyunun taleyini öz xeyrimizə dəyişə biləcəyik. Hər şeyə görə təşəkkür edirəm! Məni bağışlayın, artıq getməliyəm”, – deyə Skaloni matçdan sonra bildirib.

Misir millisinin baş məşqçisi Hossam Hassan isə qarşılaşmadan sonra hakimliyi və turnirin təşkilatçılarını sərt tənqid edib. O, komandasının penalti qazanmalı olduğunu iddia edərək bəzi qərarların Argentinanın xeyrinə verildiyini bildirib:

“Fikrimcə, biz daha yaxşı oynadıq. Amma baş verənlər düzgün deyildi. Bizə ən azı iki epizodda penalti verilməli idi. Bilmirəm, niyə belə olmadı. Hesabı 3:1 edə bilərdik, amma əvəzində rəqib ikinci qolu vurdu. Bəlkə də məsələ marketinqdir. Ola bilsin ki, dünya çempionatını tanıtmaq, son çempionun yarışda qalmasını və Lionel Messinin turnirdə çıxışını davam etdirməsini istəyirlər. Buna baxmayaraq, biz üzərimizə düşəni layiqincə yerinə yetirdik.

Misir xalqına, ərəb və Afrika azarkeşlərinə demək istəyirəm ki, bəzən nə qədər çalışsan da, futboldan kənar amillər işi daha da çətinləşdirir. Mən məğlub olmağı sevmirəm, amma bu məğlubiyyət xüsusilə ədalətsiz təsir bağışladı. Futbolda oyunun və ustalığın hüdudlarından kənarda qalan məqamlar da var. Son dünya çempionuna qarşı oynayanda belə, ona hər tərəfdən dəstək verildiyi hiss olunur”.

Argentinalı hücumçu Lionel Messi DÇ-2026-da Misir üzərində 3:2 hesablı qələbədən sonra turnirin əsas ulduzu statusunu daha da möhkəmləndirib.

Arena.az xəbər verir ki, Argentina millisinin kapitanı həm fərdi statistikalarını yaxşılaşdırıb, həm də bir neçə rekord və antirekorda imza atıb.

Misirlə oyunda vurduğu qolla Messi turnirdəki hesabını 8 topa çatdıraraq bombardirlər yarışında vahid lider olub. O, 7 qolu olan Kilian Mbappe və Erlinq Halandı arxada qoyub.

Eyni zamanda, məhsuldar ötürmə müəllifi də olan argentinalının DÇ-2026-da məhsuldar hərəkətlərinin sayı 9-a (8 qol, 1 assist) yüksəlib. Bu göstəricidə o, Mbappe ilə eyni nəticəyə malikdir. Fransa millisinin hücumçusunun aktivində isə 7 qol və 2 məhsuldar ötürmə var.

Messi bir mundialda vurduğu qolların sayına görə şəxsi rekordunu da yeniləyib. O, DÇ-2022-dəki 7 qolluq göstəricisini geridə qoyaraq 8-ci dəfə fərqlənib. Bununla yanaşı, o, argentinalılar arasında bir dünya çempionatında ən çox qol vuran futbolçu rekorduna da şərik çıxıb. Bu rekord indiyədək yalnız 1930-cu il mundialında 8 qol vurmuş Gilyermo Stabileyə məxsus idi.

39 yaşlı hücumçu daha bir tarixi göstəricini də təkrarlayıb. O, mundialdakı ilk beş oyununda 8 qol vurmaqla, 1970-ci ildə bunu bacarmış alman bombardiri Gerd Müllerin 56 illik nailiyyətinə şərik olub.

Bununla yanaşı, Messi arzuolunmaz göstəriciyə də imza atıb. O, eyni dünya çempionatında iki penalti qaçıran ilk futbolçu kimi tarixə düşüb. Daha əvvəl Avstriya ilə görüşdə 11 metrlik cərimə zərbəsini dəqiq yerinə yetirə bilməyən kapitan Misirlə oyunda da penalti imkanını boşa verib.

Beləliklə, Messinin dünya çempionatlarında qaçırdığı penaltilərin sayı 4-ə çatıb ki, bu da turnir tarixinin yeni antirekordudur.

Argentina millisinin kapitanı Lionel Messi Misirlə DÇ-2026-nın 1/8 finalında yalnız komandasını növbəti mərhələyə daşımaqla kifayətlənməyib.

Arena.az xəbər verir ki, o, Misirə 3:2 hesabıyla qalib gəldikləri görüşdə həm də dünya çempionatları tarixinin bir sıra rekordlarını da yeniləyib.

39 yaşlı hücumçu mundiallarda 31-ci matçına çıxaraq kişi və qadın futbolçular da daxil olmaqla dünya çempionatları tarixində ən çox oyun keçirən futbolçu olub. Bununla o, ABŞ yığmasının sabiq futbolçusu Kristin Lillini geridə qoyub. Kişilər arasında isə Messinin ən yaxın izləyicisi mundialla vidalaşmış Kristiano Ronaldudur (27 oyun).

Messi həmçinin dünya çempionatlarının pley-off mərhələsində keçirdiyi oyunların sayını 14-ə çatdıraraq Almaniya millisinin sabiq bombardiri Miroslav Klozenin rekorduna şərik çıxıb.

Misirlə görüşdə məhsuldar ötürmə müəllifi olan argentinalı mundiallar tarixinin ən yaxşı assistenti adına da yiyələnib. Messinin aktivində artıq 9 məhsuldar ötürmə var və bu göstəricidə o, əfsanəvi həmyerlisi Dieqo Maradonanı arxada qoyub.

Daha sonra qol da vuran Messi dünya çempionatlarında qollarının sayını 21-ə yüksəldərək bombardirlik rekordunu da yeniləyib. Bununla yanaşı, o, ardıcıl doqquzuncu mundial oyununda qol vuraraq öz rekordunu inkişaf etdirib. Bu silsilə DÇ-2022-nin 1/8 final mərhələsindən davam edir.

Təcrübəli hücumçu daha bir unikal göstəriciyə imza atıb. O, mundialların pley-off mərhələsində ardıcıl altıncı matçında fərqlənən ilk futbolçu kimi tarixə düşüb. Bundan əvvəl ardıcıl beş pley-off oyununda qol vurmaq yalnız Leonidas, Dyörd Şaroşi və Vavaya nəsib olmuşdu.

Lionel Messi həmçinin 39 yaş və daha yuxarı futbolçular arasında dünya çempionatlarının pley-off mərhələsində iki qol vuran ilk oyunçu olub. O, bu göstəricidə Kristiano Ronaldo və Pepeni geridə qoyub.

Misirlə dramatik qarşılaşmada penalti qaçırmasına baxmayaraq, qol və məhsuldar ötürmə ilə yadda qalan Messi FIFA tərəfindən matçın ən yaxşı futbolçusu seçilib. Oyundan sonra isə emosiyalarını saxlaya bilməyən kapitan göz yaşlarına hakim ola bilməyib.

Amerika Birləşmiş Ştatları (ABŞ), Kanada və Meksikada təşkil edilmiş futbol üzrə sayca 23-cü dünya çempionatı (DÇ-2026) davam edir.

Arena.az xəbər verir ki, bu gün 1/8 final mərhələsinin növbəti oyunu keçirilib.

Mundialın əsas favoritlərindən olan Argentina yığması Misir millisi ilə üz-üzə gəlib. Atlanta şəhərində (Corciya, ABŞ) təşkil edilmiş bu matçda Cənubi Amerika təmsilçisi əzmkar qələbəyə sevinib.

Görüşdə ilk iki qol Misir yığma komandasından gəlib. Yasser İbrahim (15) və Mustafa Ziko (67) Afrika təmsilçisinin qollarını vurublar. Bununla belə, özündə güc toplayan Argentina seçməsi son dəqiqələrdə ardıcıl 3 dəfə rəqib qapısına yol tapmaqla qalib gəlməyi bacarıb. “Tanqoçular”un heyətində Kristian Romero (79), Lionel Messi (83) və Entso Fernandes (90+3) diqqət mərkəzinə düşüblər.

Mundialın 1/8 finalına bu gecə keçiriləcək İsveçrə – Kolumbiya (00:00) oyunları ilə yekun vurulacaq. Daha öncə Fransa, Mərakeş, İspaniya, Norveç, İngiltərə və Belçika yığmaları 1/4 finala vəsiqəni təmin ediblər.

DÇ-2026
1/8 final
7 iyul

Argentina – Misir 3:2
Qollar: Kristian Romero, 79. Lionel Messi, 83. Entso Fernandes, 90+3 – Yasser İbrahim, 15. Mustafa Ziko, 67.

1930-cu ildə keçirilmiş ilk dünya çempionatından bəri mundial oyunlarını stadionlardan izləyən azarkeşlərin ümumi sayı 50 milyona çatıb.

Arena.az bu barədə FIFA-nın yaydığı rəsmi məlumata istinadən xəbər verir.

Bildirilir, dünya çempionatları tarixinin 50 milyonuncu tamaşaçısı DÇ-2026-nın 1/8 final mərhələsində ABŞ-nin Arlinqton şəhərində keçirilən İspaniya – Portuqaliya oyununu (1:0) tribunadan izləyən Texas sakini İmmi Xan olub.

Bu görüş İmmi Xanın cari dünya çempionatında stadiondan izlədiyi 9-cu mundial matçı kimi tarixə düşüb.

Yubiley münasibətilə ona xatirə biletini İspaniya millisinin sabiq kapitanı Karles Puyol və Portuqaliya yığmasının keçmiş müdafiəçisi Pepe təqdim ediblər.

Qeyd edək ki, İspaniya – Portuqaliya qarşılaşmasını tribunadan ümumilikdə 70 649 azarkeş izləyib. Qarşılaşma ispanların 1:0 hesablı qələbəsi ilə yekunlaşıb.

Qeyd edək ki, ABŞ, Kanada və Meksikanın birgə ev sahibliyi etdiyi DÇ-2026 iyulun 19-da başa çatacaq.

Futbol üzrə Belçika milli komandasının hücumçusu Romelu Lukaku dünya çempionatları tarixində bənzəri olmayan rekorda imza atıb.

Arena.az xəbər verir ki, 33 yaşlı futbolçu buna DÇ-2026-nın 1/8 final mərhələsində ABŞ millisi üzərində 4:1 hesablı qələbə qazandıqları oyunda nail olub.

67-ci dəqiqədə meydana daxil olmuş Lukaku 90+3-cü dəqiqədə komandasının dördüncü qolunu vuraraq görüşün yekun nəticəsini müəyyənləşdirib.

Bununla da o, dünya çempionatları tarixində ehtiyat oyunçular skamyasından meydana çıxaraq dörd müxtəlif oyunda qol vuran ilk futbolçu olub. Belçikalı forvard cari mundialda bunu üç dəfə, DÇ-2014-də isə bir dəfə bacarıb.

Qeyd edək ki, ABŞ, Kanada və Meksikanın birgə ev sahibliyi etdiyi DÇ-2026 iyulun 19-da başa çatacaq.

Portuqaliya millisinin kapitanı Kristiano Ronaldo DÇ-2026-dan sonra gələcəyi barədə düşünmək üçün özünə vaxt verəcəyini açıqlayıb.

Arena.az xəbər verir ki, 41 yaşlı hücumçu mundialdan əvvəl bu turnirin karyerasındakı son dünya çempionatı olacağını bəyan etmişdi.

O, yarışdan sonra milli komandadakı və klub karyerasındakı gələcəyi barədə tələsmədən qərar verəcəyini söyləyib:

“Doğrudur, bu mənim son dünya çempionatım idi. Qalan məsələlərə gəlincə isə, düşünmək, ailəmlə vaxt keçirmək və tələsik qərarlar verməmək üçün imkanım olacaq. Bundan sonra yoluma davam edəcəyəm”, – deyə Ronaldo bildirib.

Portuqaliyalı ulduz mundialı bu cür tərk etdiyinə görə məyus olduğunu da gizlətməyib:

“Təbii ki, dünya çempionatını belə başa vurduğum üçün kədərlənirəm. Amma mətbuat konfransında da dediyim kimi, əlimdən gələni etdim və vicdanım rahatdır. Futbol belədir, futbolçunun həyatı da belədir – bəzən qalib gəlirsən, bəzən uduzursan və hər zaman yoluna davam etməlisən”.

Xatırladaq ki, Portuqaliya millisi DÇ-2026-nın 1/8 finalında İspaniyaya 0:1 hesabıyla məğlub olaraq mübarizəni dayandırıb. Bu, Ronaldonun dünya çempionatlarındakı sonuncu oyunu olub.

Qeyd edək ki, Ronaldonun Səudiyyə Ərəbistanının “Əl-Nəsr” klubu ilə müqaviləsinin müddəti daha bir il qüvvədə qalır. Beşqat “Qızıl top” sahibi karyerası ərzində UEFA Çempionlar Liqasını beş dəfə, Avropa çempionatını bir dəfə, UEFA Millətlər Liqasını isə iki dəfə qazanıb. O, həmçinin milli komandalar, Avropa çempionatları, UEFA Çempionlar Liqası və klublararası dünya çempionatları tarixinin ən məhsuldar futbolçusudur.